Jeowa kãgabara kʼarebabʉ perabia yi edebi ẽ baita

1. ¿Dayirãra kʼãrẽ kʼarea perabaseabʉ?

BEDʼEADAYA ʉ̃kʉrʉ mebẽrã kʼãrẽ berabarida ʉ̃rʉ. Néstorta akʉza yi kima Maríaʉ̃me wãkĩrãpanasi awuru pʉwʉrʉeda, Daizeze bedʼea jaradiaita nesidabʉma.b Mamina ãyira perapanasi plata wiñaʉ̃ba bʼaibarabasi baera akʉza krĩchapanasi maʉ̃bara sobia ba ẽ baita. Atiara bedʼeadayi Biniam ʉ̃rʉ, iyira basi pʉwʉrʉ Jeowa ʉ̃rʉ Kʼawuabipanʉrã kãgade ẽ mae. Maʉ̃ta iyi buru kʼoesidera kʼawuabasi iyisida jʉradaita, maʉ̃ kʼarea perabasi. Mamina, maʉ̃ awa ẽ basi, iyira audre perabasi iya krĩchabasi baera kʼãrẽta krĩchadaita yibariraba iyi kʼawuabʉdade Jeowa ʉ̃rʉ Kʼawuabibarita. Kõbebʉrʉ ũrĩnaña Valeria berabaridata. Valeriara kayabasi kanser kayiruaba, maʉ̃ kʼarea iya mejãcha jʉrʉbasi saʉ̃ medikoba wa widi ẽã operabʉta mawũã Jeowaba zokʼabʉde oita. Valeriara beiamabasi maʉ̃ kʼarea perabasi.

2. ¿Kʼãrẽa jʉra kʼawuabaibara perabia yi edebi ẽ baita?

² ¿Bʉsida ewari abaʉde atia mebẽrã ʉ̃rʉ bedʼeada kĩrãkʼa pera sentibarika? Dayirãnebema mejãchaʉta pera sentibada. Mamina jʉra kʼawuabaibara maʉ̃ perabia yi edebi ẽ baita, maʉ̃ba krĩcha biata jidabi ẽ baera akʉza Jeowadeba jĩga babiseabʉ baera, maʉ̃ta kãgabʉ Diarubara, bari jaraita, Daizeze Bedʼeata wua jaradia ẽ marẽã (Apoc. 12:17). Diarura jipa so kayirua, iyira yi zroma akʉza mejãcha zarea barabʉ dayirãira. Mamina bʉ kʼarebata dayirã iya yi sewabi ẽ baita akʉza yi edebi ẽ baita, ¿saʉ̃ba maʉ̃ kʼarebara?

3. ¿Kʼãrẽba kʼarebai perabia yi edebi ẽ baita?

³ Diarubara dayirãra sewa ẽ bayi, wãrĩnu ĩjãpanʉbʉrʉ Jeowaba dayirã kãgata akʉza Jeowara dayirãrebʉta (Sal. 118:6). Bari jaraita, Salmo 118 bʉdara mejãcha bedʼea zroma ũdu berabarisi. Maʉ̃nebemara iya erbasi nejʉrara iyi ʉ̃tabʉta (nejʉacha zake 9, 10). Edaʉde, ẽbẽrarãra iyi ʉ̃rʉ panasi (nejʉacha zake 13). Adewara edaʉde Jeowaba zarea kʼẽãsi iyira (nejʉacha zake 18). Iyi mawũã berabarisidu iyi trãbide jarasi: «Pera ẽ bayi». ¿Kʼãrẽa mawũã pera senti ẽ basi? Iya kʼawuabasi baera Jeowaba iyi kʼẽãsidu mejãcha kãgabʉta. Salmo bʉdabara kʼawuabasi iyi nekʼãrẽ berabaribʉrʉbʉsida Jeowara iyiare bʼaita (Sal. 118:29).

