Jeowaba akʉsi yõne baside akʉza aduʼa baside

Paul: Poaga noviembre 1985de Eskuela Galaadʼdeba daira zokʼabʉesida misionera kĩrãkʼa Liberia, África Occidentalʼeda. Daira mama wãi baera mejãchade sobiapanasi. Daira abione jʉ̃ẽsida Senegalʼidu. Maʉ̃ne mʉ̃ kimaba jarasi: «Ora aba wãekʉ dayi Liberiaidu jʉ̃ẽira». Mamina maʉ̃ne daia jarasida: «Yi ẽbẽrarã Liberiaeda wãirãra abioneba ubaibara, ẽbẽrarã Liberia pʉwʉrʉdebemata nokʼora ʉ̃rʉ panʉ baera, maʉ̃ba neẽ abion sama jʉ̃ẽira». Maʉ̃ kʼarea daira Senegalde awuru misionerabawara ewari 10 bayeda piki panesi. Daiba ũrĩpanasi notisiade jarabʉta pʉwʉrʉ Liberiadera ʉ̃kʉrʉ karrurane mejãcha edepanʉta ẽbẽra beidarata. Adewara ẽbẽrarãra deda piki baibarabasita. Yi maʉ̃ ũrĩẽãra batapanasi.

Anne: Daibara nekʼãrẽ oinããra biʼia krĩchapanʉ. Mʉ̃ra jipade peramia, wikakiruedara mʉ̃ra trʉ̃gapanasi «Anne newawi» kaye berabarisida mejãcha peradogo mʉ̃ra. Mawũãsidu Liberiaidu jʉ̃ẽkĩrãpanasi.

Paul: Daira tosida Inglaterrade. Mʉ̃ dera Anne dedaʉbara jĩga chua ẽ basi, 8 kilometro basi. Daibara kolegiodeba ẽdrʉda tẽã yi nãã edebarita ojʉ̃drʉsida, maʉ̃neba ʉ̃ta dai ũmeba krĩchasida ewari jõmaʉ̃nẽ Jeowaita trajaita. Mʉ̃ yibariraba akʉza Anne papaba mejãcha kʼarebasi daiba maʉ̃ oita. Mʉ̃ 19 poaga bidade trʉ̃sida Betelde trajamarẽã. Maʉ̃ta poaga 1982de mʉ̃ra juwa jidasi Anneʉ̃me. Annesida maʉ̃ne trʉ̃sida Betelde trajamarẽã.

Anne: Daira mejãchade sobiapanasi Betelde trajapanʉne, mamina audre kʼarebakĩrãpanasi kʼarebata nesidabʉmae. Daibara maʉ̃ta audre okĩrãsida Beteldera misionerabawara ãba panasi baera, maʉ̃ kʼarea poaga ũbeabayeda diamasiza Jeowaʼa maʉ̃ta widipanasi. Maʉ̃ta poaga 1985de panʉsi Jeowaba dai bedʼeara, daira trʉ̃sida Eskuela Galaadʼeda yi klase 79 eda, mamaʉ̃ba zokʼabʉesida misionero kĩrãkʼa Liberia, África Occidentalʼeda.

MEBẼRÃBA KÃGA ŨDUBIBɄBA SO ZAREA DIASI DAIA

Paul: Daia wãseabʉ asidade, daira yi nããbema abione wãsida Liberiaeda. Mainu jʉ̃ẽbʉrʉde ũdusida maʉ̃ pʉwʉrʉdera jõma bianʉma ẽ basita yõ kʼarea akʉza ẽbẽrarãra deda piki panasi aña wã ẽ marẽã jarasida baera. Adewara ẽbẽrarã maʉ̃ pʉwʉrʉdebemarãra mejãcha perapanasi, ãya ũrĩbʉdade badu karruba buya mejãcha obʉta mĩrʉ wẽba wãpanasi. Maʉ̃ perabi taʉbiya daibara diamasiza lepanasi Salmosta. Mawũãsidu daibara mejãcha kãgabasi dai asinasionʼra. Annera misionera baera Daizeze Bedʼea jaradia wãbasi. Mʉ̃ra Betelde trajabasi mebẽã John Charukʼʉ̃me.a Naʉ̃ mebẽãbara biʼia kʼawuabasi mebẽrãra maʉ̃ pʉwʉrʉdebema kʼãrẽ berabaribʉra, maʉ̃ba mejãcha kʼarebasi mʉ̃ra.

