Jeowa ode kʼẽrẽpa panʉraba ãyi bei nãã jaradadeba, ¿kʼãrẽta kʼawuapanʉ?

1. Mebẽrã zõrã panʉrabara, ¿kʼãrẽa ũrãgʼa biata diaseabʉ dayirã?

DAYIRÃ jõmaʉ̃ba nesidapanʉ ũrãgʼa biata diadamarẽã kʼãrẽ oita jidabʉrʉde bia jidaita. Maʉ̃ oira zõrãrã kongregasionebemaba akʉza awuru mebẽrã krĩcha bia erpanʉraba kʼarebaseapanʉ. Mebẽrã zõrã panʉraba dayirãʼa ũrãgʼata diara krĩchada ẽ baibara ãya ũrãgʼa diabʉra biga ẽãta idi ewadera ẽbẽrarãra awuara krĩchapanʉ baera. Jeowabara kãgabʉ mebẽrã zõrã panʉra ũrãgʼara ũrĩpanamarẽã. Ãyira dayirã nãã panʉ baera bia kʼawuabʉ kʼãrẽta oibarata nekʼãrẽ badu berabaribʉrʉde ãyita maʉ̃ne berabaribari baera akʉza ãya krĩcha bia erbʉta dayirãʼa jaradiaseapanʉ (Job 12:12).

2. ¿Kʼãrẽta akʉdai naʉ̃ artikulodera?

² Nawedara Jeowabara zõrã panʉra iyi ode kʼẽrẽpa panʉrata zokʼabasi yi pʉwʉrʉa ũrãgʼa bia diaita, bari jaraita, Moisésta, Davidta akʉza Juanta. Naʉ̃ra yumakẽrãnebemara mia abaʉta iyabaʉ poagadebema ẽ basi akʉza aba abakaʉta nekʼãrẽ awurua berabarisi. Naʉ̃ra yumakẽrãraba ãyi bei nãã ũrãgʼa biata dia amaesida yi audre warrara panʉra. Naʉ̃ra yumakẽrã kʼẽrẽpapanʉrabara ũdubisida kʼãrẽãba yibiata Daizezeba jarabʉde oira. Ãya bedʼea jaradara Jeowabara iyi bedʼeade bʉbisi. Ãya ũrãgʼa dia amaenabara dayirã jõmaʉ̃ta kʼarebabʉ warrarapanʉrata akʉza zõrã panʉrata (Rom. 15:4; 2 Tim. 3:16). Naʉ̃ artikulode akʉdayi naʉ̃ra yumakẽrãra ũbeaʉba ãyi bei nãã ũrãgʼa diadata akʉza dayirãba kʼãrẽta kʼawuaseabʉta ãya jaradadeba.

MARARA EWARI BIOBAYEDA PANAÑI

3. ¿Kʼãrẽita zokʼasi Jeowabara Moisésʼra?

³ Moisésʼra Jeowa ode kʼẽrẽpabasi. Iyira propetabasi, juezbasi akʉza Daizeze pʉwʉrʉta zokʼabasi. Adewara bʉsi ʉ̃kʉrʉ bedʼeara Daizeze Bedʼeadebʉta. Iyi sãwũã berabaridadeba Moisésbara nekʼãrẽ mejãcha kʼawuasi. Jeowaba israelitara Egiptodeba ẽdrʉbisidera Moisésbasi Jeowa pʉwʉrʉ nãã edebʉra akʉza iya ũdusi Jeowaba sãwũã miõba okʼata osita iyi pʉwʉrʉ kʼarebaita. Jeowaba Moisésta zokʼasi Daizeze Bedʼeade libro nãã jũezoma bʉrata bʉmarẽã akʉza Salmo 90ta, adewara iya bʉsibaibara Salmo 91sida akʉza iya bʉsibaibara Job librosida.

