Revelación
Juan ʉ̃i coyʉino ina ciento cuarenta y cuatro mil paivʉ Israecavʉrã
7 No yóboi, jã́cacʉ yóvaicʉvaivʉ ángelevare núrivʉre maje cʉrijoborõ tʉrʉvai yóvaicʉvaitʉrʉva yebai na coapa. Japuicõjemeteima náre coapa iye yóvaicʉvaiye ũmevʉare ijãravʉquede. Que teni japuicõjemeteima joborõre copʉ, jia ʉrađare copʉ, aru apecʉ jocʉcʉre copʉ máre. 2 Aru jã́cacʉ apecʉ ángelede mʉri dayʉre aviá dainocapũravʉre jocarĩ. Cʉvateame ʉ̃i pʉrʉi ñai Jʉ̃menijicʉ apʉcʉ ʉ̃i jã́đovare đainore ʉ̃ jinare. Ñai ángele cođoboboame, majicacʉyʉ apevʉ yóvaicʉvaivʉ ángelevare, ina Jʉ̃menijicʉi parʉéde jímara mácavʉre, ne ãmeđare đarãjiyepe ayʉ joborõre aru jia ʉrađare máre. 3 Yópe arĩ, cođoboboame:
—Ãmeđabejarã cãreja yo joborõre, jia ʉrađare, aru jocʉcʉare máre. Yéde ãmeđabejarã pʉ ñʉje jã́đovaiye baquiyéta ina maje jabocʉ Jʉ̃menijicʉre memecaivʉre ne tʉ̃tʉvarã náre coapa, jã́đovarajivʉ náre ʉ̃ jinare, cođoboborĩ áme ñai ángele.
4 Aru jápiacacʉ aipivʉ ina obedivʉ jã́đovaimara mácavʉre ne tʉ̃tʉvarã Jʉ̃menijicʉ jinape. Caiyajuboa doce paiyajuboa Israecavʉre jocarĩ ciento cuarenta y cuatro mil paivʉ baju cʉ́teimađa. 5 Judá bácʉi pãramenacavʉ doce mil paivʉ jã́đovaimara mateimađa. Aru Rubén mácʉi pãramenacavʉ doce mil paivʉ jã́đovaimara mateimađa. Gad bácʉi pãramenacavʉ doce mil paivʉ jã́đovaimara mateimađa. 6 Aser bácʉi pãramenacavʉ doce mil paivʉ jã́đovaimara mateimađa. Neftalí bácʉi pãramenacavʉ doce mil paivʉ jã́đovaimara mateimađa. Aru Manasés bácʉi pãramenacavʉ doce mil paivʉ jã́đovaimara mateimađa. 7 Simeón mácʉi pãramenacavʉ doce mil paivʉ jã́đovaimara mateimađa. Leví bácʉi pãramenacavʉ doce mil paivʉ jã́đovaimara mateimađa. Isacar bácʉi pãramenacavʉ doce mil paivʉ jã́đovaimara mateimađa. 8 Aru Zabulón mácʉi pãramenacavʉ doce mil paivʉ jã́đovaimara mateimađa. José bácʉi pãramenacavʉ doce mil paivʉ jã́đovaimara mateimađa. Aru Benjamín mácʉi pãramenacavʉ doce mil paivʉ jã́đovaimara mateimađa máre. Caivʉ ina jã́đovaimara Jʉ̃menijicʉ jinape ciento cuarenta y cuatro mil paivʉ baju bateimađa na.
