Jeowade kĩrãkʼa jõmaʉ̃ra ʉ̃tabʉta krĩcha ẽ badrʉ

1. ¿Kʼãrẽa yibia kʼawuaita Jeowara wuabemara ʉ̃ta krĩchabʉ ẽãta?

NOKʼORA naʉ̃ drʉdebemarãra platata mejãcha erbaera, maʉ̃ba ʉ̃ta krĩchapanʉ wuabemaraira, Jeowara ãyira zareabarabʉmina mawũã krĩcha ẽ (Sal. 113:​5-8). Naʉ̃ artikulode kʼawuadayi sãwũã Jeowaba nekʼãrẽ kimareneba ũdubibʉta maʉ̃ nebiata akʉza Jesúsba yi Zeze nebia sãwũã oũdubisita. Naʉ̃ kʼawuaiba dayirãra kʼarebayi audre Jeowa kʼawa baita akʉza iyide kĩrãkʼa odaita.

ZARE Ẽ JEOWAɄ̃ME BEDʼEAITA

2. ¿Kʼãrẽta jaradiabʉ Salmo 62:8ba Jeowa ʉ̃rʉ? (Akʉra poto ).

² Ẽbẽra ʉ̃ta krĩchabʉme bedʼeaira jipade zare, mamina Jeowara mawũãbʉ ẽ, awuarabʉrʉ Jeowabara kãgabʉ dayirã sãwũã sentibʉra iyaʼa jaradamarẽã akʉza dayi kʼãrẽ krĩchabʉta. Iyara iyi kʼawa bamarẽã kãgabʉ baera (akʉra Salmo 62:8). Zeze abaʉba yi wũãwũãba iyi kʼãrẽ berabarinʉmʉ kĩrãkita ũrĩbari kĩrãkʼa, Jeowabida iyaba ũrĩbʉ iyi odepanʉra iyaʼa yiwidʼibʉdadera akʉza ʉ̃kʉrʉ yizarata iyara idu bʉbisi iyi bedʼeade. Maʉ̃ba ũdubibʉ Jeowaʉ̃me bedʼeaira zare ẽãta akʉza iya ũrĩkĩrãbʉta (Jos. 10:​12-14; 1 Sam. 1:​10-18). Mawũãsidu edaʉde krĩchaseapanʉ dayirãra kayirua omia baera, Jeowaʉ̃me bedʼeabe ẽãta mawũãbʉrʉdera, ¿kʼãrẽta oseapanʉ?

3. ¿Kʼãrẽ yizaba ũdubibʉ Jeowabara iya yiwidʼidamarẽã kãgabʉta?

³ Daya krĩchabʉbʉrʉ Jeowa dayirã kãga ẽãta mawũãsidu yiwidʼiseabʉ, maʉ̃ kʼarea yiza aba akʉdaya. Jesúsba nebʉrasi warra aba yibarira dedaʉba wãna ʉ̃rʉ. Naʉ̃ yumakẽrãra kayiruata mejãcha osi baera, iyi dedara jẽda zeamabasi, mamina iyi deda jẽda zebʉrʉdera yi zezebara bia edasi akʉza kãgabʉta ũdubisi (Luc. 15:​17-20). Abarika Jeowara naʉ̃ yumakẽrã zeze kĩrãkʼabʉ. Ẽbẽra sopʉabʉta, mawũã ẽ bʉrʉ iya kayirua oda kʼarea krĩcha obʉta, Jeowaʼa yiwidʼibʉrʉdera Jeowabara ũrĩkĩrã ũrĩbʉ (Lam. 3:​19, 20). Jeowabara so zʉbʉria akʉ kʼãrãpe iya kãgabʉta ũdubibʉ akʉza kĩrãduabʉ ẽbẽrarãba kayirua obʉra (Is. 57:15). ¿Jeowabara sãwũã ũdubibʉ iya wãrĩnu kãgabʉta? Ũdubibʉ zõrãrã kongregasionebemaraneba, dayi mebẽãdeba akʉza mebẽrã kongregasionebemaraneba (Sant. 5:​14, 15). Jeowabara kãgabʉ dayirãra iyi kʼawapanamarẽã maʉ̃ kʼarea kʼarebakĩrã kʼarebabʉ.