Anne: Daira maʉ̃ pʉwʉrʉdera mesera kʼawatotosi mebẽrã maʉ̃ pʉwʉrʉdebemarãra jipade ẽbẽra bia basi, ãya daira bia edapanasi akʉza kʼẽrẽpa panasi ãyira. Ãyira dai mebẽrã kĩrãkʼapanasi, adewara mebẽrãba ũrãgʼa diabʉba kʼarebasi dai audre Jeowa kʼawa bʼaita akʉza jaradia wãira jipade yibia basi. Daiba ẽbẽrarã Daizeze Bedʼea jaradiabʉde mesera wãinera, ãyira mejãcha kĩrʉpanasi mesera wãi baera. Daizeze Bedʼea jaradiaira dayi wãmae bedʼeaseabasi badu ẽbẽraʉ̃me. Adewara daibara ẽbẽra mejãchaʉa Daizeze Bedʼea ʉ̃rʉ kʼawuabita erpanasi, mamina maʉ̃ jõma ari bʼaeira zare basi, mawũãsidu daira mejãcha sobiapanasi.

PERAPANASIMINA SO ZAREA PANASI

Paul: Poaga kĩmarebayeda maʉ̃ pʉwʉrʉdera wiña aduʼa nʉmedasi, mamina poaga 1989de yõ zromata zesi. Adewara julio 2de, 1990de Betel pʉwʉrʉ kʼawa tabesi mia beamiarata. Maʉ̃ba Betelde bʉrãra aña wãbe ẽ basi. Adewara yi mebẽrãʉ̃me bedʼea ẽ basi akʉza sentral mundialʼʉ̃me. Maʉ̃ta mawũã berabarisi jedeko ũbeabayeda. Adewara maʉ̃ pʉwʉrʉdera mejãcha basi yõta, neẽbasi yikota akʉza yuwẽrãrata wawa opanasi. Mawũã maʉ̃ bedʼea zromane bʉta 14 poaga berabarisi. Maʉ̃ba maʉ̃ pʉwʉdera bia wã ẽ basi.

Anne: Maʉ̃ pʉwʉrʉdera mejãcha basi yõta. Ʉ̃kʉrʉ tribudebemarãra awuru tribudebemaraʉ̃me yõpanasi. Adewara mia beamiarãra ode wãpanasi, ãyara mejãcha erbasi põgata akʉza miti wua jʉ̃chubeasi, adewara ẽbẽrarã deda nezrugapanaasi. Adewara ãya ẽbẽra beai ʉ̃rʉ nebʉrabʉrʉdera «eterre beada ʉ̃rʉ» nebʉrabʉ kĩrãkʼa bedʼeapanasi. Adewara maʉ̃ ode berabaribʉrʉrãra beapanasi akʉza aramama pipiapanasi. Betel kʼawabida abarika osida. Maʉ̃ne ʉ̃kʉrʉ mebẽrãta beasida, maʉ̃ne eda beasida misionerorata ũme.

Mia beamiarabara ãya tribu kãga ẽãra pewãpanasi akʉza beapanasi. Maʉ̃ kʼarea mebẽrãbara mebẽrã maʉ̃ tribudebemarãra ãyi deda merasida ãyi bebʉidubasimina. Betelitaraba akʉza misioneroraba iyaba osida. Beteldera ʉ̃kʉrʉ mebẽrãra yi nããbema pisode opisinara bʉmae mĩrʉsida, ʉ̃kʉrʉta yi Segundo pisode betelita aba abakaʉba ãyi kuarto mera erpanasi. Bari jaraita, daibara dai kuartode merasida mebẽrã siete.

Paul: Mia beamiarãra ewariza jʉ̃ẽpanasi daichuidu ãya akʉ jʉ̃ẽpanasi daiba kʼaita mera erpanʉta deda. Maʉ̃ kʼarea daibara mebẽrã ũme bentanane bʉesida akʉza ũme puertade. Mebẽrã puertade panʉrabara ãyi juwata nãã bʉepanasi bʉrʉ kʼãrẽ berabari ẽ baibasi. Mamina mia beamiara deidu jʉ̃ẽbʉrʉdera mebẽrã puertade panʉrabara ãyi juwata jẽda bʉebasi. Mebẽrã bentanane panʉraba maʉ̃ta ũdubʉrʉdera mesra merapanasi mebẽrãta.

