Bedʼea zroma erbʉde bʉra aduʼa baseabʉ

1. ¿Kʼãrẽ Daizezedeba aduʼa bʼaita zebʉra akʉza kʼãrẽ nebiata ũduseapanʉ maʉ̃neba? (Filipenses 4:6, 7).

IDI ewadera ẽbẽrarãbara kʼawua ẽ kʼãrẽta jarakĩrãbʉta Daizezedeba aduʼa bʼaita zebʉra. Naʉ̃ba jarakĩrãbʉ Daizezeʉ̃me aduʼabʉta kʼawuapanʉ baera Daizezeʉ̃me biapanʉta. Dayirãta Jeowaʉ̃me aduʼapanʉbʉrʉ wãrĩnu ĩjãpanʉ iya kʼarebaita (akʉra Filipenses 4:6, 7). Adewara aduʼapanʉ ẽbẽrarã Jeowa kãgapanʉbawara akʉza biapanʉ Jeowaʉ̃me (1 Tes. 5:23). Dayirãba Jeowa ũdukʼawuabʉrʉde, iyi ʉ̃rʉ ĩjãpanʉne akʉza opanʉne iya zokʼabʉta, Jeowadeba aduʼa bʼaita zebʉba kʼarebaseabʉ, dayirãba bedʼea zroma erbʉde aduʼa bʼaita.

2. ¿Sãwũã kʼawuapanʉ Jeowaba dayirã diaseabʉta aduʼa bʼaita?

² ¿Wãrĩnu dayirãra aduʼa baseapanʉka kaya zroma ũdubʉrʉde, drʉade neida berabaribʉ ũdubʉde akʉza pẽwãpanʉne? Mawũã berabaribʉta ũdubʉrʉdera dayirãra mejãcha perabʉ, mamina Jesuba iyi kʼaidubemara so zarea diasi naʉ̃ta jaraside: «Mawũẽ sopuarãũdua, miã perarãũdua» (Juan 14:27). Mebẽrã mejãchaʉba ũrĩpanʉ naʉ̃ ũrãgʼata, Jeowa kʼarebadeba ãya ũdubʉ aduʼa bʼaita bedʼea zroma ũdupanʉmina.

¿SÃWŨÃ ADUʼA BASEAPANɄ KAYA ZROMANE?

3. ¿Sãwũã kaya zromabara aduabiseabʉ dayirã aduʼa bʼaita?

³ Kaya zromabara ẽbẽra bebʉra jipa awuara babiseabʉ. Bari jaraita, COVID-19bara ẽbẽrarã mejãchaʉta bedʼea zroma ũdubisi. Ẽbẽrarã maʉ̃ ʉ̃rʉ estudiabʉba jarasida ẽbẽra mejãchaʉta bia kʼãĩna ẽ basita, mejãcha krĩcha zroma opanasita, adewara mejãcha sopʉa sentipanasita. Akʉza ʉ̃kʉrʉra wuabʉrʉ itua do jʉ̃drʉsita akʉza wuabʉrʉ chirua kayirua bʉratʉma do jʉ̃drʉsita, adewara ãyi mebẽrãinʉ yõpanasita akʉza ẽbẽrarã mejãchaʉta ãyikʉza beakĩrãpanasita. ¿Dayirãbara kʼãrẽta oibara krĩcha zroma oẽ baita awuarabʉrʉ aduʼa bʼaita?

4. ¿Jesuba propesia jaradabara sãwũã aduʼa babiseabʉ?

⁴ Jesubara jarasi naʉ̃ ewari jõbodoarera, bʼaita kaya zromara naʉ̃ drʉa jõmaʉ̃nẽ (Luc. 21:11). ¿Naʉ̃ kʼawuaiba sãwũã kʼarebabʉ aduʼa bʼaita? Dayirãra krĩcha zroma oda ẽ kʼawuapanʉ baera Jesuba jaradata aripe berabarinʉmʉta. Maʉ̃ kʼarea ũrĩpanʉ Jesuba ũrãgʼa diadata ẽbẽrarã naʉ̃ ewari jõbodoarepanʉra: «Jʉra kʼawua baidua akʉza perarãidua» (Mat. 24:6).