4. ¿Jesúsba sãwũã ũdubisi iyiʉ̃me bedʼeaseapanʉta?

⁴ Jesúsbara yi Zezede kĩrãkʼa obʉ. Jesúsʼra wuabemaraira ʉ̃tabʉta krĩcha ẽ, Jeowata mawũãbʉ baera. Maʉ̃ kʼarea iyi naʉ̃ drʉade basidera ẽbẽrarãra perada ẽ basi iyi kʼawa bʼaira. Ẽbẽrarãbara bedʼeata mejãcha widipanasi (Mar. 4:​10, 11). Akʉza Jesúsbida widibasi ẽbẽrarãba kʼãrẽ krĩchabʉta akʉza jarapanasi ẽbẽrarãbara ãya kʼãrẽ krĩchabʉra (Mat. 16:​13-16). Akʉza kayirua obʉdadera perada ẽ basi kʼawuapanasi baera Jesúsʼra ẽbẽra biata akʉza mesera kĩrʉ ẽãta (Mat. 17:​24-27). Jesúsba yi Zezede kĩrãkʼa obasi baera Jesús kʼaidupanʉrabara bia ũdukʼawuasida Jeowara. Kʼawuasida Jeowara ʉ̃tabʉta krĩcha ẽãta akʉza iyiʉ̃me bedʼeaseabʉta. Jeowara jipade awuarabasi nokʼora religioranebemaraira, naʉ̃rãra ʉ̃tabʉta krĩchapanasi akʉzade ẽbẽrarã kãgabʉta ũdubida ẽ basi (Juan 14:9).

5. ¿Kʼãrẽa zare ẽ bai wuabemaraitara dayi kʼawa baita dayita wuabemara ʉ̃tabʉta krĩchabʉ ẽ bʉrʉ?

⁵ ¿Sãwũã Jeowade kĩrãkʼa oibara? Dayi wuabemara ʉ̃tabʉta krĩchabʉ ẽ bʉrʉ, wuabemara dayi kʼawa bʼaira zarea ẽ bayi. Mamina wuabemara ʉ̃tabʉta krĩchabʉbʉrʉ, dayabida erbakĩrãñi wuabemaraba nebia erbʉta akʉza zarebayi kayirua obʉdade ãyi kayirua daya kĩrãduaita. Mamina dayirãba akʉbʉbʉrʉ wuabemarãra dayirãira ʉ̃tabʉta, mawũãra ãyiʉ̃me mesera kĩrʉ ẽ bayi akʉza zare ẽ bayi kĩrãduaita ãya nekayirua obʉrʉde, adewara kãgabʉta ũdubidayi (Col. 3:​12-14). Zõrãrã kongregasionebemarãra zarea odaibara mebẽrã kongregasionebemaraba ãyiʉ̃me bedʼeaita zare ẽ bamarẽã, maʉ̃ba zarea opanʉ ãyira Daizeze ʉ̃rʉ kʼawuabari deda wãita, internetʼneba reunion akʉi kaude akʉza jaradia wãpanʉ deza deza mabẽrãbawaraʉba mawũã audre ũdukʼawuapanʉ mebẽrãba ãyita, mawũã opanʉbʉrʉ mebẽrãita zarea ẽ bayi ãyiʉ̃me bedʼeaira.

JEOWABA EDAɄDE IYA KRĨCHABɄ AWA OẼ

6, 7. Jara ũrĩbira Jeowaba sãwũã panʉsida naweda iyi odepanʉraba wididata.

