Juan

Jesús ʉ̃i jã́re đaino jã́ri eabecʉ põeteyʉ bácʉre

(Mt 5.14; Jn 8.12)

9 No yóboi, Jesús ʉ̃i cuiyede, jã́rejame cũinácʉ ʉ̃mʉ, jã́ri eabecʉre. Nópe põetedejameđa ñai jã́ri eabecʉ. 2 Ñʉja Jesúi bueimara jẽniari jã́rejacarã ʉ̃́re:

—Bueipõecʉ, ¿aipe teni jã́ri eabecʉ põetedejaquemari ñai? ¿Ʉ̃i baju ãmeina đaiye boje nópe põetedejaquemari? ¿O ʉ̃i bʉcʉva ne ãmeina đaiye boje nópe põetedejaquemari? arejacarã ñʉja Jesúre.

3 Ñʉjare, yópe arĩ, coyʉrejame:

—Ʉ̃i baju ãmeina đaiye boje ãmevʉ aru ʉ̃i bʉcʉva ne ãmeina đaiye boje máre ãmevʉ nópe põeteyʉ bácʉ ʉ̃ jã́ri eabecʉ. Jʉ̃menijicʉi parʉéde jã́đovaquiyepe ayʉ, nópe põetedejaquemavʉ ʉ̃. 4 Jãravʉre põeva memeivʉ bʉojađama. Ʉbenita ñemié tʉiyede memeivʉ bʉojabema. Quédeca majare máre đaiye jaʉvʉ yʉre daroyʉ bácʉi đaicõjeiyede jãravʉre cãreja. Ʉbenita ji yainíburu yóboi quénora đarĩ bʉojabecʉbu yʉ. 5 Ji cʉede cãreja ijãravʉi, pẽoinope páyʉ Jʉ̃menijicʉi dápiaiye jãvene majide đaivʉ ijãravʉcavʉre, arejame Jesús.

6 Que ayʉ bácʉ, yebarã jẽcuturi, najuári joboque jĩvarejame. Ʉ̃i jĩvaiye báquede ĩni, jã́ri eabecʉi yacorʉare jobo jĩjovarejame.

7 Jĩjovañʉ mácʉ ʉ̃́re arejame Jesús:

—Siloé ãmicʉriocobʉi mi yacorʉare joacʉnʉjacʉ mʉ, arejame jã́ri eabecʉre Jesús.

Siloé aino, “Jaroicobe” aiyʉrõtamu. Dibʉi nʉri, ocoque ʉ̃i yacorʉare joarejame. Joarĩ bʉojarĩ, ʉ̃i cʉ̃rami copainʉrejame, jã́ñʉta. 8 Ʉ̃́re, tãutʉrare jẽniañʉre jipocamia, jã́ivʉ bácavʉ arejaima ne bajumia:

—Jã́rijide apa. ¿Jã́ri eabecʉ bácʉ tãutʉrare jẽniari dobavayʉ bácʉ ãmeni ñai? arejaima ʉ̃i cʉrõcavʉ.

9 —Jʉ̃́jʉ, ʉ̃ baju apa, arejaima nácavʉ.

—Ʉ̃ ãmemi. Ʉ̃́reca páyʉbe. Ʉbenita jã́ri eabecʉ bácʉ ãmemi ʉ̃, arejaima apevʉ.

Ne que aiyede, ʉ̃i bajumareca arejame:

—Jã́ri eabecʉ bácʉbu yʉ, arejame, náre coyʉyʉ.

10 Dinʉmʉ ʉ̃́re jẽniari jã́rejaima ʉ̃i cʉrõcavʉ:

—¿Aipe đarĩ jã́ri eayʉrʉ̃ mʉ? arejaima.

11 —Jesús ãmicʉcʉ yebarã jẽcuturi, joboque jĩvacʉbe. Die ʉ̃i joboque jĩvaiye báqueque ji yacorʉare jĩjovami ʉ̃. “Siloé ãmicʉriocobʉi joacʉnʉjacʉ mʉ”, abi yʉre. Que đacʉnʉvʉ yʉ. Diede joayʉ bácʉ, jã́vʉ yʉ, arĩ coyʉrejame ʉ̃i cʉrõcavʉre jã́ri eabecʉ bácʉ.

12 —¿Mi aimʉ ã́ri cʉri ʉ̃ caride? arejaima ʉ̃́re ʉ̃i cʉrõcavʉ.

—Aidica, majibevʉ yʉ, arejame náre jã́ri eabecʉ bácʉ.

Jã́ri eabecʉ bácʉre fariseovacavʉ ne jẽniari jápiaino

13 Dinʉmʉre jã́ri eabecʉ bácʉre nʉvarejaimađa ʉ̃i cʉrõcavʉ fariseova yebai. 14 Dijãravʉ, Jesúi joboque jĩjovari meađaijãravʉ bácarõ jã́ri eabecʉ bácʉre ñʉja judíova ñʉje jabʉóvaijãravʉ sábado barejávʉ̃. 15 Ina fariseova jã́ri eabecʉ bácʉre jẽniari jã́rejaimađa:

—¿Aipe teni jã́ri eayʉrʉ̃ mʉ? arejaimađa.

