KARTARARABɄ INTERNET'NE Watchtower
Watchtower
KARTARARABɄ INTERNET'NE
embera katio
  • DAIZEZE BED'EA
  • KARTARA
  • ÃBA YI JɄREBARI
  • w23 septiembre pag. 14-19
  • ¿Kʼãrẽa yibia urumʉ̃rʉãbʉta ũdubita?

Bideo bʉa jʉrʉbʉra neẽ.

Naʉ̃ bideo ʉ̃tʉ ze ẽ.

  • ¿Kʼãrẽa yibia urumʉ̃rʉãbʉta ũdubita?
  • Karta Jeowa Nokʼo ʉ̃rʉ Jarakabʉ (kʼawuaita) 2023
  • Subtitulota
  • ¿KʼÃRẼTA OIBARA URUMɄ̃RɄÃ BʼAITA?
  • BIA KRĨCHAIBA SÃWŨÃ KʼAREBABɄ URUMɄ̃RɄÃ BʼAITA
  • BɄ MEBẼRÃBAWARA ÃBA ESTUDIARA
Karta Jeowa Nokʼo ʉ̃rʉ Jarakabʉ (kʼawuaita) 2023
w23 septiembre pag. 14-19

ARTIKULO KʼAWUAITA 39

¿Kʼãrẽa yibia urumʉ̃rʉãbʉta ũdubita?

«Daizeze odebʉrara kʼãrẽa yõira neẽ, awuarabʉrʉ ẽbẽra biabaibara jõmaʉ̃rabawara» (2 TIM. 2:24).

TRÃBI 120 Seamos apacibles y humildes como Cristo

KʼÃRẼTA ŨDUDAITAa

1. Trajode akʉza kolegiode dayirãʼa, ¿kʼãrẽta widiseapanʉ?

¿BɄRA sãwũã sentibʉ bʉme ãba estudiabʉba, mawũã ẽ bʉrʉ ãba trajabʉba widira bʉa kʼãrẽ ĩjãbʉ ʉ̃rʉ? ¿Pera sentibarika? Dayirãnebema mejãchaʉta mawũã sentibari, mamina ẽbẽrarãba mawũã widibʉba kʼarebabʉ kʼawuaita ãya kʼãrẽta krĩchabʉta akʉza Daizeze ʉ̃rʉ jara ũrĩbita. Edaʉde dayirãba krĩchaseapanʉ ẽbẽrarãba mawũã widibʉta dayirãʉ̃me bedʼeakaya, maʉ̃ra berabaribʉ awururaba dayirã ʉ̃rʉ aña bedʼeasida baera (Hech. 28:22). Adewara dayirãra ewari jõbodoarepanʉ baera ẽbẽrarãra «bedʼea abarika zeda ẽ bayi» akʉza «mia beamiabayi» (2 Tim. 3:​1, 3).

2. ¿Kʼãrẽa urumʉ̃rʉãbaibara dayirãra?

2 Bʉa naʉ̃ta widiseabʉ: «¿Mʉ̃ara sãwũã ũdubiseabʉ ibiadebʉta akʉza biʼia krĩchabʉta ẽbẽrarã Daizeze ʉ̃rʉ bedʼeakapanʉne mʉ̃me?». Urumʉ̃rʉãbʉba kʼarebayi bʉ ibiade bʼaita, ẽbẽra urumʉ̃rʉãbʉra aduʼa baseabʉ wuabemaraba iyi kĩrʉbikĩrãpanʉne akʉza kʼawua ẽãne sãwũã panʉita (Prov. 16:32). Urumʉ̃rʉãbʉ ũdubira zare mamina, ¿bʉa kʼãrẽta oseabʉ maʉ̃ ũdubita? ¿Bʉara sãwũã ibiade panʉseabʉ ẽbẽra abaʉta bʉme bedʼeakakĩrãbʉbʉrʉ bʉa ĩjãbʉ ʉ̃rʉ? Bʉta yibaribʉrʉ, ¿sãwũã kʼarebaseabʉ bʉ wũãwũãraba ibiade panʉmarẽã ẽbẽrarãba widibʉrʉde ãya ĩjãbʉ ʉ̃rʉ? Urumʉ̃rʉã bʼaira jipade yibia.