⁶ Ẽbẽra wuabemarai ʉ̃ta krĩchabʉbara, nekʼãrẽ wuabemaraba obʉdadera iya jarabʉrʉtrʉ iyi. Mamina Jeowara mawũãbʉ ẽ, jipade buru biamina wuabemaraira ʉ̃tabʉta krĩchabʉ ẽ akʉza edaʉde iya krĩchabʉ awa oẽ. Bari jaraita, krĩchadrʉ Míriam yiza ʉ̃rʉ, iyira yi mebẽã Aarónʼʉ̃me i kayirua bedʼeasida yi mebẽã Moisés ʉ̃rʉ, maʉ̃ba Jeowa ʉ̃rʉbida i kayirua bedʼeabʉrʉ kĩrãkʼasi, maʉ̃ba Jeowara mejãcha kĩrʉsi akʉza kayabisi Míriamʼra kaya lepraba. Maʉ̃nera yi mebẽã Aarónba widisi Moisésʼa kʼarebamarẽã, mawũẽra Moisésʼra Jeowaʼa yiwidʼisi yi mebẽã Míriam bebimarẽã aramaʉ̃ta Jeowaba Míriamʼra bebisi. Maʉ̃ba ũdubibʉ Jeowara mejãcha zareabarabʉmina, mawũãsidu wuabemara ʉ̃tabʉta krĩchabʉ ẽ, awuarabʉrʉ iya odara edaʉde awuara obʉ (Núm. 12:​1-15).

⁷ Akʉza akʉdaya Ezequías yizata. Jeowaba propeta abaʉdeba jarasi Ezequíasʼra iyi kayabʉba beita, Ezequíasba maʉ̃ kʼawuaside Jeowaʼa soiduba yiwidʼisi, maʉ̃nera Jeowaba iyi kayabʉra bebisi akʉza audu 15 poaga bamarẽã diasi (2 Rey. 20:​1, 5, 6). Naʉ̃ba ũdubibʉ Jeowaba iya oita krĩchabʉra edaʉde awuara obʉta.

8. ¿Saʉ̃ra yizaba ũdubibʉ dayirãra Jesús kʼawa baseapanʉta? (Mar. 3:​1-6).

⁸ Jesúsbara yi Zezede kĩrãkʼa obʉ. Iyi naʉ̃ drʉade basidera ũdubisi ẽbẽrarãra iyiʉ̃me bedʼeaseabʉta, kʼarebasi ẽbẽrarã mejãchaʉta. Bari jaraita, bebikʉasi sábado ewaride yi kayaberãra, maʉ̃ra nokʼo religionebemarabara bia akʉpana ẽ basi, maʉ̃ba ũdubisi nokʼo religionebemaira jipade awuarabʉta Jesúsʼra (akʉra Marcos 3:​1-6). Idibasidu Jesúsbara maʉ̃ nebiara ũdubibʉ kristianora. Bari jaraita ẽbẽra abaʉba kayirua zroma obʉrʉdera, ewarita diabʉ mawũã iya kayirua obʉ idubʉmarẽã (Apoc. 2:​2-5).

9. ¿Dayirãba sãwũã ũdubipanʉ jʉ̃ãna ẽãta wuabemaraba odamarẽã daya krĩchabʉ kĩrãkʼa? (Akʉra potorata).

⁹ ¿Sãwũã Jeowade kĩrãkʼa oibara? Dayirãsida Jeowa kĩrãkʼa krĩchaita akʉza odaita zarea odaibara (Sant. 3:17). Bari jaraita, yiza ũme akʉdaya, yibarirabara yi wũãwũãrãra ãya kãgata omarẽã iduaribi ẽ akʉza yibarirabara widi ẽ ãyi wũãwũãraba obe ẽãta odamarẽã. Akʉza awuru yizata ũdupanʉ Génesis 33:​12-14 bayeda, nama ũdupanʉ Jacobʼba kʼawuabasita kʼãrẽaba oseabʉta kʼawuabasita yi wũãwũãraba, maʉ̃ kʼarea idi ewadebida yibarirabara kʼawuabaibara ãyi wũãwũãraba kʼãrẽta oseabʉta akʉza jʉ̃ãna ẽ baibara yi mebẽãba obʉta ababemabida abarika omarẽã. Zõrãrã kongregasionebema ãba yi jʉrebʉrʉdera maʉ̃ranebema abaʉba iya jarabʉrʉtrʉ wuabemaraba ĩjãnamarẽã jʉ̃ãibara ẽ, awuarabʉrʉ iyabida ũrĩ kʼawuabaibara wuabemaraba kʼãrẽ jaraita, maʉ̃ta Daizeze Bedʼeaba jarabʉdebʉbʉrʉ maʉ̃ra iya ĩjãibara (1 Tim. 3:​2, 3). Jõmaʉ̃ta zarea odaibara wuabemaraba jarabʉ ũrĩta daya krĩchabʉme awuarabʉmina (Rom. 14:1). Jõmaʉ̃ba ũrĩnaibara naʉ̃ ũrãgʼata: «Jõmaʉ̃ba kʼawuapanaibara marabara maya krĩchabʉta oẽãta» (Filip. 4:5).

