Iduaribirãra nekʼãrẽba Jeowadeba jĩga bamarẽãra

1. ¿Sãwũã kʼawuapanʉ Jeowara dayirã kʼawa bakĩrãbʉta?

JEOWABARA kãgabʉ dayirãta iyi kʼawa bamarẽã (Sant. 4:8). Iyira dayirã Daizeze, dayi neũdukʼawua akʉza dayi zeze bakĩrãbʉ. Jeowabara panʉbʉ dayirã yiwidʼibʉra akʉza kʼarebabʉ bedʼea zroma erbʉde akʉza iyi organizasionta zokʼabʉ dayirã jaradiaita akʉza akʉita. Mamina, ¿kʼãrẽta oibara iyi kʼawa bʼaita?

2. ¿Sãwũã Jeowa kʼawa baseapanʉ?

² Jeowa kʼawa baseapanʉ iyaʼa yiwidʼipanʉne akʉza Daizeze Bedʼea le kʼãrãpe maʉ̃ ʉ̃rʉ krĩchabʉde, mawũã odara audre kãgayi Jeowata akʉza ũrĩkĩrãnañi iya zokʼabʉta adewara iyi ʉ̃rʉ ibia bedʼeabidayi (Apoc. 4:11). Dayirãba Jeowa audre ũdukʼawua wãne, audre ĩjãnañi iyi ʉ̃rʉ akʉza iya organizasion dayirã kʼarebamarẽã diabʉ kʼãrẽta.

3. (1) ¿Kʼãrẽta obʉ Diarubara dayirãta Jeowadeba jĩga bamarẽã? (2) ¿Kʼãrẽba kʼarebaseabʉ Jeowata akʉza iyi organizasionta idubʉ ẽ baita? (Salmo 31:13, 14).

³ Diarubara nekʼãrẽ jõma obʉ dayirãta Jeowadeba jĩga bamarẽã, audre mawũã obʉ dayirãta bedʼea zromane berabarinʉmʉne, ¿sãwũã obʉ maʉ̃ra? Diarubara wiña wiñane dayirãba Jeowa ĩjãbʉta akʉza iyi organizasione ĩjãbʉta adua wãbibʉ, mamina dayirãbara awuantaseapanʉ. Dayirãba Jeowa ĩjãbʉta zarea erpanʉbʉrʉ akʉza iyi organizasion ʉ̃rʉ ĩjãpanʉbʉrʉ, Jeowata akʉza iyi organizasionta idubʉda ẽ bayi (akʉra Salmo 31:13, 14).

4. ¿Kʼãrẽta akʉdai naʉ̃ artikulodera?

⁴ Naʉ̃ artikulode kʼawuadayi bedʼea zroma ũbea dayirãba ũduseabʉta. Maʉ̃ bedʼea zroma aba abakaʉba oseabʉ dayirãba Jeowa ĩjãbʉta akʉza iyi organizasion ʉ̃rʉ ĩjãbʉta wua ĩjã ẽ marẽã. Maʉ̃ra bedʼea zromabara, ¿sãwũã Jeowadeba jĩga babiseabʉ akʉza kʼãrẽta odaibara Diarua yi sewabida ẽ baita?

BEDʼEA ZROMA BERABARIBɄRɄDE

5. ¿Sãwũã aduabiseabʉ bedʼea zromabara Jeowa ʉ̃rʉ ĩjãbʉta akʉza iyi organizasion ʉ̃rʉ ĩjãbʉta?

