Ʉ̃ra juwa jidapanʉrãra nãã bʉeidua Jeowaita trajaita

1, 2. (1) ¿Kʼãrẽa ʉ̃ra juwa jidapanʉrabara ĩjãibara Jeowa ʉ̃rʉ? (Salmo 37:3, 4). (2) ¿Kʼãrẽta kʼawuadai naʉ̃ artikulodera?

¿BɄRA juwa jidaita krĩchanʉmʉka? Mawũã ẽ bʉrʉ, ¿dããraba ẽka juwa jidadata? Maʉ̃ta mawũãbʉrʉ bʉara jʉ̃ãbʉbaibara sobia bʼaita ẽbẽra bʉa mejãcha kãgabʉme. Wãrĩnu bʼaira juwa jidaidera bedʼea zroma ũduseapanʉ, maʉ̃ kʼarea biʼia krĩchaibara kʼãrẽta jidaita. Maʉ̃ra bedʼea zromara bʉa sãwũã ara obʉrʉba jãrĩseabʉ sobiata mawũã ẽ bʉrʉ sobiabiyi. Jeowa ʉ̃rʉ ĩjãra, kʼãrẽ jidabʉrʉra aripe jidayi akʉza bʉ kimaʉ̃me bia wãñi adewara marara sobiabayi. Bʉa akʉ ẽ bʉrʉ Jeowaba sãwũã krĩchabʉta, bʉ kimaʉ̃me zʉbʉriaseabʉ, maʉ̃ba jãrĩseabʉ sobiata (akʉra Salmo 37:3, 4).

² Naʉ̃ artikulora bedʼeabʉmina ʉ̃ra juwa jidapanʉra ʉ̃rʉ, bedʼeadayi bedʼea zroma juwa jidapanʉraba ũdupanʉra ʉ̃rʉ akʉza akʉdayi yiza biara yumakẽrãra akʉza yuwẽrãra Daizeze Bedʼeade jarabʉdebemata. Naʉ̃ra yiza biaraba kʼarebaseabʉ dayirãba nekʼãrẽ awuara opanʉne akʉza juwa jidabʉdebida. Akʉza akʉdayi kʼãrẽta kʼawuaseabʉta idi juwa jidapanʉraneba.

¿KʼÃRẼ BEDʼEA ZROMATA ŨDUSEAPANɄ Ʉ̃RA JUWA JIDAPANɄRABARA?

3, 4. ¿Kʼãrẽ bedʼeata ũduseapanʉ ʉ̃ra juwa jidapanʉrabara?

³ Ʉ̃kʉrʉba ũrãgʼaseapanʉ juwa jidapanʉrãra wuabemara kĩrãkʼa aduʼa panamarẽã. Ʉ̃kʉrʉba akʉza yi juwa jidapanʉra yibarirabara ũrãgʼaseapanʉ ñabasea bʼai wũãwũã baradamarẽã. Neũdukʼawuaraba mawũã ẽ bʉrʉ ãyi mebẽrãba ũrãgʼaseapanʉ deta edadamarẽã akʉza nebio baradamarẽã.

⁴ Juwa jidapanʉrata jʉra kʼawua ẽ bʉrʉ ãyara mejãcha oseapanʉ debeta, maʉ̃ kʼarea ãyira mejãcha trajadaibara maʉ̃ debe pagadaita, maʉ̃ trajora ewari jãrĩseabʉ dayidoba Daizeze Bedʼea akʉita, mebẽrãbawaraʉba Daizeze Bedʼea kʼawuaita akʉza jaradia wãita. Adewara aduaseabʉ ãba yi jʉreita ʉ̃ta trajapanʉ baera akʉza plata audre erbaita, mawũã ẽ bʉrʉ ãyi trajo adua ẽ baita. Maʉ̃ kʼarea ewari aduaseabʉ audre nekʼãrẽ sobia oita Jeowaita.

