¿Bʉra nekʼãrẽ oya awa bʉka ẽjũã kĩrãwãreãnẽra?
Dayirã jõmaʉ̃ba kãgapanʉ Jesuba jaradara: «Sobiapanʉ yi ibiade panʉra, maʉ̃ratrʉ drʉade panai baera» (Mat. 5:5). Ẽbẽrarã ʉ̃ta wãibara Jesuʉ̃meba zokʼayi naʉ̃ drʉata (Apoc. 5:10; 20:6). Idibema kristiano wãrĩnuarabara jʉrʉpanʉ naʉ̃ drʉade ewari jõmaʉ̃nẽ bʼaita sobiade akʉza aduʼa, naʉ̃ta aripe berabarimarẽãra ãyara nekʼãrẽ ũbea oibara: drʉata ara odaibara, beida jẽda piradrʉbʉrʉta kʼarebadaibara akʉza yi jẽda piradrʉbʉrʉʼa Daizeze bedʼeata jaradiaibara. Ẽjũã biade bakĩrãbʉta ũdubita krĩchara idi ewade kʼãrẽta onʉmʉba.
¿NEKʼÃRẼ OYA AWA BɄKA DRɄA ẼJŨÃ KĨRÃWÃREÃ BABITA?
Jeowaba jaraside ẽbẽrarã naʉ̃ drʉata biramarẽã akʉza trajamarẽã, Jeowaba ũdubikĩrãbasi wiña wiñane drʉata ẽjũã kĩrãwãreã bʼaita (Gén. 1:28). Ẽbẽrarã ewari jõmaʉ̃nẽ bakĩrãbʉbara ũrĩbara naʉ̃ leyta, mamina maʉ̃ oira ãyira neẽ sama ẽjũã kĩrãwãreãnẽ bʼaira, maʉ̃ jardin Edénta aduasi baera. Armagedón berabarida tẽã drʉara jaigʉa bʼai baera, nekʼãrẽ oibarata bayi mejãcha.
Maʉ̃ba kĩrãbebibʉ israelitara Babilonianeba jẽda wãside Jerusalénʼena, ãya trajo oda ʉ̃rʉ. Maʉ̃ pʉwʉrʉdera miõta ba ẽ basi 70 poagabayeda. Propeta Isaíasba jarasi Jeowa kʼarebadeba israelitarabara maʉ̃ra jẽda ara onʉmʉita, naʉ̃ propesiaba jarabʉ: «Drʉa ibʉawabʉde Edén kĩrãkʼa babiyi akʉza koribi kʼãrẽ neẽãbʉmaera Jeowa de udabʉ kĩrãkʼabayi» (Is. 51:3). Israelitarãra bia wãsi, abarika idi ewadebida Jeowa kʼarebaba ẽbẽrarã ẽjũã kĩrãwãreãnẽbʉbara ara odayi drʉata. Kʼãwũãena bʉa nekʼãrẽ mejãcha oseabʉ mawũã ũdubita nekʼãrẽ ʉ̃ra zeide maʉ̃ trajo okĩrãbʉta.
Maʉ̃nebemara bʉa nãã zarea oibara bʉ deda nekʼãrẽ jaigʉa ẽã erbaita, bʉa maʉ̃ta oseabʉ bʉ de kʼawaberaba abarika oẽ mina. Adewara bʉa kʼarebaseabʉ ãba yi jʉrebari de ara oita, mawũã ẽ bʉrʉ asamblea obarimae. Bʉ bebʉba akʉza bʉ ewariba iduaribibʉbʉrʉ, solisituta zokʼaseabʉ drʉade neida berabaribʉrʉde kʼarebaita. Bʉa Jeowa kʼarebadeba nekʼãrẽ kʼawuaseabʉ mawũã maʉ̃ta ẽjũã kĩrãwãreãnẽ zokʼaita.
¿BɄARA OYA AWA BɄKA JÃRI JẼDA PIRADRɄIRA KʼAREBAITA?
Jesuba Jairo kau piradrʉda tẽã jarasi yikota diadamarẽã (Mar. 5:42, 43). Zare ẽ basibaibara maʉ̃ wũãwũã zake 12 poagabʉ akʉita, krĩchara dayirãba nekʼãrẽ mejãcha oibarata Jesuba jarada aripe berabaribʉrʉde, jarasi «ewarita zeya, maʉ̃ ewadera beidapeada jou nʉmebara mʉ̃ nemi ũrĩbʉrʉba akʉza jẽda piradrʉyi» (Juan 5:28, 29). Daizeze Bedʼeaba mejãcha jara ẽ mina ẽbẽrarã sãwũã jẽda piradrʉi ʉ̃rʉ, krĩchabʉbaibara ãya nesidaita yikota, wuata akʉza deta. ¿Bʉara idiwedaʉba ũdubikĩrãbʉka okĩrãita ãyi kʼarebaita? Akʉra bʉa kʼãrẽta oseabʉta.
