Mateo

¿Ñamema parʉcʉ maje jẽnebore?

(Mr 9.33-37, 10.15; Lc 9.46-48, 18.17, 22.24)

18 Dinʉmʉre ñʉja, ʉ̃i bueimara, nʉrejacarã Jesús yebai. Aru jẽniari jã́rejacarã ʉ̃́re:

—¿Ñamema parʉcʉ apevʉ pʉeno Jʉ̃menijicʉi jaboteinore? arejacarã.

2 Jesús órejarejame cũinácʉ jʉeđocʉre. Núvarejame ʉ̃́re ñʉje coricai. 3 Aru arejame:

—Jãve coyʉyʉbu mʉjare: Jʉeđova “¿Meara márica ñʉja?” arĩ dápiabevʉpe dápiajarã mʉja. Oatʉvabevʉ baru mʉje dápiaiyede, Jʉ̃menijicʉi jaboteimara teivʉ bʉojabenajaramu mʉja. 4 Ácʉ põecʉ “¿Meacʉ bárica yʉ?” abecʉ baru, yópe ñai jʉeđocʉpe, ʉ̃́recabe parʉcʉ apevʉ pʉeno Jʉ̃menijicʉi jaboteinore. 5 Cũinácʉ põecʉ copʉ etayʉ baru cũinácʉ jʉeđocʉre ji ãmiái, ji cõjeiyepe, que đayʉ copʉ etaibi yʉre, arejame Jesús.

Jidojarõ maje ãmeina teino

(Mt 5.29-30; Mr 9.42-48; Lc 17.1-2)

6 Ñʉjare yópe arĩ, buede nʉrejame Jesús:

—Ácʉ põecʉ ʉ̃i ãmeina tede đaru apecʉ yʉre jʉ ayʉre parʉbecʉreca, ʉ̃i dajocaquiyepe ayʉ ʉ̃i jʉ aiyede yʉre, meajebu ʉ̃́re jarʉvaru ʉ̃i ñamemui bʉorĩ cũinábo cʉ̃rabo ʉraboque jia ʉrađai. 7 Chĩori ãmeno ñájinajarama ina ijãravʉcavʉ jʉjovaivʉ apevʉre, ne ãmeno đarãjiyepe aivʉ. Jãve jʉjovarãjarama mʉjare. Ʉbenita ñai jʉjovare đayʉ apevʉre chĩori ãmeno ñájicʉyʉme ʉ̃. 8 Aru mʉ ãmeno đayʉ baru mi pʉrʉque o mi cʉbobaque, burarĩ jarʉvajacʉ dipʉrʉre o dibare. Meaquiyebu mʉre, mi earu Jʉ̃menijicʉi cʉrõi cũinápʉrʉque o cũinába cʉbobaque. Ʉbenita meamequiyebu mʉre, mi nʉru toabo cũiméboi caipʉcapʉrʉaque o caipʉcaba cʉbobaque. 9 Aru mʉ ãmeno đayʉ baru mi yacorʉque, ĩni jarʉvajacʉ didʉre. Meaquiyebu mʉre, mi earu Jʉ̃menijicʉi cʉrõi cũinárʉ yacorʉque. Ʉbenita meamequiyebu mʉre, mi nʉru toabo cũiméboi caipʉcarʉa yacorʉaque, majicarĩ arejame Jesús.

“Oveja mamateyʉre” jã́ri dápiarĩ ne đarãjiyepe aino

(Lc 15.3-7, 19.10)