4. Soiduba ĩjãpanʉbʉrʉ Jeowaba dayirã mejãcha kãgabʉta, ¿kʼãrẽ bedʼea ũbea kʼarea perada ẽ bayi?

⁴ Kristiano aba abakaʉba kʼawuabaibara ãyira Jeowaba kãgata. Naʉ̃ kʼawuaiba kʼarebayi perabia yi edebi ẽ baita. Bari jaraita, kʼarebayi: 1) dayirã mebẽrãba nesidabʉ diabe ẽ kʼarea pera ẽ baita, 2) wuabemara kʼarea pera ẽ baita, 3) bei kʼarea pera ẽ baita. Mebẽrã parrapo nããbemanebemarabara idubʉsida ãyi perabira, soiduba ĩjãsida baera Jeowaba ãyira mejãcha kãgata.

DAYIRÃ MEBẼRÃBA NESIDABɄ DIABE Ẽ KʼAREA PERABɄTA

5. ¿Kʼãrẽ kʼarea krĩcha oseabʉ mebẽrã bururãra?

⁵ Mebẽrã buruitara audre yibia krĩchaita ãyi mebẽrã sãwũã bia erbai ʉ̃rʉ (1 Tim. 5:8). Bʉta mebẽrã burubʉrʉ, COVID-19 kʼarea krĩcha zroma osibaibara, trajo adʉai kʼarea, maʉ̃ta mawũã berabarisibʉrʉ neẽ baibasi baera bʉ mebẽrãita yiko edaita akʉza ãyi sama bʼaita neẽ baibasi baera. Mawũã ẽ bʉrʉ krĩchasibaibara Néstor akʉza María kĩrãkʼa plata wiñabara bia ba ẽãta. Diarubara mebẽrãba mejãcha perabibʉdeba sewa zebʉrʉ akʉza Jeowadeba jĩga babi zebʉrʉ.

6. ¿Kʼãrẽta ĩjãnamarẽãbʉ Diarubara?

⁶ Diaruba krĩchabikĩrãbʉ Jeowaba dayirãra krĩcha ẽãta, dayirã mebẽrãba nesidabʉ diabe ẽ kʼarea krĩcha obʉrʉde. Diaruba jarabʉta ĩjãnara krĩchadayi trajaita audre yibiata, maʉ̃ trajora Daizezeba kãgabʉde bʉ ẽ mina.

7. ¿Kʼãrẽta jarasi Jesubara iyi Zeze ʉ̃rʉra?

⁷ Mia abaʉba Jesude kĩrãkʼa ũdukʼawuabʉ ẽ Daizezera, maʉ̃ba iya naʉ̃ta jarasi: «Marã Zezebara kʼawua bʼʉ baera marãba kʼãrẽ nesidʼa bera, marãba kʼãrẽ widʼidʼai nawedʼa» (Mat. 6:8). Adewara Jesuba jarasi Jeowabara dayirã kʼarebayi awabʉta. Kristianorãra Daizeze mebẽrã, maʉ̃ba Daizezera mebẽrã buru akʉza iya 1 Timoteo 5:8de mebẽrã buruʼa widibʉra oyi.

8. (1) ¿Kʼãrẽba kʼarebai dayirã mebẽrãba nesidabʉ diabe ẽ kʼarea perabʉ idubʉita? (Mateo 6:31-33). (2) ¿Sãwũã oseapanʉ juwa jidapanʉra potodebʉ kĩrãkʼa?

⁸ Soiduba ĩjãpanʉbʉrʉ Jeowaba dayirã kãgata akʉza dayirã mebẽrãta, krĩcha ẽ bayi Jeowabara dia ẽ baita dayirãba nesidabʉra (akʉra Mateo 6:31-33). Jeowaba dayirãba nesidabʉra diakĩrãne diabʉ. Bari jaraita, Jeowaba naʉ̃ Drʉa parãsidera bari dayirãba nesida awa parã ẽ basi, mawũã dayirã bei ẽ marẽã. Awuarabʉrʉ soiduba nekĩrãtana parãsi, mawũã dayirãsi sobiapanamarẽã maʉ̃ba (Gén. 2:9). Maʉ̃ba dayirãba nekʼãrẽta idi bʼaitabʉrʉ erbʉbʉrʉ akʉza maʉ̃ta nrʉemane neẽ baibʉrʉ maʉ̃ kʼarea biga diaibara, dayirãba nesidabʉta erpanʉ baera. Naʉ̃ba ũdubibʉ Jeowaba wãrĩnu diabʉta «idibema yikota» (Mat. 6:11). Krĩcha zroma oda ẽ baibara dayirãba nebiata neẽ kʼarea, tẽãne Jeowaba audre nebia diai baera. Maʉ̃ta kĩrãduada ẽ baibara, naʉ̃ta kʼawuasida Néstorba akʉza Maríaʉ̃meba (Is. 65:21, 22).