¿KʼÃRẼTA OIBARA URUMɄ̃RɄÃ BʼAITA?

3. ¿Kʼãrẽa urumʉ̃rʉãbʉbara jarakĩrãkʉ ẽ zowaĩnĩgʉa ẽãta? (2 Timoteo 2:​24, 25).

3 Mejãcha zareata nesidapanʉ urumʉ̃rʉã bʼaita awururaba dayirã kĩrʉbibʉdade. Urumʉ̃rʉã bʼaira neta jauredebema (Gál. 5:​22, 23). Griego bedʼeadera bedʼea urumʉ̃rʉãra zokʼapanʉ jara ũrĩbita kabayo mẽsiabʉta tẽã urumʉ̃rʉã babipanʉ ʉ̃rʉ. Naʉ̃ kabayobara waidide zarea erbʉ, mamina iyira urumʉ̃rʉãbʉ, mawũã mẽsiabʉ ẽ. ¿Dayirãbara sãwũã ũdubiseapanʉ zowãĩnĩgʉapanʉta mamina urumʉ̃rʉãpanʉne? Mamina naʉ̃ nebiara dayirã dobaʉbara oauda ẽ, awuarabʉrʉ Jeowa widibara kʼarebamarẽã maʉ̃ nebiata ũdubita. Maʉ̃ra wãrĩnu berabariseabʉ. Bari jaradaita, ʉ̃kʉrʉ Jeowa ʉ̃rʉ Kʼawuabipanʉrãba ibiade panʉsida ãyi nejʉraraba ãya ĩjãbʉ ʉ̃rʉ widisidade akʉza yi naʉ̃ ũdudaraba biʼia krĩchasida Jeowa ʉ̃rʉ Kʼawuabipanʉrã ʉ̃rʉ (akʉra 2 Timoteo 2:​24, 25). ¿Bʉara sãwũã ũdubiseabʉ urumʉ̃rʉãbʉta?

4. ¿Isaac yizabara sãwũã jaradiabʉ urumʉ̃rʉã bʼaita?

4 Daizeze Bedʼeade nebʉrara mejãchabʉ dayirã ũdubibʉta kʼãrẽa yibiata urumʉ̃rʉãra bʼaita. Akʉdaya Isaac yizata, iyi Guerar pʉwʉrʉdebaside, pʉwʉrʉ iyi kʼawabemaba anasida pozo yi zezeba odata, mamina Isaacʼra ãyibawara yõi kaude wãsi awuru drʉaeda, mõbe awuru pozota korusi (Gén. 26:​12-18). Mamina tẽã, pilisteorãra iyi chuidʉ jʉ̃ẽsida jaraita maʉ̃ pozosida ãyideta, maʉ̃nebida Isaacʼra kĩrʉ ẽ basi, awuarabʉrʉ urumʉ̃rʉãbʉta ũdubisi (Gén. 26:​19-25). ¿Kʼãrẽba kʼarebasi Isaac urumʉ̃rʉã bamarẽã awururaba kĩrʉbikĩrãpanasimina? Iyara iyi yibariraneba kʼawuasibaibara, yi zeze Abrahánʼra urumʉ̃rʉãbasi akʉza yi papa Sarara aduʼabasi akʉza urumʉ̃rʉãbasi (1 Ped. 3:​4-6; Gén. 21:​22-34).

5. Yibarirabara ãyi wũãwũãra jaradiaibara urumʉ̃rʉã bamarẽã, ¿saʉ̃ yizaba ũdubibʉ maʉ̃ra kʼãrẽa yibiata?

5 Mebẽrã yibarirabara ãyi wũãwũãra jaradiaibara kʼãrẽa yibiata urumʉ̃rʉãbʉ ũdubita. Akʉdaya Maxence yizata, iyira 17 poagabʉ. Iyitara jipade zarebasi urumʉ̃rʉãbʉ ũdubira kolegiode akʉza jaradiabʉde ũdubasi baera ẽbẽrarã iyi kĩrʉbikĩrãpanʉta. Iyi yibariraba kʼarebasida urumʉ̃rʉãbʉ ũdubita. Iyi yibariraba jarapanʉ: «Maxencebara kʼawuasi dayi kĩrʉira zare ẽãta, mamina urumʉ̃rʉãbʉ ũdubita akʉza aduʼabʉ ũdubira zareata erbaibarata». Maxencebara idi ewadera urumʉ̃rʉãbʉta ũdubibʉ.

