ARTIKULO KʼAWUAITA 4
¿Kʼãrẽa wãpanʉ Jesu beida jẽda kĩrãbeima?
«Naʉ̃ta kʼãwũã o bʼeaudua mʉta krĩchabʉdata» (LUC. 22:19).
TRÃBI 20 Enviaste a Jesús, tu Hijo amado
KʼÃRẼTA ŨDUDAITAa
1, 2. (1) ¿Sõbede audre kĩrãbepanʉ dayirã mebẽrã beidara? (2) ¿Kʼãrẽta omarẽã zokʼasi Jesubara diamasi iyi bei nãã?
DAYIRÃ mebẽrã beibʉrʉdera poaga mejãcha berabarisidu kĩrãbepanʉ, mamina audre kĩrãbepanʉ iyi beida ewari zebʉrʉde.
2 Poagaza ẽbẽra mejãchaʉta naʉ̃ drʉa jõmaʉ̃nẽbemata ãbã yi jʉrepanʉ Jesu beida jẽda kĩrãbeita (1 Ped. 1:8). Maʉ̃ra opanʉ kĩrãbeita Jesu dayirãbari beidata akʉza mawũã ẽdrʉbisi baera dayirã nemitiadeba akʉza beideba (Mat. 20:28). Jesuba kãgabasi iyi kʼaidubemaba kĩrãbedamarẽã iyi beidata, maʉ̃ kʼarea diamasi iyi bei nãã ãba yi jʉresi iyi kʼaidubemabawara nekoita, mõbe naʉ̃ta zokʼasi: «Naʉ̃ta kʼãwũã o bʼeadua mʉta krĩchabʉdata» (Luc. 22:19).
3. ¿Kʼãrẽta kʼawuadai naʉ̃ artikulodera?
3 Ẽbẽra mejãchaʉta wãpanʉ Jesu beida jẽda kĩrãbeita, mamina maʉ̃ranebemara wiñapanʉ yi ʉ̃ta wãirara akʉza yi wuabemarãra nama egorode panañi. Naʉ̃ artikulode kʼawuadayi kʼãrẽa ʉ̃ta wãirãra akʉza udapanairãra wãpanʉta poagaza Jesu beida kĩrãbeita. Adewara kʼawuadayi kʼãrẽa yibiata dayirãra mama wãita. Nããra kʼawuadayi kʼãrẽa ʉ̃ta wãirãra Jesu beida jẽda kĩrãbeima wãpanʉ.
¿KʼÃRẼA WÃPANɄ Ʉ̃TA WÃIRARA JESU BEIDA JẼDA KĨRÃBEPANɄMARA?
4. ¿Kʼãrẽa yi ʉ̃ta wãirabara koseabʉ panʼra akʉza doseabʉ binora Jesu beida kĩrãbepanʉnera?
4 Ʉ̃ta wãirãra poagaza wãkĩrãpanʉ Jesu beida kĩrabeima pan koita akʉza bino doita. ¿Kʼãrẽa ãyara koseapanʉ panʼra akʉza doseapanʉ binora? Naʉ̃ bedʼea panʉita, kĩrãbedadrʉ Jesuba odata Paskua tẽã, iya iyi bei nãã yiko odata. Maʉ̃ne iyi kʼaidupanʉra 11bʉa diasi panta komarẽã akʉza binota domarẽã. Adewara bedʼeasi bedʼea ũme abarika zei ʉ̃rʉ: bedʼea abarika zeda yiwidʼi ʉ̃rʉ akʉza bedʼea abarika zeda Daizeze Nokʼodebemata (Luc. 22:19, 20, 28-30)b. Mawũã bedʼea abarika zedaba, Jesu kʼaidubemara iyi kʼaidubadata akʉza ʉ̃kʉrʉ kristianorata ʉ̃ta wãñi nokʼo bʼaita adewara saserdote bʼaita (Apoc. 5:10; 14:1). Yi ʉ̃ta wãira nama egorode panʉrac, pan koseabʉ akʉza bino doseabʉ Jesu beida kĩrãbepanʉne maʉ̃ bedʼea abarika zeda kʼarea.
