Romanos
Cʉrãjarevʉ memecarãjivʉ Jʉ̃menijicʉre
12 Mʉja, jívʉ, Jʉ̃menijicʉi pare cõmaje ãroje jã́iye boje majare, paredeca jẽniaivʉ mʉjare, mʉje jẽniarajiyepe ayʉ Jʉ̃menijicʉque, jãve mʉje đarãjiyepe ayʉ yópe ʉ̃i ʉrõpe, caiyede me matʉiyeda cainʉmʉa. Yópe põeva ne jícaiyepe ãimara boaimara mácavʉre Jʉ̃menijicʉre, jíjarã mʉja mʉje bajuáre. Ʉbenita apʉrivʉbu mʉja. Mʉjavacari epejarã mʉje bajuá coapa Jʉ̃menijicʉre, memecarãjivʉ ʉ̃́re cũinácʉre. Yópe đarĩ coatejarã mʉja mʉje ãmeina teiyede jarʉvarĩ. Aru Jʉ̃menijicʉ torojʉrĩ jã́cʉyʉme mʉjare. Nópe đaivʉ mʉja mearore jívʉbu Jʉ̃menijicʉre jãve mʉje ũmeque. 2 Ðabejarã mʉja yópe ijãravʉcavʉ Jʉ̃menijicʉre jʉ abevʉ ne đare nʉiyepe. Quénora Jʉ̃menijicʉre oatʉvaicõjejara mʉja, cʉvarãjivʉ mamaũmene aru mʉje dápiaino mamarore máre mʉja coapa. Que teni mʉja bʉojarãjaramu majidivʉ Jʉ̃menijicʉi ʉrõre mʉje đarãjiyede. Aru Jʉ̃menijicʉi ʉrõ mearomu, torojʉre đaino, aru ye jaʉbenomu.
3 Jʉ̃menijicʉ pʉeno meacʉ baju mearo đacaibi yʉre, jíyʉ yo ji memeinore, ji memecaquiyepe ayʉ mʉjare. Que baru coyʉyʉbu mʉjare, yópe arĩ: “Mearamu ñʉja”, arĩ dápiabejarã mʉja mʉje baju. Quénora “Jʉ̃menijicʉi cađatebedu yʉre, apejĩene đaiye majibejebu yʉ”, arĩ dápiajarã mʉja coapa. 4 Maje baju cũinárovacaribu cʉvae ʉre cʉepe. Ʉbenita caiye iye mememevʉ cũináromia. 5 Quédeca maja, Jesúre jʉ aipõeva, obedivʉbu. Ʉbenita cũinábajupe paivʉbu maja Jesúque. Cũinávʉpe Jʉ̃menijicʉ cójijovaibi majare caivʉ apevʉque. Que teni cũinábajupe paivʉbu maja.
6 Jʉ̃menijicʉ pʉeno meacʉ baju majide đaquemavʉ majare coapa bojecʉbeda ʉ̃i majiécarõre, maje cađatenajiyepe ayʉ apevʉre. Que baru caivʉ maja coapa đaiye jaʉvʉ majare yópe ʉ̃i majide đaiye báquepe. Jʉ̃menijicʉi jídu ʉ̃i majiécarõre maje coyʉcarãjiyepe ayʉ ʉ̃i yávaiyede, coyʉcarãjarevʉ diede, aipino ʉ̃i majare jíno mácarõpe majare coapa. 7 Jʉ̃menijicʉi jídu ʉ̃i majiécarõre maje memecarãjiyepe ayʉ apevʉ Jesúre jʉ aivʉre, memecarãjarevʉ náre. Jʉ̃menijicʉi jídu ʉ̃i majiécarõre maje buenajiyepe ayʉ põevare, buenajarevʉ náre. 8 Jʉ̃menijicʉi jídu ʉ̃i majiécarõre maje cađatenajiyepe ayʉ apevʉre, cađatenajarevʉ náre. Majacavʉ jívʉ baru ne cʉvecarõre apevʉre, jíjarãri náre jecʉbevʉva. Majacavʉ jaboteivʉ baru ina jʉ aipõevare, ʉrarõ memejarari na. Majacavʉ cõmaje ãroje jã́ivʉ baru apevʉre aru mearo đacaivʉ baru náre, torojʉrivʉ náre mearo đacajarãri na.