JEOWABA JɄ̃Ã KʼAWUABɄ

10. ¿Sãwũã ũdubisi Jeowabara iyara jʉ̃ã kʼawuabʉta?

¹⁰ Dayirãba kʼawuapanʉ ẽbẽra ʉ̃ta krĩchabʉbara jipade jʉ̃ãkĩrã ẽãta, mamina Jeowabara jipa awuarabʉ. Naʉ̃ drʉadera neẽ Jeowa kĩrãkʼa kʼãwũã jʉ̃ã kʼawuabʉra. Bari jaraita, Jeowaba Noéʼa jarasi 120 poagabayeda jʉ̃ãita iya ẽbẽrarã kayirua makenaita, maʉ̃ berabariyeda Noébara yi wũãwũãrãra dapʉẽsi akʉza osi arkata yi mebẽrãbawaraʉba (Gén. 6:3). Tẽã Jeowaba krĩchaside Sodoma akʉza Gomorradebema ẽbẽrarã kayirua makenaita, maʉ̃ ʉ̃rʉ Abrahánba wididara Jeowabara ũrĩsi, Jeowaba jaraseabasi Abrahánʼa: «¿Bʉmara mʉ̃a kʼawua ẽka kʼãrẽta oibarãra?». Mamina Jeowabara maʉ̃ta jara ẽ basi, Jeowara iyitrʉ ʉ̃tabʉta krĩchabʉ ẽ baera akʉza iyara jʉ̃ã kʼawua baera (Gén. 18:​20-33).

11. 2 Pedro 3:9de jarabʉdebara, ¿kʼãrẽa jʉ̃ãbʉ Jeowabara idi ewadera?

¹¹ Idi ewadebida Jeowabara jʉ̃ã kʼawuabʉta ũdubibʉ, iyara kʼawuabʉ sõbede makenaita ẽbẽrarã kayiruara, mamina dayirãba krĩchaseabʉ ¿kʼãrẽa jʉ̃ãbʉba Jeowabara? Iyara jʉ̃ãbʉ kãgabʉ baera mia abaʉ ẽbẽrata makena ẽ marẽã, awuarabʉrʉ kãgabʉ jõmaʉ̃ba iyita ũdukʼawuadamarẽã akʉza ãya kayirua obʉta idubʉdamarẽã (akʉra 2 Pedro 3:9). Mamina, ¿Jeowabara mawũã bari ewarade jʉ̃ãbʉka? Mawũã ẽ, iya jʉ̃ãbʉdeba ẽbẽrarã bioʉba ũdukʼawua zebʉda iyira akʉza dayirãbida kãgapanʉ ẽbẽrarã mejãchaʉba ũdukʼawuadamarẽã Jeowara. Mamina Jeowaba mawũã jʉ̃ãbʉra ewari jõmaʉ̃nẽ mawũã ba ẽ bayi, iyara ẽbẽrarã kãgamina iduaribi ẽ bayi ẽbẽrarãba ãya kãgata odamarẽã, awuarabʉrʉ iya kʼawuabʉ sõbede jõbita ẽbẽra kayiruara naʉ̃ drʉadebʉra (Hab. 2:3).

12. ¿Sãwũã Jeowade kĩrãkʼa jʉ̃ã kʼawuabʉ Jesúsbara?

