ARTIKULO KʼAWUAITA 7
«Biʼia ũrĩrã buru biaba bedʼea jarabʉra»
«Biʼia ũrĩrã buru biaba bedʼea jarabʉra» (PROV. 22:17).
TRÃBI 123 Seamos leales y sumisos al orden teocrático
KʼÃRẼTA ŨDUDAITAa
1. ¿Kʼãrẽa dayirãʼa ũrãgʼa diapanʉ akʉza kʼãrẽa yibia ũrĩta?
DAYIRÃ jõmaʉ̃ta ũrãgʼa biata diadamarẽã nesidapanʉ. Edaʉde dayirãbara ũrãgʼata diamarẽã widibʉ, ẽbẽra daya wawia ũdubibʉʼa iya ũrãga biata diabʉ baera, mawũã ẽ bʉrʉ mebẽã dayi kʼarebakĩrãbʉba ũrãgʼa diabʉ, daya nemitiata obodo baera (Gál. 6:1). Adewara dayirãʼa ũrãgʼata diaseabʉ nemitia oda tẽã, kʼãrẽ ẽ dayirã kʼarea ũrãgʼa diabʉta, audre yibia ũrĩta maʉ̃ ũrãgʼata, mawũã opanʉbʉrʉ bia wañi akʉza ẽdrʉbiseabʉ dayi bebʉta (Prov. 6:23).
2. Proverbios 12:15 de jarabʉdera, ¿kʼãrẽa ũrĩbara ũrãgʼara?
2 Naʉ̃ artikulo testode jarabʉ kĩrãkʼa, dayirãbara biʼia ũrĩbara «buru biaba jarabʉra» (Prov. 22:17). Mia kʼai ẽbẽraba nekʼãrẽ jõma kʼawuabʉ ẽ akʉza bʉ yi audre kʼawuabʉta dayirãira (akʉra Proverbios 12:15). Dayirãba awuru ũrãgʼa ũrĩbʉde ũdubibʉ eda krĩchabʉta. Adewara ũdubibʉ daya sainʉ oseabʉta akʉza kʼawuabibʉ dayirãbara kʼarebata nesidabʉta. Salomón nokʼo burubiaba bʉsi naʉ̃ta: «Mejãchaʉba ũrãgʼabʉbʉrʉ nebiata ũduyi» (Prov. 15:22).
¿Naʉ̃ra ũrãgʼa ũmenebemara, saʉ̃ta audre zare bʉa ũrĩta? (Akʉra parrapo 3 akʉza 4)
3. ¿Ũrãgʼara samaʉ̃ba zebʉ?
3 Edaʉde ũrãgʼara ẽbẽraneba zebʉ, mawũã ẽ bʉrʉ awurudeba, ¿kʼãrẽta jarakĩrãbʉ ũrãgʼa awurudeba zebʉbara? Maʉ̃bara jarakĩrãbʉ ũrãgʼara zebʉta Daizeze Bedʼeadeba, ãba yi jʉrebʉde ũrĩbʉdeba akʉza kartara akʉbʉdeba, maʉ̃ra ũrãgʼabara ũdubibʉ kʼãrẽne awuara oibarata (Heb. 4:12). ¿Kʼãrẽta jarakĩrãbʉ ũrãgʼa ẽbẽraraneba zebʉbara? Mebẽã Daizeze Bedʼeadebema audre kʼawuabʉba dayirã ũdubiseabʉ kʼãrẽne audre biʼia oibarata. Ẽbẽra abaʉba ũrãgʼa biata diara Daizeze Bedʼeadeba zebʉta, maʉ̃ba ũdubibʉ dayirã mejãcha kãgabʉta. Dayirãba iyi kãgabʉ ũdubira ũrĩbara akʉza oibara iya ũrãgʼa diabʉta.