⁵ Edaʉde dayirãbara bedʼea zroma ũdubʉ dayirã mebẽrãba kãga ẽ baera dayita Daizeze ode bamarẽã, mawũã ẽ bʉrʉ trajo aduada kʼarea, ¿sãwũã naʉ̃ra bedʼea zromabara aduabiseabʉ Jeowa ʉ̃rʉ ĩjãbʉta akʉza iyi organizasion ʉ̃rʉ ĩjãbʉta? Dayirãba bedʼea zroma ũdubʉta dããrababʉrʉ, naʉ̃ba oseabʉ dayirãba nebia jʉ̃ãbʉta aduamarẽã akʉza sopʉa sentibibʉ. Dayirã mawũã berabaribʉrʉdera Diarubara obʉ krĩchamarẽã Jeowabara dayirãra kãga ẽãta adewara Diarubara kãgabʉ dayirãba krĩchamarẽã Jeowaba mawũã zʉbʉria obʉta akʉza iyi organizasionba. Mawũã berabarisi ʉ̃kʉrʉ israelitarata, ãya nãã krĩchapanasi Jeowaba jidasita Moisésta akʉza Aarónta ãyi Egiptodeba ẽdrʉbidamarẽã (Éx. 4:29-31). Mamina tẽã, paraonba ãyi mejãcha zʉbʉriabiside naʉ̃ta jarasida Moisésʼa akʉza Aarónʼa: «Maraba osida [...] paraonba akʉza iyi nezokʼaraba daita jʉradamarẽã adewara espadata ãyi juwade jidabisi daita beadamarẽã» (Éx. 5:19-21). Ãyira imitia bedʼeasida Jeowaba jʉrʉda ʉ̃rʉ. Bʉ zʉbʉriabʉta dããrababʉrʉ, ¿kʼãrẽta oibara audre ĩjã bʼaita Jeowa ʉ̃rʉ akʉza iyi organizasionta?

6. ¿Kʼãrẽta kʼawuapanʉ dayirãbara Habacucdeba bedʼea zroma awuantai ʉ̃rʉra? (Habacuc 3:17-19).

⁶ Dayirã yiwidʼibʉrʉde dayi sode jõmabʉta Jeowaʼa jaraibara akʉza widibara iya kʼarebamarẽã. Propeta Habacucbara bedʼea zromata mejãcha ũdusi, maʉ̃ kʼarea iya krĩchasi Jeowabara iyira kʼareba ẽãta. Maʉ̃ba iyi sodebʉta jõma jarasi Jeowaʼa. Iya jarasi: «Jeowa, ¿kʼai sõbe bayeda jʉratakeraibara bʉa ũrĩmarẽã? [...] ¿Kʼãrẽa bʉa iduaribibʉ maʉ̃ nemitiara?» (Hab. 1:2, 3). Jeowabara ũrĩsi Habacuc bedʼeara (Hab. 2:2, 3). Iya tẽã bia krĩchabʉrʉde Jeowaba iyi sãwũã kʼareba zebʉrʉta, naʉ̃ba kʼarebasi jẽda sobia bʼaita. Habacucbara ĩjãbasi Jeowaba akʉbʉta akʉza kʼarebaita awuantamarẽã badu bedʼea zroma ũdubʉrʉde (akʉra Habacuc 3:17-19). ¿Kʼãrẽta kʼawuapanʉ dayirãbara naʉ̃ yizadeba? Bʉa bedʼea zroma erbʉdera Jeowaʼa yiwidʼida akʉza jarada bʉ sãwũã sentibʉta adewara akʉra Jeowaba bʉ sãwũã kʼarebabʉta. Mawũã obʉbʉrʉ, ũduyi Jeowaba bʉaʼa diabʉta bʉa nesidabʉ zareata maʉ̃ bedʼea zroma awuantaita akʉza bʉa ũdubʉrʉde Jeowaba bʉ sãwũã kʼarebabʉta bʉara iyi ʉ̃rʉ audre ĩjãñi.

7. ¿Kʼãrẽta krĩchamarẽã kãgabasi Shirley mebẽrãnebema abaʉba akʉza kʼãrẽba kʼarebasi Jeowa ĩjãbʉ adua ẽ baita?