5. (1) Filipenses 4:8, 9 bayeda jarabʉdera, ¿kʼãrẽ ʉ̃rʉ yiwidʼiseabʉ kaya zroma ũdupanʉnera? (2) ¿Sãwũã Daizeze Bedʼea grawama ũrĩbʉbara kʼarebaseabʉ?

⁵ Kaya zroma naʉ̃ drʉa jõmaʉ̃nẽ bʉsiba dayirãra krĩcha zroma obiseabʉ. Mawũã berabarisi mebẽã Desita.b Iya ũduside iyi yãbata, yi yãba wauta akʉza iyi medikota COVID-19ba beisita, iyira mejãcha perasi kayakĩrã ẽ basi baera akʉza yi papasida kayabikĩrã ẽ basi baera. Adewara krĩcha zroma obasi maʉ̃ kaya zroma kʼarea iyi trajo aduai baera, maʉ̃ba yiko edaita akʉza de arriendo pagaita neẽ baibasi baera. Mamina Desira aduʼabasi. ¿Sãwũã ũdusi iya maʉ̃ra? Iyira Jeowaʼa yiwidʼisi kʼarebamarẽã aduʼa bʼaita akʉza bia krĩchabimarẽã (akʉra Filipenses 4:8, 9). Desibara sentibasi Jeowata iyaʼa bedʼeabʉ kĩrãkʼa Daizeze Bedʼea grawamata ũrĩbaside. Iya jarabʉ: «Mebẽrãba sãwũã lebadaba, kʼarebasi mʉ̃ aduʼa sentita akʉza sentibasi Jeowaba mʉ̃ta akʉbʉta» (Sal. 94:19).

6. ¿Sãwũã kʼarebayi bʉyidobaʉba Daizeze Bedʼea estudiaiba akʉza ãba yi jʉrebarima wãiba?

⁶ Kaya zroma naʉ̃ drʉa jõmaʉ̃mae bʉbara, daya nãã obada kĩrãkʼa obi ẽ mina, zarea odaibara Daizeze Bedʼea dayidobaʉba kʼawuabʉta idubʉda ẽ baita akʉza ãba yi jʉrebarima wãbʉta. Nebʉra dayirã kartaranebʉba akʉza bideoranebʉba, kĩrãbebibʉ mebẽrã kʼẽrẽpabʉta ãyi bedʼea zromane berabaribʉmina bʉ kĩrãkʼa (1 Ped. 5:9). Adewara ãba yi jʉrebarima wãbʉbara, kʼarebayi Daizeze Bedʼeadeba krĩcha bia jidaita akʉza dayirãi so zarea diadaita (Rom. 1:11, 12). Bʉa krĩchabʉrʉde Jeowaba sãwũã kʼarebasita iyi nezokʼara kʼẽrẽpabʉta ãyi kayabaside, doba sentipanaside akʉza pera sentibaside, naʉ̃ba kʼarebayi bʉa audre ĩjãita Jeowa ʉ̃rʉ akʉza ĩjãñi iya wãrĩnu kʼarebaita.

7. ¿Kʼãrẽ yiza biata diasi apostol Juanbara?