9. ¿Kʼãrẽta jaradiabʉ Néstor akʉza María yizabara?

⁹ Néstor Maríaʉ̃mera Colombiadebemabasi. Ãyira nekʼãrẽ biata erpanasi baera mejãcha sobiapanasi, ãya jarasida: «Daiba krĩchapanasi Daizeze bedʼeata awuru pʉwʉrʉmae jaradia wãnaita, maʉ̃ kʼarea krĩchasida daiba nekʼãrẽ mejãcha erba ẽ baita, mamina perapanasi plata wiñaʉba bʼaibara baera». Mamina, ¿kʼãrẽba kʼarebasi ãyi maʉ̃ kʼarea perabada idubʉita? Néstor akʉza Maríaʉ̃mebara jõma jẽda krĩchasida Jeowaba sãwũã ãya kãga ũdubi zebʉrʉta. Maʉ̃ba kʼarebasi ãyira ĩjãita wãrĩnu Jeowaba ãyi kʼarebaita akʉza maʉ̃ kʼarea ãyi trajo bia pagabadara amaesida adewara nedosida ãyi deta, mawũã awuru pʉwʉrʉma Daizeze bedʼea jaradiaita nesidabʉma wãita. ¿Sãwũã sentipanʉba Néstorta akʉza Maríaʉ̃mera ãya oda kʼarea? Néstorba jarabʉ: «Daiba ũdu zebʉda Mateo 6:33ba jarabʉra wãrĩnuta, daiba nesidapanʉra ewari jõmaʉ̃nẽ erpanʉ akʉza audre sobiapanʉ».

AWURU ẼBẼRA KʼAREA PERABɄDE

10. ¿Kʼãrẽa ẽbẽrarã perabʉ abari ẽbẽra kʼarea?

¹⁰ Dããraba ẽbẽrarãra ãyirainʉ yi zʉbʉriabi zebʉrʉta (Ecl. 8:9). Bari jaraita, yi ʉ̃ta zarea barabʉbara kʼawua obʉ wuabemarata adewara wuabemarata kayirua obʉrʉdera, zʉbʉria obʉ adewara iyi neũdukʼawuara kolegiodebema imitia jarabare. Maʉ̃ta neẽbʉrʉ, neida oita jarabʉ adewara yi mebẽrãta bia edada ẽ daucha zʉbʉriabibare. Maʉ̃ kʼarea ẽbẽrabara wawiabare ẽbẽrarãta. Diaruba kʼawuabʉ baera ẽbẽrata maʉ̃ba perabʉta, ¿sãwũã zokʼakĩrãbʉ maʉ̃ perabira dayirã neida oita?

11, 12. ¿Sãwũã zokʼabʉ Diarubara dayirã wuabema kʼarea perabʉra dayirã neida oita?

¹¹ Diaruba dayirãta maʉ̃ perabʉta kʼawuabʉ baera iyara dayirãta daʉperabʉ Daizezeba zokʼabʉta oda ẽ marẽã akʉza Daizeze bedʼeata jaradiada ẽ marẽã. Maʉ̃ kʼarea Diarubara zokʼabʉ ʉ̃kʉrʉ nokʼoraba jaradamarẽã Daizeze bedʼeata wua jaradiada ẽ marẽã akʉza dayirãta pẽwã kʼãrãpe zʉbʉria odamarẽã (Luc. 21:12; Apoc. 2:10). Adewara ẽbẽrarã naʉ̃ drʉadebemabara sewa nebʉrata jarabʉ Jeowa ʉ̃rʉ Kʼawuabipanʉrã ʉ̃rʉ ãyira Diaruba zokʼabʉ baera. Yi ẽbẽrarã maʉ̃ sewa nebʉra ĩjãpanʉrabara dayirã ʉ̃rʉ imitia bedʼeaseabʉ, dayirã kʼarea ipidaseabʉ akʉza dayirã ʉ̃rʉ baseabʉ (Mat. 10:36). Diaruba dayirã ʉ̃rʉ sewa nebʉra jara zebʉrʉra, aranʉ wedaʉba mawũã ozebʉrʉ ẽ, siglo nããbemanebida mawũã obasi (Hech. 5:27, 28, 40).

