Ewarita bia zokʼadadrʉ

1. ¿Kʼãrẽta odaibara Jeowa neũdukʼawuabaira?

DAYIRÃ jõmaʉ̃ta daya kãgabʉ ẽbẽraʉ̃mera ãba bakĩrãbʉ, ¿bʉmabida? Bari jaraita yi juwa jidapanʉra ãba sobiapanʉ yi kimaʉ̃me, yi dobabʉra iyi neũdukʼawuaʉ̃me ãba sobiapanʉ akʉza dayirã jõmaʉ̃ta Daizezeʉ̃me bakĩrãbʉ. Mamina dayirãba ũdu e bʉrʉ, ¿sãwũã iyi neũdukʼawuabai? Kĩrã ũbeabʉ: yiwidiʼbʉde, Daizeze Bedʼeata lebʉde akʉza krĩchabʉde iya kʼãrẽ oi ʉ̃rʉ adewara iyi sode nebia erbʉ ʉ̃rʉ. Adewara lebʉde Daizeze Bedʼeata mejãcha sobiapanʉ Jeowara dayirã neudukʼawua baira (Sal. 139:17).

2. ¿Kʼãrẽa zareabʉ Jeowaita ewari jʉrʉira?

² Dayirã ewari jõmaʉ̃nẽ Jeowaʉ̃me bakĩrãbʉmina edaʉde zare. Dayirã nekʼãrẽ mejãcha oibara baera edaʉde ewari neẽ Daizezedebema oita. Bari jaraita, trajo kʼarea, dayi mebẽrã akʉi kʼarea. Naʉ̃ba krĩchabiseabʉ ewari neẽãta Jeowa yiwidʼita, iyi ʉ̃rʉ krĩchaita akʉza iyi ʉ̃rʉ kʼawuaita.

3. ¿Kʼãrẽba ewari aduabiseabʉ Jeowade oibadara?

³ Bʉ daya nekʼãrẽ kʼawua ẽã nʉmʉne ewari aduabiseabʉta maʉ̃ra kayirua ẽ mina jõmaʉ̃ta enaʉ̃kĩrã, mamina jʉra kʼawuabaibara dayi jemenenʉmʉba ewari aduabiseabʉ ewari Jeowaita jʉrʉibadara. Maʉ̃ kʼarea dayirãbara biʼia akʉibara kʼãrẽaba jemenebʉta (Prov. 25:27; 1 Tim. 4:8).

4. ¿Kʼãrẽta kʼawuadai naʉ̃ artikulodera?

⁴ Naʉ̃ artikulode kʼawuadayi kʼãrẽa krĩchaibarata, saʉ̃ta audre yibiata dayirãita akʉza kʼawuadayi sãwũã ewari bia zokʼaseabʉta audre Jeowa kʼawa bʼaita, adewara naʉ̃ba sãwũã kʼarebaita.

BIʼIA KRĨCHADADRɄ SAɄ̃TA AUDRE YIBIATA DAYIRÃITA

5. ¿Sãwũã kʼarebaseabʉ Efesios 5:15-17bara warraraba kʼawuaita saʉ̃ ota audre yibiata?

⁵ O biata jʉrʉdadrʉ. Idi ewadera warrarãra biode krĩcha opanʉ kʼawua ẽ baera saʉ̃ ota jidaita. Yibarira Jeowa ʉ̃rʉ Kʼawuabipanʉrã ẽ baera jarapanʉ unibersidade estudiamarẽã, mamina ãya kʼawuapanʉ mawũã estudiara ewari neẽ baita. Mamina yibariraba akʉza mebẽrã kongregasionebemaba jaraseapanʉ audre trajamarẽã Jeowaita. Mawũẽra, ¿kʼãrẽba kʼarebaseabʉ warrara Jeowa kãgabʉra o bia jidaita? (Akʉra) Efesios 5:15-17 bayeda jarabʉta akʉza biʼia krĩchaseabʉ kʼãrẽ ʉ̃rʉ jarabʉta, maʉ̃ tẽã bʉyikʉza widiseabʉ: «¿Kʼãrẽta kãgabʉ Jeowabara mʉ̃ita? ¿Jeowabara mʉ̃a kʼãrẽta omarẽã kãgabʉ? ¿Kʼãrẽba kʼarebai mʉ̃a Jeowaita audre ewari erbaita?». Kĩrãbedadrʉ «naʉ̃ ewarira kayiruadebʉta» Diaru juwa edrebʉ baera, mamina aranʉ Jeowaba jõma jõbiyi. Maʉ̃ kʼarea jʉrʉibara nekʼãrẽ Jeowa sobiabibʉta.