⁷ Kaya zromaba mebẽrãneba jĩga babibʉ baera, zarea ora ãyibawara badua bedʼea bʼaita. Edaʉde bʉra sentiseabʉ apostol Juan kĩrãkʼa iyi neũdukʼawua Gayota iyi kĩrãbita ũdukĩrãbaside (3 Juan 13, 14). Juanba kʼawuabasi baera iyi neũdukʼawua Gayoʉ̃me atia yi ũduda ẽ baita, maʉ̃ kʼarea iya kartata bʉ dia bʉesi. Bʉta mebẽrãʉ̃me kĩrãbita bedʼeabe ẽ bʉrʉ, zarea ora selulardeba trʉ̃ita, mensaje dia bʉeita, mawũã ẽ bʉrʉ internetʼneba bedʼeara. Mawũã opanʉbʉrʉ doba sentida ẽ bayi akʉza aduʼapanañi. Bʉta krĩcha zroma obʉbʉrʉ bedʼeara zõrãrãbawara akʉza ũrĩra ãya ũrãgʼa diabʉta (Is. 32:1, 2).

¿SÃWŨÃ ADUʼA BASEAPANɄ DRɄADE NEIDA BERABARIBɄRɄDE?

8. ¿Drʉade neida berabaribʉbara sãwũã aduabiseabʉ aduʼa bʼaita?

⁸ Bʉta oi bawanaba, doba, mawũã ẽ bʉrʉ drʉa ureba zʉbʉria berabaribisibʉrʉ, maʉ̃ kʼarea krĩcha zroma obʉbaibara ewari bio berabarisibʉsida. Maʉ̃ne bʉ mebẽrãta beisibʉrʉ, mawũã ẽ bʉrʉ bʉa nekʼãrẽ bia erbadata aduasibʉrʉ, audre krĩcha zroma oseabʉ akʉza bʉyikʉza kĩrʉseabʉ. Naʉ̃ba jarakĩrãbʉ ẽ bʉa kʼãrẽ biata aukʼara krĩchabʉta akʉza bʉa ĩjãbʉ aduasita. Bʉra mawũã mejãcha zʉbʉria berabarisi baera krĩcha mitiata erbaseabʉ (Job 1:11). Mawũãsidu bʉra aduʼa baseabʉ, ¿sãwũã ũduseabʉ maʉ̃ra?

9. ¿Kʼãrẽta jarasi Jesubara dayirã jʉra kʼawuapanamarẽã naʉ̃ drʉade neida berabaribʉrʉde?

⁹ Ʉ̃kʉrʉ ẽbẽrabara krĩchapanʉ ãyira neida berabari ẽ baita. Mamina dayirãbara biʼia kʼawuapanʉ badu ewaride neida berabarita. Kĩrãbedaibara Jesuba jaradata iyi kʼaidubemara, iya jarasi naʉ̃ drʉa jõmaʉ̃nẽ bʼaita drʉa ureta akʉza wuabema nekayiruarata (Luc. 21:11). Adewara Jesubara jarasi naʉ̃ ewari jõbodoarera mejãcha bʼaita ẽbẽra kayiruarãra. Maʉ̃ra idira dayirãba ũdupanʉ (Mat. 24:12). Jesubara jara ẽ basi bari ẽbẽrarã naʉ̃ drʉadebemata mawũã berabarita, Daizeze odepanʉrasida zʉbʉriaya asi (Is. 57:1; 2 Cor. 11:25). Jeowabara dayirã naʉ̃ drʉade neida berabaribʉdebara ẽdrʉbi ẽ mina, Jeowaba dayirãʼa jõma diabʉ aduʼa sentidamarẽã.