4. Eclesiastés 7:9 jarabʉdera, ¿dayaʼa ũrãgʼa diadara kʼãrẽta oda ẽ baibara?
4 Ẽbẽra abaʉba dayirã ũrãgʼa diabʉrʉde akʉza jarabʉrʉde kʼãrẽnẽ awuara oibarata, edaʉde zare ũrĩta iya jarabʉra, ¿kʼãrẽa? Kʼawuapanʉ dayirãra kayirua omiarata, mamina awuru ẽbẽraba dayirãʼa jarara kʼãrẽ kayirua obʉta kãga ẽ dayirãbara (akʉra Eclesiastés 7:9). Dayirãba krĩchaseapanʉ awuara oira nesida ẽãta mawũã ẽ bʉrʉ krĩchaseapanʉ yi ẽbẽra dayirã ũrãgʼa diadabara ibia bedʼea ẽ basita maʉ̃ kʼarea ũrĩkĩrã ẽ. Adewara dayirã imitia bedʼeaseapanʉ yi ẽbẽra dayirã ũrãgʼa diada kʼarea akʉza krĩchaseapanʉ iyita nemitia omiabʉrʉ, ¿sãwũã ũrãgʼai mʉ̃ra? Dayirãra nemitia omia baera edaʉde dayirãʼa ũrãgʼa diabʉrʉta kãga ẽ baera ũrĩkĩrã ẽ, mawũã ẽ bʉrʉ jʉrʉpanʉ awuru ẽbẽrata daya ũrãgʼa diamarẽã daya ũrĩkĩrãbʉta.
5. ¿Kʼãrẽta kʼawuadai naʉ̃ artikulodera?
5 Naʉ̃ artikulodera akʉdayi ʉ̃kʉrʉ yiza ẽbẽrara ũrãgʼa ũrĩnaneta akʉza ũrãgʼa ũrĩna ẽ badaraneta. Adewara kʼawuadayi, ¿kʼãrẽba kʼarebaita ũrãgʼa ũrĩta?, ¿sãwũã kʼarebabʉta naʉ̃ra ũrãgʼabara?
ẼBẼRARÃ ŨRÃGʼA ŨRĨ Ẽ BADATA
6. ¿Kʼãrẽta kʼawuapanʉ Rehoboamba odadeba?
6 Akʉdadrʉ Rehoboam yizata. Israelitarãra mejãcha trajapanasi nokʼo Salomónʼita, maʉ̃ba iyi beida tẽã wãsida yi warra Rehoboam, mõbe jarasida mejãcha trajabida ẽ marẽã. Aramaʉ̃ta Rehoboambara widisi zõrãrã pʉwʉrʉdebema, zõrãrãbara jarasida iya pʉwʉrʉ bedʼeata ũrĩra iyi pʉwʉrʉra sobia baita akʉza iyiʉ̃me baibasita (1 Rey. 12:3-7). Rehoboambara kãga ẽ basi zõrãrãba ũrãgʼa diadara, maʉ̃ kʼarea wãsi iyi neũdukʼawuarainʉ. Yi neũdukʼawuarara 40 poaga basimina audre kʼawua ẽ basi zõrãrã pʉwʉrʉ Israeldebemaneira (2 Crón. 12:13). Rehoboam neũdukʼawuarabara ũrãgʼa biata jara ẽ basi awuarabʉrʉ jarasida iyi pʉwʉrʉra audre trajabidamarẽã (1 Rey. 12:8-11). Rehoboamʼra Jeowaʼa yiwidʼiseabasi widita kʼawuabimarẽã saʉ̃ ũrãgʼata ũrĩbarata, mamina iya audre kãgabasi iyi neũdukʼawuaraba ũrãgʼa diabʉta, maʉ̃ kʼarea ãyi bedʼeata ũrĩsi, maʉ̃ba iyira bia wa ẽ basi akʉza iyi pʉwʉrʉsida bia wa ẽ basi. Ẽdaʉde dayirãʼa ũrãgʼa diabʉdata kãga ẽ mina, maʉ̃ta Daizeze Bedʼeadeba zebʉbʉrʉ ũrĩbara.
7. ¿Kʼãrẽta jaradiabʉ nokʼo Uzías yizabara?
7 Nokʼo Uzíasbara ũrãgʼa ũrĩ ẽ basi. Iyira eda wãsi saserdoteratrʉ insienso babarimae. Maʉ̃ kʼarea saserdoteraba iyaʼa jarasida ‹Uzías bʉara insiensora babe ẽ saserdoterabʉrʉ insienso baseabʉ Jeowaita›, ¿kʼãrẽta osi Uzíasbara? Iyita edabʉta krĩchasibʉrʉ wãkasi temploeda, mõbe Jeowabida kĩrãduakasi iya kayirua obadara. Mamina iyira kĩrʉsi, ¿kʼãrẽa Uzíasbara naʉ̃ ũrãgʼata ũrĩkĩrã ẽ basi? Iya krĩchabasi iyita nokʼo baera iya kãgata oseabasita, mamina Jeowabara mawũã krĩchaba ẽ basi, Jeowaba zʉbʉriabisi lepraba iyi beiyeda (2 Crón. 26:16-21). Uzías yizaba jaradiabʉ kʼãrẽ ẽãta dayi sirkuitota, zõrãrã kongregasionebemata mawũã ẽ bʉrʉ yi nãã edebarita badu ẽbẽraba ũrãgʼata ũrĩ ẽ bʉrʉ, Jeowaba bia akʉ ẽ bayi.