6. ¿Kʼãrẽta osi Maríabara akʉza kʼãrẽa yibiabasi?

⁶ Kʼawuara saʉ̃ta nããra bʉeibarata. Bia kʼawuabaibara saʉ̃ta nããra bʉebarata, dayirãba nekʼãrẽ oira mejãcha erbʉmina edaʉde aba jidaibara dayirãba ewari erbaita. Jesuba María akʉza Marta akʉ jʉ̃ẽsidera, ãyira mejãcha sobiapanasi baera bia edakĩrãpanasi Jesura, maʉ̃ kʼarea Martara yiko mejãcha wianʉmesi, mamina Maríara Jesu kʼawa jewedasi iya jaradiabada ũrĩta, Martaba kayiruata o ẽ basi, iyi neonʉmena kʼareara, mamina Jesubara jarasi. «Maríabara biata jidabʉda» (Luc. 10:38-42). Maríaba kĩrãduasibaibara maʉ̃ ewaride yiko kodara, mamina kĩrãdua ẽ basi Jesuba jaradiadara, mawũã ũdubisi Maríabara iyitara audre yibiabasita Jesuba jaradiabadata. Idi ewadebida dayirãitara audre yibiabaibara Jeowaba jaradiabʉra.

EWARI JɄRɄDADRɄ JEOWA KʼAWA BʼAITA

7. ¿Kʼãrẽ yibia Daizezeʼa yiwidʼita, Daizeze Bedʼea leita akʉza bia krĩchaita?

⁷ Kĩrãbedadrʉ dayirã yiwidʼibʉba, Daizeze Bedʼea lebʉba akʉza maʉ̃ ʉ̃rʉ bia krĩchabʉba Jeowa kʼawa babibʉta. Yiwidʼibʉde bedʼeapanʉ Daizezeʉ̃me akʉza iya mejãcha kãgabʉ dayirãra (Sal. 5:7). Daizeze Bedʼea lebʉrʉdera audre kʼawuapanʉ Daizeze ʉ̃rʉ (Prov. 2:1-5). Dayirãba biʼia krĩchabʉrʉdera akʉpanʉ Jeowaba kʼãrẽ nebia erbʉta akʉza iya kʼãrẽ nebiata kãgabʉta dayirãita. Mamina idi ewadera nekʼãrẽ mejãcha obʉba ewari neẽ baera, ¿kʼãrẽba kʼarebai daya ewari bia zokʼaita?

8. ¿Kʼãrẽta kʼawuapanʉ Jesu yizadeba?

⁸ Jʉrʉda bʉ sama aduʼa baseabʉta. Jesu doba aduʼa bʼaita wãsi drʉa ibʉawama 40 ewari bayeda (Luc. 4:1, 2). Mama yiwidʼisi akʉza bia krĩchasi yi Zezeba kʼãrẽta erbʉta iyita. Naʉ̃ba kʼarebasi bedʼea zroma erbʉde. ¿Kʼãrẽta kʼawuabʉ Jesu yizadeba? Dayi deda bio erbʉbʉrʉ mebẽrãta, edaʉde zare aduʼa kʼawuaita Daizeze Bedʼeata, mawũã berabaribʉbʉrʉ bʉ dedaʉba ãĩ wãseabʉ doba aduʼa bʼaita. Mawũã obʉ Julieba iyi Jeowaʉ̃me bedʼeakĩrãbʉde. Iyira bʉ Franciade yi kimaʉ̃me de wiña kirude, maʉ̃ kʼarea iyitara zare iyi doba aduʼa bʼaita. Iya jarabʉ: «Ewariza mʉ̃ra parkeda wãbʉ, mama doba aduaʼa baseabʉ Jeowaʉ̃me bedʼeaita».