¹² Diarubara bari nokʼoraneba daʉperabʉ ẽ Jeowa ʉ̃rʉ Kʼawuabipanʉrãra. Ʉ̃kʉrʉ mebẽrãbara audre wawi yi mebẽrãba sãwũã krĩchabʉ kʼawuaita, iyi Daizeze ode jʉ̃drʉbʉrʉ kʼarea wuabemaba iyi zʉbʉribidai kʼarea perai kaʉde. Mebẽrãbara mejãcha kãga baera yi mebẽrãta akʉza Jeowa ode bamarẽã kãgabʉ baera, mejãchade pʉ mitia bedʼeabʉdade Jeowa ʉ̃rʉ akʉza Jeowa ode panʉra ʉ̃rʉ. Mamina, edaʉde yi mebẽrã Jeowa ʉ̃rʉ imitia bedʼeabadara, ãyara tẽãne ĩjãpanʉ Jeowata. Mamina, dayirã mebẽrãnebema abaʉba jarara dayirãta Jeowa odebida baera ãyara mia kʼãrẽsida kʼawuakĩrã ẽãta dayirã ʉ̃rʉ, ¿kʼãrẽta odai maʉ̃nera?

13. ¿Kʼãrẽa wãrĩnu ĩjãnaibara Jeowaba kãgabʉta dayirã mebẽrãba kãga ẽãne? (Salmo 27:10).

¹³ Arigʉ bedʼea kĩrãwãreãta jarabʉ Salmo 27:10ba (akʉra). Dayirãba kʼawuapanʉbʉrʉ Jeowaba kʼãrẽaba kãgabʉta dayirãta mawũãra aduʼapanañi wuabema ẽbẽraba dayirã zʉbʉria opanʉ bʉsida, adewara wãrĩnu ĩjãnañi Jeowaba dayirãʼa nebia diaita dayirãba awuanta zebʉrʉ kʼarea. Jeowabara diayi dayirãba nesidabʉta akʉza aduʼa babiyi adewara audre kʼawuabiyi iyi ʉ̃rʉ. Mia kʼaiba kʼareba ẽ Jeowaba kʼarebabʉ kĩrãkʼara. Maʉ̃ta mawũã ũdusi Biniam nããbema parrapode bedʼeadaba.

14. ¿Kʼãrẽta kʼawuapanʉ Biniam yizadebara?

¹⁴ Biniamʼra Jeowa ʉ̃rʉ Kʼawuabipanʉrãbasi, iya kʼawuabasimina iyi bʉmaera nokʼoraba pẽwãibasita, Biniamba jarabʉ: «Nokʼorabara mʉ̃ra pẽwãsida mejãcha zʉbʉria odaita mʉ̃a krĩchabada audre, mamina mʉ̃ra audre perabasi mʉ̃ mebẽrãba krĩchabada kʼarea, mʉ̃ Jeowa odebida kʼarea». Mamina, ¿kʼãrẽba kʼarebasi Biniamʼra iyi perabada idubʉita? Iyara wãrĩnu soiduba ĩjãbasi Jeowaba iyita kãgabʉta adewara ewari jõmaʉ̃nẽ kʼarebabʉta, iya jarabʉ: «Mʉ̃ara jõma jẽda krĩchasi Jeowaba sãwũã kʼareba zebʉrʉta mebẽrã plata neẽãne, wuabemaba jʉrabʉde akʉza jõmaʉ̃ta ãyi ʉ̃rʉ panʉne, mamina mʉ̃a kʼawuabasi mʉ̃a Jeowata idubʉ ẽ bʉrʉ, iya mʉ̃ kʼarebaita. Nokʼorabara mʉ̃ra jidada kʼãrãpe, mejãcha posida. Maʉ̃ne mʉ̃a ũdusi dayita Jeowaʉ̃me kʼẽrẽpabʉbʉrʉ Jeowabara mejãchade kʼarebabʉta». Mawũẽra, Biniamʼitara Jeowara iyi zeze kĩrãkʼabasi akʉza mebẽrã kongregasionebemara iyi mebẽrã kĩrãkʼabasi.