4. Moisésbara ¿kʼaira ũrãgʼa diasi akʉza kʼãrẽa?

⁴ Moisés 120 poaga babʉrʉde iyi bei nãã israelitarata ãba jʉredasi ãya kĩrãbebita ãyi kʼãrẽ berabari zebʉrʉta. Naʉ̃ra israelitaranebema ʉ̃kʉrʉba ãyi warraraena ũdusida sãwũã Jeowaba miõba okata osita akʉza sãwũã zʉbʉriabisita egipsiorata (Éx. 7:​3, 4). Ãyara ũdusida Jeowaba sãwũã mar Rojo ẽzadra ewasita akʉza kʼarebasita ãyita maʉ̃ne berabarimarẽã. Tẽã ãya ũdusida Jeowaba sãwũã paraonta iyi gorogororabawara makenasita (Éx. 14:​29-31). Mawũã ãyi drʉa ibʉawabʉma wãside ãya ũdusida Jeowaba sãwũã bia akʉsita akʉza sãwũã kʼarebasita (Deut. 8:​3, 4). Jeowaba israelitara drʉa bia diaya ada zei arakʼaita babʉrʉde, Moisésba iyi bei nãã ũrãgʼa biata diasi naʉ̃ra israelitara mawũã so zarea diaita.a

5. Moisésba jaradadera israelitarabara, ¿kʼãrẽ nebiata jʉ̃ãpanasi? (Deuteronomio 30:​19, 20).

⁵ Kʼãrẽta jarasi Moisésba (akʉra Deuteronomio 30:​19, 20). Moisésbara israelitara kĩrãbebisi ãya kʼãrẽ nebiata jʉ̃ãpanʉta. Jeowaba ãyaʼa diaibasi drʉata mama ewari biobayeda panamarẽã. Maʉ̃ drʉara jipade kĩrãwãreã basi akʉza mamara yikora mejãcha basi. Moisésba jara ũrĩbisi maʉ̃ drʉara sãwũã bʉta iya jarasi maʉ̃ drʉadera basita de zromata yi parãmata akʉza maʉ̃ra dedera nekʼãrẽ bia mejãcha basita. Adewara basita egoro wamata bania mama piaita akʉza ãyara neuira nesida ẽ basi yi umabasi baera (Deut. 6:​10, 11).

6. ¿Jeowabara kʼãrẽa iduaribisi awuru pʉwʉrʉdebemaraba Israel pʉwʉrʉ jãrĩnamarẽã?

⁶ Moisésba israelitara jara ũrĩbisi ãyita maʉ̃ ẽjũã kĩrãwãreãne bakĩrãbasibʉrʉ Jeowaba zokʼabʉta oibarabasita. Moisésba ãyaʼa jarasi Jeowaba zokʼabʉta odamarẽã mawũã maʉ̃ ẽjũã kĩrãwãreãneba ãĩ wã ẽ baita. Mamina israelitarabara oda ẽ basi Jeowaba zokʼabʉde. Maʉ̃ kʼarea Jeowabara iduaribisi ãyira asirioraba akʉza babilonioraba jida edemareã akʉza ãyi drʉasida jãrĩnamarẽã (2 Rey. 17:​6-8, 13, 14; 2 Crón. 36:​15-17, 20).

7. Moisésba jaradadebara, ¿kʼãrẽta kʼawuapanʉ? (Akʉra potota).

⁷ ¿Kʼãrẽta kʼawuapanʉ? Jeowaba zokʼabʉta opanʉbʉrʉ ewari jõmaʉ̃nẽ panañi. Israelitarãra Jeowaba ãyaʼa nebia diaya ada kʼawa panasi. Abarika idi ewade Jeowaba dayirã ẽjũã bia diaya abʉ zeira arakʼaitaba. Aranʉbai naʉ̃ drʉara ẽjũã kĩrãwãreã bayi (Is. 35:1; Luc. 23:43). Diaruta akʉza angel kayiruarãra neẽbayi (Apoc. 20:​2, 3). Naʉ̃ ewaridera neẽbayi religión zeri ẽãra Jeowa ʉ̃rʉ sewida jarabʉra (Apoc. 17:16). Adewara nokʼora ẽbẽrarã zʉbʉriabibʉrãra neẽbayi (Apoc. 19:​19, 20). Akʉza naʉ̃ ẽjũãnera neẽbayi ẽbẽrarã ãya kãgata okirãpanʉrãra (Sal. 37:​10, 11). Maʉ̃ ẽjũãnera ẽbẽrarã jõmaʉ̃ba Jeowaba zokʼabʉta opanañi maʉ̃ba ãba panañi akʉza aduʼa panañi. Mawũã panʉ baera ẽbẽrarãra ãyirai yiya kãgapanañi akʉza ãyirai yiya ĩjãpanañi (Is. 11:9). Dayirã jõmaʉ̃ba jʉ̃ãpanʉ maʉ̃ ewari zemarẽã, yi audre yibiara dayirãba Jeowaba zokʼabʉde opanʉbʉrʉ bari ewari biobayeda pana ẽ bayi awuarabʉrʉ ewari jõmaʉ̃nẽ zokʼaipanañi (Sal. 37:29; Juan 3:16).