9. Jesu nekʼãrẽ mejãcha oibarabasimina, ¿kʼãrẽta osi yi Zeze kʼawa bʼaita?

⁹ Jesura ewari jõmaʉ̃nẽ nekʼãrẽ mejãcha obasi, adewara ẽbẽrarãsida iyi kʼawapanasi ewari jõmaʉ̃nẽ. Bari jaraita Daizeze Bedʼeaba jarabʉ ewari aba pʉwʉrʉ abaʉta ãba yi jʉresida de abaʉmae Jesu ũduita. Mamina mawũãsidu Jesura ewari jʉrʉsi yi Zezeʉ̃me bʼaita. Daizeze Bedʼeaba jarabʉ Jesubara jʉrʉsita iyi doba bʼaita yi Zezeʉ̃me bedʼeaita (Mar. 1:32-35).

10, 11. Mateo 26:40, 41nera, ¿Jesubara kʼãrẽta jarasi yi kʼaidubemaraʼa, maʉ̃ tẽã ãya kʼãrẽta osi?

¹⁰ Diamasi Jesu bei nãã iyira wãsi Getsemaníma mama doba aduʼa Jeowaʼa yiwidʼi baera (Mat. 26:36). Mama ũrãgʼa biata diasi iyi kʼaidubemaraʼa yiwidʼibai ʉ̃rʉ.

¹¹ Ãyi Getsemaníma jʉ̃ẽsidera, Jesuba jarasi yi kʼaidubemara kʼãĩna ẽ marẽã mõbe iyira yiwidʼi wãsi (Mat. 26:37-39). Iyi jẽda zebʉrʉdera ũdusi yi kʼaidubemarãra kʼãĩguenʉmʉta maʉ̃ kʼarea jarasi: «Ʉ̃rʉ̃ma kʼopanadua, zhiwidʼiudua wãẽãna ẽbaita» (akʉra Mateo 26:40, 41). Jesubara kʼawuabasi ãyira mejãcha mapaebʉta, maʉ̃ kʼarea so borekea akʉsi ãyita, kʼawuabasi baera ãyira mejãcha zarea neẽãta, mawũã jarada tẽã akʉza iyira wãsi yiwidʼieda, iyi jẽda zebʉrʉdera ãyi kʼãĩnʉmʉta ũdu zesi (Mat. 26:42-45).

12. ¿Kʼãrẽta oseabʉ sopʉapanʉbʉrʉ akʉza mapaepanʉbʉrʉ yiwidʼita?

¹² Jʉrʉdadrʉ sõbede yiwidʼiseabʉta. Edaʉde dayirã mejãcha aukarabʉ baera mawũã ẽ bʉrʉ bedʼea zromata erbʉ baera yiwidʼi ẽ, ¿kʼãrẽta oseapanʉ? Ʉ̃kʉrʉ mebẽrãra yiwidʼipanasi ãyi kʼãĩ naweda, mamina ãya ũdusida naʉ̃ra biga ẽãta, ãyi yiwidʼibʉde kʼãĩbasi baera, maʉ̃ kʼarea jʉrʉsida awuru ewaride yiwidʼita ãyi aukarabʉ ẽãne. Mawũã ẽ bʉrʉ ʉ̃kʉrʉitara yibia ãyi piradrʉ yiwidʼita, sãkokode yiwidʼita akʉza jewedabida. Mamina krĩcha zroma mejãcha obʉba sentipanʉbʉrʉ yiwidʼira zareata, ¿kʼãrẽta odaibara? Jõma jarada Daizezeʼa, iya dayirã so borekea akʉbʉ baera kʼawuayi kʼãrẽa mawũã sentibʉra (Sal. 139:4).

13. ¿Estudiabʉdera sãwũã selularba nekʼãrẽ awuru ʉ̃rʉ krĩchabiseabʉ?