5. ¿Bʉara kʼãrẽta kʼawuabʉ Klaus akʉza Marisa zadeba?

⁵ Mejãcha yiza ũdubibʉta nekʼãrẽ mejãcha erbaita jʉrʉbʉdera wãrĩnu bʼaira sobiabi ẽãta. Akʉra kʼãrẽta kʼawuasidata juwa jidapanʉraba Klaus akʉza Marisaba.b Ãyi juwa jida kʼãrãpe jʉ̃drʉbʉdadera, nããrãra mejãcha trajapanasi biʼia panaita mamina mawũãsidu sobiapana ẽ basi. Klausba jarasi: «Daibara mejãcha erpanasi nekʼãrẽra mamina neẽbasi kʼãrẽta audre oira Daizezeita. Wãrĩnu bʼaira bia ba ẽ basi akʉza krĩcha aduʼapana ẽ basi». Bʉabida kʼawuasibaibara nekʼãrẽ mejãcha erbaita jʉrʉibara wãrĩnu bʼaira sobiabi ẽãta. Maʉ̃ta mawũãbʉrʉ paerãra. Wuabemara ũrãgʼa ũrĩbʉba kʼarebaseabʉ maʉ̃ne. Nããra kʼawuadayi yumakẽrã juwa jidabʉrabara kʼãrẽta kʼawuaseabʉta nokʼo Jehosafatdeba.

NOKʼO JEHOSAFATDE KĨRÃKʼA ĨJÃRA JEOWATA

6. Proverbios 3:5, 6ba jarabʉdebara, ¿nokʼo Jehosafatbara kʼãrẽta osi bedʼea zroma ũdusidera?

⁶ Yumakẽrã juwa jidapanʉra ¿edaʉde marara krĩcha obʉka maraba nekʼãrẽ oibara kʼarea? Maʉ̃ta mawũãbʉrʉ mejãcha kʼarebaseabʉ nokʼo Jehosafat yizaba. Jehosafatʼra nokʼobasi baera akʉibarabasi pʉwʉrʉra jõma. Iyara, ¿sãwũã osi maʉ̃ne kʼãrẽ zroma oibara biʼia oita? Jehosafatbara osi iya oseabʉta, Judá pʉwʉrʉde nekʼãrẽ waebʉra ara biʼia osi bia akʉi kʼarea akʉza jʉrʉsi gorogororata, 1.160.000 (2 Crón. 17:12-19). Maʉ̃ tẽã Jehosafatbara bedʼea zromata ũdusi. Gorogorora ammonitaraba, moabitaraba akʉza yumakẽrãra Seir katumanebemaba, jarasi iyita neida oita iyi mebẽrãta akʉza pʉwʉrʉta (2 Crón. 20:1, 2). ¿Kʼãrẽta osi Jehosafatbara? Jʉrʉsi Jeowa kʼarebata. Iyara osi ũrãgʼa Proverbios 3:5, 6de jarabʉta (akʉra). Jehosafat yiwidʼida 2 Crónicas 20:5-12 bayeda jarabʉba ũdubibʉ iya kʼãrẽaba ĩjãbasita yi Zeze ʉ̃tʉbema ʉ̃rʉ. ¿Jeowabara sãwũã panʉsi Jehosafat yiwidʼibadara?

7. ¿Jeowabara sãwũã panʉsi Jehosafat yiwidʼidara?

⁷ Jeowara Jehosafat bedʼeasi lebita Jahazieldeba, Jeowaba jarasi: «Wãidua yõibarama mamina kʼãrẽ oraidua akʉza akʉidua Jeowaba mara sãwũã ẽdrʉbita» (2 Crón. 20:13-17). Ãyira mawũã yõpanasi ẽ, mamina maʉ̃ bedʼeara yumakẽrãneba ze ẽ basi awuarabʉrʉ Jeowadeba. Jehosafatbara soiduba ĩjã kʼãrãpe osi iyaʼa jaradapeadata. Jehosafat iyi pʉwʉrʉeda ãba wãsidera yõena, iyara yi yõ kʼawuapanʉratrʉ bʉ ẽ basi nããrãra, awuarabʉrʉ trãbarirata, kʼãrẽ yõbari neẽãpanʉta. Jeowabara Jehosafatʼra wãrĩnu kʼarebasi iyi nejʉrarãra makenaside (2 Crón. 20:18-23).