ẼBẼRARÃ ŨRÃGʼA ŨRĨBADARATA
8. ¿Kʼãrẽta osi Jobʼbara iyaʼa ũrãgʼa diasidadera?
8 Daizeze Bedʼeadera edabʉ yiza bia ẽbẽrarã Daizezeba ũrãgʼa diada ũrĩnaneba bia wãnarata. Akʉdadrʉ Job yizata. Iyara Jeowa mejãcha kãgabasimina, iyira nemitia omia basi, maʉ̃ba iyi mejãcha zʉbʉriaside imitia bedʼeasi Jeowa ʉ̃rʉ, maʉ̃ kʼarea Jeowaba akʉza iyi neũdukʼawua Elihúba ũrãgʼata diasida, ¿kʼãrẽta osi Jobʼbara? Iyara edabʉta ũdubibasi baera ũrĩsi ũrãgʼa iyaʼa diadapeadata, maʉ̃ kʼarea jarasi: Mʉ̃ara jõma bia kʼawua ẽãta bedʼeasi, mʉ̃ara soiduba jẽda krĩchabʉ mʉ̃a jaradata (Job 42:3-6, 12-17).
9. ¿Kʼãrẽta osi Moisésbara iyaʼa ũrãgʼa diasidadera akʉza kʼãrẽa yiza biata dayirãitara?
9 Moisés yizaba ũdubibʉ edaʉde ũrãgʼara diapanʉta dayirãba kayirua oda tẽãbʉrʉ. Ewari aba Moisésʼra mejãcha kĩrʉbasi, maʉ̃ba mõgaradeba baña zebisidera Jeowadeba zesi aikaʉde maʉ̃ta jara ẽ basi, maʉ̃ba eda wã ẽ basi Jeowaba drʉa bia diaya adamara (Núm. 20:1-13). Moisésba Jeowaʼa badua widida ʉ̃rʉ widisi eda wãbimarẽã drʉa biade. Mamina Jeowaba jarasi ‹Mʉ̃aʼa maʉ̃ ʉ̃rʉ wua bedʼearara› (Deut. 3:23-27). Mamina Moisésʼra kĩrʉ ẽ basi awuara bʉrʉ ũrĩsi Jeowaba ũrãgʼa diadata, mamina Jeowabara iduaribisi iyira israelitara buru bamarẽã (Deut. 4:1). Jobʼba Moisésʼʉ̃meba yiza biata ũdubibʉ, ãya ũrĩsida baera ũrãgʼa diadapeadata. Akʉza dayirãbara ãyide kĩrãkʼa odaibara. Jobʼba ũrãgʼata ũrĩbasi baera iya krĩchabadara awuara krĩchasi, Moisésba nebia aduasimina ũrĩsi iyaʼa ũrãgʼa diadapeadata akʉza ũdubisi ĩjãbʉta.
10. (1) Proverbios 4:10-13bayedaʉba jarabʉdebara, ¿kʼãrẽ nebiata ũdudai ũrãgʼata ũrĩpanʉbʉrʉ? (2) ¿Kʼãrẽta osida ʉ̃kʉrʉ mebẽrãba ãyaʼa ũrãgʼa diasidadera?
10 Moisés akʉza Jobʼde kĩrãkʼa opanʉbʉrʉ bia wañi (akʉra Proverbios 4:10-13). Mebẽrã mejãchaʉba ãyide kĩrãkʼa opanʉ. Bari jaraita mebẽã Emanuelb Congodebemaba, jarabʉ: «Zõrãrã kongregasionebemaba ũdusida mʉ̃ra Jeowadeba jĩga wãta, maʉ̃ kʼarea kʼarebakĩrãpanasi. Mʉ̃a ũrãgʼata ũrĩsi baera Jeowa kʼawabesi». Yi nãã edebari Canádadebema yi trʉ̃ Meganba jarabʉ: «Edaʉde dayirãba ũrãgʼata ũrĩkĩrã ẽ mina nesidapanʉ ũrĩta naʉ̃ ũrãgʼata» Akʉza mebẽã Croaciadebema yi trʉ̃ Markoba, jarabʉ: «Mʉ̃a pribilegio aduasimina ũrãgʼa diadapedaba kʼarebasi mʉ̃ audre Jeowa neũdukʼawua bia baita».
11. ¿Kʼãrẽta jarasi mebẽã Kleinbara ũrãgʼa ũrĩ ʉ̃rʉra?