Juan ʉ̃i coyʉino ina obedivʉ Jʉ̃menijicʉ jina boricajeare doivʉrã
(Mt 24.1; Mr 13.19; Jn 1.29, 4.10, 7.37, 10.1-16; 1 Jn 1.7; Ap 21.4)
9 No yóboi, jã́cacʉ obedivʉ baju põevare. Ne obedivʉ cʉe boje, ñame bʉojarĩ corevabejebu náre. Caijaborõacavʉ, aru caiyajuboa põeyajuboacavʉ, caicamua yávaicamuacavʉ, aru caiĩmaroacavʉ máre cʉ́teima na. Núteima no jabocʉi dobarõ mearo coricacarõ jipocai aru Cristo, ovejajĩcʉ ne aimʉ, ʉ̃i jipocai máre. Caivʉ ina doima ne cuitótecajea boricajeare. Aru ʉjʉmedʉa paiyede cʉvateima náre coapa ne pʉrʉái. 10 Yópe arĩ, bʉjié cođoboboima:
Maje jabocʉ Jʉ̃menijicʉ, ñai dobacʉ jabocʉi dobarõ mearo coricacarõra, meađayʉbe majare. Aru ñai ovejajĩcʉ máre meađayʉbe majare, aima na.
11 Caivʉ ina ángeleva núrivʉ ina veinticuatro paivʉ bʉcʉva ne yóboi, ina yóvaicʉvaivʉ apʉrivʉ ne yóboi, no jabocʉi dobarõ mearo coricacarõ yebai, mori tʉima ne jivare, mearore jínajivʉ Jʉ̃menijicʉre. No jabocʉi dobarõ mearo coricacarõ jipocai mearore jíma Jʉ̃menijicʉre. 12 Yópe arĩ, mearore jíma ʉ̃́re:
Quédecabu. Maje jabocʉ Jʉ̃menijicʉrecabe caivʉ ne mearore jímʉ, aru ne torojʉre đaimʉ máre. Ʉ̃́recabe caiyede coreóvayʉ. Caivʉ torojʉede jíjarãri ʉ̃́re aru pueđajarãri ʉ̃́re. Ʉ̃́recabe caiye parʉéde cʉvacʉ aru caiye méne đaiye majicʉ máre cainʉmʉa. Quédecabu, aima na.
13 Aru cũinácʉ nácacʉ, ina veinticuatro paivʉ bʉcʉvacacʉ, yópe arĩ, jẽniari jã́me yʉre:
—¿Ñamema ina põeva doivʉ ne cuitótecajea boricajeare? ¿Ã́rocavʉba na? jẽniari jã́me yʉre.
14 Yópe arĩ, coyʉcacʉ ʉ̃́re:
—Mʉ, ji jabocʉ, majibevʉ yʉ. Mʉrecabu coreóvayʉ náre, acacʉ yʉ.
Aru coyʉáme yʉre:
—Nárecabu napivʉ bácavʉ ne ñájiye báquede pʉeno ʉrarõ baju. Joaquemavʉ ne cuitótecajeare, bore đarãjivʉ dicajeare ñai ovejajĩcʉi jiveque. 15 Que baru núrivʉbu Jʉ̃menijicʉ jabocʉi dobarõ mearo jipocai. Memecaivʉbu ʉ̃́re ʉ̃i cʉ̃rami jívʉi jãravʉre aru ñamine máre. Ñai dobacʉ jabocʉi dobarõ mearo coricacarõra jã́ri corecʉyʉme náre ʉ̃i cʉe boje náque. 16 Aipinʉmʉ ñájimenama na ãvʉéna. Aru aipinʉmʉ cũiñómebu náre máre. Aipinʉmʉ aviá bórĩ ẽ́mecʉbe náre. Aru aipinʉmʉ toaijino máre cãrijovamebu náre. 17 Nópe baquiyébu ñai ovejajĩcʉ cʉcʉ jabocʉi dobarõ mearo coricacarõ yebai dobacʉ ʉ̃i jã́ri coreiye boje náre. Jipocatecʉyʉme náre oco apʉre đaioco pĩapóino cʉrõi. Tʉ̃recʉyʉme caiye oride ne yacorʉare. Aru torojʉre đacʉyʉme náre cainʉmʉa, arĩ coyʉáme ñai bʉcʉcʉ yʉre.