¿Bʉra kʼãrẽta obʉ idira ũdubita ẽjũã kĩrãwãreãnẽ baya awa bʉta?
Jarabʉdade zõrãrã kongregasionʼra akʉbari zebʉrʉde, ¿bʉara trʉ̃barika bʉ deda neko wãmarẽã? Mawũã ẽ bʉrʉ, ¿mebẽã wua zõrãrã kongregasionʼra akʉbari ba ẽãta, maʉ̃ mawũãbʉrʉdera bʉara de kʼareba jʉrʉ diabarika iyi sama bamarẽãra?, ¿bʉchumae asambleata baebʉbʉrʉ, bʉa iyi jʉ̃drʉda tẽã akʉza jõna tẽã kʼarebabʉka, adewara mebẽrãra bʉma zemarẽã trʉ̃bʉka?
OYA AWA BɄ JẼDA PIRADRɄDARA JARADIAITA
Hechos 24:15ba jarabʉ kĩrãkʼa jʉ̃ãpanʉ ẽbẽrarã mejãchaʉta piradrʉmarẽã, maʉ̃ranebema mejãchaʉba ãyi bei nãã kʼawuada ẽ basi Jeowa ʉ̃rʉra, mamina ãyi piradrʉda tẽã kʼawuaseabʉ.a Jeowaʉ̃me kʼẽrẽpabʉraba akʉza mejãcha kʼawuabʉraba jaradiayi ãyaʼa (Is. 11:9). Charlottba jaradiabadade Europade, Suraméricade akʉza Áfricade, jʉ̃ãbʉ maʉ̃ta berabarimarẽã iya sobiade jarabʉ: «Mʉ̃a jʉ̃ãbʉ ẽbẽrarã jẽda piradrʉbʉrʉde jaradiaita. Mʉ̃a krĩchabʉrʉde jari ẽbẽrarã dããrabade badara ʉ̃rʉ. Mʉ̃yikʉza jarabʉ: ‹Naʉ̃ ẽbẽraba Jeowata ũdukʼawuabasibʉrʉ iyi bebʉra awuara bakasi›. Mʉ̃a jipa jaradiakĩrãbʉ jari ẽbẽrarã piradrʉira sãwũã ãya Jeowa ũdukʼawuabʉrʉba ãyi bebʉra jipa awuara baseabʉta».
Jesu zei nãã Jeowaʉ̃me kʼẽrẽpa badarãrabida ãyi piradrʉbʉrʉde, bayi nekʼãrẽ mejãcha kʼawuaita. Krĩchara kʼãrẽaba yibia bʼaita Danielba propesia bʉdata iyi piradrʉbʉrʉde jara ũrĩbita kʼãrẽta jarakĩrãbasita (Dan. 12:8). Mawũã ẽ bʉrʉ Rutʼa akʉza Nohemíʼa jara ũrĩbita dayirã ẽdrʉbibarira sãwũã zesita ãyideba. Jipa arigʉ yibia kʼãwũã ẽbẽrarã jaradiaita naʉ̃ drʉade jõmaʉ̃ʼa, mama neẽbayi dayi awuara krĩchabita, awuara obita, naʉ̃ drʉaba idi obʉ kĩrãkʼa.
¿Bʉara kʼãrẽta oseabʉ kʼãwũãena oya awa bʼaita kʼãwũã ʉ̃ra piradrʉira jaradiaita? Zarea odaibara nejaradiabari bia bʼaita akʉza badua Daizeze bedʼeata jaradiabaibara (Mat. 24:14). Bʉta zõnababʉbʉrʉ akʉza zarea obʉbʉrʉ Daizeze bedʼea jaradiaita, naʉ̃ba ũdubibʉ ẽjũã kĩrãwãreãnẽ ẽbẽra beida jẽda piradrʉbʉrʉdera jaradiakĩrãbʉta.
¿Bʉra ẽjũã kĩrãwãreãnẽ bakĩrãbʉka?, ¿sobiabʉka drʉata ara oi baera ẽjũã kĩrãwãreã bamarẽã? akʉza ¿ẽbẽra beida jẽda piradrʉda Daizeze Bedʼea ʉ̃rʉ jaradiai baera? Idi dayirãba nekʼãrẽ oũdubibʉba biode kʼarebayi ẽjũã kĩrãwãreã zebʉrʉde abarika oita.
a Akʉra artikulo «Majãchaʉʼa jaradiabʉ aripe oita», Jarakabʉ septiembre 2022debemata.