Lepanʉraba widipanʉta
¿Kʼai «yuwẽrã» Isaías 60:1ne jarabʉra akʉza sãwũã piradrʉbʉ akʉza ʉ̃nabʉ?
Isaías 60:1ne jarabʉ: «Piradrʉra yuwẽrã, ʉ̃nara, bʉ ʉ̃nara zesi baera. Jeowaba obʉrʉ nebia bʉ uruyabibʉta». Naʉ̃ testo nãã akʉza tẽã jarabʉba kʼawuabibʉ «yuwẽrãra» Sionta iyabaʉta Jerusalénta, naʉ̃ra Judá kapital basi (Is. 60:14; 62:1, 2). Maʉ̃ Jerusalénbara jarakĩrãbʉ Israel pʉwʉrʉ jõma. Isaíasba bedʼea jaradaba dayirãʼa bedʼea ũme ʉ̃rʉ krĩchabibʉ: Nããra ¿Sõbeda akʉza sãwũã piradrʉsi Jerusalénʼra? ¿Sõbeda akʉza sãwũã ʉ̃nasi? Yi ũmeta, ¿Isaíasba bedʼea jaradara idi ewade jõma aripe berabarinʉmʉka?
¿Sõbeda akʉza sãwũã piradrʉsi Jerusalénʼra? ¿Sõbeda akʉza sãwũã ʉ̃nasi? Pʉwʉrʉ Jerusalénʼra akʉza templora ãrĩbasi babilonioraba judiora 70 poagabayeda ãyi juwa edre erbaside. Mamina tẽã Babilonia pʉwʉrʉta medoraba akʉza persaʼraba ãyi juwa edre baebiside israelitara Babiloniane badara jẽda wãseabasi ãyi pʉwʉrʉma, mawũã jẽda Jeowaba zokʼabada kĩrãkʼa yiwidʼita (Esd. 1:1-4). 12 tribude edabasi ʉ̃kʉrʉ ẽbẽrarã Jeowaba zokʼabʉ aripe obʉta maʉ̃raba poaga 537 Dayirã ewari nãã. Naʉ̃neba ʉ̃ta Jeowaba zokʼabʉ kĩrãkʼa yiwidʼi jʉ̃drʉsi (Is. 60:4). Ãyara Jeowa sakripisio dia jʉ̃drʉsida, Jeowaba piesta omarẽã zokʼabʉta ojʉ̃drʉsida adewara templota ara ojʉ̃drʉsida (Esd. 3:1-4, 7-11; 6:16-22). Jeowaba nebia obʉrʉba Jerusalénta uruyabibʉrʉ kĩrãkʼasi akʉza mawũã obʉrʉba israelitarãra ʉ̃nabʉrʉ kĩrãkʼasi wuabemara pʉwʉrʉ Jeowa ʉ̃rʉ kʼawua ẽ panʉraita.
Mamina Isaíasba propesia jaradara maʉ̃ne jõma aripe berabari ẽ basi. Israelitara mejãchaʉba ũrĩna ẽ basi Jeowaba zokʼabʉra (Neh. 13:27; Mal. 1:6-8; 2:13, 14; Mat. 15:7-9). Maʉ̃ awuara tẽã ũdubisida ĩjãna ẽãta dayirã Ẽdrʉbibari Jesús ʉ̃rʉ (Mat. 27:1, 2). Poaga 70 dayirã ewaride pʉwʉrʉ Jerusalénta akʉza templota jẽda ãrĩsida.
Jeowaba jarasi mawũã berabarita (Dan. 9:24-27). Wãrĩnubaira Jeowabara krĩcha ẽ basi iya propesia Isaías 60de jaradara Jerusalén nama egorodebemane jõma aripe berabarita.
¿Isaíasba bedʼea jaradara idi ewade jõma aripe berabarinʉmʉka? Mawũã, mamina naʉ̃nera yuwẽrãbara jarakĩrãbʉ Jerusalén ʉ̃tʉbemata, apostol Pablobara jarasi maʉ̃ yuwẽrãra dayirã papata (Gál. 4:26). Jerusalén ʉ̃tʉbemabara jarakĩrãbʉ Jeowa organizasion ʉ̃tʉbemata maʉ̃nera bʉ angelera iyiʉ̃me kʼẽrẽpa bʉrata. Yi wũãwũãrane edabʉ Jesústa akʉza 144.000ra Jeowaba iyi jaure zareaba jidadata. Ãyara Pablode kĩrãkʼa jʉ̃ãpanʉ ʉ̃ta wãita. Ãyira «pʉwʉrʉ jaigʉa ẽ bʉ» «Daizeze Israel» (1 Ped. 2:9; Gál. 6:16).