¹² Jesúsba yi Zezede kĩrãkʼa obʉ. Poaga biobayeda Jesúsbara jʉ̃ã kʼawuabʉta ũdubi zebʉrʉ yi zeze Jeowade kĩrãkʼa, ¿kʼãrẽa? Ũdu zebʉrʉ sãwũã Diaruba Daizeze ʉ̃rʉ sewa nebʉrʉ jaranʉmʉta akʉza ẽbẽrarã ʉ̃rʉ akʉza maʉ̃ awuara ũdubʉ ẽbẽrarã sãwũã zʉbʉriabʉta maʉ̃ kʼarea (Gén. 3:​4, 5; Job 1:11; Apoc. 12:10). Wãrĩnu Jesúsbara kãgabʉbaibara Diaruba kayirua onʉmʉra ara oita (1 Juan 3:8). Jesúsbara jʉ̃ãbʉ Jeowaba kʼawua jarayeda sõbede jõbita Diaruba kayirua onʉmʉra, ¿maʉ̃ra iya kʼãrẽa mawũã obʉ? Jesúsbara krĩcha ẽ iyitrʉ audre yi zromata, maʉ̃ba jʉ̃ãbʉ Jeowabʉrʉ kʼawua jaramarẽã sõbede Diaruba kayirua obʉra jõbita (Hech. 1:7).

13. ¿Kʼãrẽne ũdubisi Jesúsbara jʉ̃ã kʼawuabʉta iyi kʼaidupanʉra?

¹³ Jesús nama uda zesidera jʉ̃ã kʼawuabʉta ũdubisi. Iyi kʼaidupanʉrãra ãyirai bedʼeakapanasi kʼaita audre yi zromata, Jesúsʼra maʉ̃ kʼarea mesera kĩrʉ ẽ basi, kʼawuabasi baera ewari berabari wãne ãyara audre bia krĩchaita (Luc. 9:46; 22:​24-27). ¿Bʉya nekʼãrẽ aña oda kʼarea sopʉa sentibarika? Jipa yibia kʼawuaita Jesúsʼra mesera kĩrʉ ẽãta dayirãba nekʼãrẽ aña obʉrʉdera.

14. ¿Kʼãrẽba kʼarebayi audre jʉ̃ã kʼawua bʼaita?

¹⁴ ¿Sãwũã Jeowade kĩrãkʼa oibara? Mawũã Jeowade kĩrãkʼa odaira, Jesús kĩrãkʼa krĩchadaibara (1 Cor. 2:16). Maʉ̃itara dayirãbara estudiaibara Daizeze Bedʼeade naʉ̃rata: Mateo, Marcos, Lucas akʉza Juanta, nama kʼawuapanʉ baera Jesús sãwũã krĩchabadata akʉza iya kʼãrẽ obadata. Akʉza Jeowaʼa wididaibara iyi warra Jesús kĩrãkʼa krĩchabimarẽã, mawũã wuabemaraira ʉ̃tabʉta krĩcha ũdubi ẽ baita. Mawũã opanʉbʉrʉ Jeowa kĩrãkʼa krĩchadayi akʉza daya aña obʉrʉde mejãcha kĩrʉ ẽ bayi akʉza wuabemaraba nekʼãrẽ obʉrʉdebida, mawũã jʉ̃ã kʼawuabʉta ũdubi baera (Mat. 18:​26-30, 35).

JEOWABA BIA AKɄBɄ WUABEMAI AUDRE KRĨCHABɄ ẼÃRA

15. ¿Sãwũã aripe obʉ Jeowabara Salmo 138:6de jarabʉra?