6. ¿Yiwidʼibʉba sãwũã kʼarebai urumʉ̃rʉãbʉ ũdubita?

6 ¿Kʼãrẽta oseapanʉ awurura imitia bedʼeabʉrʉde Daizeze ʉ̃rʉ akʉza Daizeze Bedʼea ʉ̃rʉ? Jeowaʼa yiwidʼibara iyi jaure zareata diamarẽã, mawũã ibiade panʉita. Mamina dayirãba ibiade panʉ ẽ basibʉrʉ jẽda akʉza Jeowa yiwidʼibara, mõbe krĩchaibara tẽã sãwũã audre bia oseabʉta. Jeowaba diayi iyi jaure zareata dayirãba dayirã kakuata bia zokʼamarẽã, mawũã ibiade panʉita akʉza mesera kĩrʉ ẽ baita.

7. ¿Testora kĩrãbeiba sãwũã kʼarebabʉ ibiade bedʼeaita akʉza urumʉ̃rʉãbʉ ũdubita? (Proverbios 15:​1, 18).

7 Dayirãita zarebʉrʉ ibiade panʉita, ʉ̃kʉrʉ testora Daizeze Bedʼeadebemaba kʼarebaseabʉ. Daizeze jaure zareaba kʼarebayi maʉ̃ra testora kĩrãbeita (Juan 14:26). Bari jaraita ũrãgʼara Proverbios librode edabʉba kʼarebaseabʉ urumʉ̃rʉã bʼaita (akʉra Proverbios 15:​1, 18). Akʉza naʉ̃ libroba ũdubibʉ jipade yibiata dayirãba urumʉ̃rʉãbʉ ũdubita nekʼãrẽba kĩrʉbikĩrãbʉde (Prov. 10:19; 17:27; 21:23; 25:15).

BIA KRĨCHAIBA SÃWŨÃ KʼAREBABɄ URUMɄ̃RɄÃ BʼAITA

8. Ẽbẽrarãba dayirã bedʼea widibʉrʉdera, ¿kʼãrẽ ʉ̃rʉ krĩchaibara?

8 Bia krĩchaiba kʼarebaseabʉ (Prov. 19:11). Ẽbẽra bia krĩchabʉbara kʼawuabʉ sãwũã panʉita awururaba imitia bedʼeabʉrʉde iya kʼãrẽ ĩjãbʉ ʉ̃rʉ. Edaʉde ẽbẽrarãba dayirã nekʼãrẽ widibʉrʉdera ãyara jara ũrĩbida ẽ kʼãrẽa maʉ̃ta widipanʉta, ãyara maʉ̃ra widipanʉbaibara krĩcha zroma obʉ baera, mawũã ẽ bʉrʉ bʉ baera nekʼãrẽ ãyaʼa maʉ̃ta widibibʉta. Dayirãba panʉi nãã biʼia krĩchaibara dayirãbara kʼawua ẽãta maʉ̃ ẽbẽrabara kʼãrẽa widibʉta maʉ̃ra (Prov. 16:23).

9. ¿Gedeónbara sãwũã ũdubisi bia krĩchabʉta akʉza urumʉ̃rʉãbʉta yumekẽrãra Efraínʼnebema bedʼeaside?

9 Akʉdaya Gedeónba sãwũã panʉsita yumakẽrãra Efraínʼnebemara. Efraínʼnebemarabara kĩrʉ widisida kʼãrẽa trʉ̃ ẽ basita ãyira yõenara, ¿kʼãrẽa mawũã widisibaibara ãyara? ¿Ãyara ʉ̃tabʉta krĩchapanasika? Ãya kʼãrẽ oda krĩcha ẽã Gedeónbara ibiade panʉsi, maʉ̃ kʼarea Daizeze Bedʼeaba jarabʉ Efraínʼnebemabawara aduʼapanesita (Juec. 8:​1-3).

