¿Kĩrãbebʉka?

Naʉ̃ poagade Jarakabʉ ʉ̃tʉ zedara, ¿jõma bia akʉsika? Akʉra panʉseabʉ kʼawuaita nama edre widibʉta:

¿Kʼãrẽ nebiata ũdui ewari jʉrʉbʉbʉrʉ ũrĩta Jeowa ʉ̃rʉ, krĩchaita iyi ʉ̃rʉ akʉza bedʼeabʉbʉrʉ?

O biata jidadayi, audre nejaradiabari biabayi, dayirãba ĩjãbʉra audre zareabayi, audre kãgadayi Jeowata (w22.01, pagina 30 akʉza 31).

¿Sãwũã kʼarebai Jeowa ʉ̃rʉ ĩjãiba akʉza iyi organizasion ʉ̃rʉ?

Kʼãwũãena ĩjãibara Jeowaba nekʼãrẽ sãwũã obʉ ʉ̃rʉ, kʼãrẽ krĩcha ẽã zõrãrãba kʼãrẽa mawũã omarẽã jarabʉta. Maʉ̃ba zʉbʉria zroma zebʉrʉdera zare ẽ bayi ãya zokʼabʉ ũrĩta maʉ̃ra dayima bʉ ẽ mina (w22.02, pagina 4-6 bayeda).

¿Kʼãrẽa angelbara Zacaríasʼa jara ũrĩbisi Zorobabelba plomada juwade erbada ʉ̃rʉ? (Zac. 4:8-10).

Naʉ̃ba angelbara jarakĩrãbasi templo biʼia parã ba ẽ basimina nãã erpanana kĩrãkʼa templora jõma parãnaita. Adewara jõma aripe oibasita Jeowaba kãgabʉ kĩrãkʼa (w22.03, pagina 16 akʉza 17).

¿Sãwũã yiza bia baseabʉ bedʼeabʉdeba? (1 Tim. 4:12).

Ibia bedʼeabʉde jaradia wãbʉrʉde, nejaradiabari bia babʉrʉde, sobiade trãpanʉne, badua juwa ʉ̃ta wuapanʉne panʉita, yãrãta imitia jara ẽãne, bedʼea jarabʉde wuabemara kʼarebaita, soiduba wãrĩnuta jarapanʉne (w22.04, pagina 6-9 bayeda).

¿Kʼãrẽa Daniel kapitulo 7de nedʉwʉrʉra kimare ʉ̃rʉ bedʼeabʉra abarikabʉ Apocalipsis 13:1, 2de jarabʉme?

Nedʉwʉrʉ zroma Apocalipsis 13de bedʼeabʉbara jarakĩrãbʉ ẽ nokʼo abapai, bari jaraita Romata, awuarabʉ jarakĩrãbʉ nokʼo zromara naʉ̃ drʉa jõmaʉ̃mae zokʼa zebʉrʉrata (w22.05, pagina 9).

¿Sãwũã ũdubipanʉ ĩjãbʉta Jeowaba jõma ara oita?

Nemitia odata kĩrãduapanʉbʉrʉ ũdubidayi ĩjãbʉta Jeowaba obʉra aripe obʉta. Dayirãba ĩjãpanʉbʉrʉ Jeowaba jõmaʉ̃ta daucha kʼawua oita, mawũãra dayirãitara zare ẽ bayi iyi juwade amaeita awuru ẽbẽraʉ̃me bedʼea zroma erbʉra (w22.06, pagina 10 akʉza 11).

Mebẽã abaʉba jarabʉbʉrʉ awurura daidu yiwidʼimarẽã, ¿kʼãrẽ ʉ̃rʉ krĩchaibara?

Mebẽã mawũã yiwidʼibʉbara kĩrãbeibara kʼẽã ẽ baibarata akʉza bedʼea jara ẽ baibarata yiwidʼibʉrʉdera. Maʉ̃ kʼarea mebẽã ãba yi jʉreita yiwidʼibʉrʉdera, mejãcha bedʼea ẽ baibara (Mat. 6:7) (w22.07, pagina 24).

¿Kʼãrẽta jarakĩrãbʉ yi nemitia odapeadara piradrʉita ãyi kʼawua odaita? (Juan 5:29).

Jarakĩrãbʉ Jeowaba kʼawua oẽ baita ẽbẽraba ãyi bei nãã kʼãrẽ odadeba awuarabʉrʉ jarakĩrãbʉ ẽbẽra jẽda piradrʉda tẽã Jesuba akʉita ãyi sãwũã panʉta akʉza kʼẽrẽpapanʉ kʼawuaita (w22.09, pagina 18).

¿Kʼãrẽta jarasi mebẽã Rutherfordba asamblea septiembre 1922de?

Asamblea Cedar Point, (Ohio, Estados Unidos), mebẽãba jarasi: «Nokʼobara zokʼanʉmʉ, marara iyi Nokʼo ʉ̃rʉ jaradiabari. Jaraidua, jaraidua, jaraidua Daizeze Nokʼoba sãwũã zokʼanʉmʉta» (w22.10, pagina 3-5 bayeda).

Isaías kapitulo 30de bedʼea ũbea ũdubibʉ sãwũã Jeowaba kʼarebabʉta.

Nããra, dayirã yiwidʼibʉ ũrĩbʉde akʉza panʉbʉde. Ũmeta, dayirãʼa nekʼãrẽ jaradiabʉde. Akʉza ũbeata, idi ewade dayirãʼa nebia diabʉde akʉza ʉ̃ra zeide (w22.11, pagina 8).

¿Kʼãrẽa jaraseapanʉ Salmo 37:10, 11, 29 nãã aripe berabarisita akʉza ʉ̃ra zeidebida aripe berabarita?

Nokʼo Davidba bedʼeabʉdade jarabasi nokʼo Salomónba zokʼabʉrʉde sãwũã bʼaita. Salomónba zokʼabasidera Daizeze pʉwʉrʉra nekʼãrẽ biata mejãcha erbasi. Jesubara jara ũrĩbisi bersikulo 11de ẽjũã kĩrãwãreã ʉ̃rʉ jarabʉta (Mat. 5:5; Luc. 23:43) (w22.12, pagina 8-10 bayeda, 14).