Lepanʉraba Widipanʉta
Levítico 19:16ba jarabʉ «piradrʉrãra yãrã bebʉ jãrĩta» ¿Naʉ̃ba kʼãrẽta jarakĩrãbʉ?
Jeowaba jarasi israelitaraʼa ãyira neneẽã baibarabasita. Mawũã neneẽã baita kʼarebaya naʉ̃ta zokʼasi: «Bʉ pʉwʉrʉde eda sewa nebʉrata jaraka wãrara. Piradrʉrãra yãrã bebʉta jãrĩta. Mʉ̃ra Jeowa» (Lev. 19:2, 16).
Naʉ̃ bedʼea «piradrʉrãra» ebreo bedʼeadera jarakĩrãkʉ dayi piradrʉ edaʉnʉma ẽ baita mawũã ẽ bʉrʉ yãrã kʼawa ba ẽ baita. Judio libro Levítico ʉ̃rʉ bedʼeabʉba jarasi: «Zareabʉta daya ũrĩta naʉ̃ bedʼeaba jarabʉra».
Levítivo 19:15ba jarabʉ: «Bʉa kʼawua onʉmʉne aña orara. Daucha akʉra nekʼãrẽ neẽãbʉta akʉza yi plata barabʉta. Yãrã kʼawua obʉrʉde jõma aripe ora». Maʉ̃ba ẽbẽrarã naʉ̃ ʉ̃rʉ mejãcha kʼawuabʉba krĩchapanʉ, bedʼea piradrʉrãra jarakĩrãbasita israelitaraba yãrã kʼawua onʉmʉnera aña oẽ baibarabasita. Adewara wuabemarara sewa ẽ baibarabasita ãyita nebia ũduita. Naʉ̃ bedʼeara wãrĩnu, mamina atia akʉdayi nejʉacha zake 16de jarabʉra zare ẽãta daya ũrĩta.
Nejʉacha zake 16de jarabasi israelitaraʼa sewa nebʉrata jaraka wã ẽ marẽã (Prov. 10:19; Ecl. 10:12-14; 1 Tim. 5:11-15; Sant. 3:6). Sewa jaraibara jarakĩrãbʉ kĩrĩña yãrã ʉ̃rʉ imitia bedʼeabʉta. Ẽbẽra mawũã obʉbara imitia bedʼeabʉ awuru ẽbẽra beabiseabʉmina. Mawũã berabarisi Nabot, ẽbẽrarãta zekʼãrãpe sewa nebʉrata jarasida iyi ʉ̃rʉ, maʉ̃ kʼarea mõgaraba bata beasida iya nemitia oẽ basimina (1 Rey. 21:8-13). Maʉ̃ kʼarea ẽbẽra abaʉba yãrã ʉ̃rʉ sewida jarabʉrʉdera, Levítico 19:16ba jarabʉ kĩrãkʼa piradrʉbʉ yãrã bebʉ jãrĩta.
Adewara ẽbẽra abaʉba sewa nebʉra jaraseabʉ wuabema ʉ̃rʉ jʉrabʉ baera. 1 Juan 3:15 jarabʉ: «Jõma yi mebẽrã jʉrara nebeamiara, mamina maraba kʼawuabʉ jõma nebeamiarãra ba ẽãta ewari jõmaʉ̃nẽ». Akʉza Daizezeba Levítico 19:16de jarada tẽã iya jarasi, bʉ mebẽãra soiduba jʉrarãra (Lev. 19:17).
Maʉ̃ kʼarea Levítico 19:16ba jarakĩrãbʉ, dayirãbara jipa erba ẽ baibarata krĩcha mitiara akʉza yãrã ʉ̃rʉ sewa nebʉra jara ẽ baibara. Dayirãba sewa nebʉrata jarabʉbʉrʉ wuabema ʉ̃rʉ, naʉ̃ba ũdubibʉ jʉrabʉta akʉza dayirã kristianorabara mawũã oda ẽ baibara (Mat. 12:36, 37).