8. ¿Yumakẽrã juwa jidapanʉrabara kʼãrẽta kʼawuaseapanʉ Jehosafat yizadebara?

⁸ Yumakẽrã juwa jidapanʉra Jehosafatdeba kʼawuaseapanʉ. Marabara akʉibara mara mebẽrãra, maʉ̃ kʼarea zarea trajapanʉ mara mebẽrãba nesidabʉta diaita. Bedʼea zroma erbʉdera erbaseapanʉ dayidobaʉba ara oita maʉ̃ bedʼeara. Bʉyi zarea ʉ̃rʉ ĩjãikaude Jeowaʼa yiwidʼira, iya bʉta kʼarebamarẽã akʉza soidʉba yiwidʼira bʉ kimaʉ̃me. Kʼareba jʉrʉda Daizeze Bedʼea akʉbʉde, dayirã kartara akʉbʉde akʉza oita maʉ̃ne kʼawuadata. Ʉ̃kʉrʉitara biga ẽ bayi bʉa nekʼãrẽ jidabʉra Daizeze Bedʼeadeba akʉ kʼãrãpe, adewara krĩchaseapanʉ bʉra krĩcha kʼawua ẽãbʉta akʉza jaraseapanʉ plata erbaiba akʉza nekʼãrẽ edaiba kʼarebaita marara biapanaita. Mamina kĩrãbera Jehosafat yizata, iyara ĩjãbasi Jeowa ʉ̃rʉ, mawũã ũdubisi iya obʉdeba. Jeowabara maʉ̃ yumakẽrã kʼẽrẽpabʉra ama ẽ basi, iya bʉsida ama ẽ bayi (Sal. 37:28; Heb. 13:5). ¿Kʼãrẽta oseapanʉ juwa jidapanʉrabara ãyi sobiapanaita?

PROPETA ISAÍASBA IYI KIMAɄ̃MEBA ODA KĨRÃKʼA NÃÃRA BɄERA JEOWAITA TRAJAITA

9. ¿Kʼãrẽta jaraseapanʉ propeta Isaías akʉza iyi kima ʉ̃rʉra?

⁹ Propeta Isaíasba iyi kimaʉ̃meba nããra opanasi Jeowaita trajadaita. Isaíasʼra propetabasi, iyi kimasida propetabasi, mamina nekʼãrẽ awuara obasibaibara (Is. 8:1-4). Naʉ̃ra ũmera ãba trajapanasi Jeowaita, maʉ̃trʉ yibiabasi baera ãyitara. Ãyira jipa yiza biatapanʉ juwa jidapanʉraitara.

10. ¿Juwa jidapanʉrãra sãwũã kʼarebaseabʉ Daizeze Bedʼeade ʉ̃ra zei ʉ̃rʉ akʉpanʉne audre nekʼãrẽ oita Jeowaita?

¹⁰ Idi ewadebida juwa jidapanʉrabara nããra Jeowadeta oita bʉeseapanʉ, ãya nekʼãrẽ jõma opanʉne Jeowaita trajaita. Ãya ãbaʉba ʉ̃ra kʼãrẽ berabari ʉ̃rʉ akʉpanʉba audre soiduba ĩjãnañi Jeowa ʉ̃rʉ akʉza sãwũã wãrĩnu mawũã aripe berabaribʉta (Tito 1:2).c Ãya krĩchaseapanʉ ʉ̃ra zeira sãwũã ãyabida kʼarebaseabʉ aripe berabarimarẽã. Kʼarebaseapanʉ Jesuba jarada aripe berabarimarẽã, Daizeze Bedʼea naʉ̃ drʉa jõmaʉ̃nẽ jaradiaita ewarinʉmʉta jõi naweda (Mat. 24:14). Juwa jidapanʉraba akʉpanʉne ʉ̃ra zeira aripe berabarinʉmʉta maʉ̃ba kʼarebayi ãya nejõma oita Jeowaita trajaita.