⁷ Ne bio oseabʉ Jeowa kʼawa bʼaita. Akʉdaya sãwũã Shirleyʼra mawũã obʉba kʼarebasita bedʼea zroma ũduside, iyira Papua Nueva Guineanebema.b Shirley mebẽrãra nekʼãrẽ mejãcha neẽbasi maʉ̃ kʼarea edaʉde mejãcha trajadaibarabasi yiko ũduita, iyi mebẽrã abaʉdebemaba okĩrãbasi Jeowa ʉ̃rʉ ĩjãbʉta idubʉmarẽã, iya jarasi: «Bʉa jarabʉ jaure zareaba kʼarebabʉta mamina, ¿atiara maʉ̃ kʼarebara sama chu? Bʉra wabida nekʼãrẽ neẽãbʉ, ewari aduabʉ Daizeze bedʼea jaradiabʉde». Maʉ̃ kʼarea Shirleybara edaʉde krĩchabasi maʉ̃ ʉ̃rʉ: «Mʉ̃yikʉza widisi: ‹¿Daizezebara daira wãrĩnu akʉbʉka?›. Aramaʉ̃ta Jeowa yiwidʼisi, mõbe jõma jarasi mʉ̃a kʼãrẽta krĩchabʉta. Daizeze Bedʼeata ewariza lebasi akʉza dayirã kartarata akʉbasi adewara Daizeze bedʼea jaradia wãbasi akʉza ãba yi jʉrebarima wãbasi». Tẽã iya kʼawuasi Jeowaba iyi mebẽrãra wãrĩnu akʉbʉta, maʉ̃ba wua jarrabade berabari ẽ basi akʉza sobiapanasi. Shirleyba jarabʉ: «Mʉ̃a kʼawuasi Jeowaba panʉbʉta mʉ̃ yiwidʼira» (1 Tim. 6:6-8). Bʉa ne bio obʉbʉrʉ Jeowa kʼawa bʼaita, naʉ̃ba iduaribi ẽ bayi bedʼea zroma zebʉrʉde Jeowadeba jĩga bʼaita.

DAYIRÃ NÃÃ EDEPANɄRATA ZɄBɄRIABIBɄDADE

8. ¿Kʼãrẽta berabariseabʉ mebẽrã Jeowa organizasion nãã edebʉra?

⁸ Telebisordeba, radiodeba akʉza internetʼneba sewa nebʉrata jarapanʉ dayirã nãã edepanʉra ʉ̃rʉ dayirã nejʉrabara (Sal. 31:13). Ʉ̃kʉrʉ mebẽrãra jidapanʉ karselde eda bʉeita ẽbẽra kayirua kĩrãkʼa. Nããbema kristianorãra abarika berabarisi, apostol Pablo ʉ̃rʉ sewa nebʉrata jarada kʼãrãpe karselde eda bʉesidade. Aramaʉ̃ta, ¿kʼãrẽta osida maʉ̃ra kristianorabara?

9. ¿Kʼãrẽta osida ʉ̃kʉrʉ nããbema kristianorabara Pablo karselde bʉesidade?

⁹ Ʉ̃kʉrʉ kristianorabara Pablo Romane karselde bʉesidade wua kʼarebada ẽ basi (2 Tim. 1:8, 15). ¿Kʼãrẽa? Ãyira so perabasibaibara Pablota ẽbẽra kayirua kĩrãkʼa jidasida baera (2 Tim. 2:8, 9). Mawũã ẽ bʉrʉ mejãcha perabasibaibara ãyisida abarika jidadai kʼarea. Mamina, ¿sãwũã sentibasiba Pablora maʉ̃ kʼareara? Pablora mejãcha zʉbʉriasi akʉza ãyi kʼarea bera beasida (Hech. 20:18-21; 2 Cor. 1:8). Dayirãra jari kristianora Pablo mejãcha bedʼea zroma ũdubʉrʉde amaena kĩrãkʼa ba ẽ baibara. ¿Kʼãrẽta kĩrãbedaibara mebẽrã dayirã nãã edebʉta pẽwãbʉdade?

10. ¿Kʼãrẽta kĩrãbedaibara mebẽrã dayirã nãã edebʉta pẽwãbʉdade akʉza kʼãrẽa?