8. Jeowaba nebia weya abʉ ʉ̃rʉ krĩchaiba, ¿sãwũã kʼarebasi misionero aba? (Judas 20, 21).

⁸ Dayirãba Jeowaba nebia diaya abʉ ʉ̃rʉ badua krĩchapanʉbʉrʉ naʉ̃ba kʼarebayi dayirãba bedʼea zroma ũdubʉrʉde maʉ̃a yi edebi ẽ baita akʉza bedʼea zroma ũdubʉmina Jeowaba zokʼabʉde bʼaita (akʉra Judas 20, 21). Adewara Jeowaba dayirã nebia diaya abʉba kʼarebabʉ nemitia yi edebi ẽ baita. Mebẽã aba Áfricade misionerode bʉta poaga biobaba jara ũrĩbibʉ iya edaʉde nekʼãrẽ Jeowaba kãga ẽãta okĩrãbasita, iya jarabʉ: «Mʉ̃a Jeowaba zokʼabʉde obʉbʉrʉ ewari jõmaʉ̃nẽ baseabʉ, maʉ̃ ʉ̃rʉ krĩchaiba kʼarebasi mʉ̃ bedʼea zroma yi edebi ẽ baita akʉza badua Jeowaʼa kʼareba widibasi. Jeowaba kʼarebasi iyi ode kʼẽrẽpa bʼaita».

BIA WÃÑI

9. ¿Davidbara kʼãrẽ bedʼea zromata ũdusi?

⁹ Davidʼra nokʼo biabasi. Adewara Davidbara nekʼãrẽ trãbidebemara jõma kʼawuabasi, iyara bedʼea biakirʉta bʉbasi, iyira yõ kʼawuabasi akʉza propetabasi. Davidbara bedʼea zroma mejãcha ũdusi. Bari jaraita, iyira ewari biobayeda mĩrʉ wãibarabasi nokʼo Saúldeba, naʉ̃ba iyita beakĩrãbasi baera. Adewara David nokʼo bada tẽã, yi warra Absalónba iyi nokʼota jãrĩkĩrãbʉ baera beakĩrãbasi, maʉ̃ kʼarea iyira mĩrʉ wãibarabasi. David mawũã mejãcha bedʼea zroma ũdusimina akʉza iya nemitia osimina ũdubisi iyira Jeoware kʼẽrẽpabʉta beiyeda. Jeowaba jarasi Davidbara iyi so sobiasita, maʉ̃ kʼarea jipade yibia dayirãbida Davidba ũrãgʼa diada ũrĩta (Hech. 13:22; 1 Rey. 15:5).

10. ¿Davidbara kʼãrẽa ũrãgʼata diasi yi warra Salomónʼa nokʼo bai nãã?

¹⁰ Akʉdaya kʼãrẽta jarasita Davidba yi warra Salomónʼa iyi nokʼo bai nãã. Jeowaba jidasi Salomónta templota omarẽã mamaʉ̃ba iyi pʉwʉrʉba iyaʼa yiwidʼipanamarẽã (1 Crón. 22:5). Mawũẽra Salomónbara nekʼãrẽ mejãcha oita erbasi akʉza Jeowa kʼarebata nesidabasi pʉwʉrʉ bia zokʼaita. Akʉdaya Davidba kʼãrẽ ũrãgʼata diasita.

11. ¿Davidbara kʼãrẽ ũrãgʼata diasi Salomónʼa akʉza sãwũã aripe berabarisi? (1 Reyes 2:​2, 3 akʉza akʉra potota).