PRISCILA AKɄZA ÁQUILADE KĨRÃKʼA NÃÃRA BɄERA DAIZEZE NOKʼODEBEMATA

11. ¿Kʼãrẽta osida Áquila akʉza Priscilaʉ̃meba akʉza kʼãrẽa?

¹¹ Ʉ̃ra juwa jidapanʉrabara kʼawuaseapanʉ Priscila akʉza Áquila yizadeba. Ãyira judiorabasi mamina Romane panasi. Ãyara ũrĩbarisida bedʼea biata Jesu ʉ̃rʉ, mõbe kristianobasida maʉ̃neba ʉ̃ta. Wãrĩnu bʼaira ãyira aduʼapanasi, mamina nekʼãrẽ awuara totosi nokʼo Claudioba jaraside judiorãra wãibarata Romaneba. Krĩchara maʉ̃ra kʼãrẽaba zareabasita Áquila akʉza Priscilaitara. Ãyara idubʉibarabasi ãyi badamaera, jãpe de jʉrʉibarabasi akʉza ãyi trajo karpa de obarira jãpe ededaibarabasi. ¿Ãyi mawũã berabaridadeba krĩchasidaka nããra bʉe ẽ baita Daizeze Nʼokora? Bʉa kʼawuachubaibara kʼãrẽta osidata. Ãyira Corintode Pabloʉ̃me ãba trajasida kongregasion so zarea diaita. Maʉ̃ tẽã ãyira awuru pʉwʉrʉraena wãsida, Daizeze Bedʼea jaradiaita waenabʉmae (Hech. 18:18-21; Rom. 16:3-5). Ãyira kʼãrẽaba bia berabarisidabaibara ãba.

12. ¿Kʼãrẽa juwa jidapanʉrabara bia krĩchadaibara kʼãrẽta odaita Jeowaita?

¹² Juwa jidapanʉra idibemabara Áquila akʉza Priscilade kĩrãkʼa oseapanʉ nããra bʉepanʉne Daizeze Nokʼota. Yumakẽrãta yuwẽrãʉ̃me bedʼeadaibʉrʉ ʉ̃ra zeide kʼãrẽta odaita, audre yibia maʉ̃ ʉ̃rʉ bedʼeadaita ʉ̃ra yi bedʼeapanʉne. Juwa jidapanʉrata abarika krĩchapanʉbʉrʉ ãya nekʼãrẽ abarika oita Jeowaita, mawũãra ũdudayi Jeowa jaure zareaba ãyi sãwũã kʼarebabʉta (Ecl. 4:9, 12). Akʉdayi Russell akʉza Elizabeth ʉ̃rʉ. Russellba jarabʉ: «Dai ʉ̃ra yi bedʼeapanasidera bedʼeapanasi kʼãrẽta odaita Jeowaita». Elizabethba jarabʉ: «Dai maʉ̃ ʉ̃rʉ bedʼeasidadera, bedʼeasida daiba nekʼãrẽ oita jidabʉdadera, maʉ̃ba iduaribi ẽ baita Jeowaita nekʼãrẽ odaita». Ãyira wãseabasi baera wãsida Micronesiaeda nejaradiabari waenʉmʉmae.