¹³ Estudiabʉde zarea oibara nekʼãrẽ awuru ʉ̃rʉ krĩcha ẽ baita. Jeowa neũdukʼawuabaira yiwidʼibara, wãnaibara ãba yi jʉrebarima akʉza Daizeze Bedʼeata leibara, ¿kʼãrẽta oseapanʉ Daizeze Bedʼea ʉ̃rʉ lebʉde akʉza ãba yi jʉrebarima wãbʉde nekʼãrẽ awuru ʉ̃rʉ krĩcha ẽ baita? Krĩchara kʼãrẽba nekʼãre awuru ʉ̃rʉ krĩchabiseabʉta Daizeze Bedʼea lebʉde akʉza ãba yi jʉrepanʉne dayi selularde trʉ̃bʉdade mawũã ẽ bʉrʉ dayima mensaje zebʉrʉde. Idi ewade selular erbaira biode yibia akʉza ẽbẽrarã mejãchaʉba erbʉ maʉ̃ra, mamina ẽbẽra buru biaba jarabʉ dayirã estudiabʉde, selularta kʼawa erpanʉbʉrʉ naʉ̃ba nekʼãrẽ awʉrʉ ʉ̃rʉ krĩchabiseabʉta. Akʉza jarapanʉ: «Bʉa biʼia krĩcha ẽ bʉa nekʼãrẽ onʉmʉ ʉ̃rʉ awuarabʉrʉ krĩchabʉ bʉ selularde kʼaiba trʉ̃sita, mawũã ẽ bʉrʉ kʼaiba bʉsita». Asambleadera jarapanʉ dayi selular chʉpea omarẽã wuabemaraba ũrĩnamarẽã, abarika oseapanʉ Daizeze Bedʼea lebʉde audre Jeowa kʼawa bʼaita, mawũã dayirã selularba nekʼãrẽ awuru ʉ̃rʉ krĩchabi ẽ bayi.

14. Filipenses 4:6, 7de jarabʉdera, ¿kʼãrẽta oibara Jeowaba kʼarebamarẽã nekʼãrẽ awuru ʉ̃rʉ krĩcha ẽ baita?

¹⁴ Yiwidʼidadrʉ Jeowa nekʼãrẽ awuru ʉ̃rʉ krĩcha ẽ baita. Ãba yi jʉrebʉde mawũã ẽ bʉrʉ Daizeze Bedʼea lebʉde nekʼãrẽ awuru ʉ̃rʉ krĩchanʉmʉbʉrʉ Daizezeʼa yiwidʼira kʼarebamarẽã. Mawũã dayirã bedʼea zroma erbʉde mawũã ẽ bʉrʉ sopʉabʉde kʼarebayi dayirãba nekʼãrẽ onʉmʉne biʼia krĩchaita. Yiwidʼidadrʉ Jeowa dayirã aduʼa babimarẽã akʉza biʼia krĩchabimarẽã (akʉra Filipenses 4:6, 7).

KʼÃRẼ YIBIA JEOWA KʼAWA BʼAIRA

15. ¿Kʼãrẽ nebiata ũdudai ewari jʉrʉpanʉbʉrʉ Jeowa kʼawa bʼaita?

¹⁵ Dayirãbara nebiata mejãcha ũduyi ewari jʉrʉpanʉbʉrʉ iyiʉ̃me bedʼeaita, iya jarabʉ ũrĩta akʉza iyi ʉ̃rʉ krĩchaita. Nããra, o biata jidadayi. Daizeze Bedʼeaba jarabʉ: «Yi buru biabawara ãbabʉra buru bia bayi» (Prov. 13:20). Neẽ Jeowa kĩrãkʼa audre buru biara, maʉ̃ba ewari jʉrʉpanʉbʉrʉ audre Jeowa ʉ̃rʉ kʼawuaita dayirãra audre buru bia bayi. Adewara kʼawuadayi iya kʼãrẽta kãgabʉta akʉza oda ẽ bayi iya kãga ẽãta.

16. ¿Kʼãrẽa Jeowaʉ̃me audre bedʼeabʉbʉrʉ nejaradiabari biabayi?

¹⁶ Yi ũmeta, audre nejaradiabari biabayi. Dayirãba Daizeze Bedʼea jaradiabʉrʉdera kʼarebakĩrãpanʉ ẽbẽrata Jeowa kʼawa bamarẽã, maʉ̃ba dayirãta audre Jeowaʉ̃me bedʼeapanʉbʉrʉ audre kãgadayi, mawũã zare ẽ bayi nekʼawuabariʼa jaradiaita Jeowa kãgamarẽã. Mawũã berabarisi Jesuta. Jesu yi Zeze ʉ̃rʉ bedʼeabasidera ũdubibasi soiduba mejãcha kãgata, maʉ̃ kʼarea iyi kʼaidubemarabida mejãcha kãgasida Jeowara (Juan 17:25, 26).