¹¹ ¿Kʼãrẽ ũrãgʼata diasi Davidbara? (Akʉra 1 Reyes 2:​2, 3). Davidba jarasi yi warra Salomónʼa Jeowaba zokʼabʉta aripe obʉbʉrʉ bia wãita. Jeowabara poaga biobayeda nekʼãrẽ biata diasi akʉza nekʼãrẽ biode kʼarebasi (1 Crón. 29:​23-25). Salomónbara parãsi templota adewara ʉ̃kʉrʉ librora Daizeze Bedʼeadebemarata bʉsi. Adewara iya bedʼea jaradara ũduseapanʉ awurura testode. Adewara Salomónʼra jõmaʉ̃ba ũdukʼaudebasi iyi buru bia kʼarea adewara nekʼãrẽ biata mejãcha erbʉ kʼarea (1 Rey. 4:34). Davidba jarada kĩrãkʼa Salomónba Jeowaba zokʼabʉta ũrĩbʉedara jõma bia wãbasi. Mamina iyi zõnababʉrʉde daizeze zeri ẽãra yiwidʼi jʉ̃drʉsi. Jeowaba maʉ̃ra kãga ẽ basi, maʉ̃ba wua buru biata dia ẽ basi. Salomónbara maʉ̃ba bia zokʼa ẽ basi pʉwʉrʉra (1 Rey. 11:​9, 10; 12:4).

12. ¿Kʼãrẽta kʼawuapanʉ Davidba ũrãgʼa diadadeba?

¹² ¿Kʼãrẽta kʼawuapanʉ dayirãbara? Dayirãba Jeowaba zokʼabʉta ũrĩpanʉbʉrʉ iya dayirã nebiata diayi akʉza kʼarebayi (Sal. 1:​1-3). Jeowaba jara ẽ Salomón nebia diada kĩrãkʼa dayirãʼa diaita, mamina dayirãba iyi bedʼeata ũrĩnara buru biata diayi dayirãba kʼawua bia jida damarẽã nekʼãrẽ oide (Prov. 2:​6, 7; Sant. 1:5). Daizeze Bedʼeade ũrãgʼa diabʉta ũrĩpanʉbʉrʉ maʉ̃ba biode kʼarebabʉ jidaita kʼãrẽ estudiaita, kʼãrẽ trajo jidaita, plata sãwũã gasta kʼawuaita akʉza kʼãrẽ jemeneita. Jeowaba zokʼabʉta opanʉbʉrʉ audre iyi kʼawa panañi akʉza ewari jõmaʉ̃nẽ panañi (Prov. 2:​10, 11). Neũdukʼawua biata erbayi akʉza Jeowaba dayirãʼa jaradiayi sãwũã dayirã mebẽrãbawara audre sobia bʼaita.

13. ¿Kʼãrẽba kʼarebasi mebẽã Carmenʼra krĩcha bia jidaita?

¹³ Mebẽã Carmen Mozambiquedebemaba krĩchabasi dayi bia bʼaira estudiaibarabasita unibersidade, maʉ̃ kʼarea iyira estudiasi unibersidade de parãbaridebemata. Iya jarabʉ: «Mʉ̃a kãgabasi mʉ̃a estudiabʉra, mamina mʉ̃a kʼawuasi mawũã estudiabʉba ewari neẽãta, estudiabasi baera diapeda a la 7:30deba kʼewara 6 bayeda. Maʉ̃ba ewari neẽbasi ãba yi jʉrebarieda wãita akʉza Jeowadeba wiña wiñane jĩga wãbasi. Maʉ̃ne kʼawuasi Jeowaba ũrãgʼa diabʉta ũrĩnʉmʉ ẽãta» (Mat. 6:24). Maʉ̃ba mebẽã Carmenʼra Daizeze Jeowa yiwidʼisi akʉza jʉrʉsi dayirã kartara maʉ̃ ʉ̃rʉ bedʼeabʉta. Iya jarabʉ: «Zõrãrã kongregasionebemaba mʉ̃aʼa ũrãgʼa diadata ũrĩpe akʉza mʉ̃ papaba jarabʉta ũrĩpe idubʉsi unibersidara mawũã Jeowaita ewari jõmaʉ̃nẽ trajaita. Naʉ̃ba kʼarebasi mʉ̃a krĩcha bia jidaita maʉ̃ kʼarea sobiabʉ mʉ̃ra».