BEI KʼAREA PERABɄDE

15. ¿Kʼãrẽa perapanʉ bei ʉ̃rʉ krĩchabʉdadera?

¹⁵ Daizeze Bedʼeabara jarabʉ, beira dayi nejʉra kĩrãkʼabʉta (1 Cor. 15:25, 26). Bei ʉ̃rʉ krĩchaiba, naʉ̃bara mejãcha krĩcha zroma obibʉ dayirãra. Audre sopʉabʉ dayita, mawũã ẽ bʉrʉ dayirã mebẽrãta kayabʉbʉrʉ. ¿Kʼãrẽa perapanʉ dayirãra bei ʉ̃rʉ krĩchabʉrʉdera? Daizezeba dayirã parãsidera, dayirã sode bʉsi baera ewari jõmaʉ̃nẽ bakĩrãpanamarẽã (Ecl. 3:11). Dayi bei kʼarea perabʉbara biode kʼarebabʉ dayi bebʉ bia akʉita, dayi kayabʉdera remedio jʉrʉ wãpanʉ, medikoeda wãpanʉ, yiko bia kopanʉ, ejersisio opanʉ akʉza oẽ nekʼãrẽ dayi beaseabʉta.

16. ¿Kʼãrẽta obʉ Diarubara dayirã bei kʼarea perabʉdeba?

¹⁶ Diarubara kʼawuabʉ dayirãbara mejãcha kãgata dayi bebʉra, maʉ̃ kʼarea iya jarabʉ dayirãbara nekʼãrẽ baduta oita dayi bebʉ zokʼai erbaita adewara idubʉseabʉta Jeowa neũdukʼawua bʼaita (Job 2:4, 5). Mamina iya jipa aña krĩchabʉ, Diarura zarea barabʉ baera dayirã beaita, iyara maʉ̃ta zokʼabʉ dayirã daʉperaita akʉza Jeowadeba jĩga babita (Heb. 2:14, 15).Maʉ̃ kʼarea Diarubara edaʉde zokʼabʉ ʉ̃kʉrʉ ẽbẽrata, dayirã jaramarẽã dayirãba Daizeze ĩjãbʉta idubʉ ẽ bʉrʉ beadaita adewara dayirã mejãcha kayabʉdera Diarubara obʉ medikorata akʉza dayirã mebẽrã Jeowa odepanʉra ẽãta dayirã ʉ̃rʉ bamarẽã wata kẽgʉde bʉemarẽã. Mawũã ẽ bʉrʉ Diarubara dayirã kayabʉdera obʉ ʉ̃kʉrʉ ẽbẽraneba daya jaramarẽã, jʉrʉmarẽã sãwũã beita, maʉ̃ra Daizezeba kãgabʉde bʉ ẽ mina.

17. Romanos 8:37-39 bayeda jarabʉdera, ¿kʼãrẽa perada ẽ baibara dayi bei kʼareara?

¹⁷ Dayirãnebemara mia kʼaita beiamapanʉ, mamina beidara kʼawuapanʉ Daizezebara iyi krĩchade erbaita akʉza dayirãra kãga bʼaita (akʉra Romanos 8:37-39). Jeowaitara iyi neũdukʼawua beibʉrʉdera iyi burude zokʼaibʉ kĩrãkʼabʉ (Luc. 20:37, 38). Maʉ̃ kʼarea Jeowabara ñabasea jẽda piradrʉbikĩrãbʉ (Job. 14:15). Jeowabara iyi warrata beibisi dayirã bari, mawũã dayirãta ewari jõmaʉ̃nẽ panamarẽã (Juan 3:16). Dayirãbara biʼia kʼawuapanʉ, Jeowabara kʼãrẽaba kãgabʉta akʉza akʉkĩrãbʉta dayirãra, maʉ̃ kʼarea kayabʉdera adewara pẽwãpanʉnera jĩgara wã ẽ iyideba, awuarabʉrʉ jʉrʉpanʉ iyi kʼarebata. Dayirã diamarẽã zowaĩnĩgʉata akʉza aduʼa babimarẽã. Maʉ̃ta osida Valeria akʉza yi kimaʉ̃meba (Sal. 41:3).

18. ¿Kʼãrẽta jaradiabʉ Valeria yizabara?