Aipe đaiye jaʉrõ Jesúre jʉ aipõevare
(Mt 5.44, 19.18-19, 22.21; Mr 12.17; Lc 6.28, 20.25; 2 Co 8.21; Ef 6.11-17; He 10.30, 13.2; 1 P 4.9)
9 Ʉjarã apevʉre aru me đajarã náre jãve. Pʉcaũmea cʉbevʉva cađatejarã náre. Ʉbejarã ãmenore. Cainʉmʉa đajarã mearore. 10 Ʉjarã mʉja mʉje bajumia. Torojʉrivʉ jã́jara mʉja coapa apevʉre mʉje pʉenocavʉre aru pueđajarã náre máre.
11 Jũracʉbejarã. Quénora pare mʉje đaiyʉeque memejara mʉja. Memecajarã ʉrarõreca maje jabocʉ Jesucristore mʉje ũmeque.
12 Napini coreivʉbu mʉja Jʉ̃menijicʉi mearo đacaquiyede mʉjare. Que baru torojʉjarã mʉja cainʉmʉa. Napijara mʉja mʉje ñájiyede. Aru ʉetʉbevʉva coyʉjarã Jʉ̃menijicʉque cainʉmʉa.
13 Jíjarã mʉje cʉvecarõre aru tãutʉrare máre ina Jʉ̃menijicʉi põevacavʉre jaʉéde. Me copʉ etajarã ina curãdaivʉre mʉje yebai apenoacavʉre.
14 Jẽniajara mʉja Jʉ̃menijicʉque, ʉ̃i ãmeđabequiyepe aivʉ ina mʉje mauvare. Aru mʉjavacari ãmeina yávabejarã náre. Quénora jẽniajara Jʉ̃menijicʉque, ʉ̃i mearo đacaquiyepe aivʉ náre.
15 Torojʉjarã mʉja ina torojʉrivʉque. Aru chĩori ojarã mʉja ina apevʉ chĩori oivʉque.
16 Cãrijimenoque cʉjarã mʉja apevʉque. Cũinátʉrʉ mʉje ũmei dápiajarã mʉja. Aru jã́jara caivʉ apevʉre cũinátʉrʉ. Dápiabejarã mʉja coapa “¿Meara márica?” apevʉ pʉeno. Quénora yóvajarã mʉja ina cõmaje ãrojarivʉre. Dápiabejarã mʉja ʉrarõ me majidivʉpe.
17 Apevʉ ne ãmeno đaiyede mʉjare, copʉ ãmeno đabejarã náre. Jipocamia dápiajarã aipe đaiye jaʉrõre, apevʉ ne jã́rajiyepe aivʉ mʉja jʉjovabevʉre. 18 Mʉjacapũravʉ caiye mʉje đaiyeque cãrijimena cʉre đajarã mʉje bajumia.
19 Mʉja, ji yóvaimara, cainʉmʉa ñájine đabejarã mʉja apevʉre, ne ñájine đaiye báque boje mʉjare. Quénora corejarã Jʉ̃menijicʉ ñájine đacʉyʉre náre. Que baru yópe arĩ, Jʉ̃menijicʉ toivaicõjenejaquemavʉ ʉ̃i yávaiyede: “Yʉrecabu ñájine đacʉyʉ ina ãmeina đaivʉ bácavʉre apevʉre. Yʉ́vacari bojeđare đacʉyʉmu náre yópe ne ãmeno đaino mácarõpe”, arejaquemavʉ maje jabocʉ Jʉ̃menijicʉ. 20 Que baru đajarã mʉja yópe Jʉ̃menijicʉi toivaicõjeiye báquepe ʉ̃i yávaiyede: “Mʉje mauvai ñájinu ãvʉéna, jíjarã mʉja náre ne ãiyeva. Aru mʉje mauvai ũcuiyʉru, jíjarã mʉja náre ne ũcuiyeva. Que đarĩburu yóboi, nácapũravʉi chĩomenu mʉjare ne ñájine đaiye báquede, pʉeno ʉrarõ ñájine đarãjaramu mʉja Jʉ̃menijicʉi ñájiovaquijãravʉ baquinóre ne maucʉvae báque boje mʉjare, mʉje mearo đacaiyedeca náre”, arejaquemavʉ Jʉ̃menijicʉ. 21 Ãmenore đare đaicõjemejara ina ãmeno đare đaivʉre mʉjare. Quénora mearo đacajarã mʉja caivʉre, bíjarorãjivʉ mʉje mauva ne ãmenore đaiyede.