10. ¿Kʼãrẽba kʼarebai ibiade panʉita ẽbẽrarã dayirãba ĩjãbʉ ʉ̃rʉ imitia bedʼeapanʉra? (1 Pedro 3:15).

10 Edaʉde dayirãʉ̃me estudiabʉba mawũã ẽ bʉrʉ trajabʉba widiseabʉ dayirãba kʼãrẽa obʉta Daizeze Bedʼeaba jarabʉra. Maʉ̃nera dayirãbara ẽbẽrarã jara ũrĩbibara kʼãrẽa mawũã opanʉta, mamina ibiade oibara (akʉra 1 Pedro 3:15). Edaʉde yibia ẽbẽrarãba daya mawũã widibʉrʉdera, naʉ̃ba kʼarebabʉ baera kʼawuaita ãya kʼãrẽta krĩchabʉta akʉza krĩcha ẽ baita ãya mawũã opanʉta dayirã kĩrʉbita. Krĩchada ẽ baibara ẽbẽrarãba dayirã bedʼea widibʉrʉdera kʼãrẽa mawũã opanʉta, awuarabʉrʉ zarea oibara ewari jõmaʉ̃nẽ ibiade panʉita, mawũã opanʉbʉrʉ ẽbẽrarãba bia krĩchaseapanʉ dayirãba ĩjãbʉ ʉ̃rʉ. Naʉ̃ ẽbẽra kĩrʉ bedʼeabʉmina dayirãbara ewari jõmaʉ̃nẽ krĩchaibara ibiade panʉita (Rom. 12:17).

Ẽbẽra wẽrã abaʉba tortata yi toda ewari piestadebemata diabʉ mebẽã abaʉʼa. Yi wuabemarãra ababema opisinade nekopanʉ akʉza ne dopanʉ.

Dayirãba biʼia kʼawuapanʉbʉrʉ kʼãrẽa jʉ̃ẽmarẽã jarabʉta ãyi toda ewari piesta eda, mawũãra kʼawuadayi sãwũã bia panʉita. (Akʉra parrapo 11 akʉza 12).

11, 12. (1) ¿Ẽbẽrarãba dayirã nei widibʉrʉdera, nãã kʼãrẽ ʉ̃rʉ krĩchaibara? (Akʉra potota). (2) Jara ũrĩbira sãwũã bia widibʉba kʼarebaseabʉta ibiade bedʼeaita.

11 Dayirãʉ̃me ãba trajabʉba dayirã widira kʼãrẽa dayirãbara dayirã toda ewari piestara oẽãta, naʉ̃ ʉ̃rʉ krĩchaibara: ¿Iyara maʉ̃ra widibʉka krĩchabʉ baera dayirãra sobia bakĩrã ẽãta, mawũã ẽ bʉrʉ kãga ẽ baera trajodebemarata aduʼapanamarẽã? Dayirãba iyaʼa jaraseapanʉ jipade yibiata iya kʼãwũã kãgabʉ baera ẽbẽrarã trajodepanʉra aduʼapanamarẽã akʉza dayirãbida maʉ̃ta kãgapanʉta. Dayirãba mawũã opanʉbʉrʉ naʉ̃ba kʼarebayi dayirãʉ̃me ãba trajabʉba audre kʼawuakĩrãmarẽã Daizeze Bedʼeaba kʼãrẽta jarabʉta dayi toda ewaride piesta oi ʉ̃rʉ.