10. Drʉade neida berabari nãã kʼãrẽ okʼawuabʉbara, ¿sãwũã ũdubibʉ Daizeze ʉ̃rʉ ĩjãbʉta? (Proverbios 22:3).

¹⁰ Nekʼãrẽta okʼawuabʉbʉrʉ drʉade neida berabari nãã, naʉ̃ba kʼarebayi aduʼa bʼaita. Drʉade neida berabari nãã nekʼãrẽ okʼawuabʉbara, ¿ũdubibʉka Jeowa ʉ̃rʉ ĩjã ẽãta? Mawũã ẽ, awuarabʉrʉ ũdubibʉ ĩjãbʉta Jeowara zarea barabʉta dayirã kʼarebaita, ¿kʼãrẽa mawũã jarapanʉ? Daizeze Bedʼeaba jaradiabʉ baera drʉade neida berabari nãã nekʼãrẽ okʼawuadamarẽã (akʉra Proverbios 22:3). Dayirã kartaraneba, ãba yi jʉrepanʉneba, bedʼea jarakapanʉneba, Jeowa organizasionbara jarabʉ nekʼãrẽta okʼawuadamarẽã drʉade neida berabari nãã.c ¿Jeowa ʉ̃rʉ ĩjãpanʉka? Mawũãra ũrĩnañi naʉ̃ ũrãgʼara drʉade neida berabari nãã.

11. ¿Kʼãrẽta kʼawuaseabʉ Margaret yizadebara?

¹¹ Akʉdaya mebẽã Margaret kʼãrẽ berabaridata. Nokʼoraba jarasida iyi dedaʉba aña wãmarẽã oita babʉsi baera. Ẽbẽrarã mejãchaʉta mamaʉ̃ba ãĩ wãbʉsi baera, ora karruba bira totosi, maʉ̃ba aña wãbe ẽ basi. Maʉ̃ne ãyi audura nãrĩba birasi, Margaretʼra ariya karrude pikibesi. Mamina Margaretʼra bei ẽ basi, iya abasi baera iyi bolsode mapata. Margaretbara maʉ̃ oi bawai nãã, akʉ jʉ̃ẽbaribasi o sãwũãbʉta. Mawũã kʼawuaita saʉ̃ ode wãita neida berabaribʉrʉde. Drʉade neida berabari nãã iya odaba kʼarebasi Margaret bei ẽ baita.

12. ¿Kʼãrẽa ũrĩnaibara dayirãʼa omarẽã zokʼapanʉra?

¹² Dayita bei ẽ marẽã akʉza wuabemarata bei ẽ marẽã, edaʉde nokʼorabara jarapanʉ dayi deda piki bamarẽã, mawũã ẽ bʉrʉ dayi dedaʉba mesera ãĩ wãmarẽã, mawũã ẽ bʉrʉ nekʼãrẽ awuruta omarẽã zokʼapanʉ. Mamina ʉ̃kʉrʉ ẽbẽrabara ũrĩkĩrã ẽ ãya deda nekʼãrẽ bia erbʉta amaekĩrã ẽ baera. Mamina, ¿kʼãrẽta opanʉ kristianorabara? Daizeze Bedʼeaba panʉbʉ: «Jesu kʼarea dayirãra ẽbẽra buru edre bʼaibara, nokʼora edre, ãyira yi buru baera mawũã ẽ buru yi zokʼabʉra edre» (1 Ped. 2:13, 14). Idi ewaridera Jeowa organizasionbara dayirãʼa jaradiabʉ kʼãrẽta oibarata neida berabaribʉrʉde. Dayirãʼa badua kĩrãbebipanʉ zõrãrã diamarẽã dayi numero selularta akʉza jaramarẽã samabʉta, mawũã neida berabaribʉrʉde dayirãbawara bedʼeamarẽã, ¿bʉara obarika maʉ̃ra? Akʉza dayirã jaraseapanʉ sama mĩrʉ wãseabʉta, sama wãibarata neida berabaribʉrʉde, mawũã ẽ bʉrʉ sama ũduseabʉta yikorata, remediorata, baniata, adewara sama akʉza sãwũã kʼarebaseapanʉta wuabemarata. Dayirãba naʉ̃ta oẽ bʉrʉ zʉbʉriaseapanʉ dayirãta akʉza zʉbʉriabiseapanʉ zõrãrã kongregasionebemarata. Kĩrãbedaibara naʉ̃ra mebẽrãbara dayirãta akʉpanʉta (Heb. 13:17). Margaretba jarabʉ: «Mʉ̃a krĩchabʉ mʉ̃aʼa zõrãrã bedʼea ũrĩbʉba akʉza organizasionba jarabʉ obʉba, kʼarebabʉta mʉ̃ bei ẽ baita».