5. ¿Kʼãrẽta kʼawuapanʉ yi ʉ̃ta wãirabara ãya nebia jʉ̃ãbʉ ʉ̃rʉra?
5 Yi ʉ̃ta wãirara Jesu beida kĩrãbepanʉma wãpanʉ krĩchaita kʼãrẽ nebia zeita jʉ̃ãi ʉ̃rʉ. Jeowabara ãyaʼa diayi nebia zromata: ãyira beikabayi adewara erbayi kakua jauredebemata, maʉ̃ra jõkabayi, ãyara Jesuʼʉ̃meba zokʼayi akʉza Jeowa kĩrãbita panañi (1 Cor. 15:51-53 1 Juan 3:2). Yi ʉ̃ta wãirabara kʼawuabʉ Jeowaba ãyi jʉrʉsita maʉ̃ nebia diaita, mamina ãyita ʉ̃ta wãkĩrãpanʉbʉrʉ kʼẽrẽpa baibara ãyi beiyeda (2 Tim. 4:7, 8). Maʉ̃ kʼarea yi ʉ̃ta wãira mejãcha sobiapanʉ (Tito 2:13). Mamina, ¿kʼãrẽta berabari nama drʉa kĩrãwãreãnẽ panaita? (Juan 10:16). Atia akʉdayi kʼãrẽa yi nama egorode panaira wãpanʉta Jesu beidata kĩrãbepanʉma.
¿KʼÃRẼA NAMA EGORODE BʼAIRARA WÃPANɄ JESU BEIDA KĨRÃBEPANɄMA?
6. Yi nama egorode bʼairara, ¿kʼãrẽa poagaza wãpanʉ Jesu beida kĩrãbepanʉma?
6 Yi nama egorode panairara wãpanʉ Jesu beida kĩrãbepanʉma akʉita, ãya pan kobe ẽ mina akʉza dobe ẽ mina. Poaga 1938de La Torre del Vigía ba jarasi, yibiata yi nama egorode panaira Jesu beida jẽda kĩrãbepanʉma wãita akʉdamarẽã mama kʼãrẽta sãwũã obʉta, adewara jarasi: «Ãyisida naʉ̃ kʼarea kʼãbãẽã sobia baibara». Ẽbẽra juwa jidapanʉba dayaʼa jarara jʉ̃ẽmarẽã, dayirã sobiayi akʉza akʉ jʉ̃ẽñi, abarika Jesu beida kĩrãbepanʉnera dayirã sobiabibʉ akʉza akʉ jʉ̃ẽñi.
7. Yi nama egorode panaibara, ¿kʼãrẽa ũrĩkĩrã Jesu beida kĩrãbepanʉne diskurso diapanʉra?
7 Yi nama egorode panaibara Jesu beida kĩrãbepanʉma wãbʉrʉdera krĩchapanʉ ãya nebia ʉ̃ra zei ʉ̃rʉ jʉ̃ãbʉta. Ãya ũrĩkĩra diskurso Jesu beida kĩrãbepanʉne jarapanʉta, mama bedʼeabʉ baera Jesuba akʉza iyi kʼaidu 144.000ba poaga 1.000 bayeda zokʼabʉrʉde kʼãrẽ nebia weita. Bari jaraita, ãyara naʉ̃ drʉara ẽjũã kĩrãwãreã babiyi adewara kʼarebayi dayirã kakuata akʉza dayita nene ẽã bamarẽã. Yi ẽbẽrarã nama egorode panaira mejãcha sobiapanʉ, krĩchabʉrʉde Isaías 35:5, 6; 65:21-23 akʉza Apocalipsis 21:3, 4 jarabʉta aripe berabari baera. Ãya krĩchabʉrʉde ẽjũã kĩrãwũãreãnẽ yi mebẽrãbawara sobia bʼaita naʉ̃ba so zarea diabʉ Daizeze ode kʼẽrẽpa bʼaita (Mat. 24:13; Gál. 6:9).