10 Jesús, yópe arĩ, buedejame bedióva cojedeca jʉeđovarã:

—Cavarõ mearo Jʉ̃menijicʉi cʉrõi ina ángeleva jʉeđovare coreivʉ cʉma cainʉmʉa Jʉ̃menijicʉi jivateinoi. Que baru cũinájicʉ ina jʉeđovacacʉre ye ãmeina jã́mejara mʉja. Yéde ãmeina đabejarã cũinájicʉre. 11 Yʉ, Jʉ̃menijicʉi daroimʉ mácʉ ʉ̃mʉpe, meađacʉdaivʉ ina bíjare đaivʉre Jʉ̃menijicʉre jocarĩ. 12 ¿Aipe dápiaivʉrʉ̃ mʉja iye ji coyʉquiyede mʉjare? Cũinácʉ ʉ̃mʉ, ovejavare coreipõecʉ, cʉvacʉ baru cien paivʉ ovejavare, aru cũinácʉ nácacʉ ʉ̃i mamatedu, ñai dajocajebu ina noventa y nueve paivʉ ovejavare cʉ̃racũai, vocʉñʉ ñai bíjayʉ bácʉre. 13 Aru jãve coyʉyʉbu mʉjare: Eayʉ baru ñai mamateyʉ bácʉre, torojʉjebu ʉ̃́que ina noventa y nueve paivʉ mamatebevʉ pʉeno. 14 Quédeca cũinájicʉ ina quĩ́jinacacʉ ʉ̃i bíjaiyede ʉbebi jipacʉ cavarõ mearocacʉ, arejame Jesús.

Aipe ãrʉmeteiye jaʉrõ majecʉ ʉ̃i ãmeina đaiyede

(Mt 16.19; Lc 17.3-4; Jn 20.23)

15 Yópe arĩ, buedejame ñʉjare Jesús:

—Apecʉ ʉ̃i ãmeina đaru mʉre, apevʉ ne jápiabenoi coyʉjacʉ ʉ̃́re ʉ̃i ãmeina đaiyede. Mi coyʉiyede jápiaru, ãrʉmetejacʉ ʉ̃i ãmeina đaiyede. Aru cãrijimene đajarã mʉja. 16 Ʉbenita mi coyʉiyede jápiaiyʉbedu, nʉvajacʉ ʉ̃i yebai cũinácʉ mʉjecʉre, ʉ̃i majiquiyepe ayʉ, o pʉcarã mʉjevʉre, ne majinajiyepe ayʉ, aipe mi coyʉiyede ʉ̃́re aru aipe ʉ̃i coyʉiyede mʉre máre, ne majicarãjiyepe ayʉ ʉ̃́re. 17 Ne coyʉiyede máre jápiaiyʉbedu, coyʉjacʉ ʉ̃i ãmeina đaiyede caivʉ ina yʉre jʉ aivʉre ne cójijinoi. Aru ne coyʉiyede máre jápiaiyʉbedu, đajacʉ ʉ̃́re yópe mi đaiyepe ina judíova ãmevʉre aru ina jabovare tãutʉra ĩcaipõevare. 18 Jãve coyʉyʉbu mʉjare: Caivʉ mʉje jacopʉbemarare ijãravʉi jacopʉbecʉyʉme Jʉ̃menijicʉ cavarõ mearo ʉ̃i cʉrõi. Aru caivʉ mʉje jacopʉimarare ijãravʉi jacopʉcʉyʉme Jʉ̃menijicʉ cavarõ mearo ʉ̃i cʉrõi.

19 ’Bedióva cojedeca coyʉyʉbu mʉjare: Pʉcarã mʉjacavʉ cũinátʉrʉ baru mʉje ũmei, mʉje jẽniaiyede jipacʉ cavarõ mearocacʉre, ʉ̃́capũravʉ đacʉyʉme yópe mʉje jẽniaiyepe. 20 Pʉcarã o yóbecʉrã ne cójijidu, jẽniarajivʉ ji ãmiái, ji parʉéque, yʉ́vacari cʉvʉ ne jẽneboi, arĩ buedejame Jesús.

21 Dinʉmʉre Pedro jẽniari jã́rejame Jesúre:

—Mʉ, ji jabocʉ, ¿aipiye baju majecʉ ʉ̃i ãmeina đaiyede yʉre ãrʉmeteji? ¿Siete baju ʉ̃i ãmeina đaiyede ãrʉmeteji? arejame Pedro.

22 Aru Jesús arejame ʉ̃́re:

—Siete baju abevʉ yʉ. Quénora corevabecʉva ãrʉmetejacʉ ʉ̃i ãmeina đaiyede cainʉmʉa, arejame Jesús.