¹⁰ Kĩrãbera kʼãrẽ kʼarea pẽwãpanʉta akʉza kʼaiba mawũã obʉta. 2 Timoteo 3:12ba jarabʉ: «Yi ẽbẽra jõma Jesukristo bedʼea ũrĩkĩrãbʉra, pẽwãnaña abʉ». Maʉ̃ kʼarea kʼawuapanʉ mebẽrã dayirã nãã edebʉra Diarubara audre pẽwãita. Diarubara kãgabʉ iya mawũã pẽwãbʉ kʼarea dayirãta Jeowaʉ̃me kʼẽrẽpa ba ẽ marẽã akʉza pera sentidamarẽã (1 Ped. 5:8).

11. ¿Kʼãrẽta kʼawuapanʉ Onesíforo yizadebara? (2 Timoteo 1:16-18).

¹¹ Mebẽrãta kʼarebapanaidua akʉza ãyiʉ̃me kʼẽrẽpapanaidua (akʉra 2 Timoteo 1:16-18). Kristiano aba, siglo nããranebemaba, yi trʉ̃ Onesíforoba awuara osi. Pablo karselde bʉesidade iyira so pera senti ba ẽ basi Pablo karselde edabʉ kʼareara, awuarabʉrʉ jʉrʉ wãsi Pablota, iya ũduside jʉrʉsi sãwũã kʼarebaita. Iya mawũã obʉ kʼarea bera beisi. Dayirãbara, ¿kʼãrẽta kʼawuabʉ naʉ̃neba? Ẽbẽra kʼarea perabʉba iduarida ẽ baibara dayirã mebẽrã kʼarebadaita, awuarabʉrʉ dayirã mebẽrãre bedʼeadaibara akʉza akʉdaibara (Prov. 17:17). Dayirã mebẽrãbara nesidabʉ ãyaʼa kãgata ũdubidamarẽã akʉza kʼarebadamarẽã.

12. ¿Kʼãrẽta kʼawuapanʉ dayirãbara mebẽrã Rusiadebemanebara?

¹² Akʉdaya sãwũã mebẽrã Rusiadebemabara kʼarebabʉta mebẽrã Rusiade karselde edabʉta. Mebẽã aba juez nãã edepanʉnera, mebẽrã mejãchaʉta wãpanʉ iyi kʼawa bʼaita. ¿Kʼãrẽta kʼawuapanʉ ãyideba? Mebẽrã dayirã nãã edebʉta jidabʉdade, ãyi ʉ̃rʉ sewa nebʉra jarabʉdade akʉza pẽwãbʉdade pera sentida ẽ baibara. Ãyi bari yiwidʼidaibara, ãyi mebẽrãta kʼarebadaibara adewara dayirãbara jʉrʉdaibara maʉ̃ra mebẽrã sãwũã kʼarebadaita (Hech. 12:5; 2 Cor. 1:10, 11).

DAYIRÃ KʼAREA IPIDAPANɄNE

13. ¿Sãwũã dayirã kʼarea ipidabʉba aduabiseabʉ Jeowa ʉ̃rʉ akʉza iyi organizasion ʉ̃rʉ ĩjãbʉta?

¹³ Dayirã mebẽrã Jeowa odebʉ ẽãta, dayiʉ̃me kolegiode estudiabʉta akʉza dayiʉ̃me trajabʉta ipidaseabʉ dayirãba Daizeze bedʼeata jaradiabʉ kʼarea akʉza Jeowaba zokʼabʉta obʉ kʼarea (1 Ped. 4:4). Ãya jaraseapanʉ: «Mʉ̃mara bʉra ẽbẽra bia, mamina bʉ religionbara aukʼara nekʼãrẽta omarẽã zokʼabʉ». Ʉ̃kʉrʉra ibia bedʼeada ẽ ẽbẽra kongregasioneba ãĩ bʉeda ʉ̃rʉ, ãya jarabʉ: «¿Sãwũã jarai marara ẽbẽra biata kʼãwũã opanʉbʉrʉ?». Mawũã jarapanʉba daya ĩjãbʉta adua wãbiseabʉ, maʉ̃ba dayikʉza widibiseabʉ: «¿Jeowabara iyita nekʼãrẽ mejãcha omarẽã jʉ̃ãbʉka? ¿Iyi organizasionbara nekʼãrẽ mejãcha omarẽã zokʼabʉka?». Bʉta naʉ̃ bedʼea zromane berabarinʉmʉbʉrʉ, ¿sãwũã Jeowa kʼawa baseabʉ akʉza iyi organizasion kʼawa?

