Marcos
Jesús ʉ̃i nacajaino yainore jarʉvarĩ
(Mt 26.32, 28.1-10; Mr 14.28; Lc 24.1-12; Jn 20.1-10)
16 No judíovai jabʉóvaijãravʉ sábado, nainú vaiyede, María Magdalacaco, aru Salomé, aru Santiagoi paco mumijʉribʉre ĩni bojeđarejaimađa na. Jesús bácʉre ne jarʉvainoi nʉri, die mumijʉeque ʉ̃ mácʉi baju bácarõre yuarãnʉivʉ barejáimađa na. 2 No sumana bʉijãravʉ domingo javejĩnara, aviá ʉ̃i tucʉmʉiyede, Jesús bácʉre ne jarʉvainoi nʉrejaimađa ina nomiva.
3 Ne bajumia borotede nʉrejaimađa, yópe arĩ:
—¿Ñame majare cʉ̃racobe bieitʉravare jãturuvari, cađatenajidica na? arejaimađa dinomiva.
4 Ne eaiyede nore, dicobe biebecobede jã́rejaimađa na. Ditʉrava bieitʉrava bácarõ ʉratʉrava baju barejávʉ̃ya. Ʉbenita joajĩeneca ditʉravare jã́ri earejaimađa na. 5 Dicobede ecoivʉ nore meapũravʉi dobacʉre, bojʉyore jã́rejaimađa ina nomiva. Boricajede, ʉ̃mʉjʉricajede doyʉ barejámeđa ʉ̃. Aru dinomiva cuecumarejaimađa na.
6 Náre arejameđa:
—Jidʉbejarã mʉja. Jesús Nazarecacʉre, ne jocʉcʉjaravena pẽvaimʉ mácʉre, vorĩduivʉbu mʉja. Yore cʉbebi ʉ̃. Javeta nacajami. Jã́rijide apa. Ʉ̃i bajure ne jarʉvaino mácarõre jã́jara mʉja. 7 Pedrore aru Jesúi bueimara mácavʉ apevʉre yópe coyʉrãnʉjara mʉja: “Mʉje jipocai Galileai nʉcʉyʉme Jesús. Nore mʉjare ʉ̃i ávarepe ʉ̃́re jã́rajaramu mʉja”, ajarã, arejameđa náre.
8 Aru dicobede etarĩ, cúyarĩ nʉrejaimađa ina nomiva. Jidʉrĩ bididejaimađa na. Nʉri, ne copʉimarare ye abedejaimađa dinomiva, cuecumaivʉ.
Jesús ʉ̃i cʉeteino María Magdalacacore
9 Jesús nacajañʉ mácʉ yainore jarʉvarĩ, sumana bʉijãravʉ domingo javejĩnara, cʉetedejameđa mamarʉmʉre María Magdalacacore, ico ʉ̃i jarʉvaimo máco siete paivʉ abujuvare. 10 Õ nʉri, majide đarejacođa ina ʉ̃́que cʉrivʉ bácavʉre, chĩori oivʉre. 11 Aru na jápiaivʉ nacajañʉre yainore jarʉvarĩ, aru õi jã́ino mácarõre máre jápiarĩ, “Jãve majʉvʉ́”, abedejaimađa na.
Jesús ʉ̃i cʉeteino pʉcarã ʉ̃i bueimarare
12 No yóboi cʉetedejameđa apecʉpeda ina pʉcarã ʉ̃i bueimaracavʉre ne nʉiyede mái ĩmarore jocarĩ. 13 Na nʉri coyʉrĩdurejaimađa nácavʉre. Ʉbenita jʉ abedejaimađa náre máre.
Jesús ʉ̃i coyʉicõjeino ʉ̃i yávaiye méne
(Mt 28.16-20; Lc 24.36-49; Jn 20.19-23; Hch 1.8)
14 Yóbo baji Jesús cʉetedejameđa caivʉ once paivʉ ʉ̃i bueimarare ne dobaede tʉoiva yebai. Jʉ abevʉ barejáimađa ina jã́ivʉ bácavʉ Jesúre, nacajañʉ mácʉre yainore jarʉvarĩ, ne coyʉiyede ʉ̃́ra. Que baru jararejameđa ne jʉ abenore aru ne jápiarĩ coreóvabede máre. 15 Arejameđa náre:
—Buenanʉjara caivʉ ijãravʉcavʉre iye yávaiye méne. 16 Nácavʉ ne jʉ arĩ jã́đovaru Jʉ̃menijicʉre ocoque meađacʉyʉmu yʉ. Ʉbenita nácavʉ jʉ abevʉ baru bíjarãjarama na. 17 Ina yʉre jʉ aivʉ põeva ne đarĩ majibede đarãjarama. Ji ãmiái, ji parʉéque, jaetovarãjarama abujuvare. Yávarãjarama apecamua yávaicamuare ne majibecamuare. 18 Dʉrʉrãjarama ãđavare. Ne ũcuiyede ijede ye ãmeđabequiyebu náre. Ijimarare tʉorãjarama, aru meatenajarama na, arejameđa Jesús.
Jesús ʉ̃i mʉino cavarõ mearo Jʉ̃menijicʉi cʉrõi
19 Jesús yávayʉ bácʉ náre, mʉri nʉrejaquemavʉ ijãravʉre jocarĩ. Nʉrejaquemavʉ cavarõ mearo Jʉ̃menijicʉi cʉrõi. Dobarejaquemavʉ Jʉ̃menijicʉi meapũravʉi. 20 Aru ʉ̃i bueimara mácavʉ coyʉrãnʉrejaimađa iye yávaiye méne põevare cainoai. Que baru cainʉmʉa Jesús cađatedejameđa ʉ̃i põevare, ne coyʉrãjiyepe ayʉ Jʉ̃menijicʉi yávaiyede põeva ne đarĩ majibede đaiyeque. Quénoramu.