YI 54
Idi ewaride «yi wãrĩnu nezokʼara jipabʉra akʉza biʼia krĩchabʉra» kʼãrẽta opanʉ
«Jesura kongregasion buru» (Efesios 5:23). Idira Jesubara ʉ̃tʉ bajaneba iyi kaidupanʉrãra akʉbʉ naʉ̃ drʉade. Maʉ̃ra iyara obʉ nezokʼa abaʉdeba. Maʉ̃ «nezokʼara» jipabʉ akʉza biʼia krĩchabʉ (akʉra Mateo 24:45). Jesubara jʉrʉsi maʉ̃ nezokʼata jipabʉta akʉza biʼia krĩchabʉta iyi pʉwʉrʉta bia zokʼamarẽã, mawũãmina maʉ̃bara Jesuba zokʼabʉta obʉ. ¿Kʼai maʉ̃ra? ¿Maʉ̃ nezokʼabara sãwũã akʉbʉ dayirãra?
1. Nezokʼara jipabʉrata akʉza biʼia krĩckabʉrata, ¿kʼai maʉ̃ra?
Jeowabara nããwedara jidasi ʉ̃kʉrʉ yumakẽrãraba iyi pʉwʉrʉta zokʼamarẽã (Malaquías 2:7; Hebreos 1:1). Bari jaradaita, Jesu beida tẽã iyi kaidupanʉraba akʉza zõrãrã Jerusalénebemaba bia akʉ jʉredasida kongregasionʼra (Hechos 15:2). Idi ewadebida nãã obada kĩrãkʼa obʉ zõrãrãba (maʉ̃ra ũdukʼaʉde Zõrãrã Burubia ãba yi jʉrepanʉne) dayirã diabʉ yiko jawuredebemata akʉza kʼarebabʉ dayirãba sãwũã jaradia wãita. Naʉ̃ra «yi wãrĩnu nezokʼara jipabʉra akʉza biʼia krĩchabʉra, Nokʼobara [Jesu] yi nezokʼara zokʼa amaesi» jõma iyi debʉ ʉ̃rʉ (Mateo 24:45a). Zõrãrã Burubia ʉ̃ta wãira Daizeze jawure zareaba jidasi, maʉ̃rãra naʉ̃ drʉade beibʉrʉde Jesubawaraʉba ʉ̃tʉba eda zokʼayi.
2. ¿Kʼãrẽ yiko jawuredebemata diabʉ nezokʼa jipabʉraba akʉza biʼia krĩchabʉraba?
Jesubara jarasi nezokʼa jipabʉra «yiko diamarẽã [kristianora wuabemaraʼa] nekobari ũmadaʉde» (Mateo 24:45b). Dayi yikoara kobʉde zareabʉ kĩrãkʼa akʉza neneẽãbʉ kĩrãkʼa, Daizeze Bedʼearadebemaba mawũã kʼarebabʉ Jeowaʉ̃me kʼẽrẽpa bʼaita akʉza Jesuba zokʼada aripe oita (1 Timoteo 4:6). Zõrãrã Burubiabara maʉ̃ra yiko jawuredebemara diabʉ ãba yi jurebarideba, asambleadeba, kartaraneba akʉza bideoraneba. Maʉ̃ra jõma kʼarebabʉ Jeowa sãwũã krĩchabʉ kʼawuaita akʉza audre iyi neũdukʼawua bʼaita.
AUDRE BIʼIA KʼAWUADADRɄ
Akʉdaya kʼãrẽa nesidapanʉta «nezokʼara jipabʉra akʉza biʼia krĩchabʉra» (Zõrãrã Burubia ãba yi jʉrepanʉta).
Zõrãrã Burubiabara yiko jawuredebemata diabʉ, kʼãrẽbabʉ adewara ũrãgʼata diabʉ Jeowa ʉ̃rʉ Kʼawuabipanʉrãta naʉ̃ drʉa jõmaʉ̃nẽ.
3. Jeowa pʉwʉrʉrãra daucha bʼaibara
Jesubara nããbema kristianora jarasi iyi pʉwʉrʉ daucha zokʼadamarẽã, idi ewadebida Zõrãrã Burubiabara maʉ̃ra nekĩrãkʼa daucha zokʼapanʉ Jeowa pʉwʉrʉrata. Akʉra BIDEOTA.
Akʉra 1 Corintios 14:33, 40, mõbe naʉ̃ta panʉidua:
Naʉ̃ testoba jarabʉdebara, ¿Jeowabara kãgabʉka iyi ode panʉraba daucha odamarẽã iya jarabʉta? ¿Bʉra kʼãrẽa mawũã krĩchabʉ?
