Jeowaba ũrĩ zebʉrʉ mʉ̃ yiwidʼibʉra

DAI AKɄ JɄ̃ẼNA KʼÃRÃPE DAI BEBɄRA AWUARA BESI

Mʉ̃ra tosida 22 diciembre 1929de, daira basi Novillede, mamara dera 9 pai panasi, maʉ̃ra Bastoña pʉwʉrʉ kʼawa basi (Bélgica). Mʉ̃a biʼia kĩrãbebʉ mʉ̃ warraraena dai deda sãwũã badata. Mʉ̃ mebẽã Raymondʼʉ̃meba diapeda pakata jʉpanasi akʉza ne u jʉrepe bari ewaridera daiba kʼarebapanasi dai yibarirãra. Daira mamara yi kʼarebapanasi, abaʉba kʼarebata nesidabʉrʉ jõmaʉ̃ba kʼarebapanasi.

Mʉ̃ yibarira, Emile akʉza Alice, ãyira katolikora basi. Ãyara kãgabasi ãyi religionʼra, domingoza wãpanasi iglesiaeda, mamina 1939de zesi dai pʉwʉrʉeda yi nãã edebarira Inglaterradebemata. Mʉ̃ zezeʼa diasida Consolación kartata akʉza maʉ̃ta widisida mʉ̃ zezeʼa korreodeba badua diabʉseabʉ kʼawuaita (idi naʉ̃ kartara ũdukʼawuapanʉ ¡Despertad!). Mʉ̃ zezeba maʉ̃ba ñabasea kʼawuasi wãrĩnuta ũdubʉrʉta, maʉ̃neba ʉ̃ta Daizeze Bedʼea kʼawua jʉ̃drʉsi. Ẽbẽra dai de kʼawabʉrãra ẽbẽra biabasi daibawara, mamina mʉ̃ zezeba Daizeze Bedʼea kʼawua jʉ̃drʉdadeba ʉ̃ta ãyira jipa kĩrʉsi mʉ̃ zezeʉ̃mera akʉza jarapanasi idubʉ ẽ marẽã iglesia eda wãbʉta.

Mʉ̃ra mejãchade krĩcha osi mʉ̃ zeze mawũã edadapeada kʼarea, maʉ̃ kʼarea Daizezea yiwidʼisi nãã jarada kĩrãkʼa. Mʉ̃ra mejãcha sobiasi dai de kʼawa pananaba nãã jarapanana kĩrãkʼa jara ẽ basi baera, maʉ̃ba soiduba ĩjãsi mʉ̃ara Daizezebara ũrĩbʉta dayi yiwidʼibʉra.

YÕ EWARIDE DAI BEBɄ SÃWŨÃ BADATA

Poaga 1940de 10 mayode Alemaniata zesi Bélgica drʉa jãrĩta, maʉ̃ba mamabema ẽbẽrarãra aña mĩrʉ wãibarabasi. Daira mĩrʉ wãsi Francia eda, dai ode wãne, ode ũdupanasi gorogorora Alemanianebemata akʉza Franciadebemaʉ̃me yõpanʉta.

Dai deda zesidera daiba nekʼãrẽ erbadata jõma ũdu ze ẽ basi jõma edesida baera. Dai usa Bobbietrʉ abapai yirasi. Maʉ̃ jõma ũdui mʉ̃yikʉza widibasi: «¿Kʼãrẽa kʼãwũã mejãchabʉ yõra akʉza zʉbʉriara?».

Daira mebẽã Emile Schrantzba,a akʉ jʉ̃ẽnaba mejãcha kʼarebasi, iyira zõrãrãbasi akʉza yi nãã edebari basi. Iyara Daizeze Bedʼeadeba panʉsi dayirã kʼãrẽa zʉbʉriapanʉta akʉza kʼãrẽ awuru mʉ̃a wididata. Maʉ̃ba kʼarebasi mʉ̃ra Jeowaʉ̃me audre neũdukʼawua bʼaita akʉza soiduba ĩjãsi Jeowabara dayirãra kãgata.