13. Salmo 28:7ba jarabʉdebara, ¿kʼãrẽta ũdudai Jeowa ʉ̃rʉ ĩjãipanʉbʉrʉ?

¹³ Idi juwa jidapanʉra mejãchaʉba opanʉ Russell akʉza Elizabethʼʉ̃meba oda kĩrãkʼa, nekʼãrẽ awuruta oda ẽ ewari erpanai kʼarea, audre Daizeze Bedʼea jaradiaita. Juwa jidapanʉraba krĩchapanʉne Jeowaita nekʼãrẽ odaita akʉza ãya zarea opanʉne mawũã oita, maʉ̃neba nebiata ũdupanʉ, akʉdayi Jeowaba sãwũã akʉbʉta, audre ĩjãnañi iyi ʉ̃rʉ akʉza wãrĩnu sobiapanañi (akʉra Salmo 28:7).

APOSTOL PEDRO AKɄZA IYI KIMANE KĨRÃKʼA ĨJÃNADRɄ JEOWABA JARABɄTA

14. ¿Sãwũã ũdubisi Pedrobara iyi kimaʉ̃meba ĩjãpanʉta Jeowaba bedʼea bia jarabʉta Mateo 6:25, 31-34 bayeda?

¹⁴ Juwa jidapanʉrabara mejãcha kʼawuaseapanʉ Pedrodeba akʉza yi kimaneba. 6 jedeko ʉ̃ta Jesu ũdukʼawuadadeba Pedrobara jidaibarabasi kʼãrẽta oita. Pedrora beda jʉrʉ trajabasi, mawũẽ Jesuba jaraside iyiʉ̃me ewari jõma trajaita, iya krĩchasibaibara iyi mebẽrã ʉ̃rʉra (Luc. 5:1-11). Pedrobara jidasi Jesu kʼaidu jaradia wãita, mawũãra iyara biʼia jidasi maʉ̃ra. Dayirãbara jaraseapanʉ Pedro kimara maʉ̃nera bedʼea abarika zesita iyi kimaʉ̃me. Daizeze Bedʼeabara jarabʉ Jesu jẽda piradrʉda tẽãra, Pedro kimara kʼaidu wãsita dããrabayeda (1 Cor. 9:5). Pedro kimara yiza bia kimaraitara. Pedrobara ũrãgʼa diaseabasi kristianora juwa jidapanʉrãra (1 Ped. 3:1-7). Wãrĩnu bʼaira Pedrobara iyi kimaʉ̃meba ĩjãsida Jeowabara ãyira kʼarebaibasita iyi Nokʼota nãã bʉepanʉneba (akʉra Mateo 6:25, 31-34).

15. ¿Bʉara kʼãrẽta kʼawuabʉ Tiagodeba akʉza Estherdeba?

¹⁵ Bʉta dããrababʉbʉrʉ juwa jidabʉta, ¿kʼãrẽta oseabʉ audre nekʼãrẽ oita Jeowaita? Akʉseabʉ wuabemara juwa jidapanʉraba sãwũã opanʉta. Bari jaraita akʉseabʉ artikuloraba jarabʉta «Se ofrecieron de buena gana para servir». Maʉ̃ kartaba kʼarebasi juwa jidapanʉra Brasildebemata, Tiagota akʉza Estherta, ãya jaradia wãkĩrãpanamarẽã nejaradiabarira waenʉmʉmae. Tiagoba jarabʉ: «Daiba akʉsidade kartarane, Jeowabara idipanʉra kristianora sãwũã kʼarebasita, daibida abarika akʉkĩrãpanasi Jeowaba sãwũã kʼarebabʉta daira». Ãyira Paraguayʼeda wãsida 2014deba portugue bedʼeade bedʼeabʉmae kʼarebaita. Estherba jarabʉ: «Daiʉ̃meba jipa kãga Efesios 3:20ba jarabʉta, daibara biobayeda ũdusida maʉ̃ bedʼeara wãrĩnu berabaribʉta». Apostol Pablobara jarasi maʉ̃ bedʼeadera, Jeowabara nekʼãrẽ diaita dayirãba krĩchabʉde wueta. Maʉ̃ bedʼeara wãrĩnu.

