Kʼarebara wuabemara bedʼea zroma awuantaita

1. ¿Jeowaba sãwũã panʉbʉ iyi nezokʼara kʼẽrẽpabʉ yiwidʼibʉra?

¿KʼAWUABASIKA bʉa Jeowaba bʉ zokʼaseabʉta mebẽrã yiwidʼibʉ panʉita? Zõrãrãbʉrʉ, zõrãrã kʼarebabaribʉrʉ, yi nãã edebaribʉrʉ, Daizeze bedʼea jaradiabaribʉrʉ, kʼarebaseabʉ. Zõrãbʉbʉrʉ, warrarabʉbʉrʉ, yuwẽrãbʉrʉ akʉza yumakẽrãbʉrʉ, kʼarebaseabʉ. Mebẽã abaʉba Jeowa kʼarebata jʉrʉbʉbʉrʉ iya kʼarebabʉ zõrãrãneba, mawũã ẽ bʉrʉ mebẽrã Jeowa ode kʼẽrẽpabʉdeba, mawũã ãya so zarea diamarẽã (Col. 4:11). Dayirãra sobiapanʉ mebẽrã mawũã kʼarebabʉrʉde. Dayirãba dayirã mebẽrã kʼarebaseapanʉ akʉza so zarea diaseapanʉ ãyi kayabʉde, drʉade neida berabaribʉrʉde akʉza pẽwãpanʉne.

KʼAREBARA WUABEMARA KAYA ZROMA ZEBɄRɄDE

2. ¿Edaʉde kʼãrẽa zare baseabʉ kaya zroma zebʉrʉde wuabemara kʼarebaita?

² Kaya zroma zebʉrʉdera zare baseabʉ dayirã yiya kʼarebaita. Bari jaraita, edaʉde bʉa akʉ wãkĩrãbʉ bʉ neũdukʼawuarata, mawũã ẽ bʉrʉ trʉ̃kĩrãbʉ mebẽrã yiko mejãcha neẽbʉta bʉ deidu neko jʉ̃ẽmarẽã, mamina maʉ̃ra obe ẽ ãyi kayaseabʉ baera. Daya edaʉde wuabema kʼarebakĩrãbʉmina zare baseabʉ dayirã mebẽãsi zʉbʉriabʉ baera. Jeowaba bia akʉbʉ daya mebẽrã kongregasionebema kʼarebakĩrãbʉrʉdera (Prov. 3:27; 19:17). ¿Kʼãrẽta oseapanʉ mebẽrã kʼarebaita?

3. ¿Kʼãrẽta kʼawuaseapanʉ zõrãrã Desi kongregasionebemabara? (Jeremías 23: 4).

³ Zõrãrãba oseabʉta. Zõrãrã kongregasionebemabʉrʉ biʼia ũdukʼawuaibara mebẽrã kongregasionebemara (akʉra Jeremías 23:4). Mebẽã Desiba jarabʉ: «Zõrãrã mʉ̃ grupodebemara ãba yi jʉrepanasi mʉ̃me akʉza wuabema mebẽrã mʉ̃ grupodebemabawara jaradia wãita, adewara ãba jemeneita».b Zõrãrãba Desi kʼarebapanasi baera, maʉ̃ba zare ẽ basi ãyitara Desi kʼarebaira, ʉ̃kʉrʉ iyi mebẽrãnebema beisidade COVID-19 kʼarea.

4. ¿Kʼãrẽa zõrãrãbara kʼarebaseapanasi Desira, kʼãrẽta kʼawuapanʉ maʉ̃nebara?

⁴ Desiba jarabʉ: «Mʉ̃a kʼawuabasi zõrãrãra mʉ̃ neũdukʼawuarata, maʉ̃ba zare ẽ basi mʉ̃a jaraita mʉ̃ sãwũã sentibʉra akʉza kʼãrẽba krĩcha obibʉra». ¿Zõrãrãbara kʼãrẽta kʼawuaseapanʉ maʉ̃neba? Biʼia akʉra mebẽrã bʉ juwa edrebʉra, bedʼea zroma zei nãã akʉza ãyi neũdukʼawua bara. Kaya zroma kʼarea mebẽrãta akʉ wãbe ẽ bʉrʉ, bedʼeara ãyiʉ̃me selulardeba mawũã ẽ bʉrʉ nekʼãrẽ awurudeba. Desiba jarabʉ: «Iyabaʉ ewaride zõrãrã awuara awuarakaʉba trʉ̃panasita akʉza mensajeta zokʼa bʉepanasita. Mʉ̃aʼa so zarea diabasi ãya testo dia bʉebadaba, mʉ̃a maʉ̃ra testo ũdukʼawuabasimina».