Anne: Semana bio berabarida tẽã mia beamiarãra ewariaba eda jʉ̃ẽsida Betelde, aramaʉ̃ta mʉ̃ra mebẽã abaʉ̃me bañone eda mirʉtotosi. Maʉ̃ bañone basi nekʼãrẽ wuagabarita, nekʼãrẽ wuagabaride eda zobea zaketa chuasi, maʉ̃ra miõba ũdu ẽ basi. Aramaʉ̃ta mebẽãra maʉ̃ zobea zakede ajuerzade eda wã kʼãrãpe mama mirʉtotosi. Maʉ̃ne mia beamiarãra mʉ̃ kuarto chuidu zeda kʼãrãpe puertama toutou nʉmabarisi maʉ̃ kʼarea Paulba jarasi: «Jʉ̃aidua mʉ̃ kimara bañone edachu». Kõbe mʉ̃a mebẽã merabʉrʉde bʉya otasi maʉ̃ serrabʉrʉde akʉza nekʼãrẽ mama badata jʉ̃rzʉanʉmaedasi. Maʉ̃ba mʉ̃ra mejãcha pera kʼãrãpe uretotosi. Maʉ̃ kʼarea mʉ̃a krĩchasi mʉ̃ kʼãwũã perakʉde puerta ewara kʼawuadayi mʉ̃a merakʉta, maʉ̃ba Jeowaʼa yiwidʼisi mʉ̃ta so aduʼa babimarẽã, mõbe ewasi puertara. Mʉ̃a puerta ewabʉrʉde iyi saludabʉrʉdera mʉ̃a kʼawua ẽ sãwũã aduʼa saludasita. Maʉ̃ne mia beamiara abaʉdebemata eda deguesi mõbe jʉrʉsi newuagadamae mamina nekʼãrẽ ũdu ẽ basi mamara. Aramaʉ̃ta jʉrʉsi wuabemara kuartorata, mamabida nekʼãrẽ ũdu ẽ basi.

JÕMAɄ̃BA ŨDUSEABASI JEOWABA KʼAREBABɄTA IYI PɄWɄRɄRA

Paul: Audrera diapedara daiba kʼãrẽ koira neẽ basi. Mamina diapedaza ãba yi jʉrepanasi mebẽrãbawara testo akʉita, naʉ̃ra dai «yiko kĩrãkʼa basi». Daiba kʼawuapanasi Daizeze Bedʼeata lepanasibʉrʉ akʉza estudiapanasibʉrʉ, naʉ̃ba kʼarebaibasita bedʼea zroma ũdupanʉmina zarea bʼaita.

Daiba kʼawuapanasi daita ewaraeda nekʼãrẽ edade wãsibʉrʉ mebẽrã daiba mera erpanʉrãra mia beamiaraba beaseabasita kʼaiba kʼarebai neẽ baera, maʉ̃ kʼarea krĩchasida aña wãna ẽ baita. Mamina Jeowaba biʼia akʉsi daira. Daiba krĩcha ẽãne diasi daiba nesidabʉta akʉza kʼarebasi daisida aduʼa panaita.

Ewarade mejãcha yõ nʉmasimina mebẽrãra Daizeze Bedʼea ʉ̃rʉ kʼawuaiba mejãcha kʼarebasi zarea bʼaita akʉza nebia jʉ̃ãita. Ãyita beada ẽmarẽã mĩrʉ wãibarabasimina adua ẽ basi ãya ĩjãbʉra akʉza ũdubisida aduʼa panʉta. Ãya jarapanasi ãyi kʼãwũã berabarinʉmʉbara mejãcha kʼarebabasita «zʉbʉria zroma zebʉrʉde kʼawuaita kʼãrẽta oita». Adewara zõrãrã kongregasionebemaraba akʉza yumakẽrãraba nekʼãrẽ mejãchaʉde kʼarebasida. Mamina mebẽrã mĩrʉ wãnapeadarabara ãyi bʉmae Daizeze Bedʼeata jaradiasida. Adewara ʉ̃kʉrʉbara mea jʉrʉsida sãwũã ãba yi jʉreita. Ãyi zʉbʉria nʉmasimina ãba yi jʉrebarieda wãiba, jaradiaiba mejãchade kʼarebasi so zarea panaita. Daiba mebẽrã nekʼãrẽ ãya nesidabʉ diabari jʉ̃ẽbʉrʉdera mebẽrãbara daiara audrera widipanasi bolsota diamarẽã jaradia wãita wuata widikʼaude. Maʉ̃ba daia mejãcha so zarea diasi wãrĩnu ĩjãbʉta ũdubipanʉ baera. Ẽbẽrarã ewaradera zʉbʉrianʉmʉ baera mejãchade sopʉa panasi, maʉ̃ba mebẽrãba bedʼea bia jaradia bʉrʉdera ũrĩkĩrãne ũrĩpanasi akʉza ãyara ĩjã ẽ basi sãwũã Jeowa ode panʉrãra bedʼea zromanepanʉmina sobiapanasita akʉza ãyirai yiya kãga ũdubipanasita (Mat. 5:​14-16). Maʉ̃ba kʼarebasi ʉ̃kʉrʉ mia beamiaranebasida Jeowa ode wãnamarẽã.