4. Nezokʼa jipabʉba akʉza biʼia krĩchabʉba jaradiabʉ sãwũã jaradia wãita
Nããbema kristianoraitara jaradia wãita audre yibiabasi. Akʉra Hechos 8:14, 25, mõbe naʉ̃ ʉ̃rʉ bedʼeaidua:
¿Siglo nããbemanera kʼairaba kʼarebapanasi jaradia wãmarẽãra?
¿Wuabemara apostoleraba Pedroʼa akʉza Juanʼa jarasidadera kʼãrẽta osida ãyara?
Zõrãrã Burubiaba opanʉnebemata jaradia wãita audre yibia Akʉra BIDEOTA.
Jesubara jaradiasi audre yibiata jaradia wãira. Akʉra Marcos 13:10, mõbe naʉ̃ta panʉidua:
¿Kʼãrẽa Zõrãrã Burubiaita arigʉ yibia jaradia wãita?
¿Kʼãrẽa kãgapanʉ Zõrãrã Burubiaba kʼarebamarẽã naʉ̃ drʉa jõmaʉ̃nẽ daucha jaradia wãnaita?
5. Nezokʼa jipabʉba akʉza biʼia krĩchabʉba daucha oita kʼarebapanʉ
Zõrãrã Burubiabara kristianora naʉ̃ drʉa jõmaʉ̃nẽbemata daucha zokʼapanʉ. ¿Maʉ̃ra sãwũã opanʉ? Akʉra sãwũã opanasita Zõrãrã Burubia nããbemaraba. Akʉra Hechos 15:1, 2, mõbe naʉ̃ta panʉidua:
Siglo nããbemanera, ¿kʼãrẽba bedʼea abarika ze ẽ basi kristianora ãyiraira?
Maʉ̃ bedʼea zroma ara oira Pabloba Bernabeʉ̃mebara, ¿kʼai kʼarebata jʉrʉsi?
Akʉra Hechos 15:12-18, 23-29, mõbe naʉ̃ ʉ̃rʉ bedʼeaidua:
Nekʼãrẽ jidai nãã Zõrãrã Burubia siglo nããbemarabara, ¿kʼãrẽta osi Daizezeba ãyita kʼãrẽbamarẽãra? (Akʉra nejuacha zake 12, 15 akʉza 28).
Akʉra Hechos 15:30, 31 akʉza 16:4, 5, mõbe naʉ̃ ʉ̃rʉ bedʼeaidua:
Nããbema kristianorãra ¿kʼãrẽta osida Zõrãrã Burubiaba ũrãgʼa diasidade?
¿Sãwũã kʼawuapanʉ Jeowaba bia akʉsita ãya mawũã ũrĩna kʼarea?
Akʉra 2 Timoteo 3:16 akʉza Santiago 1:5, mõbe naʉ̃ ʉ̃rʉ bedʼeaidua:
¿Zõrãrã Burubiaba ãya nekʼãrẽ jidai nãã kʼãrẽta opanʉ?
Ʉ̃KɄRɄBA KRĨCHAPANɄTA: «Zõrãrã Burubiaba jarabʉta opanʉbʉrʉ, yumakẽrãba jarapanʉta obʉ».
¿Bʉara kʼãrẽba ĩjãbibʉ Jesuba zokʼabʉta Zõrãrã Burubiara?
KĨRÃBEITA
Jesuba jidasi Zõrãrã Burubiara maʉ̃rãra iyabaʉ «nezokʼara jipabʉra akʉza biʼia krĩchabʉra». Naʉ̃rabara diabʉ kristianora naʉ̃ drʉa jõmaʉ̃nẽbema yiko jawuredebemata.
Panʉnadrʉ
¿Kʼaiba jidasi «nezokʼara jipabʉra akʉza biʼia krĩchabʉra»?
¿Zõrãrã Burubiabara dayirãra sãwũã kʼarebabʉ?
¿Buara ĩjãbʉka Zõrãrã Burubiara «nezokʼara jipabʉra akʉza biʼia krĩchabʉra iyabaʉta»?
JɄRɄDA AUDRE KʼAWUAITA
Akʉra Zõrãrã Burubiaba kʼãrẽta opanʉta ãyaʼa zokʼadapeadata aripe oita.
«¿Kʼãrẽta jarakĩrãkʉ Zõrãrã Burubiabara Jeowa ʉ̃rʉ Kʼawuabipanʉrãneta?» (Artikulo jw.org)
Akʉra kʼãrẽta obʉta Zõrãrã Burubiabara ãya biʼia kʼawuaita dayirã yiko jawuredebema diabʉra aripebʉta.
Zõrãrã Burubiabara, ¿sãwũã akʉpanʉ Jesuba omarẽã zokʼadara?
¿Sãwũã ũdupanʉ ãba yi jurebarimae akʉza asambleade Zõrãrã Burubiara Jeowaba zokʼabʉta?