8. Adewara yi nama egorode panaira, ¿kʼãrẽa wãpanʉ Jesu beida kĩrãbepanʉmara?
8 Yi nama egorode panaibara Jesu beida kĩrãbepanʉma wãpanʉ kãgata ũdubikĩrãpanʉ baera akʉza yi ʉ̃ta wãirata wãrĩnu kʼarebakĩrãpanʉ baera. Atia kʼawuadayi kʼãrẽa Daizeze Bedʼeabara jarabʉta yi ʉ̃ta wãirata akʉza yi nama egorode panaira ãba panaibasita.
9. Zacarías 8:23de jarabʉdera, ¿yi egorode bʼairara sãwũã sentipanʉ yi ʉ̃ta wãnai kʼareara?
9 (Akʉra Zacarías 8:23). Naʉ̃ propesiaba ũdubibʉ sãwũã sentipanʉta yi nama egorode panairara yi ʉ̃ta wãira kʼarea. Naʉ̃ testode eda jarabʉ: «judio» akʉza «marabawara», naʉ̃ bedʼeabara jarakĩrãkʉ iyabaʉta, yi ʉ̃ta wãirata (Rom. 2:28, 29). Bedʼea «10 yumakẽrã bedʼea awuara awuarakachubeba», jarakĩrãbʉ nama egorode bʼairata. Ãyara zarea jidapanʉ judio wuama, naʉ̃ba jarakĩrãbʉ kʼẽrẽpapanʉta yi ʉ̃ta wãirama, adewara ãbaʉba Jeowabʉrʉ yiwidʼipanʉta, mawũã Jesu beida kĩrãbepanʉma wãpanʉba ũdubipanʉ yi ʉ̃ta wãirata kãgapanʉta.
10. ¿Sãwũã aripe berabaribʉ Ezequiel 37:15-19, 24, 25 jarabʉra?
10 (Akʉra Ezequiel 37:15-19, 24, 25). ¿Sãwũã kʼawuapanʉ naʉ̃ propesia aripe berabarisita? Yi ʉ̃ta wãirata akʉza nama egorode panairata ãba trajapanʉ baera, naʉ̃ra Jeowaba mawũã obʉ. Naʉ̃ propesiadera bedʼeabʉ bakuru ũme ʉ̃rʉ. Bakuru «Judádeta», naʉ̃ba jarakĩrãkʉ ẽbẽrarã ʉ̃ta wãi ʉ̃rʉ akʉza bakuru «Efraínʼneta»d, naʉ̃ba jarakĩrãbʉ ẽbẽrarã nama egorode bʼai ʉ̃rʉ. Maʉ̃ta Jeowaba oyi bakuru aba bamarẽã, naʉ̃ba jarakĩrãkʉ yi ʉ̃ta wãirata akʉza nama egorode bʼaita ãba panaita Daizezeba zokʼabʉ oita, maʉ̃ kʼarea poagaza ãba yi jʉrepanʉ Jesu beida jẽda kĩrãbeita (Juan 10:16).
11. Mateo 25:31-36, 40 jarabʉdebara, ¿kʼãrẽne kʼarebabʉ obejarabara yi ʉ̃ta wãira?
11 (Akʉra Mateo 25:31-36, 40). Naʉ̃ testode jarabʉ obeja ʉ̃rʉ, naʉ̃ba jarakĩrãbʉ ẽbẽrarã nama egorode bʼai ʉ̃rʉ. Yi nama egorode panaibara biode kʼarebabʉ yi ʉ̃ta wãirata, Daizeze Bedʼea jaradiaita naʉ̃ drʉa jõmaʉ̃nẽ (Mat. 24:14; 28:19, 20).
12, 13. ¿Sãwũã kʼarebapanʉ yi nama egorode bʼaibara yi ʉ̃ta wãirara?