Waidide yõi jõi naena daira mebẽrãbawara bedʼea baribasi. Agosto 1943de, mebẽã José-Nicolas Minetʼta jʉ̃ẽsi diskurso diade daidu. Maʉ̃ diskurso jõna tẽã iya widisi: «¿Kʼaita buru kʼoekĩrãbʉ?». Maʉ̃ne dai ũme juwa ʉ̃tasi, mʉ̃ta akʉza mʉ̃ zezeta. Daira buru kʼoesi do zake dai kʼawa badamae.

Diciembre poaga 1944de Segunda Guerra Mundial jõbodoare Alemaniata yõsi Europa Occidentalde, maʉ̃ yõ trʉ̃ta jarapanʉ yõ Ardenasneta. Daiba dai deda erbasi zobeata, mama mĩrʉsi daira jẽdeko ababayeda yõra dai de kʼawabʉ baera. Ewari aba mʉ̃ nedʉwʉrʉra ne diaya ãĩ zebʉrʉde batasida, maʉ̃ra daiba yiko wuagabʉ de buru soma zesi. Nedʉwʉrʉ wuagabada kʼawa basi gorogoro Estados Unidosdebemata, iya mʉ̃a jarasi: «Tabatotora», aramaʉ̃ta mʉ̃ra iyi kʼawa tabatotosi iya mʉ̃aʼa jʉ̃bisi iyi kaskota mʉ̃ neida berabari ẽ marẽã.

MɄ̃ KʼÃRẼ SÃWŨÃ BERABARIDABA AUDRE JEOWA KʼAWA BABISI

Maʉ̃ yõta berabarida tẽã audre bedʼeasi mebẽrã kongregasion Liejadebemaʉ̃me, maʉ̃ra 90 kilometro basi daimaebara. Maʉ̃ tẽã jʉ̃nea ẽbẽrarã wikaubawara ãba yi jʉrebesi Daizeze Bedʼea kʼawuaita Bastoñane. Mʉ̃ra traja jʉ̃drʉsi impuesto kobrabadamae akʉza estudia jʉ̃drʉsi abogado bʼaita, tẽã mʉ̃ra traja jʉ̃drʉsi notariade. Tẽã jʉ̃nea 1951ne osida asamblea sirkuitodeta, Bastoñane. Mama jʉ̃ẽsida ẽbẽrarã 100, maʉ̃ne zesi yi nãã edebari Elly Reuterta iyira asamblea eda zeira 50 kilometro jĩgabasi, iyira zesi bisikletade. Dai yi ũdukʼawua kʼãrãpe yi kãgasida, mõbera abarika zesida juwa jidaita. Iyira trʉ̃sida Eskuela Galaadʼeda jʉ̃ẽmarẽã Estados Unidosde. Iya krĩchasi wãbe ẽãta, maʉ̃ kʼarea mebẽrã kartata bʉsi jara ũrĩbita kʼãrẽa wãbe ẽ kĩrãkʼabʉta. Maʉ̃ ewaribasidera mebẽã Knorrta yi buru basi, iya jarasi bari buru tẽã jʉ̃neane yi kimaʉ̃me zeseabʉta Eskuela Galaad eda. Daira juwa jidasi febrero poaga 1953de.

Iyabaʉ poagade Ellʼyʉ̃me wãsi asamblea «La Sociedad del Nuevo Mundo» eda Nueva Yorkde, Estadio Yankeesmae. Mama mebẽã aba ũdukʼawuasi, naʉ̃ mebẽãba jarasi trajo diaita akʉza bia pagaita, mõbe jarasi Estados Unidos eda zemarẽã, mamina daira Jeowa yiwidʼisi maʉ̃ tẽã krĩchasida wãita jẽda Bélgicaeda, mama kʼarebasida kongregasion Bastoñanebemata, naʉ̃ kongregasionera nejaradiabarirãra 10 paibasi. Maʉ̃ poaga berabarida tẽã daira mejãcha sobiasi tosida baera dai wũãwũã Serge, mamina iyi todapeadata jedeko 7 babʉrʉde kayape beisi. Daira maʉ̃ kʼarea Jeowaʼa mejãcha yiwidʼisi, mõbe iyaʼa jara ũrĩbisi kʼãrẽaba sopʉapanʉta, aramaʉ̃ta Jeowaba daiʼa so zarea diasi ẽbẽrarã jẽda piradrʉbiya abʉdeba.

