1 Corintios
Jʉ̃menijicʉre memecaivʉ ne yóvaino ne baju
(Hch 18.4-11, 24-28; 1 Co 1.12, 6.19; 2 Co 6.16; He 5.12-13)
3 3:1-2 Mʉja, jívʉ, ji cʉe báquede mʉjaque, coyʉyʉ bʉojabetecacʉ mʉjare yópe ji coyʉiyepe ina Jesúre jʉ aipõeva, parʉre nʉivʉre ne ũmei Espíritu Santoque. Quénora coyʉiye jaʉteavʉ̃ yʉre mʉjare, Jesúre jʉ aipõeva Espíritu Santore cʉvarivʉreca, yópe ji coyʉiyepe Jesúre jʉ abevʉ Espíritu Santore cʉvabevʉre. Jʉeđojĩnape paivʉ bateávʉ̃ mʉja. Jʉeđojĩna opeco matʉiyeda ũcuñaima aru ãiyede ãiye majibema. Quédeca mʉja jʉeđojĩnape paivʉ mʉje ũme, quénora Jʉ̃menijicʉi yávaiye maiyójabede Cristorã jápiarĩ eavʉ̃ mʉja, aru ʉ̃i yávaiye maiyójaede jápiarĩ eabeteavʉ̃ mʉja. Aru caride máre, bueiye maiyójaede jápiarĩ eajʉrorivʉvacari, jápiarĩ eabevʉtamu mʉja cãreja. 2 — 3 Nopedecabu mʉje dápiaiye boje aru mʉje đaiye boje máre yópe ijãravʉcavʉ Jesúre jʉ abeni Espíritu Santore cʉvabevʉ ne dápiaiyepe aru ne đaiyepe máre. Mʉja jarađavʉ̃ mʉje bajumia cãreja. Aru mʉja tebuteđavʉ̃ mʉje baju cãreja. Mʉje nópe đaiye boje, jã́đovađavʉ parʉre nʉmevʉ mʉje ũmei Espíritu Santoque. Quénora đare nʉñavʉ mʉja yópe ijãravʉcavʉ Jesúre jʉ abevʉpe. 4 Cũinácʉ mʉjacacʉ “Pablo ʉ̃i bueimʉmu yʉ” arĩ, aru apecʉ “Apolos ʉ̃i bueimʉmu yʉ” arĩ, jã́đovaivʉ ijãravʉcavʉre Jesúre jʉ abevʉpe paivʉbu mʉja.
5 ¿Ye parʉéde cʉvari ñai Apolos, aru ye parʉéde cʉvari yʉ, põeva ne yóvarãjiyepe aivʉ ñʉjare? Ñʉjacapũravʉbu Jʉ̃menijicʉre memecaivʉ quéda. Ñʉje memecaiye boje ʉ̃́re, mʉja jʉ aivʉbu maje jabocʉ Jesucristore. Ñʉja coapa đaivʉbu ñʉje memeiyede yópe Jʉ̃menijicʉi memeicõjeiye báquepe ñʉjare. 6 Yópe cũinácʉ jiore memeipõecʉ ʉ̃i oteiyepe, nopedeca mamarʉmʉre Jʉ̃menijicʉi yávaiye méne coyʉcacʉ yʉ mʉjare. Aru yópe apecʉ ʉ̃i meađaiyepe iye oteiyede, nopedeca ji yóboi mʉjare buequemavʉ Apolos. Ʉbenita yópe Jʉ̃menijicʉi bʉcʉre đaiyepe iye oteiyede, nopedeca ʉ̃́recabe põevare jʉ are đayʉ ʉ̃i yávaiye méne. 7 3:7-8 Que baru ye baquinó ãmevʉ yʉ mamarʉmʉcacʉ, coyʉyʉ Jʉ̃menijicʉi yávaiye méne, yópe oteipõecʉpe. Aru ye baquinó ãmemi ñai Apolos, yóbocacʉ, ñai bueyʉ diede máre, yópe meađaipõecʉpe. Ñʉjacapũravʉ cũinátʉrʉtamu. Cũinácʉ ñʉjacacʉ apecʉ pʉenocacʉ ãmemi. Ʉbenita Jʉ̃menijicʉrecabe caivʉ maja maje pʉenocacʉ, ʉ̃i jʉ are đaiye boje põevare ʉ̃i yávaiye méne, yópe ʉ̃i bʉcʉre đaiyepe oteiyede. Ʉbenita