14. ¿Kʼãrẽ ũrãgʼata diasida Moisésba Davidʼʉ̃mebara?

¹⁴ Moisésba Davidʼʉ̃mebara mejãcha kãgapanasi Jeowara akʉza bia kʼawuapanasi kʼãrẽãba yibiata Jeowaba zokʼabʉ oira. Maʉ̃ba ãyi bei nãã jarapanasi ãyide kĩrãkʼa odamarẽã akʉza Jeowaʉ̃me kʼẽrẽpa panamarẽã. Moisésba Davidʼʉ̃meba jarasida Jeowaba zokʼabʉta oda ẽ bʉrʉ wuara iyi neũdukʼawua ba ẽ baita akʉza nebia dia ẽ baita. Ãya ũrãgʼa diadara idi ewadebida dayirãita yibia. Poaga bio berabarida tẽã awuru ẽbẽra Jeowa ode kʼẽrẽpabʉbida jarasi kʼãrẽãba yibiata Jeowaba zokʼabʉde bʼaita.

«MɄ̃RA MEJÃCHADE SOBIA SENTIBɄ NAɄ̃ KʼAREA»

15. ¿Kʼãrẽta ũdusi Juanbara iyi zokʼaibʉedara?

¹⁵ Juanʼra Jesús neũdukʼawuabasi akʉza Jesúsbara mejãcha kãgabasi (Mat. 10:2; Juan 19:26). Juanʼra Jesúsʼʉ̃me Daizeze Bedʼea jaradia wãbasi, ũdusi Jesúsba miõba okata oũdubidara akʉza Jesúsʼʉ̃me kʼẽrẽpabasi bedʼea zroma berabarinʉmasimina. Akʉza ũdusi Jesús sãwũã beasidata adewara Jesús jẽda pirãdrʉbʉrʉsida. Juanbara ũdusi siglo nããbema kongregasionra sãwũã wari wãta adewara iyi bei nãã ũdusi Daizeze Bedʼea bia ʉ̃rʉ jõmaʉ̃a jaradiasidata (Col. 1:23).

16. ¿Kʼairata kʼareba zebʉrʉ Juanba bʉdabara?

¹⁶ Juan zõnababʉrʉde Apocalipsis librode bʉta bʉsi (Apoc. 1:1). Adewara iya bʉsi libro ebangeliodebemata aba maʉ̃ awuara bʉsi karta primera, segunda akʉza tersera Juanta, maʉ̃nebemata karta tersera Juanʼra bʉdiabʉesi yi neũdukʼawua Gayoʼa, Juanbara maʉ̃ra iyi wũãwũã kĩrãkʼa akʉbasi (3 Juan 1). Maʉ̃ ewaridera Juanbara mebẽrã mejãchaʉta kãgasi iyi wũãwũãra kĩrãkʼa akʉza Juanba karta bʉdabara mejãcha kʼareba zebʉrʉ Jesús kʼaidubemarata.

17. 3 Juan 4ba jarabʉdebara, ¿kʼãrẽba sobiabibʉ dayirãra?

¹⁷ ¿Juanbara kʼãrẽta bʉsi? (Akʉra 3 Juan 4). Juanbara jarasi dayirãra audre sobiapanʉta ũrĩpanʉbʉrʉ Jeowaba zokʼabʉta. Iya Tersera Juan bʉsidera ʉ̃kʉrʉ ẽbẽrarãba sewa nebʉrata jaradiapanasi akʉza mebẽrãta kongregasione ãyirai yõbipanasi. Mawũãsidu ʉ̃kʉrʉra Jeoware panasi ãya Jeowaba zokʼabʉta opanasi baera (2 Juan 4, 6). Mawũẽra Juanʼra mejãcha sobiabasi, mamina naʉ̃ra kristianorabara Juan awa sobiabi ẽ basi Jeowasida sobiabasi (Prov. 27:11).