13. Mebẽrã mejãchaʉta ãyi drʉadeba ãĩ wãbʉmina, ¿kʼãrẽba kʼareba zebʉrʉ sobia bʼaita akʉza aduʼa bʼaita?

¹³ Mebẽrã mejãchaʉta yõ kʼarea, mawũã ẽ bʉrʉ neida berabaribʉ kʼarea, ãyi drʉadeba aña wãpanʉ. Mamina ãyira zarea opanʉ ãyi bʉmae sobia bʼaita akʉza Jeowaba zokʼabʉ oita. Ãyara kristianora nããrabemane kĩrãkʼa opanʉ, naʉ̃ra kristianorãra ãyi drʉadeba aña wãsi pẽwãpanasi baera, mamina ãya idubʉda ẽ basi Daizeze ʉ̃rʉ jaradiapanʉra (Hech. 8:4). Daizeze Bedʼea jaradiabʉba kʼarebabʉ naʉ̃ra mebẽrãba Daizeze Nokʼo ʉ̃rʉ krĩchaita, mawũã ãya kʼãrẽ zʉbʉria ũdubʉ ʉ̃rʉ krĩcha ẽ baita. Naʉ̃ kʼãwũã obʉba kʼarebabʉ ãyi sobia bʼaita akʉza aduʼa bʼaita.

¿SÃWŨÃ ADUʼA BASEAPANɄ PẼWÃBɄDADE?

14. ¿Dayirã pẽwãbʉdabara sãwũã jãrĩseabʉ aduʼapanʉta?

¹⁴ Dayirã pẽwãbʉdadera nekʼãrẽ dayirã aduʼa babibʉta aduaseapanʉ. Dayirãra mejãcha sobiapanʉ wuabemabawara ãba yi jʉrebʉde, Daizeze bedʼea jaradiabʉde akʉza kʼawuapanʉne jidada ẽ baita karselde bʉeita. Dayirã aduʼabʉta jãrĩbʉdadera mejãcha krĩcha zroma oseapanʉ akʉza peraseapanʉ kʼawua ẽ baera kʼãrẽta berabarita. Mamina jʉra kʼawuabaibara aukʼara krĩcha zroma oẽ baita, Jesuba jarasi baera dayirã pẽwãbʉdadera ʉ̃kʉrʉra Daizezedeba jĩga bʼaibasita (Juan 16:1, 2). Mawũẽra, ¿sãwũã aduʼa baseapanʉ dayirã pẽwãpanʉne?

15. ¿Kʼãrẽa perada ẽ baibara pẽwãbʉdadera? (Juan 15:20; 16:33).

¹⁵ Daizeze Bedʼeaba jarabʉ: «Yi ẽbẽra jõma Jesukristo bedʼea ĩjãkĩrãbʉra, pẽwãnaña abʉ» (2 Tim. 3:12). Mebẽã Andréi pʉwʉrʉdera Daizeze bedʼeara idu jaradiabida ẽ basi, maʉ̃ba iyitara zareabasi ũrĩta Daizeze Bedʼeaba jarabʉta, Daizeze pʉwʉrʉra pẽwãnaibasita. Iya krĩchabasi: «Namara mejãchabʉ Jeowa ʉ̃rʉ Kʼawuabipanʉrãra, ¿nokʼorabara sãwũã odai Jeowa ʉ̃rʉ Kʼawuabipanʉrã jõma jidaita?». Mawũã krĩchabʉba mejãcha krĩcha zroma obisi Andréira. Mamina wuabema mebẽrãbara Jeowa ʉ̃rʉ ĩjãsida, krĩcha ẽ basi ãyira jidada ẽ bʼaibasita, awuarabʉrʉ kʼawuapanasi ãyira badu ewaride jidadaibasita. Mawũãsidu ãyira mejãcha krĩcha zroma oẽ basi Andréi kĩrãkʼa. Mawũẽra tẽã juneane Andréibara naʉ̃ra mebẽrãne kĩrãkʼa osi, Jeowa ʉ̃rʉ ĩjãsi. Maʉ̃ba atiara iyira aduʼabʉ bedʼea zroma ũdubʉmina. Dayirãsida abarika berabariseabʉ. Jesuba jarasi dayirã pẽwãpanʉmina kʼẽrẽpapanaibasita (akʉra Juan 15:20; 16:33).