EWARI JÕMA TRAJA JɄ̃DRɄSIDA JEOWAITA

Octubre 1961ne mʉ̃a ũdusi trajo biata, naʉ̃ba mʉ̃ra yi nãã edebari babiseabasi baera. Maʉ̃ iyabaʉ ewaride mebẽã Betel Bélgicadebemaba trʉ̃si mʉ̃ra, widita kongregasionʼra akʉbari zõrãrã baseabʉ kʼawuaita. Aramaʉ̃ta mʉ̃a ãyaʼa widisi maʉ̃ ojʉ̃drʉi nãã yi nãã edebarita oseabʉ kʼawuaita. Mebẽrãbara oseabʉ asida mʉ̃a jarada kĩrãkʼa. Daira enero 1962de yi nãã edebaribasida, jedeko 8 berabarida tẽã mʉ̃ra kongregasionʼra akʉbari zõrãrã basi septiembre 1962de.

Poaga ũme berabarida tẽã daira trʉ̃sida Betelde trajaita, aramaʉ̃ta daira octubre 1964de traja jʉ̃drʉsi mama. 1965de mebẽã Knorrba akʉ jʉ̃ẽsi Betel Bélgicadebemata dai trajabadadebemata, maʉ̃ audre ẽãne mʉ̃ra Betel akʉbari babisida, maʉ̃ tẽã daira trʉ̃sida Eskuela Galaad eda wãita yi klase 41ma, mebẽã Knorrba jaradara aripe berabarisi 13 poaga berabarida tẽãbʉrʉ. Eskuela jõna tẽã jẽda wãsi Betel Bélgicadebemama.

JEOWA PɄWɄRɄARE BEDʼEAPANASI

Mʉ̃a abogado bʼaita estudiasi baera, mebẽrã awuru pʉwʉrʉdebemata akʉza Europadebemata kʼareba zebʉrʉ ãyiare bedʼeabʉdeba (Filip. 1:7). Maʉ̃ trajo obʉba mʉ̃ra nokʼora 55 pʉwʉrʉ awuara awuarakadebemaʉ̃me bedʼeabari, maʉ̃ra pʉwʉrʉrane idaribida ẽ basi baera Jeowaba omarẽã zokʼabʉ oita. Mʉ̃ nokʼoraʉ̃me bedʼeabʉrʉdera ãya jara ẽ basi mʉ̃ra abogado biata, awuarabʉrʉ jarabasi «mʉ̃ra Daizeze nezokʼata», mʉ̃ara ewari jõmaʉ̃nẽ Jeowaʼa kʼareba widibasi kʼawuabasi baera nokʼora sora bania kĩrãkʼabʉta Jeowa juwadera, iya edebʉ baera iya kãgabʉma (Prov. 21:1).

Ewariaba mʉ̃ra bedʼeaibarabasi Europadebema nokʼo abaʉme, mamina naʉ̃ nokʼoba jarasi 5 minuto pai bedʼeaseabʉta iyiʉ̃mera, aramaʉ̃ta mʉ̃ra Jeowaʼa yiwidʼisi, maʉ̃ kʼarea naʉ̃ yumakẽrãra peratotosi, mõbe iyaʼa mʉ̃aʼa widisi: «¿Kʼãrẽta onʉmʉ bʉara?». Mʉ̃a iyaʼa jarasi: «Daizezeʼa biga diabʉ bʉra Daizezeba zokʼadata bʉ baera», aramaʉ̃ta iya mʉ̃aʼa jarasi: «¿Sãwũã mawũãra?». Maʉ̃ kʼarea mʉ̃a iya ũdubisi Romanos 13:4​ba jarabʉta, iyara Daizeze Bedʼea ʉ̃rʉ ũdukʼawuabasi baera akʉza Daizeze Bedʼea wawia ũdubibasi baera ũrĩkĩrãsi mʉ̃a iyaʼa jaradiabʉra, daira mama bedʼeapanʉta 30 minuto. Maʉ̃ ewaridera bia jʉ̃ẽsi mʉ̃ra, maʉ̃ tẽã iya mʉ̃a jarasi iyara jipade bia akʉbʉta Jeowa ʉ̃rʉ Kʼawuabipanʉrãba obʉra.