14. ¿Kʼãrẽta oibara dayirãbara ẽbẽrarãta Jeowaba zokʼabʉta obʉ kʼarea ipidapanʉnera? (Salmo 119:50-52).

¹⁴ Nekʼãrẽ jõma ora Jeowaba zokʼabʉare bʼaita. Jobʼbara jõma aripe osi Jeowaba zokʼabʉra iyi ʉ̃rʉ ipidapanasimina. Job neũdukʼawua abʉba nekʼãrẽ jõma osi ĩjãbita Jeowaitara kʼãrẽ ẽãta Jobʼba iya zokʼabʉta ũrĩbʉta, mawũã ẽ bʉrʉ ũrĩ ẽãta (Job 4:17, 18; 22:3). Mamina Jobʼbara ũrĩ ẽ basi maʉ̃ bedʼeara, iya kʼawuabasi Jeowaba saʉ̃ta biabʉta akʉza saʉ̃ta zeri ẽã ʉ̃rʉ zokʼabʉra jõma aripe basita. Maʉ̃ba nekʼãrẽ jõma osi Jeoware bʼaita akʉza iduaribi ẽ basi wuabemaraba iyi Jeowaʉ̃me kʼẽrẽpa bʼaita iduaribimarẽã (Job 27:5, 6). ¿Kʼãrẽta kʼawuapanʉ dayirãbara? Iduaribida ẽ baibara dayirã kʼarea ipidapanʉ kʼarea krĩchaita Jeowaba zokʼabʉra zeri ẽãta. Krĩchara bʉ sãwũã zebʉrʉta, ¿bʉa ũdu zebʉrʉ ẽka Jeowaba zokʼabʉra yibiata akʉza bʉta kʼareba zebʉrʉta? Maʉ̃ kʼarea zarea ora Jeowa organizasionʼare bʼaita akʉza iya zokʼabʉ aripe oita. Kʼãrẽ ẽ kʼairata dayirã kʼarea ipidabʉ bʉsida mia abaʉba Jeowadeba jĩga babibe ẽ (akʉra Salmo 119:50-52).

15. ¿Kʼãrẽa Brizit kʼarea ipidapanasi?

¹⁵ Akʉdaya kʼãrẽta berabarisita mebẽã Brizitʼta iyira Indiadebema. Iyi mebẽrãra iya ĩjãbʉ kʼarea ipidapanasi. Tẽã 1997de buru kʼoeside, iyi kima Jeowa ode bʉ ẽãta trajo aduasi, maʉ̃ kʼarea Brizit kimaba jarasi iyita akʉza yi mebẽrãbawara wãibarabasita awuru pʉwʉrʉma yi mebẽrãbʉidu. Mamina Brizitʼbara bedʼea zromara audre ũdusi, yi kimata trajo neẽ baera iyira ewariza trajaibarabasi yi mebẽrãba nesidabʉ diaya, adewara ãba yi jʉrebarima wãita 350 kilometro wãibarabasi akʉza yi kima mebẽrãba kãga ẽ basi ãyi Jeowa ode panamarẽã, maʉ̃ kʼarea ãyira wãibarabasi awuru pʉwʉrʉma. Maʉ̃are yi kimasida mesera beisi, tẽã yi kau poaga 12bʉta kanserba beasi. Maʉ̃ba wuabʉrʉ bedʼea zromata ũdusi, yi mebẽrãba jarasida baera ãyi kʼarea jõma mawũã berabarisita, jarasida ãyita Jeowa ʉ̃rʉ Kʼawuabipanʉrã ba ẽ basibʉrʉ, naʉ̃ kayiruata kʼãwũã berabari ẽ bakasita. Mawũãsidu Jeowa ĩjãbʉta idubʉ ẽ basi akʉza iyi organizasion kʼawabasi.