5. ¿Zõrãrãbara sãwũã kʼawuaseabʉ mebẽrãba nesidabʉra akʉza ãya kʼãrẽta oibara mebẽrã kʼarebaita?

⁵ Mebẽrãba ãya nesidabʉ kʼawuaira widita oibara (Prov. 20:5). ¿Yiko arabia erbʉka mawũã ẽ bʉrʉ remediota, adewara ãya nesidabʉ erbʉka? ¿Ãyi trajo aduasika mawũã ẽ bʉrʉ plata neẽka ãyi arriendo pagaita?, ¿ãya nesidabʉka bʉa kʼarebamarẽã nokʼoraba sãwũã kʼareba diabʉ kʼawuaita? Mebẽrãba mejãcha kʼarebasida Desira iya nesidabʉde. Mamina iyira audre kʼarebasi zõrãrãba kãga ũdubidaba akʉza so zarea diadaba. Iya jarabʉ: «Zõrãrãra mʉ̃me yiwidʼipanasi, mʉ̃a kĩrãbe ẽ mina kʼãrẽ jaradara, mamina mʉ̃a kĩrãbebʉ mʉ̃ sãwũã sentidara, ãya mawũã odadeba Jeowaba mʉ̃aʼa jarabʉrʉ kĩrãkʼa basi: ‹Bʉra abapai ẽã›» (Is. 41:10, 13).

6. ¿Dayirãba kʼãrẽta oseapanʉ mebẽrã kongregasionebema kʼarebaita? (Akʉra potota).

⁶ Kongregasionba oseabʉta. Zõrãrãba kʼarebaibaramina, Jeowaba jarabʉ dayirã jõmaʉ̃ba yiya kʼarebaseabʉta akʉza so zarea diaseabʉta (Gál. 6:10). Dayirãba mebẽã kayabʉta kʼarebabʉbʉrʉ, maʉ̃ba so zarea diaseabʉ. Kʉ̃rã abaʉba kʼarebaseabʉ mebẽã aba kʼareba ne eda diaita. Mebẽã awuruba yiko oseabʉ kayabʉita, mawũã iyi deidu edeita. Kaya zroma eaba wãbʉrʉ mebẽrã jõmaʉ̃ba nesidapanʉ kʼarebata. Ãba yi jʉrebarima wãbʉrʉde, maʉ̃ jõna tẽã mesera wãrãra mebẽrãbawara bedʼeaita, Daizeze deda wãbʉrʉde mawũã ẽ bʉrʉ internetʼneba akʉbʉrʉde. Zõrãrãbida so zarea diadamarẽã nesidapanʉ. Ʉ̃kʉrʉ mebẽrãbara zõrãrãʼa kartata dia bʉepanʉ biga diaita, ãyira mejãcha trajapanʉ baera kaya zroma zebʉrʉdera. Kʼãrẽ yibia dayirãi so zarea diapanʉne akʉza dayirãi kʼarebabʉde (1 Tes. 5:11).

KʼAREBARA WUABEMARA DRɄADE NEIDA BERABARIBɄRɄDE

7. ¿Kʼãrẽ bedʼea zromata ũduseabʉ drʉade neida berabarida tẽã?

⁷ Drʉade neida berabaribʉrʉba ẽbẽra bebʉra awuara babiseabʉ. Ãya nekʼãrẽ erbʉ aduabʉ baera, ãyi deta, ãyi mebẽrãnebemata beibʉ baera. Maʉ̃ nemitiade berabaripanʉ mebẽrãsida. Maʉ̃ kʼarea, ¿kʼãrẽta oseapanʉ ãyi kʼarebaita?

8. ¿Zõrãrãba akʉza mebẽrã buruba kʼãrẽta oseabʉ drʉade neida berabari nãã?