Jeowa odepanʉra mejãchaʉta wãpanʉ Europade juezʼra kĩrãbita jara ũrĩbita ãyira yõena wã ẽãta, ãyi wũãwũãrata yibariraneba jĩga babi ẽ marẽã, impuesto aukʼara widida ẽ marẽã mawũã ẽ bʉrʉ nekʼãrẽ awuru kʼarea jʉ̃ẽpanʉ. Mʉ̃a mejãcha kʼareba zebʉrʉ mebẽrãta, ãyiare bedʼeaita juezʼra kĩrãbita jʉ̃ẽbʉrʉde, maʉ̃ra jipade yibia ũdubʉ baera Jeowabara wãrĩnu kʼarebabʉta mebẽrãra. Idi ewadera Tribunal Europeo de Derechos Humanos nãã Jeowa ʉ̃rʉ Kʼawuabipanʉrãbara 140 audre gana zebʉda ãya bedʼea zroma ara opanʉne.

CUBADE IDUARIBIPANɄ JEOWADETA AUDRE ODAMARẼÃ

Poaga 90deba ʉ̃ta mebẽã Philip Brumley Sede mundialdebemata akʉza Valter Farneti Italiadebemata adewara mʉ̃ta zarea trajasida kʼarebaita mebẽrã Cubadebemata, mamara aduʼa obida ẽ basi baera nekʼãrẽ Daizezedeta.

Cubabari bedʼeabari opisinata Bélgicadebasi. Mʉ̃a kartata bʉ diabʉesi mama, tẽã mʉ̃ra bedʼeasi yumakẽrã mʉ̃me bedʼeamarẽã zokʼadapeadaʉ̃me, nokʼoraba daiba kʼãrẽ jaradata aña ũrĩsi baera ãyiʉ̃me maʉ̃ ʉ̃rʉ bedʼeakĩrãpanasi audre bia jara ũrĩbita, mamina ãyiʉ̃me nãã yi ũdusidera bia jʉ̃ẽ ẽ basi. Tẽã daira Jeowaʼa yiwidʼisida kʼareba widita, mõbe wãsida nokʼorainʉ widita idu zokʼabʉebidamarẽã Cuba eda Daizeze Bedʼeata 5 mil, ãya jarasida maʉ̃ra oseabʉta. Maʉ̃ra Daizeze Bedʼeara neneẽã wesida akʉza mebẽrã jõmaʉ̃a dedekasida. Mama ũdusida Jeowabara bia akʉbasita daiba kʼãrẽ opanʉra, tẽã daiba akʉza widisida idu zokʼabʉeseabʉ kʼawuaita 27.500 Daizeze Bedʼeata, maʉ̃ne bida idaribisida maʉ̃ta omarẽã, mʉ̃ra mejãcha sobiasi mebẽrã Cubadebemata kʼarebasi baera ãyidebema mejãchaʉba erbamarẽã Daizeze Bedʼeata.

Mʉ̃ra Cubaeda jʉ̃ẽma bio jʉ̃ẽbari, kʼarebaita mebẽrã mamabemarata nokʼoraʉ̃me bedʼeaita, maʉ̃ kʼarea maʉ̃ pʉwʉrʉdebema nokʼorãra bio ũdukʼawuabʉ.

MEBẼRÃ RUANDADEBEMATA KʼAREBAPANɄ

1994de ẽbẽrarã Tutsiʼta ãyirai yõsi Ruandade, maʉ̃ne millón audre beasida ẽbẽrarãta, maʉ̃rane edapanasi ʉ̃kʉrʉ mebẽrã Jeowa odepanʉrata, maʉ̃ kʼarea ãba jʉredasida ʉ̃kʉrʉ mebẽrãta maʉ̃ra mebẽrã mamabemarata kʼarebade jʉ̃ẽnamarẽã.