18. ¿Kʼãrẽta kʼawuaseapanʉ Juanba bedʼea jaradadeba?

¹⁸ ¿Kʼãrẽta kʼawuapanʉ dayirãbara? Jeowaʉ̃me kʼẽrẽpa bʉdera dayirãra sobiapanʉ akʉza wuabemarasida sobiabipanʉ (1 Juan 5:3). Bari jaraita, dayirãra mejãcha sobiabʉ Jeowata sobiabipanʉnera akʉza Jeowara mejãcha sobiabʉ ũdubʉrʉde dayirãba oda ẽãta naʉ̃ drʉade opanʉta, adewara aripe opanʉne iya zokʼabʉta (Prov. 23:15). Akʉza angelerasida sobiapanʉ dayirã kʼarea (Luc. 15:10). Dayirãra mejãcha sobiabʉ ũdubʉdade mebẽrãra pewãpanʉinʉ kʼẽrẽpabʉta akʉza nemitia oita zebʉrʉde maʉ̃ʼa yi edebi ẽãne (2 Tes. 1:4). Naʉ̃ drʉa Diaruba zokʼabʉta jõbʉrʉdera dayirãra mejãcha sobiapanañi Jeoware kʼẽrẽpabʉta ũdubibʉda baera.

19. Mebẽã Rachelbara, ¿kʼãrẽta jarasi awurura jaradiai ʉ̃rʉra? (Akʉra potota).

¹⁹ Dayirãra mejãcha sobiapanʉ awurura Daizeze Bedʼea ʉ̃rʉ jaradiapanʉnera. Mebẽã Rachel, iyira República Dominicananebema, iya jara ũrĩbibʉ kʼãrẽãba sobiabʉta wuabemara Daizeze ʉ̃rʉ jaradiabʉrʉdera. Mebẽã Rachelbara mejãcha kʼarebabʉrʉ ẽbẽrata Daizeze ode panamarẽã. Iya jarabʉ: «Mʉ̃ra mejãcha sobiabʉ ũdubʉrʉde mʉ̃ nekʼawuabariraba Jeowa kãgabʉta, ĩjãbʉta iyi ʉ̃rʉ akʉza nekʼãrẽ obʉta idubʉita ãya nekʼãrẽ nãã obadata, mawũã Jeowaʼa sobiabita. Mʉ̃ra mejãcha zarea osi ãyaʼa nejaradiaita, mamina audre sobiabibʉ naʉ̃ kʼãwũã ũdubʉba».

NAɄ̃RA ẼBẼRARÃBA BEDʼEA JARADADEBARA KʼÃRẼ NEBIATA ŨDUPANɄ

20. ¿Kʼãrẽne abarika panʉ Moisés, David akʉza Juanʼʉ̃mera?

²⁰ Moisés, David akʉza Juan ewarira jipa awuarabʉ dayirã ewarira akʉza ãyi sãwũã berabaridasida awuarabʉ. Mawũãsidu bʉ nekʼãrẽne abarika bʉta. ¿Kʼãrẽne? Naʉ̃ra yumakẽrãraba opanasi Jeowaba zokʼabʉta dayirãbida abarika opanʉ. Dayirãra Jeowaʼa yiwidʼipanʉ, Jeowa ʉ̃rʉ ĩjãpanʉ, adewara jʉrʉpanʉ iyi kʼarebata. Naʉ̃ra yumakẽrãrane kĩrãkʼa dayirãbida ĩjãpanʉ Jeowabara kʼarebabʉta iyi bedʼea ũrĩpanʉra.

21. ¿Kʼãrẽ nebiata ũduseapanʉ Moisés, David akʉza Juanba ũrãgʼa diadata ũrĩpanʉbʉrʉ?

²¹ Mawũẽra naʉ̃ra yumakẽrãraba jaradata ũrĩnaibara, Jeowaba zokʼabʉta aripe odaibara. Dayirãba ũrĩnara ewari jõmaʉ̃nẽ bia wãñi akʉza ewari biobayeda panañi (Deut. 30:20). Adewara dayirã Zeze Jeowata mejãcha sobiabidayi. Iya nebiata mejãcha diayi dayirãba krĩcha ẽ badata (Efes. 3:20).