¹⁸ Valeria 35 poaga baside, iya jarasida kanser kayiruaba kayasita. Akʉdaya sãwũã Jeowa kãgabʉba iyi bei kʼarea perabasimina kʼarebasita. Valeriaba jarabʉ: «Mʉ̃aʼa kʼãrẽba kayabʉta jarasidade, mʉ̃itara jõma awuara besi, mamina maʉ̃ kaya bebira operaibarabasi, maʉ̃ kʼarea mʉ̃a jʉrʉsi medikoraʼa wa widi ẽã operabʉrata. Mamina mia abaʉ medikoba ĩjã ẽ basi wa neẽã operaira, maʉ̃ kʼarea mʉ̃ perabasimina mʉ̃a iduaribi ẽ basi mʉ̃ kẽgʉde wata bʉeda kʼãrãpe operadamarẽãra. Jeowaba mʉ̃ta mejãcha kãgabʉta ũdubi zebʉrʉ baera kõbebʉrʉ mʉ̃areba iyita mejãcha kãgabʉta ũdubibarabasi, mʉ̃a badua bedʼea pʉata jara zebʉrʉza, mʉ̃aʼa ũdubibasi wãrĩnu zarea ĩjãbʉta Daizezeta, mawũã Diarua yi daʉperabi ẽ baita. Mʉ̃a kãgabasi Jeowara mʉ̃a obʉ kʼarea sobia bamarẽã, tẽãne medikorabara mʉ̃ra operasida wa mʉ̃ kẽgʉde bʉeda ẽã. Maʉ̃ra jõma bia berabarisi, mʉ̃ra wabidabasidu kayabʉ, mawũãsidu Jeowabara mʉ̃ra ewari jõmaʉ̃nẽ kʼarebabʉ. Mʉ̃ kanser kayiruaba baribʉta jaraita semana aba waebasi, maʉ̃ne ãba yi jʉrebaramʉne kʼawuasida La Atalaya aba yi trʉ̃ra ‹Afrontemos con valentía los golpes de la vida›.c Maʉ̃ra arigʉ yibiabasi daita, maʉ̃ra daibara leda ʉ̃rʉ lepanasi. Naʉ̃ra karta kʼãwũã ũrãgʼa bia diabʉ kĩrãkʼabʉdeba akʉza Daizezedebema obʉdeba, kʼarebasi daira aduʼa panaita adewara krĩcha bia jidaita».

PERABIA YI EDEBIDA Ẽ BAIBARA

19. ¿Aranʉ kʼãrẽta berabari?

¹⁹ Naʉ̃ drʉa jõmaʉ̃nẽ bʉ mebẽrã ãyi zʉbʉria berabarida awuanta zebʉrʉta Jeowa kʼarebadeba akʉza Diarua yi edebida ẽãta (1 Ped. 5:8, 9). Bʉabida ãyide kĩrãkʼa oseabʉ. Aranʉ Jeowaba jarayi Jesuʼa akʉza iyi bawaraʉba zokʼaiʼa ara odamarẽã Diaruba ãrĩ wãta (1 Juan 3:8).Maʉ̃ tẽã, Jeowa ode panʉrabara naʉ̃ bedʼeata aripe berabaribʉrʉta ũdudayi: «Mia kʼãrẽ kʼarea pera ẽ bayi akʉza mia kʼãrẽba so perada ẽ bayi» (Is. 54:14; Miq. 4:4). Maʉ̃ ewari zeyeda dayirã perabʉa yi edebida ẽ baibara.

20. ¿Kʼãrẽba kʼarebai perabia yi edebida ẽ baita?

²⁰ Dayirã perabʉ aduaira, ĩjãnaibara Jeowaba dayirã kãgabʉta akʉza kʼarebaita. ¿Kʼãrẽba kʼarebai maʉ̃ oita? Jẽda krĩchaibara Jeowaba sãwũã kʼareba zebʉrʉta iyi ode panʉrãra akʉza maʉ̃ta wuabemabawara bedʼeaibara akʉza dayirãbida jẽda krĩchaibara sãwũã Jeowaba kʼareba zebʉrʉta dayirã bedʼea zroma erbʉde. Jeowa kʼarebadeba dayirãra pera bia yi edebida ẽ bayi (Sal. 34:4).