16. ¿Kʼaira bedʼeata ũrĩnaibara dayirã pẽwãbʉdadera?

¹⁶ Dayirãʼa Daizeze bedʼea idu jaradiabida ẽãnera, beteldebemaraba akʉza zõrãrãba jarapanʉ kʼãrẽta oibarata. Ãyira panʉ dayirã kʼarebaita, yiko jauredebema diaita, mawũã dayirãba Daizeze bedʼea jaradia panamarẽã dayirãba oseabʉde. Zarea ora ũrĩta bʉaʼa zokʼapanʉta, bʉita zaremina ũrĩta ãya kʼãrẽa mawũã omarẽã jarabʉta (Sant. 3:17). Adewara yãrã jararãra mebẽrã ʉ̃rʉ akʉza kongregasionba kʼãrẽ obʉ ʉ̃rʉ (Ecl. 3:7).

17. Apostolera nããbema siglodebema kĩrãkʼa, ¿dayirãbara kʼãrẽta odaita krĩchaibara?

¹⁷ Diarubara audre pẽwãbʉ Daizeze pʉwʉrʉta, ãya Jesu ʉ̃rʉ jaradiapanʉ baera (Apoc. 12:17). Iduaribirãra Diaruba akʉza iyi juwa edrebʉba bʉta daʉperamarẽã. Dayirã pẽwãpanʉne Daizeze bedʼea jaradiabʉba kʼarebayi sobia bʼaita akʉza aduʼa bʼaita. Nããrabema siglode judiora nokʼoba apostolera jarasidade Daizeze bedʼea jaradiabʉta idubʉdamarẽã, ãyara idubʉda ẽ basi Daizeze bedʼea ʉ̃rʉ jaradiaita, naʉ̃ba kʼarebasi ãyi sobia bʼaita (Hech. 5:27-29, 41, 42). Daizeze bedʼea idu jaradiabida ẽãnera, jʉra kʼawua jaradiadaibara (Mat. 10:16). Dayirãba zarea opanʉbʉrʉ aduʼapanañi Jeowaba zokʼabʉta opanʉ baera akʉza ẽbẽrarã Daizeze bedʼeata jaradiapanʉ baera.

DAIZEZEBA BɄRA ADUʼA BABIYI

18. ¿Kʼaiba kʼarebaseabʉ dayirã aduʼa bʼaita?

¹⁸ Ĩjãra bʉa bedʼea zroma ũdubʉmina aduʼa baseabʉta. Dayirãba bedʼea zroma ũdubʉrʉdera kĩrãbedaibara Jeowabʉrʉ aduʼa babiseabʉta. Jeowa ʉ̃rʉ ĩjãra kaya zroma zebʉrʉde, naʉ̃ drʉade neida berabaribʉrʉde akʉza pẽwãbʉdade. Jeowa organizasion kʼawa bara akʉza krĩchara iya aranʉ kʼãrẽ nebia weya abʉ ʉ̃rʉ, dayirãba mawũã opanʉbʉrʉ Jeowaba kʼarebayi aduʼa panaita (Filip. 4:9). Wuarebema artikulode kʼawuadayi, sãwũã kʼarebaseapanʉta wuabema mebẽrã zʉbʉria berabaribʉrasida aduʼapanamarẽã.