¿Sõbeda akʉza sãwũã piradrʉsi Jerusalén ʉ̃tʉbemara? ¿Sõbeda akʉza sãwũã ʉ̃nasi? Jeowaba maʉ̃ra aripe berabaribisi yi wũãwũãra iya jidakʉada nama egorode panʉraneba. Akʉra ãyi sãwũã berabaridata mõbe akʉra sãwũã ãyide aripe berabaribʉta propesia Isaías 60de jarabʉta.
Kristianorãra jẽda piradrʉibarabasi, siglo ũmeneba ya apostolera beida tẽãra audre besi baera apostatarata akʉza maʉ̃ba parĩgʉade bʉ kĩrãkʼabasi (Mat. 13:37-43). Maʉ̃ba ãyira Babilonia zroma juwa edre besi, naʉ̃ra religion zeri ẽãra. Mebẽrã ʉ̃ta wãirãra jida erpanʉ kĩrãkʼa basi ewari jõbodo jʉ̃drʉyeda, maʉ̃ ewarira 1914deba ʉ̃ta jʉ̃drʉsi (Mat. 13:39, 40). Poaga 1919dera ãyira maʉ̃neba edrʉsida aramaʉ̃ta ãyara Daizeze nokʼo ʉ̃rʉ jaradia jʉ̃drʉsida, maʉ̃ba ãyira ʉ̃nabʉ kĩrãkʼabasi.a Poaga berabari wãne ẽbẽrarã naʉ̃ drʉa jõmaʉ̃nẽbemata maʉ̃ ʉ̃nama zebʉ, maʉ̃rane edabʉ ʉ̃ta wãinebemara yi waebʉrata (Is. 60:3; Apoc. 5:9, 10).
Ʉ̃ra zeide naʉ̃ra kristianora ʉ̃ta wãirabara audre ʉ̃nabidayi Jeowa ʉ̃nara. ¿Sãwũã? Ãyi beibʉrʉdera ʉ̃ta wãñi mawũã Nueva Jerusalénʼnebema bayi mawũã ẽ bʉrʉ Jesús nobia bayi, maʉ̃rãra 144.000ra, ãyira nokʼora akʉza saserdotera (Apoc. 14:1; 21:1, 2, 24; 22:3-5).
Nueva Jerusalénba kʼarebayi Isaías 60:1ba jarabʉta aripe berabarita (Isaías 60:1, 3, 5, 11, 19, 20 naʉ̃ testoʉ̃me akʉra Apocalipsis 21:2, 9-11, 22-26). Nawedara Israeldebema nokʼorabara Jerusalénʼneba zokʼapanasi maʉ̃ kĩrãkʼa Nueva Jerusalénta (144.000) akʉza Jesuta nokʼobayi ẽjũã kĩrãwãreãnẽ. ¿Sãwũã Daizeze maeba baebʉ Nueva Jerusalénʼra? Ãyara akʉyi ẽbẽrarã nama egorodebʉta. Mawũã ẽbẽrarã jõma Daizezeʼa wawia ũdubipanʉra ãyi ʉ̃nane wãñi, maʉ̃ awuara ãya ẽdrʉbidayi nemitiadeba akʉza beideba (Apoc. 21:3, 4, 24). Mawũã obʉrʉba nekʼãrẽ jõma ãrĩbʉra ara odayi Isaíasba akʉza wuabema propetaraba jarada kĩrãkʼa (Hech. 3:21). Maʉ̃ra ara ojʉ̃drʉsi Jesús nokʼo baside akʉza maʉ̃ta ma ara oyi Jesúsba zokʼabʉta mil poaga babʉrʉde.
a Poaga 1919de Jeowaba zokʼabʉde yiwidʼi jʉ̃drʉdara yi jaramabasi naʉ̃ra testode Ezequiel 37:1-14 bayeda akʉza Apocalipsis 11:7-12 bayeda. Ezequielba jarasi jõma mebẽrã ʉ̃ta wãirabara Jeowaba zokʼabʉde yiwidʼidaibasita ãyi dããrabayeda jida erpanʉta berabarida tẽã. Kõbe Apocalipsisba propesia jarabʉbara jarakĩrãbasi mebẽrã ʉ̃ta wãira wiñabʉ ʉ̃tʉ zedata. Ãyira pikinʉmasi nemitia oẽãta karselde ibalbʉesida baera mamina mamaʉ̃ba ẽdrʉda tẽã Jeowa organizasionta nãã ede jʉ̃drʉsida. Poaga 1919de ãyira kʼãwũã trʉ̃gasida «nezokʼa jipabʉra akʉza biʼia krĩchabʉra» (Mat. 24:45; akʉra La adoración pura de Jehová: ¡por fin restaurada!, pag. 118).