12 Yi nama egorode panaibara biode kʼarebapanʉ yi ʉ̃ta wãirara Jesu beida kĩrãbei nãã jõmaʉ̃ʼa jarakapanʉne (akʉra rekuadro «¿Kʼãrẽta oibarata Jesu beida kĩrãbepanʉma wãita?»). Ʉ̃kʉrʉ kongregasione bʉ yi ʉ̃ta wãirata akʉza ʉ̃kʉrʉ kongregasionmaera neẽmina, naʉ̃ drʉa jõmaʉ̃nẽ kongregasionza kĩrãbepanʉ Jesu beidara. Yi egorode panaira mejãcha sobiapanʉ yi ʉ̃ta wãirata kʼarebapanʉ baera, ãya kʼawuapanʉ yi ʉ̃ta wãirata kʼarebabʉdera Jesuta kʼarebabʉ kĩrãkʼabʉta (Mat. 25:37-40).
13 Yi ʉ̃ta wãita mawũã ẽ bʉrʉ nama egorode bʼaita, ¿kʼãrẽa wãibara Jesu beida kĩrãbepanʉmara?
¿KʼÃRẼA JÕMAɄ̃TA WÃPANɄ?
14. ¿Jeowa Jesuʼʉ̃mebara sãwũã kãgabʉta ũdubisida dayirã?
14 Biga diakĩrãpanʉ baera Jeowa Jesuʼʉ̃meba dayirã kãga ũdubipanʉ baera. Jeowabara dayirãra mejãcha kãgabʉ, mamina iya audre kãgabʉta ũdubisi yi warra Jesuta zokʼaside dayirãbari beimarẽã (Juan 3:16). Jesubida kãgabʉta ũdubisi iyi bebʉ diakĩrãside dayirãbari (Juan 15:13). Dayirãbara mapaga ẽ Jeowa Jesuʼʉ̃meba dayirã kʼarea odara. Mamina biga diabʉta ũdubiseabʉ obʉde ãya zokʼabʉta (Col. 3:15). Jesu beida kĩrãbepanʉma wãpanʉne biga diapanʉ akʉza kãga ũdubipanʉ.
15. ¿Kʼãrẽa biga diapanʉ yi ʉ̃ta wãiraba akʉza nama egorode bʼairaba Jesuba iyi bebʉ diada kʼarea?
15 Biga diakĩrãpanʉ Jesuba ẽdrʉbisi baera (Mat. 20:28). Jesuba iyi bebʉta diasi baera yi ʉ̃ta wãirara Jeowa warrarabasi (Rom. 5:1; 8:15-17, 23). Adewara yi nama egorode panaira Jesuba iyi bebʉta diasi baera Jeowaba bia akʉyi, Jeowata orraseabʉ akʉza zʉbʉria zroma zebʉrʉdera ẽdrʉbiyi (Apoc. 7:13-15). Akʉza yi ʉ̃ta wãirata adewara nama egorode panairata poagaza Jesu beida jẽda kĩrãbepanʉma wãbʉrʉdera, biga diapanʉ Jesuba iyi bebʉta diasi baera ẽdrʉbita.
16. ¿Kʼãrẽa wãkĩrãpanʉ Jesu beida kĩrãbepanʉmara?
16 Ũrĩkĩrapanʉ baera Jesuba zokʼadata. Dayirã nama egorode bʼaita mawũã ẽ bʉrʉ yi ʉ̃ta wãita, jõmaʉ̃ba ũrĩkĩrãpanaʉ Jesuba diamasi iyi bei nãã jaradata: «Naʉ̃ta kʼãwũã oidua mʉ̃ krĩchabʉdata» (1 Cor. 11:23, 24).
¿KʼÃRẼNE KʼAREBABɄ JESU BEIDA KĨRÃBEBɄMA WÃPANɄBARA?
17. ¿Kʼãrẽa Jesu beida kĩrãbepanʉma wãibara Jeowa kʼawa babibʉ?
17 Naʉ̃ba Jeowa kʼawa babibʉ baera (Sant. 4:8). Jesu beida kĩrãbepanʉma wãbʉbara dayirã krĩchabibʉ Jeowaba dayirã nebia diai ʉ̃rʉ, adewara iya dayirã kʼãrẽaba kãgabʉta (Jer. 29:11; 1 Juan 4:8-10). Dayirãbara kʼawuapanʉ naʉ̃ nebiara wãrĩnu zeita akʉza Jeowaba dayirã kãgabʉra jõkabaita. Mawũã krĩchapanʉbʉrʉ audre kãgadayi Jeowata akʉza iyita audre orradayi (Rom. 8:38, 39).