⁸ Zõrãrãba oseabʉta. Zõrãrã, nekʼãrẽ oidua naʉ̃ drʉade neida berabari naena mebẽrã kʼarebaita. Zõrãrãbara jaradiaibara mebẽrã kʼãrẽta odaita neida berabaribʉrʉdera akʉza kʼarebaibara ãya erbamarẽã sãwũã bedʼeaita zõrãrãbawara. Mebẽã Margaretba jarabʉ: «Dai zõrãrã kongregasionebemaba, kongregasionba nesidabʉde jara ũrĩbisida, wabida oira bakʉanʉmʉta akʉza ãya jarasida nokʼora mamabemaba jaradara de amaeibarata, mawũã ẽ bʉrʉ mamaʉ̃ba ãĩ wãibarata, maʉ̃ra bedʼeara ũrĩnaibarabasita». Mawũã mebẽrãba jaradiamarẽã nesidabʉde jaradiasida ãya kʼãrẽ oibarata, semana juesoma berabarida tẽã oira bawasi baera. Mebẽrãbawara semanaza ãba yi jʉrebʉrʉdera, yi mebẽrã burubara jaradiaibara aba abakaʉʼa ãya kʼãrẽ oibarata. Bʉa akʉza bʉ wũãwũãraba kʼawuabʉbʉrʉ drʉade neida berabaribʉrʉde kʼãrẽ oita, mawũãra aduʼabayi.

9. ¿Kʼãrẽta oibara zõrãrãbara naʉ̃ drʉade neida berabari nãã akʉza maʉ̃ tẽãbida jõma daucha erbaita?

⁹ Bʉta zõrãrãbʉrʉ akʉza grupo aba zokʼabʉbʉrʉ, erbaibara bʉ grupodebema selular numerota akʉza biʼia kʼawuaibara ãyi samabʉta. Maʉ̃ jõma erbaibara drʉade neida berabari nãã. Bʉra mebẽrã trʉ̃ta akʉza akʉra iyi selular numerora iyabaʉ kʼawuaita, adewara iyi bʉmae ariyabʉ kʼawuaita. Mawũã drʉade neida berabaribʉrʉde kʼawuayi ãyiʉ̃me sãwũã bedʼeaita akʉza kʼãrẽta nesidabʉta. Bʉa mawũã erbʉra jarara zõrãrã ãba yi jʉredabaria. Maʉ̃ba jaramarẽã kongregasionʼra akʉbari zõrãrãʼa. Maʉ̃ra mebẽrã ãba trajabʉrʉba audre kʼarebaseabʉ. Oi bawana tẽã Margaret kongregasionʼra akʉbari zõrãrã kʼãĩ ẽ basi 36 orabayeda. Iya nekʼãrẽ mejãcha oibarabasi baera, iya jaradiaibarabasi zõrãrã kongregasionebema kʼãrẽta oibarabasita, mebẽrã 450 de aduadara kʼarebaita (2 Cor. 11:27). Mawũã yi de neẽ bedara jʉrʉsida sama bʼaita.

10. ¿Kʼãrẽa zõrãrãitara yibia mebẽrã akʉ bʼaita? (Juan 21:15).

¹⁰ Zõrãrãbara mebẽrã zowaĩnĩgʉa diaibara Daizeze Bedʼeadeba akʉza kʼarebadaibara yi sopʉapanʉrata (1 Ped. 5:2). Drʉade neida berabaribʉrʉdera zõrãrãbara akʉdaibara mebẽrãba yiko erbamarẽã akʉza sama bʼaita. Mawũã berabaridata jedeko bio berabaribʉrʉde, mebẽrãbara nesidayi ãyaʼa so zarea diamarẽã akʉza Daizeze Bedʼeadeba kʼarebadamarẽã (akʉra Juan 21:15). Mebẽã Haroldʼra Mebẽrã Betel akʉbari, iyira bedʼeasi mebẽrã drʉade neida berabaribʉrʉde zʉbʉriadabawara. Iya jarabʉ: «Mebẽrãra ewari nesidabʉ ãyi jẽda bia bʼaita, mamina ãyi mebẽrã beidata akʉza ãyi sãwũã berabaridata jẽda kĩrãbebʉrʉdera, maʉ̃ba mejãcha sopʉabibʉ. Maʉ̃ba jarakĩrãbʉ ẽ ãya Daizeze ĩjãbʉta aduasidata».

11. ¿Kʼãrẽne kʼarebamarẽã nesidapanʉ mebẽrãbara?

¹¹ Zõrãrãbara odaibara nama Daizeze Bedʼeaba jarabʉta: «Jẽgaudua jẽga bʼe bawarara» (Rom. 12:15). Zõrãrãbara kĩrãbebibara mebẽrã naʉ̃ drʉade neida berabarida kʼarea zʉbʉriabʉra, Jeowaba akʉza mebẽrãbara wabida kãgabʉta. Zõrãrãbara kʼarebadayi mebẽrãra Daizeze bedʼea jaradiapanamarẽã, ãba yi jʉrebarima wãnamarẽã akʉza Daizeze Jeowaʼa yiwidʼipanamarẽã. Adewara zõrãrãbara kʼarebaseabʉ yibarirãraba kʼarebadamarẽã ãyi wũãwũãba krĩchadamarẽã Daizezeba kʼãrẽ nebia wei ʉ̃rʉ. Yibarirãra, kĩrãbebidua mara wũãwũãra Jeowara ãyi neũdukʼawuata akʉza iya ewari jõmaʉnẽ kʼarebaita. Akʉza jara ũrĩbidua mebẽrã naʉ̃ drʉa jõmaʉ̃nẽbʉba kʼarebakĩrãbʉta (1 Ped. 2:17).