mamarʉmʉcacʉ, yʉ coyʉyʉ, aru yóbocacʉ, ñai bueyʉ, cũinátʉrʉ cʉrivʉvacari ñʉje memeiyeque, cũinátʉrʉ ãmevʉ ñʉje ĩ́ye bojeque. Quénora Jʉ̃menijicʉ bojeđacʉyʉme ñʉjare coapa, yópe ñʉjare jaʉépe ñʉje memeiye báque boje. 8 — 9 Memecaipõevarecabu ñʉja. Jʉ̃menijicʉrecabe ñʉje memecaimʉ. Aru ñʉje baju yóvaivʉbu ñʉje memecaiyede ʉ̃́re. Mʉjacapũravʉ jiope paivʉbu. Aru yópe jiore memeipõecʉ ʉ̃i memeiyepe, nopedeca Jʉ̃menijicʉrecabe memeñʉ mʉjare, oatʉvacʉyʉ, meara đacʉyʉ.
Apenore máre jẽvari coyʉquijivʉ yʉ. Mʉja cʉ̃ramipe paivʉ bárãjivʉbu. Aru Jʉ̃menijicʉrecabe ñai đayʉ diñamine. 10 Yópe põecʉ cʉvaiyʉcʉ meađami cʉ̃rami cʉ̃ravaque đaiñamine ʉ̃i đarĩ bʉicõjeiyepe diñamine cũinácʉ cʉ̃raque memeipõecʉ me majicʉre, nopedeca Jʉ̃menijicʉ yʉre majide đarĩburu yóboi ʉ̃i majiéque, coyʉrĩ bʉicõjeame ʉ̃i yávaiye méne mʉjare. Yópe apevʉ memeipõeva ne memene nʉiyepe diñamine, nopedeca apevʉ ji yóbocavʉ buede nʉñama mʉjare. Aru yópe ina memeipõeva ne me jã́iyepe aipe ne memeiyede, nopedeca me jã́jarari ina mʉjare bueipõeva coapa aipe ne bueiyede, jãve maquiyépe aivʉ. 11 Yópe memeipõecʉ ʉ̃i đarĩ bʉojabepe cʉ̃ravaque đaiñamine cʉ̃rava cʉvabecʉva, nopedeca apecʉ bueni bʉojabebi Jʉ̃menijicʉi yávaiyede jãvene, Jesucristorã coyʉbecʉva. 12 Yópe apevʉ memeipõeva ne memeiyepe bojecʉeque, yópe úruque, plataque, aru bojecʉrijĩboa cʉ̃rajiboaque máre, nopedeca apevʉ me nurié coyʉivʉbu Jʉ̃menijicʉi yávaiyede. Ʉbenita yópe apevʉ memeipõeva ne memeiyepe bojecʉbeque, yópe jocʉveaque, muiyocaque, aru cõriáque máre, nopedeca apevʉ nurime coyʉivʉbu Jʉ̃menijicʉi borore. 13 Jesucristoi daquijãravʉ, ʉ̃i ñájiovaquijãravʉ baquinói põevare, ne ãmeina teiye boje, me jã́đovacʉyʉme ʉ̃ toaque aipe ãrojaene caivʉ põeva ne đaiye báquede ijãravʉi. 14 Põecʉi nurié buedu Cristorã, ʉ̃i đaiye ẽ́ni cũiméquiyebu no toaque. Aru Jʉ̃menijicʉ me bojeđacʉyʉme ʉ̃́re, yópe memeicõjeipõecʉ ʉ̃i me bojeđaiyepe ʉ̃́re memecayʉre, bojecʉeque memeñʉ mácʉre. 15 Ʉbenita põecʉi nurime buedu Cristorã, ʉ̃i đaiye ẽ́ni cũiquíyebu no toaque. Aru Jʉ̃menijicʉ bojeđabecʉyʉme ʉ̃́re, yópe memeicõjeipõecʉ ʉ̃i bojeđabepe ʉ̃́re memecayʉre, bojecʉbeque memeñʉ mácʉre. Ñai põecʉ ʉ̃i đaiye boje bíjaquiyebu ʉ̃́re jocarĩ. Ʉbenita ʉ̃́vacari bíjabecʉyʉme. Meađaimʉ macʉyʉ́me yópe põecʉ ʉ̃i cúyarĩ dupini nʉiyepe cʉ̃rami toaque uruiñamine jocarĩ.