18. Krĩchabʉrʉde Jesuba odata, ¿kʼãrẽne kʼarebabʉrʉ dayirãra?
18 Jesude kĩrãkʼa obibʉ baera (1 Ped. 2:21). Jesu beida kĩrãbei ewari nãã kĩrãbepanʉ Daizeze Bedʼeadeba, iya kʼãrẽ odata, iyi beidata akʉza jẽda piradrʉdata. Tẽã Jesu beida jẽda kĩrãbebʉ ewaride diskursoba kĩrãbebibʉ dayirã kʼãrẽaba kãgabʉta iyara (Efes. 5:2; 1 Juan 3:16). Dayirãba lepanʉbʉrʉ Jesuba odata akʉza iya nekʼãrẽ amaenata, adewara dayirã jõmaʉ̃ta kʼarebaya iyi bebʉ diadata, naʉ̃ba kʼarebabʉ iyide kĩrãkʼa oita (1 Juan 2:6).
19. ¿Kʼãrẽta odaibara Jeowa neũdukʼawua bʼaita?
19 Kʼarebabʉ baera Jeowa neũdukʼawua bʼaita (Jud. 20, 21). Dayirãta zarea opanʉbʉrʉ Daizeze Bedʼea ũrĩta, iyi trʉ̃ neneẽã erbaita akʉza iyi so sobiabita, mawũãra iyi neũdukʼawuabayi (Prov. 27:11; Mat. 6:9; 1 Juan 5:3). Jesu beida kĩrãbepanʉma wãpanʉbʉrʉ dayirãʼa zarea diayi ũdubita Jeowaʼa iyi neũdukʼawua bakĩrãpanʉta.
20. ¿Kʼãrẽa yibiabʉ dayirãita wãita Jesu beida Jẽda kĩrãbeima?
20 Yi nama egorode bʼaita mawũã ẽ bʉrʉ yi ʉ̃ta wãita wãkĩrapanʉ Jesu beida kĩrãbepanʉmara. Adewara mama kĩrãbepanʉ baera Jesuba iyi bebʉ diasita dayirãbari akʉza kĩrãbepanʉ mawũã Jeowaba dayirãʼa kãga ũdubidata. Naʉ̃ poagadera Jesu beida jẽda kĩrãbeira odayi viernes 15 abril 2022de diamaside. Dayirãbara mejãcha kãgabʉ Jeowa akʉza Jesu, maʉ̃ kʼarea poagaza wãpanʉ Jesu beida kĩrãbepanʉma ũrĩta, naʉ̃ta dayirãita audre yibia nekʼãrẽ wuabemaraira.
TRÃBI 16 Alabemos a Jehová por su Hijo, el Ungido
a Ʉ̃ta wãita akʉza uda bʼaita jõmaʉ̃ta poagaza wãkĩrãpanʉ Jesu beida jẽda kĩrãbeita. Naʉ̃ artikulode kʼawuayi, kʼãrẽa Daizeze Bedʼeaba jarabʉ wãibarata akʉza sãwũã kʼarebabʉta.
b Bʉa audre kʼawuakĩrãbʉbʉrʉ bedʼea abarika zeda yiwidʼi ʉ̃rʉ akʉza bedʼea abarika zeda Daizeze Nokʼodebema ʉ̃rʉ akʉra “Llegarán a ser ‘un reino de sacerdotesʼ”, en La Atalaya del 15 de octubre de 2014, pagina 15-17 bayeda.
c KʼÃRẼTA JARAKĨRÃKɄ: Yi ʉ̃ta wãira wabida nama egorode panʉra trʉ̃gapanʉ resto ungido.
d Ezequiel 37de bedʼeabʉ propesia bakuru ũme ʉ̃rʉ. Bʉa audre kʼawuakĩrãbʉbʉrʉ akʉra libro La adoración pura de Jehová: ¡por fin restaurada!, pagina 130-135 bayeda, parrapo 3-17 bayeda.