12. ¿Wuabemarabara kʼãrẽta oseabʉ yi zʉbʉriabʉra kʼarebaita? (Akʉra potora).

¹² Kongregasionba oseabʉta. Bʉ de kʼawa neida berabarira, widira zõrãrãʼa sãwũã kʼarebaseabʉ kʼawuaita. Jaraseabʉ bʉa de diaita mebẽrã neida berabarida kʼarea zʉbʉriadata, mawũã ẽ bʉrʉ yi kʼareba zedarata. Adewara yikota diaseabʉ akʉza ãya kʼãrẽ nesidabʉta. Mamina bʉchumaeba jĩga neida berabarira, ¿sãwũã kʼarebaseabʉ? Kʼarebaseabʉ mebẽrã zʉbʉriabʉ ʉ̃rʉ yiwidʼibʉde (2 Cor. 1:8-11). Akʉza bʉa kʼarebaseabʉ donasion diabʉde, mawũã mebẽrãba kʼarebadamarẽã yi zʉbʉriabʉta (2 Cor. 8:2-5). Bʉta wãkĩrãbʉbʉrʉ yi neida berabaridama, widira zõrãrã kʼãrẽta oseabʉta. Bʉta trʉ̃nara, bʉaʼa jaradiadayi sãwũã kʼarebaibarata yi zʉbʉria berabaridara.

KʼAREBARA MEBẼRÃTA PẼWÃPANɄNE AWUANTADAMARẼÃ

13. ¿Kʼãrẽ bedʼea zromata ũdupanʉ mebẽrãbara Daizeze bedʼea idu jaradiabida ẽ maera?

¹³ Drʉa Daizeze Bedʼea idu jaradiabida ẽ maera mebẽrãitara audre zareabʉ. Maʉ̃ drʉadera mebẽrãitara zare baera plata ũduita, adewara kayapanʉ baera akʉza ãyi mebẽrãsida beipanʉ baera. Mamina Daizeze bedʼeata idu jaradiabida ẽ baera, zõrãrãita zare ãyi akʉ wãita mawũã so zarea diaita. Mawũã berabarisi mebẽã Andréita. Mebẽã wẽrã aba iyi grupodebemata mejãcha zʉbʉria berabaribasi plata neẽ kʼarea. Mebẽã wẽrãra karrude asidentasi, maʉ̃ba mejãcha nesidabasi operadamarẽã akʉza trajabe ẽ basi. Naʉ̃ drʉade kaya zroma berabarinʉmʉmina akʉza nokʼoraba pẽwãpanʉmina mebẽrãbara nekʼãrẽ jõma osida maʉ̃ mebẽã wẽrã kʼarebadaita. Mawũã opanʉta Jeowaba jõma akʉbasi.

14. ¿Zõrãrãbara sãwũã ũdubiseabʉ Jeowa ʉ̃rʉ ĩjãbʉta?

¹⁴ Zõrãrãba oseabʉta. Andréira yiwidʼisi akʉza iya oseabʉta jõma osi. ¿Sãwũã kʼarebasi Jeowabara? Jeowabara osi yi kʼarebakĩrãbʉba kʼarebamarẽã. Ʉ̃kʉrʉ mebẽrãbara medikoma edesida akʉza ʉ̃kʉrʉba platata diasida. Jeowaba obisi ẽbẽraba kʼarebadamarẽã akʉza maʉ̃ mebẽã wẽrãba iya nekʼãrẽ nesidabʉta jõma erbamarẽã (Heb. 13:16). Zõrãrã, maraba nekʼãrẽ mejãcha obeda ẽãnera jarada awurura kʼarebadamarẽã (Jer. 36:5, 6). Audre Jeowaʼa kʼareba widida, iya kʼarebaseabʉ mebẽrãba nesidabʉ jõma diabʉde.

15. ¿Sãwũã aduʼa ãba baseapanʉ mebẽrãbawara dayirã pẽwãpanʉne?