16. ¿Kʼãrẽ ũrãgʼaba kʼarebaseabʉ juwa jidapanʉra yizakerãra ãya krĩchapanʉne kʼãrẽta oita?

¹⁶ Juwa jidapanʉra yizakerabara, kʼawuaseapanʉ wuabemara juwa jidapanʉrãraba sãwũã Jeowa ʉ̃rʉ ĩjãsidata. Ʉ̃kʉrʉ juwa jidapanʉrãra dããraba Jeowaita ewari jõma trajapanʉta. Maraba kʼawuakĩrãpanʉbʉrʉ kʼãrẽta oibarata, ¿kʼãrẽa ãyaʼa krĩcha widida ẽ? Mawũã obʉdeba ũdubibʉ Jeowa ʉ̃rʉ ĩjãpanʉta (Prov. 22:17, 19). Zõrãrãbida kʼarebaseapanʉ juwa jidapanʉra yizakerãra ãya nekʼãrẽ oita krĩchadamarẽã akʉza odamarẽã.

17. ¿Kʼãrẽta berabarisi Klaus Marisaʉ̃mera akʉza kʼãrẽta kʼawuapanʉ maʉ̃neba?

¹⁷ Edaʉde dayirãba audre okĩrãbʉmina daya kãgakʉde berabari ẽ. Dayirãba erpanʉ Klaus akʉza Marisa yizata nããrabema parrapode jaradata. Ãyi poaga ũbeabade juwa jidapanʉta krĩchasida Finlandiaeda wãnaita, Finlandia sukursalde de parãnaita. Mamina ãyaʼa jarasida mamara 6 jedeko ʉ̃ta babe ẽãta. Ãyira nããrãra maʉ̃ kʼareara sopʉasida. Mamina maʉ̃ tẽãra trʉ̃sida arabe bedʼea kʼawuaita. Idira ãyira sobia jaradiapanʉ arabe bedʼeabʉmae, awuru pʉwʉrʉde. Marisaba jẽda kĩchabʉde sãwũã berabaridata jarabʉ: «Daitara zare aduʼa badata aña wãita, mõbe jipa Jeowa ʉ̃rʉ ĩjãita. Mamina mʉ̃a ũdusi Jeowaba sãwũã daiba krĩcha ẽãde kʼarebasita akʉza maʉ̃ba audre ĩjãbibʉ iyi ʉ̃rʉ». Naʉ̃ yizaba ũdubibʉ kĩrãkʼa, akʉseapanʉ sãwũã Jeowabara nebiata ũdubiseabʉta iyi ʉ̃rʉ soiduba ĩjãpanʉbʉrʉ.

18. ¿Kʼãrẽta oseapanʉ juwa jidapanʉrabara ewari jõma Jeowa ʉ̃rʉ ĩjã bʼaita?

¹⁸ Juwa jidaira Jeowaba nebiata diada (Prov. 5:18; Mat. 19:5, 6). Iya kãgabʉ juwa jidapanʉrãra sobiapanamarẽã. Juwa jidapanʉra yizakera, ¿kʼãrẽa akʉda ẽ maraba kʼãrẽta opanʉta? ¿Mayi bebʉde nejõma opanʉka bika diaita Jeowaba, ne bio diabʉ kʼarea maraʼa? Bedʼeaidua Jeowaʉ̃me mara yiwidʼibʉde, jʉrʉidua wãrĩnu Daizeze Bedʼearadebemata mara bebʉde oseabʉta akʉza ũrĩnaidua Jeowaba ũrãgʼa maraʼa diabʉta. Wãrĩnu ĩjãseabʉ mara juwa jidabʉdera sobia bʼaita, nekʼãrẽ Jeowaita oita nããra bʉepanʉbʉrʉ.