MEBẼRÃNEBA JĨGA BʼAITA ZARE BASIMINA JEOWABA ZAREA DIASI

Paul: Daira Liberia pʉwʉrʉdeba awuru pʉwʉrʉeda mĩrʉ wãsi 5 bese. Tre bese mĩrʉ wãsidera ewari wiña mĩrʉsi, mamina do bese mĩrʉ wãsidera poaga aba mĩrʉsida. Daira abarika krĩchapanasi misionera abaʉba jaradaʉ̃me. Iya jarasi: «Daiara Eskuela Galaadʼde jaradiasida dai zokʼabʉdamae mamabema mebẽrãra soiduba kãgadamarẽã. Daiba maʉ̃ta osida. Dai mĩrʉ wãibaradera daitara jipade zare basi mebẽrãneba jĩga wãira ãyira zʉbʉriade berabarinʉmasi baera». Mamina daira Liberia pʉwʉrʉ kʼawa mĩrʉ wãsi baera mamaʉba kʼarebaseabasi mebẽrãra.

Anne: Mayo 1996de daira dai chumaeba jĩga wãibarabasi Betelba karru diadade maʉ̃ karrudera daira kimare wãsi. Daibara dokumento mebẽrãba Liberiade kʼãrẽ onʉmʉ ʉ̃rʉ bedʼeabʉta diabaribarabasi mainʉ biʼia wuagaita. Dai karrude mama wãita atide atiaʉde yõtotosi ẽbẽrarãra akʉza mia beamiarabara ʉ̃ta batatotosi. Aramaʉ̃ta dai karrura pikiabisida akʉza daidebemata ũbea ubaebisida, mamina mʉ̃ kima Paulʼra maʉ̃ karrude edesida. Audre ẽãne daiba ũdusida ẽbẽrarã bionʉmʉ ẽzadra Paulʼra daima uruta mamina iyira datrʉ wasoa taibasi. Aramaʉ̃ta daiba krĩchasida batasidata mamina tẽã bia krĩchasida iyita batasidabʉrʉ taibabe ẽãta. Maʉ̃ta tẽã kʼawuasida iyira batada ẽ basita, awuarabʉrʉ mia beamianebema abaʉba karrudeba ãĩ bʉebʉrʉde posita. Mamina iyira mejãcha poda ẽ basi.

Maʉ̃ne daiba ũdusida gorogorora kamionta wãtakuta, daira mama barisi mamina ẽbẽrarã mejãchabʉ baera neẽ basi sama barira. Aramaʉ̃ta daira ewarade jirjiraba wãsi, maʉ̃ne karrura ĩjara zũga atibasi baera daitara zare basi ariwia jirjirabaira. Maʉ̃ kʼarea yi manejabʉa widisida jʉ̃ãmarẽã dai bia barita, mamina yi manejabʉra mejãcha perabasi baera ũrĩ ẽ basi dai bedʼeara. Aramaʉ̃ta daiba zarea osida maʉ̃ karru kẽnẽta ẽ baita. Dai zawa jʉ̃ẽbʉrʉdera dai juwara ma pʉ̃a jʉ̃ẽsi akʉza ma tʉrrʉa jʉ̃esi perabiba.