—Jobo ʉ̃i jĩvaiye báqueque ji yacorʉare jĩjovame. Joacʉnʉvʉ, ʉ̃i cõjeiyepe. Que teyʉ bácʉ jã́ivʉ caride, arejameđa náre.

16 —Jʉ̃menijicʉi daroimʉ mácʉ ãmecʉbe ʉ̃, mʉre meađayʉ bácʉ, ʉ̃i memeiye boje maje jabʉóvaijãravʉre, arejaimađa apevʉ ina fariseovacavʉ.

Ʉbenita apevʉ arejaimađa:

—¿Ãmeina đayʉ baru, aipe teni põeva ne đarĩ majibede jã́đovaiye majidi ʉ̃? arejaimađa nácavʉ.

Que arĩ ne bajumia cũinátʉrʉra yávabedejaimađa. Aru cũinátʉrʉ ãmenejavʉ̃ya ne ũme. 17 Bedióva cojedeca ina fariseova jẽniari jã́rejaimađa ʉ̃́re:

—¿Ñai mʉre meađayʉ bácʉ mi aimʉ, mi dápiaru, ye põecʉ páyʉ bárica ʉ̃? arejaimađa.

—Ji dápiaru, Jʉ̃menijicʉi yávaiyede coyʉcaipõecʉbe ʉ̃, arejameđa.

18 Ʉbenita ñʉje jabova judíova “Jã́ri eabecʉ bácʉbe jã́ñʉ”, abedejaimađa cãreja. Que baru ʉ̃i bʉcʉvare cutuicõjenejaimađa, ne darãjiyepe aivʉ ne yebai. Ne eaiyede fariseova jẽniari jã́rejaimađa:

19 —¿Mʉjemacʉba ñai? ¿Aru mʉjemacʉ baru, jã́ri eabecʉ põetedejarĩ ʉ̃? ¿Nópe põeteyʉ bácʉvacari, aipe teni jã́ñʉma caride? arejaimađa jã́ri eabecʉ bácʉi bʉcʉvare ina fariseova.

20 —Ñʉjemacʉ bajube ñai. Jã́ri eabecʉ põetedejame. 21 Aru caride jã́ri eaibi. Aipe teni jã́ñʉ mácʉre majibevʉbu ñʉja. Ʉ̃́re meađayʉ bácʉre coreóvabevʉbu. Jẽniari jã́jara ñʉjemacʉre. Bʉcʉcʉbe ʉ̃. Ʉ̃i baju coyʉcʉyʉme mʉjare, arejaimađa ʉ̃i bʉcʉva.

22 Nópe arejaimađa, ne jidʉé boje ñʉja judíova ñʉje jabovare. Jipocamia yópe arĩ, coyʉrejaimađa ina fariseova: “Ácʉ põecʉ ‘Jesúbe Jʉ̃menijicʉi daroimʉ mácʉ ʉ̃’ ayʉre, ñʉje cójijiñamine jaetovarãjaramu ñʉja, ʉ̃i cójijibequiyepe aivʉ ñʉjaque bedióva cojedeca”, aivʉ barejáimađa na jipocamia. 23 Que baru, “Bʉcʉcʉbe ʉ̃. Ʉ̃́re jẽniari jã́jara mʉja”, arejaimađa ina fariseovare ʉ̃i bʉcʉva.

24 Bedióva cojedeca jã́ri eabecʉ bácʉre cutuicõjenejaimađa ina fariseova. Eayʉ bácʉre arejaimađa:

—Mʉre meađayʉ bácʉre majivʉ ñʉja, ãmeina teipõecʉ bajure. Que baru Jʉ̃menijicʉi jã́inore jãve coyʉjacʉ mʉ caride, arejaimađa jã́ri eabecʉ bácʉre.

25 —Ãmeina đayʉre o mearore majibevʉ yʉ. Ʉbenita jã́ri eabecʉ batevʉ́ yʉ. Caride que ãmevʉ. Jã́ivʉ yʉ. No quénoratamu ji majino, arejameđa ina fariseovare jã́ri eabecʉ bácʉ.

26 —¿Aipe đari ʉ̃ mʉre? ¿Aipe đayʉ, mʉre jã́re đari ʉ̃? arĩ jẽniari jã́rejaimađa ʉ̃́re cojedeca.

27 —Mʉjare coyʉivʉ yʉ. ¿Jápiabenarʉ mʉja? ¿Ʉ̃i bueimara teiyʉrivʉrʉ̃ mʉja? Que barureca burubeda yʉre jẽniari jã́ivʉbu mʉja, arejameđa fariseovare.

28 Ʉ̃́re, yópe arĩ, ãmeina yávarejaimađa:

—Mʉ́tamu ʉ̃i bueimʉ. Moisés bácʉi bueimaramu ñʉja. 29 Moisés bácʉre yávarejaquemavʉ Jʉ̃menijicʉ. Aru Moisés bácʉre majivʉ ñʉja. Ʉbenita mʉre meađayʉ bácʉre ye majibevʉbu ñʉja. ¿Ã́rocacʉba ʉ̃? arejaimađa ina fariseova.