12 Abarika ibiade panʉseapanʉ awuru ẽbẽrarãba widibʉdade nekʼãrẽ awuru ʉ̃rʉ. Bʉme ãba estudiabʉba jarara Jeowa ʉ̃rʉ Kʼawuabipanʉrãba abari yumakẽrã, mawũã ẽ bʉrʉ abari yuwẽrãra ãba kʼãĩ ʉ̃rʉ krĩchabʉra awuara krĩchaibarata, bʉyikʉza widira: «¿Iyara mawũã krĩchabʉka biʼia kʼawua ẽ baera Daizeze Bedʼeaba kʼãrẽta jarabʉta maʉ̃ ʉ̃rʉ? ¿Mawũã ẽ bʉrʉ iyi neũdukʼawuaba, mawũã ẽ bʉrʉ iyi mebẽrãnebemaba kãgaka abari yumakẽrãta, mawũã ẽ bʉrʉ abari yuwẽrãta? ¿Mawũã ẽ bʉrʉ iyara krĩchabʉka dayirãbara kãga ẽãta ẽbẽrarã mawũãchura?». Ũdubidaibara dayirãbara ẽbẽrarã jõmaʉ̃ta kãgapanʉta akʉza wawia ũdubipanʉta ãya sãwũã krĩchabʉrab (1 Ped. 2:17). Akʉza jara ũrĩbidaibara kʼãrẽa yibiata Daizeze Bedʼeaba jarabʉ oita.

13. ¿Bʉara sãwũã kʼarebaseabʉ ẽbẽra Jeowa ʉ̃rʉ ĩjã ẽãra?

13 Ẽbẽra abaʉba dayirãba krĩchabʉ kĩrãkʼa krĩcha ẽ bʉrʉ, jara ẽ baibara dayirãbara kʼawuabʉta kʼãrẽa mawũã krĩchabʉta iya (Tito 3:2). Bari jaraita, bʉme ãba estudiabʉba jarara Daizeze ʉ̃rʉ ĩjãira jipade yibia ẽãta, maʉ̃nera bʉara krĩchaseabʉ iyara maʉ̃ta jarabʉta ĩjãbʉ baera nekʼãrẽ naʉ̃ drʉadebʉra iyidoba zesita. Mamina bʉa biʼia krĩchara kʼawuayi iyara mawũã jarabʉta wuabemaraba jarabʉ kʼarea, maʉ̃ kʼarea iyiʉ̃me siensia ʉ̃rʉ bedʼeakai kaude jarara jw.org de jʉrʉmarẽã bedʼea naʉ̃ ʉ̃rʉ bedʼeabʉta. Bʉa mawũã ora iyira bedʼeakĩrãñi bʉme iya kʼãrẽ ũduda ʉ̃rʉ kartarane mawũã ẽ bʉrʉ bideorane. Dayirãba ibiade panʉbʉbʉrʉ naʉ̃ba kʼarebayi ẽbẽrarãba awuara krĩchamarẽã.

14. ¿Niallba sãwũã zokʼasi dayirã pagina internetʼne jw.org ta kʼarebaita ẽbẽraba awuara krĩchamarẽã Jeowa ʉ̃rʉ Kʼawuabipanʉrã ʉ̃rʉ?

14 Mebẽã aba yi trʉ̃ Niallba zokʼasi jw.org ta ẽbẽra abaʉba Jeowa ʉ̃rʉ Kʼawuabipanʉrã ʉ̃rʉ aña krĩchabʉta awuara krĩchabita. Iya jarabʉ: «Mʉ̃me ãba estudiabʉba jarabasi mʉ̃ara siensia ʉ̃rʉra ĩjã ẽãta, ĩjãbasi baera librobari nebʉra ʉ̃rʉ bedʼeabʉ ʉ̃rʉ». Iyiʉ̃me ãba estudiabʉba idu jara ũrĩbi ẽ basi baera Niallba kʼãrẽ ĩjãbʉ ʉ̃rʉ, iyara jarasi akʉ wãmarẽã jw.org ta, «Daizeze Bedʼeata akʉza siensiata» abʉmae. Niallba tẽã kʼawuasi iyiʉ̃me ãba estudiabʉbara akʉsita iya jw.org de akʉ jaradara, maʉ̃ tẽã Niallʼra iyiʉ̃me ãba estudiabʉme bedʼeasi dayirã samaʉ̃ba zeda ʉ̃rʉ. Bʉabida abarika oseabʉ.

BɄ MEBẼRÃBAWARA ÃBA ESTUDIARA

15. ¿Yibarirabara sãwũã kʼarebaseabʉ ãyi warraraba ibiade panʉmarẽã kolegiode ãya ĩjãbʉ ʉ̃rʉ widibʉdade?