Paul: Dai kamioneba ubaebʉrʉdera ũdusida dai wuara jẽguesoabʉta akʉza jaigʉabʉta akʉza dai yiya akʉbʉrʉdera mia abaʉba ĩjã ẽ basi waidide zokʼaipanʉta, nekʼãrẽ mejãchade berabarisida baera. Daira kaisi elikotero kʼawa, naʉ̃ra põgaba batada baera dayima zeri ẽ kĩrãkʼa chuasi. Mamina nrʉema maʉ̃ne wãsi Sierra Leonaena. Daira sobiapanasi bei ẽ basi baera, mamina krĩcha opanasi mebẽrã kʼarea.

JEOWABA ZAREA DIASI AWURU BEDʼEA ZROMA AWUANTAITA

Anne: Daira jʉ̃ẽsida Betel Freetown, Sierra Leonainu. Mainu jʉ̃ẽbʉrʉdera mebẽrãba bia akʉsida akʉza daira aduʼa panasi mamina ataiʉde krĩcha zebasi dai Liberiade sãwũã berabaridata. Mʉ̃ma ataiʉde neida berabari kĩrãkʼa basi akʉza yi sãwũã nʉmʉsida kʼawua ẽ basi mʉ̃ara. Diamasiarera pera urumabasi akʉza ñabaita pʉbasi. Mawũã berabaribʉrʉdera mʉ̃ kima Paulba bura kʼãrãpe mʉ̃me yiwidʼibasi akʉza ãbaʉba trãpanasi dayirã organizasionebema trãbita. Naʉ̃ba kʼarebabasi aduʼa bʼaita. Naʉ̃nera mʉ̃a krĩchasi mʉ̃ra kĩrãnemabʉta maʉ̃ba wua misionera babe ẽãta.

Maʉ̃ tẽã kʼãrẽ berabaridara mʉ̃ara waidide kĩrãbebʉ, daiʼa diasida kartata ũme, abara ¡Despertad! 8 junio 1996debema basi. Naʉ̃ne basi artikulo aba yi trʉ̃ «¿Qué hacer ante los ataques de pánico?» Naʉ̃ artikuloba kʼarebasi kʼawuaita mʉ̃ kʼãrẽba sãwũã berabarinʉmʉta. Yi ababemara karta La Atalaya 15 mayo 1996debema basi. Naʉ̃ba erbasi artikulo aba kʼãwũã jarabʉta «¿De dónde proviene su fuerza?» Naʉ̃ kartade ũdubibasi bagabaga abaʉba iyi i kimarenebemata aba arĩbʉmina wãbariseabasita akʉza nekʼobasita. Jara ũrĩbibasi maʉ̃ kĩrãkʼa dayirãsida zʉbʉriade berabaribʉ kʼarea sopʉabʉmina, zarea neẽ kĩrã sentibʉmina, wuabemarata kʼarebaseabʉta Jeowa jaure zareadeba. Jeowaba mʉ̃ra kʼarebasi mʉ̃a kʼareba nesidabʉ ewaride maʉ̃ kartadeba. Maʉ̃neba ʉ̃ta mʉ̃a audre jʉrʉ jʉ̃drʉsi dayirã kartarane maʉ̃ ʉ̃rʉ bedʼeabʉta. Mõbe yi maʉ̃ ʉ̃rʉ bedʼeabʉra karpetade wuaga wãsi, naʉ̃ba mejãcha kʼarebasi (Mat. 24:45). Ewari berabari wãne mʉ̃ara aukʼara krĩcha ẽ basi mʉ̃ sãwũã berabarida ʉ̃rʉra.

NEKʼÃRẼ AWUARA OIBARADE JEOWABA KʼAREBASI

Paul: Daira jẽda Liberiaeda wãbʉrʉza mejãchade sobia sentipanasi. 20 poaga badea kʼarebasida mebẽrã Liberiadebemara. Maʉ̃ta 2004de yõ berabarida tẽã Betelbemaraba jarasida Betel ara oita. Aramaʉ̃ta daiʼa widisida awuru pʉwʉrʉeda wãseabʉ kʼawuaita.

Daiba maʉ̃ne kʼãrẽta oita jidaira jipade zare basi mebẽrã Liberiadebemara mejãcha kãga zesida baera, ãyira daitara dai mebẽrã kĩrãkʼa basi. Akʉza maʉ̃ kʼarea ãyideba jĩga wã amapanasi. Daiba krĩchasida nãã Eskuela Galaad eda wãinebida daiba idubʉibarabasita dai mebẽrãta. Mamina maʉ̃ne Jeowaba daira mejãcha kʼarebasi, maʉ̃ kʼarea krĩchasida ĩjãita Ghanaena wãita. Mamabida Jeowaba iyaba akʉi baera.