30 —“¿Ã́rocacʉba ʉ̃?” aivʉbu mʉja. Ʉbenita ji jã́ri eabe báquede meađaibi yʉre. Mʉjacapũravʉ ʉ̃i cʉrõ mácarõre majibevʉbu mʉja. 31 Me majivʉ maja: Ãmeina teivʉre jápiabebi Jʉ̃menijicʉ. Quénora ʉ̃́re mearore jívʉre, ʉ̃i ʉrõpe đaivʉre, jápiaibi ʉ̃. 32 Jã́ri eabecʉre meađaiyede maja jápiabevʉbu. Yʉreca páyʉ nópe ãmepeda põeteyʉ bácʉre meađaipõecʉ cʉbebi ʉ̃. 33 Yʉre meađayʉ bácʉ Jʉ̃menijicʉi daroimʉ mácʉ ãmenu, ji jã́ri eabe báquede meađabejebu ʉ̃, ayʉbu yʉ mʉjare, arejameđa náre jã́ri eabecʉ bácʉ.

34 —Mipacoi yapibʉrã põetecʉyʉvacari javeta ãmeina đayʉ barejaquémavʉ mʉ. ¿Quécʉvacari ñʉjare bueyʉrʉ̃ mʉ? arejaimađa jã́ri eabecʉ bácʉre ina fariseova.

Que arĩ, ʉ̃́re ne cójijiñamine jaetovarejaimađa ina fariseova, ʉ̃i cójijibequiyepe aivʉ náque bedióva cojedeca.

Jesús ʉ̃i coyʉino majepacʉ Jʉ̃menijicʉre coreóvabevʉ jã́ri eabevʉpe paivʉre

35 Jã́ri eabecʉ bácʉre ne jaetovaiye báquede coreóvarejaquemavʉ Jesús. Coreóvayʉ bácʉ, jã́ri eabecʉ bácʉre vocʉnʉrejame. Aru eayʉ bácʉ ʉ̃́re, yópe arĩ, jẽniari jã́rejame Jesús:

—¿Mʉ Jʉ̃menijicʉi daroimʉ mácʉre ʉ̃mʉpe jʉ ayʉrʉ̃? arejame Jesús.

36 —Mʉ, ji jabocʉ, mi aimʉre coreóvare đajacʉ yʉre. Ʉ̃́re majicʉ, jʉ acʉyʉmu yʉ, arejame Jesúre jã́ri eabecʉ bácʉ.

37 —Jave jã́ivʉ mʉ ʉ̃́re. Ʉ̃́mu yʉ, mʉ́que boroteyʉ caride, arejame ʉ̃́re Jesús.

38 Ʉ̃i que aiyeda, ñʉatutarĩ Jesúre mearore jídejame jã́ri eabecʉ bácʉ:

—Mʉ, ji jabocʉ, mʉre jʉ aivʉ yʉ, arejame Jesúre.

39 Dinʉmʉre yópe arĩ, coyʉrejame Jesús:

—Ijãravʉi darejacacʉ yʉ, beocʉyʉ jʉ aivʉre aru jʉ abevʉre máre. Põeva “Majibevʉbu ñʉja Jʉ̃menijicʉi dápiaiye jãvene” aivʉ, jã́ri eabevʉpe paivʉbu. Nápe paivʉre meađacʉdayʉbu yʉ, ne majinajiyepe ayʉ Jʉ̃menijicʉi dápiaiye jãvene jã́ivʉpe. Ʉbenita põeva “Majidivʉbu ñʉja Jʉ̃menijicʉi dápiaiye jãvene” aivʉ, jã́ivʉpe barĩduyama, ne dápiaru. Nópe ne dápiaiye boje, náre meađabecʉbu yʉ. Que baru jã́ri eabevʉpe teni, Jʉ̃menijicʉi dápiaiye jãvene ye majibenama na, arejame Jesús.

40 Jesús que ayʉre jápiarejaima fariseovacavʉ.

—Que baru, ¿“Jã́ri eabevʉpe paivʉbu mʉja”, ayʉrʉ̃ mʉ ñʉjare? arejaima Jesúre.

41 Jesús jʉ ayʉ yópe arejame náre:

—Mʉja jã́ri eabevʉpe majibevʉ baru aru mʉja coreóvaivʉ baru Jʉ̃menijicʉi cađateiyede jaʉrõre mʉjare, boropatebejebu mʉja. Ʉbenita “Majidivʉbu ñʉja Jʉ̃menijicʉi dápiaiye jãvene” aivʉ, jã́ivʉpe paivʉtamu mʉja. Ʉbenina dápiađavʉ̃ mʉja majini bʉojaivʉre Jʉ̃menijicʉi dápiaiye jãvene ʉ̃ cađatebecʉva mʉjare. Que baru boropateivʉ mauteivʉbu mʉja cãreja, arejame náre.