15 Yibarirabara ãyi wũãwũãra jaradiaseabʉ sãwũã ibiade panʉibarata awururaba ãya ĩjãbʉ ʉ̃rʉ widibʉdade (Sant. 3:13). Ʉ̃kʉrʉ yibarirabara ãyi mebẽrãbawara Daizeze ʉ̃rʉ kʼawuaita ãba yi jʉrebʉrʉde, oũdubipanʉ sãwũã ibiade panʉibarata kolegiode bedʼea widibʉdade. Akʉra rekuadro: «¿Kʼãrẽ oita bʉ mebẽrã kʼarebaita?».

Mebẽrãra ãba yi jʉrepanʉ Daizeze ʉ̃rʉ kʼawuaita akʉza wũãwũãba yi zezeʼa ũdubibʉ sãwũã panʉita.

¿Kʼãrẽ oita bʉ mebẽrã kʼarebaita?

Mebẽrã mejãchaʉba Daizeze ʉ̃rʉ kʼawuaita ãba yi jʉrebʉrʉde estudiapanʉ kolegiode akʉza trajode sãwũã panʉibara ʉ̃rʉ ãyaʼa widibʉdade (Prov. 9:9). Bari jaraita, estudiaseapanʉ sãwũã panʉibara ʉ̃rʉ ẽbẽra abaʉba widibʉbʉrʉ:c

  • «Yi ẽbẽrarã kʼãrẽ be ẽãrabʉrʉ ĩjãpanʉ Daizeze Bedʼea ʉ̃rʉ».

  • «Nekʼãrẽ naʉ̃ drʉadebʉ iyidoba zedara wãrĩnu».

  • «Nekʼãrẽ naʉ̃ drʉadebʉta abaʉba parãsibʉrʉ, ¿kʼaiba parãsi maʉ̃ ẽbẽrarã?».

  • «Jeowa ʉ̃rʉ Kʼawuabipanʉrãbara jʉra yumakẽrã abari yumakẽrã akʉza yuwẽrã abari yuwẽrãʉ̃me ãba kʼãĩbʉra».

  • «¿Kʼãrẽa Jeowa ʉ̃rʉ Kʼawuabipanʉrãbara ẽbẽrarã jarapanʉ ãyi religionʼena zemarẽã?».

  • «Marabara Daizeze Bedʼeara osi maya jaradiabʉ kĩrãkʼa bamarẽã».

16, 17. ¿Nekʼãrẽ berabari nãã estudiabʉba sãwũã kʼarebabʉ warrarãra?

16 Nekʼãrẽ berabari nãã estudiabʉba kʼarebayi bʉa ĩjãbʉta zarea erbaita akʉza kʼarebaita wuabemarabida abarika ĩjãmarẽã. Jw.org de bʉa ũduyi «Warraraba widipanʉta», nama ũdubibʉ bʉa kʼãrẽta oseabʉta. Naʉ̃ra osida warraraba audre bia kʼawuamarẽã ãya kʼãrẽ ĩjãbʉ ʉ̃rʉ akʉza maʉ̃ ʉ̃rʉ biʼia panʉmarẽã. Naʉ̃ta dayirã mebẽrãbawaraʉba ãbaʉba estudiara, kʼawuadayi sãwũã ibiade panʉita dayirãba ĩjãpanʉ ʉ̃rʉ.

17 Kʉrã aba, yi trʉ̃ Matthewba jarabʉ kʼãrẽa yibiata nekʼãrẽ berabari nãã estudiaita. Matthewbara yi mebẽrãbawara Daizeze Bedʼea ãba estudiabʉrʉde, estudiabasi bedʼea iyi kolegiode widiseapanʉ ʉ̃rʉ. Iya jarabʉ: «Daibara krĩchapanasi wuabemaraba kʼãrẽ bedʼea ʉ̃rʉ widiseapanʉ ʉ̃rʉ akʉza daiba sãwũã panʉseabʉta maʉ̃ ʉ̃rʉ. Mʉ̃a bia kʼawuaside sãwũã panʉibara ʉ̃rʉ, aduʼabasi akʉza ibiade panʉbasi».