11 Mebẽã Karl Kleinba nebiata ũdusi ũrãgʼa ũrĩnaneba. Iyira Zõrãrã Burubiadebemabasi akʉza jarasi : «Mʉ̃ra Joseph Rutherfordʼʉ̃me neũdukʼawua bia basi, mamina ewari aba iya mʉ̃ta ũrãgʼasi, maʉ̃ba mʉ̃ra iyiʉ̃me kĩrʉsi. Maʉ̃ tẽã mʉ̃ra yi ũdusi mebẽã Rutherfordʼʉ̃me, iya mʉ̃ra i biʼia bedʼeasi, jarasi ‹mõbe Karl›, mʉ̃ra iyiʉ̃me kĩrʉbasi baera iyaʼa ikokoa ‹za› asi aramaʉ̃ta mebẽã Rutherfordʼba mawũã asi ‹kʼaubara che, Diarura bʉ jẽda are bʉa›, mʉ̃ra mejãcha pera kʼãrãpe panʉsi ‹che mʉ̃ jẽda arera miõ neẽã› Rutherfordʼbara kʼawuabasi mʉ̃ra kĩrʉbʉta, maʉ̃ kʼarea jarasi ‹bedʼea neẽãta, mamina kʼaubara Diarubara pẽwãbʉ bʉra›. Rutherfordʼba jaradara wãrĩnu basi. Dayirãta mebẽã abaʉba ũrãgʼa diabʉrʉde kĩrʉpanʉbʉrʉ Diarubara Jeowadeba jĩga babiseabʉ»c (Efes. 4:25-27). Mebẽã Kleinbara ũrĩsi mebẽã Rutherfordʼba ũrãgʼa diadara, mawũã ãyi yi neũdukʼawua biata aduada ẽ basi.
¿KʼÃRẼBA KʼAREBAI DAYIRÃBA ŨRÃGʼA ŨRĨTA?
12. Salmo 141:5de jarabʉdera, ¿sãwũã kʼarebabʉ eda krĩchabʉbara ũrãgʼa ũrĩta?
12 ¿Kʼãrẽba kʼarebai dayirãba ũrãgʼa ũrĩta? Dayirãta eda krĩchabʉta ũdubipanʉbʉrʉ naʉ̃ba kʼarebayi adewara kĩrãbepanʉbʉrʉ dayirãra nemitia omiata. Kĩrãbedadrʉ Job yizata iyara aña krĩchabasi mamina tẽã iya krĩchabadara awuara krĩchasi, maʉ̃ kʼarea Jeowabara nebia diasi iya ũdubisi baera eda krĩchabʉta. Elihú warrara basimina, Jobʼbara ũrĩsi Elihú ũrãgʼata, mawũã eda krĩchabʉta ũdubisi (Job 32:6, 7). Edaʉde dayirãbara krĩchapanʉ ũrãgʼara nesida ẽãta, mawũa ẽ bʉrʉ daya ũrãgʼa diabʉra dayirãraira audre warrarata, maʉ̃ kʼarea ũrĩkĩrã ẽ. Mamina dayirãta edabʉta krĩchabʉbʉrʉ naʉ̃ba kʼarebayi ũrãgʼa ũrĩta. Mebẽã Canádadebemaba jarabʉ: «Dayikʉzara akʉ ẽ wuabemaba dayi akʉbʉ kĩrãkʼara, maʉ̃ kʼarea awuruba daya ũrãgʼa diada ẽãra zare bayi dayi ara oita». Dayirã jõmaʉ̃ba nesidapanʉ ũrãgʼara nebia erbaita dayi sode, naʉ̃ba kʼarebayi dayirã nejaradiabari bia bʼaita (akʉra Salmo 141: 5).
13. ¿Kʼãrẽta krĩchadaibara ũrãgʼa ʉ̃rʉra?
13 Akʉdadrʉ Jeowaba ũrãgʼa diabʉrʉde dayirãʼa kãga ũdubibʉta. Jeowabara nebiata kãgabʉ dayirãitara (Prov. 4:20-22). Jeowaba dayirã ũrãgʼa diabʉrʉdera Daizeze Bedʼeadeba, kartaraneba mawũã ẽ bʉrʉ mebẽrã kongregasionebemaneba mawũã ũdubibʉ dayirã kãgabʉta akʉza «iyara dayirãra kʼẽãbʉ bia bamarẽã» (Heb. 12:9, 10).
14. ¿Kʼãrẽta akʉdaibara dayirã ũrãgʼa diabʉdadera?
