Mateo
Juan Bautista bácʉ ʉ̃i yaino
(Mr 6.14-29; Lc 3.19-20, 9.7-9)
14 Dinʉmʉ ñai Herodes, ñʉja Galilea ãmicʉrijoborõcavʉ ñʉje jabocʉ, jápiarejameđa Jesúi borore. 2 Jápiayʉ, ʉ̃́re memecaivʉre arejameđa:
—Ñaime Juan Bautista. Nacajacʉbe yainore jarʉvarĩ. Que baru yópe parʉcʉbe ʉ̃, ʉbenina arejameđa.
3 Nópe dápiarejameđa Herodes, Juan Bautista bácʉ apʉcʉre cãreja, ʉ̃i yaiquíye jipocai, Herodes ʉ̃i bʉoicõjeiye báque boje ʉ̃́re. Aru bʉoicõjenejameđa, jacocʉyʉ ãmeina teivʉre jẽni jacoiñami, yópe Herodei márepaco Herodíai ʉrõpe. Nópe ʉrejacođa, õi jorojĩye boje ʉ̃i ãmecoroiye báquede Herodede, ʉ̃i cʉvae boje ṍre, ĩmacʉ Felipei márepacore. 4 Javede Juan Bautista bácʉ ávarejameđa Herodede: “Jʉ̃menijicʉi đaicõjeiye Moisés bácʉ ʉ̃i coyʉiye báque cʉvaicõjemevʉ mʉre apecʉi márepacore”, ávarejameđa ʉ̃́re.
5 Herodecapũravʉ Juan Bautista bácʉre boarĩ́ jarʉvaiyʉcʉvacari, jidʉrejameđa ina obedivʉ põevare, “Jʉ̃menijicʉi yávaiyede coyʉcaipõecʉbe Juan Bautista”, arĩ dápiaivʉre. 6 Ʉbenita cũinájãravʉ ʉ̃i ãrʉrijãravʉ eaiyede, Herodei põeteijãravʉ bácarõre, torojʉve teino đarejameđa ʉ̃. Dijãravʉre Herodíai máco nʉri, uparejacođa caivʉ ina Herodei cutuimara ne jã́iyede. Que teni Herodede pare cojʉyarejacođa õ. 7 Que baru parʉéque arejameđa ṍre:
—Jíquijivʉ mʉre yéde mi ʉrõre. Yʉre ñájine đajacʉrĩ Jʉ̃menijicʉ, ji đabedu yópe ji ainope, arejameđa.
8 Jípaco jẽniaicõjenejacođa ṍre. Aru ico nomió bojʉyo arejacođa Herodede:
—Jíjacʉ yʉre carijĩe Juan Bautistai jipobʉre jororʉque, arejacođa õ.
9 Õi jẽniainore jápiarĩ, chĩorejameđa ñai jabocʉ. Ʉbenita ʉ̃i aiye báque boje parʉéque ʉ̃i cutuimara ne jápiaiyede, jícaicõjenejameđa ṍre. 10 Boaipõecʉre jarorejameđa ãmeina teivʉre jẽni jacoiñami jívʉi, ʉ̃i burarĩ jarʉvaquiyepe ayʉ Juan Bautistai jipobʉre. 11 Burarĩ bʉojarĩ, jororʉque nʉvari, jídejameđa ico nomió bojʉyore. Aru jídejacođa jípacore, õi majicojiyepe ađo Juan Bautista bácʉ jãve yaiyʉ́ bácʉre. 12 Aru Juan Bautista bácʉi bueimara nʉvarejaimađa ʉ̃i baju bácarõre, jarʉvarãjivʉ cʉ̃racobe jívʉi. Que teniburu yóboi, coyʉrãnʉrejaimađa Jesúre die borore.
Jesús ʉ̃i ãre đaino cũinápʉrʉpe paimil baju ʉ̃mʉvare
(Mr 6.30-44; Lc 9.10-17; Jn 6.1-14)
13 Jesús diede jápiayʉ bácʉ, nore jocarĩ nʉrejame jiađocũi, ina põeva obedivʉre dajocarĩ, pʉ põecʉbenoita. Ʉbenita nʉñʉre majidejaimađa na. Aru mái ʉ̃i yóboi nʉrejaima na, obedivʉ ĩmaroacavʉ. 14 Ʉ̃i jataiyede, ẽcarʉi mari, ina obedivʉ põevare cõmaje ãroje jã́rejame Jesús. Nácavʉ ijimarare meađarejame ʉ̃. 15 Nainúta ñʉja ʉ̃i bueimara ʉ̃i yebai nʉri, coyʉrejacarã ʉ̃́re:
—Nainútamu majare yui põecʉbenoi. Põeva ne ãrajiyede bojeđarãnʉicõjejacʉ mʉ. Noi ĩmajinoai jarorĩ, náre “Ãranʉjara” ajacʉ mʉ, arĩdurejacarã Jesúre.
16 Ñʉjare arejame:
—Ne ãrajiyede bojeđarãnʉiye jaʉbevʉ náre. Jíjarã mʉja ne ãrajiyede, arejame ñʉjare.