16 Caivʉ maja Jesúre jʉ aipõeva Jʉ̃menijicʉi cʉ̃ramipebu, maje cʉvae boje ʉ̃i Espíritu Santore. Yópe põeva ne cʉepe cʉ̃rami jívʉi, ñai Espíritu Santo cʉbi maje ũmei. ¿Diede coreóvabenarʉ mʉja? 17 Yópe Jʉ̃menijicʉi cʉ̃rami meađami bajupe, mʉjarecabu Jʉ̃menijicʉi põeva meara baju, memecarãjivʉ ʉ̃́re. Que baru ácʉ põecʉ, ʉ̃i bueiyede jãve ãmeque, bíjare đaiyʉrĩburu yóboi mʉjare, ʉ̃i dajocare đaiyʉrĩduiyede mʉjare mʉje jʉ aiyede Jesúre, Jʉ̃menijicʉvacari bíjarocʉyʉme ʉ̃́re.
18 Mʉje bajumia apecʉre jʉjovaicõjemejara. Cũinácʉ mʉjacacʉ “¿Majicʉ bárica yʉ ijãravʉcavʉ Jesúre jʉ abevʉ jiede?” arĩ dápiayʉ baru, ʉbenina arĩ dápiarĩduibi ʉ̃. Ñai nópe arĩ dápiayʉ majibecʉpe tejacʉrĩ ijãravʉcavʉ Jesúre jʉ abevʉ ne jã́iyede, ʉ̃́re Jʉ̃menijicʉi majide đaquiyepe ayʉ majié jãveque. 19 Ijãravʉcavʉ Jesúre jʉ abevʉ ne majié bojecʉbevʉ Jʉ̃menijicʉi jã́inore. Ne coyʉiyede ne majiéque, “Ʉbenina coyʉivʉbu”, arĩ dápiaibi ʉ̃. Yópe arĩ, toivaicõjenejaquemavʉ ʉ̃i yávaiyede: “Ina ‘¿Majidivʉ bárica ñʉja?’ ʉbenina arĩ majiniduivʉre jarʉvaibi Jʉ̃menijicʉ, ne baju majiniduiye boje”, arĩ toivaicõjenejaquemavʉ. 20 Aru yópe máre arĩ, toivaicõjenejaquemavʉ Jʉ̃menijicʉ: “Maje jabocʉ majibi ina ‘¿Majidivʉ bárica ñʉja?’ arĩ majiniduivʉre ne dápiaiye ye bojecʉbede”, arĩ toivaicõjenejaquemavʉ. 21 3:21-22 Que baru arĩ dápiabejarã cũinácʉ põecʉ majicʉre apevʉ pʉeno. Que baru, “Pablo ʉ̃i bueimʉmu yʉ”, o “Apolos ʉ̃i bueimʉmu yʉ”, o “Pedro ʉ̃i bueimʉmu yʉ”, abejarã mʉja. Caivʉ mʉjare bueipõevare aru caiye apede Jʉ̃menijicʉi mearo đacaiyede epedejaquemavʉ ʉ̃ majare boje. Ijãravʉre, maje cʉede, maje yainájiyede, caride, aru javenare máre epedejaquemavʉ Jʉ̃menijicʉ, majare boje. 22 — 23 Majamu Cristo jina, đarãjivʉ yópe ʉ̃i ʉrõpe. Aru Cristobe Jʉ̃menijicʉ jicʉ, đacʉyʉ yópe ʉ̃i ʉrõpe.