16. ¿Kʼãrẽ nebiata ũdusi Brizitbara Jeowa kʼawabʉ kʼarea akʉza iyi organizasion kʼawabʉ kʼarea?

¹⁶ Brizitʼra iyi kongregasioneba jĩgabasi baera, zõrãrã kongregasion akʉbari abaʉba jarasi iyi deda ãba yi jʉre bamarẽã akʉza iyi bʉmae Daizeze bedʼeata jaradia bamarẽã. Nããrãra iyitara zarebasi maʉ̃ oita, mamina osi mebẽãba jarabʉ kĩrãkʼa. Ãba yi jʉresi iyi deda akʉza ewari jʉrʉsi yi mebẽrãbawara semanaza Jeowa ʉ̃rʉ kʼawuaita. ¿Kʼãrẽta ũdusi iya mawũã oda kʼarea? Brizitbara ẽbẽrarã mejãchaʉʼa jaradia jʉ̃drʉsi Daizeze Bedʼeata akʉza ʉ̃kʉrʉta buru kʼoesida, maʉ̃ta poaga 2005de yi nãã edebariba jʉ̃drʉsi. Maʉ̃ kʼarea Jeowaba iyaʼa nebiata mejãcha diasi, iyi ʉ̃rʉ ĩjãbasi baera akʉza iyi organizasionʼare kʼẽrẽpabasi baera, yi kaurãra Jeowaʉ̃me kʼẽrẽpapanʉ akʉza iyi bʉmae kongregasion ũmebʉ. Brizitbara ĩjãbʉ Jeowaba kʼarebasita iyi bedʼea zroma awuantaita akʉza yi mebẽrã iyi kʼarea ipidabʉta awuantaita.

JEOWAɄ̃ME KʼẼRẼPA BARA AKɄZA IYI ORGANIZASIONʼɄ̃ME

17. ¿Kʼãrẽta odaita krĩchadaibara?

¹⁷ Diarubara kãgabʉ dayirãba ĩjãnamarẽã Jeowabara kʼareba ẽãta dayirãba bedʼea zroma ũdubʉrʉdera akʉza Jeowa organizasionta kʼarebapanʉbʉrʉ dayirãbara wuabʉrʉ bedʼea zromata ũduita. Diarubara kãgabʉ dayirãra pera sentidamarẽã mebẽrã dayirã nãã edepanʉrata jidada kʼãrãpe karselde bʉepanʉ kʼarea. Dayirã kʼarea ipidabʉba Diarubara kãgabʉ dayirãba krĩchadamarẽã Jeowaba zokʼabʉra zeri ẽãta akʉza ĩjãna ẽ marẽã iyi organizasion ʉ̃rʉ. Mamina dayirãbara biʼia kʼawuabʉ Diaruba sãwũã sewakĩrãbʉra, maʉ̃ kʼarea yi sewabida ẽ (2 Cor. 2:11). Krĩchapanʉ jipa ũrĩna ẽ baita Diaruba sewa nebʉra jarabʉra, awuarabʉrʉ krĩchapanʉ Jeowaʉ̃me akʉza iyi organizasionʼʉ̃me kʼẽrẽpa bʼaita. Kĩrãbeidua Jeowabara dayirãra doba amae ẽ baita (Sal. 28:7). Maʉ̃ kʼarea iduaribirãra nekʼãrẽba Jeowadeba jĩga babimarẽã (Rom. 8:35-39).

18. ¿Kʼãrẽta akʉdai wuarebema artikulodera?

¹⁸ Naʉ̃ artikulode kʼawuasida, ʉ̃kʉrʉ bedʼea zroma dayirãba ũduseabʉta. Mamina dayirãbara kongregasione ũduseabʉ bedʼea zroma Jeowa ʉ̃rʉ ĩjãbʉta akʉza iyi organizasion ʉ̃rʉ ĩjãbʉta aduabiseabʉta. Maʉ̃ bedʼea zromara, ¿sãwũã awuantaseabʉ dayirãbara? Naʉ̃ ʉ̃rʉ kʼawuadayi wuarebema artikulode.