¹⁵ (Akʉra Salmo 138:6). Jeowaba wuabemaraba kʼãrẽ ẽ kĩrã akʉbʉ ẽbẽrarã, bia akʉbʉ. Maʉ̃ra yizarata kʼawuadaya, Déborara Isaac mebẽrã akʉza Jacob mebẽrã nezokʼabasi, iyira trajasi 125 poagabayeda ãyita, Jeowabara Débora trʉ̃ ʉ̃rʉ bʉbisi Moisésʼa, adewara bʉbisi iyira kãgadebasita (Gén. 24:59; 35:​8, nota). Poaga bio berabarida tẽã Jeowabara akʉza Davidta jidasi nokʼo bamarẽã, Davidʼra obeja akʉbaribasimina (2 Sam. 22:​1, 36). Akʉza tẽã Jeowabara iyi angeleraneba jarasi obeja akʉbarira Dayirã ẽdrʉbibarira tosidata Belénʼne (Luc. 2:​8-11). Joséba akʉza Maríaba Jesús templo eda edesidera, Jeowabara idu ũdubisi iyi warra Jesústa Simeónʼa akʉza Ana ãyi zõrãrãbasimina, mawũã ũdubisi iyara bia akʉbʉta ãyira akʉza kãgata (Luc. 2:​25-30, 36-38). Naʉ̃ra yizaraba ũdubibʉ Jeowabara bia akʉbʉta wuabemarai ʉ̃tabʉta ũdubipanʉ ẽãra.

16. ¿Jesúsbara sãwũã yi Zeze Jeowade kĩrãkʼa osi?

¹⁶ Jesúsbara yi Zezede kĩrãkʼa obʉ. Jesúsbara bia akʉsi ẽbẽrarã wuabemarai ʉ̃tabʉta krĩchabʉra ẽãta, iyara jaradiasi Daizeze ʉ̃rʉ (Hech. 4:13; Mat. 11:25). Jesúsba ẽbẽrarã bebikʉasidera, maʉ̃ta iya oibara baera oẽbasi, awuarabʉrʉ iyara soiduba osi mawũã ẽbẽrarãra sobia sentibisi akʉza aduʼapanasi maʉ̃ba (Luc. 5:13). Jesúsbara iyi beadai nãã iyi kʼaidupanʉra jĩrʉra sʉgʉsi, maʉ̃ oira nezokʼarabʉrʉ opanasimina (Juan 13:5). Jesúsba iyi ʉ̃ta wãi nãã, iyi kʼaidupanʉra nekʼãrẽ omarẽã dia amaesi, wuabemarata kʼarebadamarẽã mawũã ewari jõmaʉ̃nẽ panamarẽã ãyisida maʉ̃ra idi dayirãbida opanʉ (Mat. 28:​19, 20).

17. ¿Sãwũã Jeowade kĩrãkʼa oseapanʉ? (Akʉra potota).

¹⁷ ¿Sãwũã Jeowade kĩrãkʼa oibara? Dayirãbara jõmaʉ ẽbẽra jaradiapanʉ Jeowa ʉ̃rʉ, krĩcha ẽã ãyi kʼãrẽ kulturadebamata, mawũã ẽ bʉrʉ ãyi kʼãrẽaba estudiachuta akʉza mebẽrãsida bia edapanʉ dayirãne ʉ̃tabʉta krĩchapanʉ wuabemarãra (Filip. 2:3). Jeowara mejãchade sobiabʉ dayirãta wuabemarai ʉ̃tabʉta krĩchabʉ ẽ baera akʉza yiya kãgabʉta ũdubipanʉ baera (Sof. 3:12; Rom. 12:10).

18. ¿Kʼãrẽa bʉara bʉtrʉ audre yi zromata ũdubiamabʉ Jeowade kĩrãkʼa?

¹⁸ Jeowade kĩrãkʼa dayitrʉ audre yi zromata ũdubipanʉ ẽ baera, naʉ̃ba kʼarebayi wuabemarata dayiʉ̃me bedʼeaita zare ẽ bamarẽã akʉzade jʉ̃ã kʼawua bʼaita, adewara daya krĩchabʉtrʉ oẽ bayi akʉza wuabemarasida bia edadayi, Jeowaba obʉ kĩrãkʼa. Dayirãta zarea opanʉbʉrʉ Jeowa kĩrãkʼa panaita wuabemaraira ʉ̃tabʉta krĩchada ẽ baita, mawũãra Jeowabara dayirãra audre bia akʉyi (Is. 43:4).