14 Biʼia ũrĩda kʼãrẽta jarakĩrãbʉta krĩcharara sãwũã jaradiadata. Dayirã jõmaʉ̃ba ũrãgʼa diabʉrʉdera ibiade jaradiaibara (Gál. 6:1).d Mamina edaʉde awuruba dayirãʼa ũrãgʼa diasibʉrʉ, krĩchaseapanʉ ũrãgʼara ũrĩkĩrã ẽãta ibiade bedʼea ẽ basi baera. Krĩchaibara kʼãrẽta jaradiakĩrãpanasita krĩcha ẽ baibara dayirãʼa sãwũã bedʼeada ʉ̃rʉ, mawũã oira dayikʉza widiseapanʉ: Mʉ̃a kãga ẽ basimina mʉ̃a sãwũã jaradiadata, ¿kʼãrẽta kʼawuaseabʉ maʉ̃ ũrãgʼadeba? Dayirãba krĩchabʉbʉrʉ yi ẽbẽra daya ũrãgʼa diabʉra nemitia omiata, zare bayi ũrĩta iyi ũrãgʼara, mamina dãyirata buru bia bʉrʉ akʉdayi kʼãrẽta kʼawuaseabʉta iya ũrãgʼa diabʉdeba iyi nemitia omiamina (Prov. 15:31).
ŨRÃGʼATA WIDIRA NEBIATA ŨDUYI
15. ¿Kʼãrẽa wididaibara ũrãgʼara?
15 Daizeze Bedʼeaba jarabʉ daya jʉrʉmarẽã ũrãgʼara. Proverbios 13:10ba jarabʉ: «Ẽbẽra ũrãgʼa widibʉra buru bia bayi». Naʉ̃ra wãrĩnu, ẽbẽra awuruʼa ũrãgʼa widibʉra audre buru bia bayi, maʉ̃ kʼarea awuruʼa widira ũrãgʼara.
¿Kʼãrẽa mebẽã wera warraraba ũrãgʼa widibʉ mebẽã kĩrãdawarabʉa? (Akʉra parrapo 16).
16. ¿Sõbede ũrãgʼata widiseapanʉ?
16 ¿Sõbede ũrãgʼa widiseabʉ dayirã mebẽrãra? Krĩchara naʉ̃ ʉ̃rʉ, (1) Mebẽã abaʉba jarabʉ mebẽã Daizeze odebʉ dããrabaʼa, iyiʉ̃me Daizeze Bedʼea jaradia wãmarẽã. Tẽã iya ũrãgʼa diamarẽã jarabʉ ara oita, mawũã audre bia jaradiaita. (2) Mebẽã wera dobabʉba wua edakĩrãbʉ, maʉ̃ kʼarea jarabʉ ababema mebẽã iyi kʼaidu ne eda wãmarẽã, mawũã ũrãgʼa diamarẽã kʼãrẽ wua edaita. (3) Mebẽã abaʉta diskurso diakata diayi, maʉ̃ kʼarea ababema mebẽã diskurso dia kikibariʼa widibʉ, adewara mebẽrã diskurso dia kikibarimina awuru mebẽã diskurso diakikibariʼa ũrãgʼata widiseabʉ kʼãrẽne waebʉta mawũã ara oita.
17. ¿Kʼãrẽta odaibara dayirãʼa ũrãgʼa diabʉdadera?
17 Dayirãra ũrãgʼara diadayi, mawũã berabaribʉrʉde kĩrãbedadrʉ naʉ̃ artikulode kʼawuadata. Eda krĩchabʉta ũdubibara. Krĩcharara daya sãwũã jaradapeadata awuarabʉrʉ akʉra kʼãrẽta kʼawuaseabʉta daya ũrãgʼa diadapeadadeba. Adewara ora daya ũrãgʼa diadapeadade. Buru biara doba ze ẽ, maʉ̃ kʼarea Daizeze Bedʼeabara jarabʉ dayirãba ũrãgʼata widipanʉbʉrʉ akʉza opanʉbʉrʉ buru bia bayi (Prov. 19:20).
TRÃBI 124 Siempre fieles y leales
a Daizeze pʉwʉrʉbara bia kʼawuabʉ audre yibiata ũrĩta Daizeze Bedʼeaba ũrãgʼa diabʉra, mamina edaʉde zareabʉ naʉ̃ ũrãgʼa ũrĩta, ¿kʼãrẽa mawũã zareabʉ? ¿Kʼãrẽta oibara naʉ̃ ũrãgʼa ũrĩta akʉza kʼãrẽ nebiata ũdui maʉ̃neba?
b Naʉ̃ artikulodera ʉ̃kʉrʉ trʉ̃ta awuara jarabʉ.
d Wuarebema artikulode kʼawuadayi sãwũã ibiade ũrãgʼaseabʉta wuabemarara.