17 Ʉ̃́re arejacarã:
—Pã́uboa cũinápʉrʉpe paiboa aru moa pʉcarã cʉvavʉ ñʉja, arejacarã Jesúre.
18 —Diede davajarã ji yebai, arejame Jesús.
19 Dinʉmʉre cõriá pʉenora põevare dobaicõjenejame Jesús. Aru die pã́uboa cũinápʉrʉpe paiboa aru moa pʉcarãre jẽni, cavarõi jã́ñʉ, torojʉede jídejame Jʉ̃menijicʉre. Ʉ̃i cotʉvarĩburu yóboi pã́uboare, ñʉja ʉ̃i bueimara jídejacarã diede ina põevare, yópe Jesús ʉ̃i jícõjeiye báquepedeca ñʉjare. 20 Aru caivʉ ãri, yapidejaima na. Ãri bubarĩburu yóboi, iye cotʉvaiye báquede, ne ãri oabede, ĩni, meađarĩ, pʉebʉa doce paibʉa, judíovai pʉebʉare, buivárejacarã ñʉja. 21 Aru ina ãivʉ bácavʉ ʉ̃mʉva cũinápʉrʉpe paimil baju barejáima. Apevʉ, nomiva aru jʉeđova máre, ãrejaima na.
Jesús ʉ̃i cuino oco pʉenora
22 Dinʉmʉ Jesús jatuicõjenejame ñʉja ʉ̃i bueimarare jiađocũi, ñʉje nʉrajiyepe ayʉ ʉ̃i jipocai macajitabʉ ʉrabʉ apedʉvei. Que teni copaicõjenejameđa ina põevare ne cʉ̃ramiai. 23 Ne nʉriburu yóboi, Jʉ̃menijicʉre coyʉcʉnʉrejameđa cũinácʉva cʉ̃racũi. Noi ʉ̃i coyʉiyede Jʉ̃menijicʉque, ñami marejávʉ̃ya. 24 Dicũ, ñʉje jiađocũ, macajitabʉ ʉrabʉ coricai cʉrejavʉ̃. Pãcaiboa ʉraboa jarʉrʉrejavʉ̃ dicũre. Aru ũmevʉ cobarejavʉ̃ ñʉjare. 25 Aru jãravʉcapũravʉi aviá ʉ̃i daquiye jipocai, Jesús curĩ macajitabʉ ʉrabʉ pʉenora darejame ñʉje yebai. 26 Ʉbenita ñʉja jã́ivʉ ʉ̃ cuyʉre macajitabʉ ʉrabʉ pʉenora, jidʉrivʉ baju cođoboborejacarã:
—¡Põe decocʉ bácʉtame! arĩ cođoboborejacarã ñʉja, jidʉrivʉ.
27 Ʉbenita maumena ñʉjare coyʉrĩ, arejame Jesús:
—Parʉéque dápiajarã. Yʉ́tamu Jesús. Jidʉbejarã mʉja, arejame ʉ̃.
28 Dinʉmʉma Pedro arejame ʉ̃́re:
—Mʉ, ji jabocʉ, jãve mʉ maru, yʉre daicõjejacʉ mi yebai, oco pʉenora, arejame ʉ̃.
29 Aru Jesús arejame ʉ̃́re:
—Dajacʉ, arejame.
Que jápiayʉ, Pedro etarejame dicũre jocarĩ. Aru vaivárejame oco pʉenora, nʉriducʉyʉ Jesús yebai. 30 Ʉbenita ũmevʉ pare japuiyede jã́ri, jidʉrejameđa ʉ̃. Jidʉcʉ, corĩ bʉ́rejame. Que baru cođoboborejame:
—¡Mʉ, ji jabocʉ, cađatejacʉ yʉre! arejame.
31 Maumejiena Jesús jabióvarejame Pedrore ʉ̃i pʉrʉi. Aru arejame ʉ̃́re:
—¿Aipe teni jidʉcʉrʉ̃ mʉ? ¿Aipe teni “Jesús meađacʉyʉme yʉre”, abecʉrʉ̃ mʉ? arejame Pedrore.
32 Ne jatuiyede dicũ jiađocũi, ũmevʉ bíjarejavʉ̃. 33 Aru ñʉja dicũi cʉrivʉ mearore jídejacarã Jesúre.
—Jãve mʉ́tamu Jʉ̃menijicʉi mácʉ, arejacarã ʉ̃́re.
Jesús ʉ̃i meađaino Genesarecavʉ ijimarare
34 Jatarĩburu yóboi, earejacarã Genesaret ãmicʉrijoborõi. 35 Aru dicũre jocarĩ etaivʉ bácavʉre, obedivʉ põeva coreóvarejaima Jesúre. Que baru ʉ̃i borore jarorejaimađa caino ne ĩmaroai, ne davarãjiyepe aivʉ ijimarare. 36 Ʉ̃́re jẽniarejaima, jẽni jã́rajivʉ ʉ̃i cuitótecaje tʉrʉvarã. Aru caivʉ jẽni jã́ivʉ meateivʉ barejáima na, ijimara mácavʉ.