¹⁵ Kongregasionba oseabʉta. Nokʼoraba dayirãta pẽwãpanʉnera, dayirãra wĩkaʉde ãba yi jʉredayi. Maʉ̃ba kʼãwũãena dayirãinʉ ibiadepanaibara. Dayirãra yõpanʉ Diaruʉ̃me, mawũã dayirã mebẽrãbawara yõpanʉ ẽ. Maʉ̃ kʼarea akʉda ẽ baibara mebẽrãba nemitia obʉta akʉza ara odaibara (Prov. 19:11; Efes. 4:26). Bʉyareba jʉrʉda sãwũã kʼarebaita wuabemarata (Tito 3:14). Mebẽrã Andréi grupodebemaba, mebẽã wẽrã kʼarebakĩrãpananaba osi ãyi aduʼa ãbapanamarẽã mebẽrã kĩrãkʼa (Sal. 133:1).

16. Colosenses 4:3, 18de jarabʉdebara, ¿sãwũã kʼarebaseabʉ mebẽrã pẽwãpanʉra?

¹⁶ Mebẽrã mejãchaʉba obʉ Jeowaba zokʼabʉta. Nokʼoraba Daizeze bedʼea jaradiabʉta iduaribida ẽ mina. Ʉ̃kʉrʉ mebẽrãra karseldebʉ Jeowaba zokʼabʉta opanʉ baera. Yiwidʼiseapanʉ ãyi bari, yi mebẽrã bari, adewara mebẽrã karseldebʉ kʼarebapanʉra bari, ãyisida jidaseapanʉ baera maʉ̃ kʼarea. Ãyara mebẽrã karseldebʉra so zarea diapanʉ akʉza diabʉ ãya nesidabʉta. Adewara juez nãã mebẽrãre bedʼeapanʉc (akʉra Colosenses 4:3, 18). Krĩcharãra bʉ mebẽrã bari yiwidʼibʉra zeri ẽãta (2 Tes. 3:1, 2; 1 Tim. 2:1, 2).

17. ¿Kʼãwũãena kʼãrẽta oseabʉ bia kʼawuaita kʼãrẽta oita pẽwãbʉdade?

¹⁷ Kʼãwũãena bʉta bʉ mebẽrãbawaraʉba nekʼãrẽ okʼawuaseabʉ mawũã nokʼoraba pẽwãbʉdade kʼawuaita kʼãrẽ odaita (Hech. 14:22). Aukʼara krĩcharãra bʉ sãwũã zʉbʉria odaita, awuarabʉrʉ zarea ora bʉa akʉza bʉ wũãwũãraba audre zarea ĩjãnaita Jeowata. Bʉta edaʉde naʉ̃ kʼarea krĩcha zroma obʉbʉrʉ jõma jarada Jeowa (Sal. 62:7, 8). Ãbaʉba bedʼeaidua kʼãrẽa ĩjãibarata Jeowa ʉ̃rʉ.d Bʉa bʉ wũãwũãra jaradiabʉ kĩrãkʼa drʉa ure zebʉrʉde kʼãrẽ oita, abarika kʼarebara bʉ wũãwũãra jaradiaita pẽwãbʉdade kʼãrẽ oita. Mawũã ora ãyira so zareabayi akʉza aduʼapanañi, bʉa jaradiasi baera kʼãrẽa ĩjãibarata Jeowa ʉ̃rʉ.

18. ¿Aranʉ kʼãrẽ nebia zeita jʉ̃ãpanʉ?

¹⁸ Daizeze aduʼabʉbara kʼarebabʉ dayirã aduʼa bʼaita (Filip. 4:6, 7). Jeowabara dayirãra aduʼa babibʉ naʉ̃ drʉade pẽwãpanʉmina, kayapanʉmina akʉza naʉ̃ drʉade neida berabaribʉmina. Jeowabara zokʼabʉ zõrãrã kongregasionebemata mebẽrã akʉmarẽã. Akʉza jaradiabʉ sãwũã dayirãi yi kʼarebadamarẽã. Dayirã kʼãwũãena bedʼea zroma neẽãne, zarea odaibara kʼawuadaita kʼãrẽ oita bedʼea zroma zebʉrʉde akʉza zʉbʉria zroma ũdubʉdade (Mat. 24:21). Dayirãbara jʉrʉdaibara kʼãwũãena aduʼapanaita akʉza kʼarebadaibara mebẽrãsida aduʼapanamarẽã. Naʉ̃ kʼãwũã zʉbʉria zroma berabaribʉrʉdera neẽbayi kʼãrẽba wua zʉbʉriabira. Mawũã Jeowaba dayirãita kãgabʉdepanañi, ewari jõmaʉ̃nẽ aduʼapanañi (Is. 26:3, 4).