18. Jara ũrĩbira kʼãrẽa yibiata Colosenses 4:6ba jarabʉra.

18 Dayirãba ĩjãbʉ ʉ̃rʉ wuabemara biʼia jara ũrĩbipanʉmina jõmaʉ̃ba ũrĩkĩrã ba ẽ bayi, mamina dayirãba ibiade panʉbʉba akʉza urumʉ̃rʉã ũdubibʉba kʼarebayi (akʉra Colosenses 4:6). Wuabemara bʉa ĩjãbʉ ʉ̃rʉ jara ũrĩbira balon ẽbẽra abaʉʼa bata bʉei kĩrãkʼabʉ, bʉa naʉ̃ta pikãga batara ababemabara jidaseabʉ akʉza jemeseabʉ bʉme. Abarika dayirãba ẽbẽrarã ibiade panʉbʉbʉrʉ akʉza urumʉ̃rʉãbʉta ũdubipanʉbʉrʉ wuabemarabara ũrĩkĩrãñi dayi bedʼeara akʉza dayirãʉ̃me audre bedʼeakĩrãnañi. Mamina ẽbẽra abaʉba dayirã widibʉbʉrʉ bari dayirãʉ̃me bedʼeakaya, kʼãrẽa panʉira neẽ dayirãbara (Prov. 26:4). Mamina audrebʉ yi ẽbẽrarã ũrĩkĩrãpanʉrãra.

19. ¿Kʼãrẽ kʼarea urumʉ̃rʉãbaibara?

19 Jipade yibia dayirãba zarea oita urumʉ̃rʉãpanaita. Jeowa yiwidʼira zarea diamarẽã bʉa ibiade panʉita awururaba imitia bedʼeabʉrʉde bʉa ĩjãbʉ ʉ̃rʉ. Kĩrãbera bʉa urumʉ̃rʉãbʉta ũdubira kʼarebaita wuabemaraʉ̃me bedʼeaka ẽ baita akʉza bʉ urumʉ̃rʉãbʉ ũdubibʉba, kʼarebayi yi ẽbẽrarã dayirã ʉ̃rʉ aña krĩchabʉba akʉza Daizeze Bedʼea ʉ̃rʉ aña krĩchabʉba awuara krĩchamarẽã. Bia kʼawuara sãwũã panʉita awururaba bʉa nekʼãrẽ widi nãã, mamina maraba maʉ̃ obʉrʉdera «oidʉa ibiade akʉza wawiade» (1 Ped. 3:15). Mawũã, ewari jõmaʉ̃nẽ urumʉ̃rʉãbʉta ũdubira.

¿KʼÃRẼTA PANɄI?

  • ¿Kʼãrẽta oibara urumʉ̃rʉãpanaita?

  • ¿Bia krĩchabʉba sãwũã kʼarebai ibiade panʉita?

  • ¿Yibarirabara sãwũã kʼarebaseabʉ ãyi warraraba bia panʉmarẽã ãya ĩjãbʉ ʉ̃rʉ?

TRÃBI 86 Krĩchapanʉ Jeowaba jaradiamarẽã

a Naʉ̃ artikulode ũdudayi ũrãgʼara dayirã kʼarebaseabʉta wuabemaraba dayirãba ĩjãbʉ ʉ̃rʉ imitia bedʼeabʉrʉde ũdubita urumʉ̃rʉãbʉta.

b Maʉ̃ ʉ̃rʉ audre kʼawuakĩrãbʉbʉrʉ akʉra artikulo «¿Qué dice la Biblia de la homosexualidad?» ¡Despertad! num. 4 2016de.

c Bʉa maʉ̃ ʉ̃rʉ audre kʼawuaseabʉ jw.org de «Warraraba widipanʉta» abʉmae akʉza «Preguntas frecuentes sobre los testigos de Jehová» abʉmae.

    Librora joma Ẽbẽra bedʼeade (2004-2025)
    Ãĩ wãita
    Eda wãita
    • embera katio
    • Dedekai
    • Mʉ̃a kãgata
    • Copyright © 2025 Watch Tower Bible and Tract Society of Pennsylvania
    • Kartadebʉ Sãwũã Zok'aita
    • Neida bʉkʉabe ẽ eda
    • Configuración de privacidad
    • JW.ORG
    • Eda wãita
    Dedekai