Anne: Mebẽrã Liberiadebemaneba jĩga wãbʉrʉdera mejãcha jẽgasida. Mamina mebẽã Frankba jaradaba mejãcha kʼarebasi. Iya jarasi: «Kĩrãduaidua daira. Daiba kʼawuapanʉ maraba daira wãrĩnu kĩrãdua ẽãta, mamina zarea oidua mebẽrã Ghananebemarasida soiduba kãgaita. Naʉ̃ asinasionʼra Jeowaba diasi mara, maʉ̃ kʼarea soiduba trajaidua kamabida». Mebẽãba jaradaba kʼarebasi daiba drʉa ũdukama wãmina akʉza kʼai ũdukʼama wãmina bia sentita.

Paul: Daira audre ẽãne kʼawatotosi Ghananera. Daibara mebẽrãʼa iyabaʉ kãgata ũdubisida. Ghananera mejãcha basi Jeowa ode panʉrãra akʉza mebẽrãba ãya ĩjãbʉ ũdubibʉba kʼarebasida daisida kʼẽrẽpa bʼaita Jeowa ode. Mamina Ghanane 13 poaga babʉrʉde zokʼabʉesida Betel Kenianebemaena Áfricade. Daiba mebẽrã Ghananebemarãra krĩchapanasimina Kenianebemarasida iyaba kãga zesida. Idibasidu daira Keniane panʉ, naʉ̃ pʉwʉrʉdebida mejãcha bʉ kʼãrẽta oita Jeowaita.

DAIBA KʼÃRẼTA KʼAWUA ZEBɄRɄTA NAINUBAYEDA

Anne: Poaga berabari zebʉrʉde mʉ̃ra zʉbʉriade berabari zebʉrʉ akʉza edaʉde mejãcha perabari. Wãrĩnubaira dayita chubʉrʉ drʉa yõne bʉmae maʉ̃nera mejãcha perabʉba kayabibare akʉza sopʉabibare. Maʉ̃nera jʉ̃ãbe ẽ Jeowaba dayita maʉ̃ bedʼea zromaneba neneẽã ẽdrʉbimarẽã, mawũãsidu mʉ̃ara kʼawua zebʉrʉ Jeowaba daya kʼareba diabʉta daya akʉbʉbʉrʉ akʉza mebẽrã yi kʼarebabibʉbʉrʉ, adewara Daizeze Bedʼea jaradia wãbʉbʉrʉ, Daizeze Bedʼeata ewariza akʉbʉbʉrʉ, ãba yi jʉrebarieda wãbʉbʉrʉ, Jeowaba naʉ̃neba kʼarebabʉta dayi asinasione ariwia bʼaita, mapae ẽ baita.

Paul: Edaʉde ʉ̃kʉrʉba daiʼa widipanʉ: ¿Mara asinasionebemara saʉ̃ta audre kãga marabara? Daya bia krĩchabʉrʉdera drʉara biakede, mamina edaʉde neida berabariseabʉ maʉ̃ pʉwʉrʉdera. Mawũãbʉba zarea baseabʉ dayi mama kʼawaira. Mawũẽra, ¿kʼãrẽta audre yibia dayi asinasionera? Audre yibiara mebẽrãʉ̃me ãba baita. Wãrĩnubaira jõmaʉ̃ta awuara dapũẽsida, jõmaʉ̃ta awuara panʉ, kultura awuara panʉ, mamina jõmaʉ̃ba iyaba krĩchapanʉ, jõmaʉ̃ba Jeowata kãgapanʉ. Daiʼa asinasion diasidadera daibara krĩchasi daira wãta mebẽrã so zarea diaita, wãrĩnubaira mebẽrãbʉrʉ daia so zarea diasida.

Dai kʼãwũã pʉwʉrʉ awuruma zokʼa bʉebʉdade ũdupanʉ Jeowa pʉwʉrʉde bʼaira jipade yibiata. Bʉ wãmae kongregasionʼrane ũdubʉ baera mebẽrã wãrĩnu bʉ mebẽãra kĩrãkʼa bʉta. Daiba kʼawuapanʉ Jeowa kʼarebata ewari jõmaʉ̃nẽ jʉrʉpanʉbʉrʉ dai zarea neẽã sentibʉrʉdera, Jeowaba kʼarebaita (Filip. 4:13).