“Memecaipõecʉ ãrʉmeteiyʉbecʉre apecʉ ʉ̃i ãmeina đaiyede” jã́ri dápiarĩ ne đarãjiyepe aino

23 Yópe arĩ, buedejame Jesús, jã́ri dápiarĩ ne đarãjiyepe ayʉ, põeva ne ãrʉmetenajiyepe ayʉ apevʉre ne ãmeina đaiyede:

—Jʉ̃menijicʉi jaboteino yópebu cũinácʉ jabocʉ meađaiyʉcʉ ʉ̃́re memecaivʉ ne bojecʉbe đaiyede. 24 Ʉ̃i corevarĩ bʉiyede, apevʉ davaquemavʉ ʉ̃i yebai cũinácʉ ʉ̃́re memecaipõecʉre, bojecʉbe đayʉre obedimillones tãutʉrare. 25 Ʉ̃i bojecʉbe đaiyede ye bojeđayʉ bʉojabetequemavʉ. Que baru ñai jabocʉ, yebacavʉpe teni, bojeđaicõjequemavʉ ʉ̃́re, aru jímarepacore, aru némarare máre. Caiye ne cʉvaede máre bojeđaicõjequemavʉ, ĩcʉyʉ ʉ̃i bojecʉbe đaiyede. 26 Ñai memecaipõecʉ pueđarĩ ñai jabocʉre, ñʉatutaquemavʉ ʉ̃i jipocai. “Mʉ, ji jabocʉ, napijacʉ yʉre. Aru caiyede bojeđacʉyʉmu mʉre”, aquemavʉ. 27 Que baru ñai jabocʉ, cõmaje ãroje jã́ri, ãrʉmetequemavʉ caiye iye ʉre bojecʉbe đaiyede. Aru jođeicõjequemavʉ ʉ̃́re.

28 ’Ʉbenita ñai memecaipõecʉ etayʉ bácʉ, apecʉ memecaipõecʉ ʉ̃i yóvaimʉre copʉquemavʉ. Ñai ʉ̃i copʉimʉ majiéda bojecʉbe đaquemavʉ ʉ̃́re, obebecentenares tãutʉrare. Ñai ʉ̃i copʉimʉre ʉ̃i ñamemui jẽni, yaiváiyʉrĩduquemavʉ ʉ̃́re. “¡Mi bojecʉbe đaiyede jíjacʉ yʉre!” aquemavʉ. 29 Que đayʉre, apecʉ ñʉatutaquemavʉ ʉ̃i jipocai. “Napijacʉ yʉre. Caiyede bojeđacʉyʉmu mʉre”, aquemavʉ. 30 Ʉbenita apecʉ jápiaiyʉbetequemavʉ ʉ̃́re. Quénora jarʉvaicõjequemavʉ ʉ̃́re ãmeina teivʉre jẽni jacoiñami jívʉi, pʉ ʉ̃i bojeđaiyeta caiye iye bojecʉbe đaiyede. 31 Apevʉ ñai jabocʉre memecaivʉ ʉ̃i đaiyede jã́ri, chĩori, coyʉrãnʉquemavʉ diede ne jabocʉre. 32 Ne coyʉiyede ʉ̃i jápiarĩburu yóboi, ñai jabocʉ órejaicõjequemavʉ ñai ʉ̃i ãrʉmeteimʉ mácʉre. Aru aquemavʉ: “¡Ãmecʉ bajutamu mʉ! Yʉ́capũravʉ ãrʉmetevʉ caiye iye mi bojecʉbe đaiye báque ʉrarõ bajure, mi jẽniaiye báque boje yʉre. 33 Que baru mʉre máre, cõmaje ãroje jã́iye jaʉvʉ mícʉre, yópe ji cõmaje ãroje jã́iyepe mʉre”, aquemavʉ. 34 Pare jarayʉ, ñai jabocʉ ãmeina teivʉre jẽni jacoiñami coreipõevare nʉvaicõjequemavʉ ʉ̃́re, ʉ̃i ñájiquiyepe ayʉ, pʉ ʉ̃i bojeđaiyeta caiye iye bojecʉbe đaiyede, arejame Jesús.

35 Aru arejame Jesús:

—Quédeca đacʉyʉme mʉjare jipacʉ, cavarõ mearocacʉ, mʉje ãrʉmetebedu mʉjecʉre ʉ̃i ãmeina đaiyede, arejame ñʉjare, majicayʉ Jesús.