Maʉ̃ra mebẽrã Kigali pʉwʉrʉidu jʉ̃ẽbʉrʉde ũdusida opisina tradusibarira akʉza kartara wuaga bari dera zobe zobekanʉmasita põgaba batada kʼarea. Ãya nebʉrasida sãwũã ʉ̃kʉrʉ mebẽrã yumakẽrãrata akʉza yuwẽrãrata kuchoba tʉ beasidata adewara jara ũrĩbisida sãwũã ʉ̃kʉrʉ mebẽrãba mejãcha kãgata ũdubisidata ãyaʼa. Bari jaraita ãya jara ũrĩbisida sãwũã mebẽrã huturaba mebẽã aba tutsita egoro zobeade merasidata ewari 28 bayeda, mawũã wuabemaraba neida oda ẽ marẽã. Adewara pʉwʉrʉ Kigalide ãba yi jʉresida mebẽrã 900 audre panʉra so zarea diaita.

Daira berabarisi pʉwʉrʉ Zaireʼeda (maʉ̃ra idi ewade ũdukʼawuapanʉ República Democrática del Congo) mainʉ jʉ̃ẽsida mebẽrã Ruandadebemarata mejãchaʉta mĩrʉne jʉ̃ẽsida baera kampo repugiado pʉwʉrʉ Goma kʼawabadaidu. Daiba maʉ̃ra mebẽrãta ũdu ẽ baera Jeowaʼa yiwidʼisida kʼarebamarẽã, maʉ̃ audre ẽãne yumakẽrã aba daima taibasi aramaʉ̃ta daiba iya widisida Jeowa ʉ̃rʉ Kʼawuabipanʉrã ũdukʼawuabʉ kʼawuaita, iya jarasi: «Mawũã, mʉ̃ra Jeowa ʉ̃rʉ Kʼawuabipanʉrã, mʉ̃a edeseabʉ marara mebẽrã kʼarebabarirata ãbabʉmae». Daira mebẽrã kʼarebaita ãba yi jʉrepanʉrabawara bedʼeasida, mõbe mil 600 ẽbẽrarã mama mĩrʉ jʉ̃ẽnabawara ãba yi jʉresida ãyaʼa so zarea diaita adewara ãyaʼa le ũrĩbisida mebẽrã zõrãrã Burubiadebemaraba karta zokʼabʉedata. Mebẽrãra mejãcha sobiasida ũrĩsidade naʉ̃ bedʼeata: «Daira ewari jõmaʉ̃nẽ mara kʼarea yiwidʼipanʉ, daiba kʼawuapanʉ Jeowabara marara wãrĩnu kʼarebaita». Naʉ̃ra mebẽrã Zõrãrã Burubiadebemaraba jaradara wãrĩnubasi. Idi ewadera Jeowa ʉ̃rʉ Kʼawuabipanʉrãra 30 mil bʉ Ruandadera.

MɄ̃RA EWARI JÕMAɄ̃NẼ KʼẼRẼPA BAKĨRÃBɄ

Mʉ̃ra mʉ̃ kimaʉ̃me juwa jidabʉta 58 poagabasi, maʉ̃ta mʉ̃ kima Ellyra 2011de beisi. Maʉ̃ne mʉ̃ra mejãcha sopʉasi maʉ̃ kʼarea, mʉ̃ mejãcha sopʉabʉrʉdera Jeowaʼa so zareata widibʉ akʉza so zareata ũdubʉ wuabemara Daizeze Nokʼo ʉ̃rʉ jaradiabʉrʉde.

Mʉ̃ra 90 poaga audrebʉmina waidide semanaza wãbʉ Daizeze Bedʼea jaradiade akʉza Betel Bélgicadebemane kʼarebabʉ Departamento de Asuntos Legalesde adewara mebẽrã jara ũrĩbibʉ mʉ̃ sãwũã berabarida ʉ̃rʉ akʉza so zarea diabʉ betelitara warrarapanʉra.

84 poagaba mʉ̃a Jeowaʼa yiwidʼikata yiwidʼida ewarira, maʉ̃neba ya mʉ̃ra audre iyi neũdukʼawua bia ba wã, mʉ̃ara mejãcha biga diabʉ Jeowaʼa iya ewari jõmaʉ̃nẽ ũrĩ zebʉrʉ baera mʉ̃ yiwidʼita (Sal. 66:19).b