17. ¿Sãwũã kʼarebabʉ audre zarea ĩjãita yiwidʼiba akʉza Daizeze Bedʼeata yi dobaʉba kʼawuaiba?

¹⁷ Yi ũbeata, dayirãba ĩjãbʉra audre zareabayi. Krĩchara naʉ̃ta, dayirã yiwidʼibʉrʉde Daizezeba maʉ̃ panʉbʉrʉdera dayirãbara ĩjãbʉra audre zareabʉ (1 Juan 5:15). Adewara Daizeze Bedʼea dayi dobaʉba kʼawuabʉba audre ĩjãbibʉ. Kĩrãbedadrʉ Daizeze Bedʼeaba jarabʉta: «Aramaʉ̃nerã ũrĩbʉrʉba ĩjã bʼʉa» (Rom. 10:17). Dayirãba audre ĩjãira bari Daizeze Bedʼeata kʼawuabeda ẽ. Nekʼãrẽ awuruta odaibara.

18. Yiza abaʉdeba jara ũrĩbira kʼãrẽa yibiata biʼia krĩchaira.

¹⁸ Dayirãbara biʼia krĩchaibara nekʼãrẽ kʼawuanʉmʉ ʉ̃rʉ. Krĩchadadrʉ Salmo 77 bʉda ʉ̃rʉ. Iyira sopʉabasi krĩchabasi baera Daizezeba bia akʉ ẽ basita israelitarata akʉza iyita. Maʉ̃ kʼarea iyira diamasira kʼãĩ ẽ basi krĩcha zroma obʉ baera (Sal. 77:2-8). Aramaʉ̃ta, ¿kʼãrẽta osi iyara? Iya jarasi Jeowa: «Pikãga krĩchabayi bʉa jõma obʉde akʉza jʉ̃zaba krĩchabayi sãwũã obʉde?» (Sal. 77:12). Iya bia kʼawuabasimina Jeowaba kʼãrẽ osita iyi pʉwʉrʉ iyikʉza widisi: «¿Daizezebara kĩrãduasika dayirã nebia diaita mawũã ẽ bʉrʉ mejãcha kĩrʉbʉba so zʉbʉria akʉ ẽka?» (Sal. 77:9). Naʉ̃ salmo bʉdabara bia krĩchasi nãã Jeowaba sãwũã so zʉbʉria akʉdata, naʉ̃ba kʼarebasi iya ĩjãita Jeowabara amae ẽãta iyi pʉwʉrʉra (Sal. 77:11, 15). Dayirãbida abarika ĩjãnañi krĩchapanʉbʉrʉ Jeowaba odata iyi pʉwʉrʉ kʼarea akʉza dayi kʼarea.

19. ¿Kʼãrẽ nebiata ũdudai ewari jʉrʉpanʉbʉrʉ Jeowa kʼawa bʼaita?

¹⁹ Yi kimareta, audre kãgadayi Jeowata. Naʉ̃ra biode yibia, dayirãba Jeowata kãgabʉbʉrʉ zarea oyi ũrĩta iya zokʼabʉta, zarea oyi iya kãgabʉ oita akʉza bedʼea zromata awuantayi (Mat. 22:37-39; 1 Cor. 13:4, 7; 1 Juan 5:3). Dayirãitara audre yibia Jeowa neũdukʼawuabaita (Sal. 63:1-8).

20. ¿Bʉra kʼãrẽta oita krĩchabʉ audre Jeowa kʼawa bʼaita?

²⁰ Yiwidʼiba, Daizeze Bedʼea kʼawuaiba akʉza maʉ̃ ʉ̃rʉ bia krĩchaiba kʼarebayi audre Jeowa kʼawa bʼaita. Odadrʉ Jesude kĩrãkʼa, jʉrʉdadrʉ sama doba aduʼa bʼaita Jeowaʉ̃me bedʼeaita. Daizeze Bedʼea kʼawuabʉde akʉza ãba yi jʉrebʉde yiwidʼibara Jeowaba kʼarebamarẽã nekʼãrẽ awuru ʉ̃rʉ krĩcha ẽ bʼaita. Ewari jʉrʉpanʉbʉrʉ Jeowa kʼawa bʼaita iya nebiata diayi, adewara ẽjũã biade ewari jõmaʉ̃nẽ panañi (Mar. 4:24).