1 Pedro
Maje memecaino Jʉ̃menijicʉre Espíritu Santoi majide đainoque majare coapa
4 Jesucristo ñájinejame ʉ̃i baju ʉ̃i cʉede ijãravʉi. Que baru mʉja máre, dápiarĩ ʉ̃i dápiaiye báquepedeca, jidʉbejarã mʉje ñájinajiyede. Ácʉ põecʉ ñájiñʉ, ãmeina teiyede dajocaibi. 2 Que baru caride mʉje cʉede ijãravʉi đaicõjemejara mʉje bajure yópe mʉje baju ʉrõpe. Quénora đaicõjejara Jʉ̃menijicʉre mʉje bajure yópe ʉ̃i ʉrõpe. 3 Ina Jʉ̃menijicʉre jʉ abevʉ đaivʉ ne baju ʉrõpe. Javede mʉja máre nápe đaivʉ barejaquémavʉ obediʉjʉa. Que teni mʉja ãmeno đaivʉ barejaquémavʉ. Mʉje ãmeina đaiyʉepe đaivʉ barejaquémavʉ. Pacoteivʉ barejaquémavʉ. Bʉjiéque ũcuri torojʉve teivʉ barejaquémavʉ. Ũcuri upaivʉ barejaquémavʉ. Aru ãmeno đaivʉ barejaquémavʉ mearore jívʉ pẽpeimarare Jʉ̃menijicʉre ʉbevʉva. 4 Aru caride coreóvabema na mʉje náre yóvabe boje ne ʉrarõ ãmeno đaiyede. Que baru arĩ dápiarĩ, “¿Aipe teivʉ bárica yóvabevʉ majare?” arĩ, ãmeina yávađama mʉjare ne bajumia. 5 Ʉbenita návacari núrajarama, coyʉrãjivʉ ne baju ne borore caiye ne đaiye báquede, aru ne yávaiye báquede, aru ne dápiaiye báquede máre Jʉ̃menijicʉi jivateinoi, ʉ̃i ñájine đaquiyede caivʉ põevare ne ãmeina teiye boje, yaivʉ bácavʉre aru apʉrivʉre máre. 6 Ne majinajiyepe ayʉ diede, javede iye Jʉ̃menijicʉi yávaiye méne coyʉrejaquemavʉ ina yaivʉ bácavʉre caride. Que baru ñájine đaimara mácavʉvacari ne yaiye báquede yópe caivʉ põevape ne bajure, apʉrivʉ cʉrivʉ bʉojarãjarama ne ũmene yópe Jʉ̃menijicʉpe.
7 Caijãravʉ vaivʉ, pʉeno joabenotamu ijãravʉ cũiquíno. Que baru me đaicõjejara mʉje dápiaiyede aru mʉje đaiyede máre, me jẽniamuri Jʉ̃menijicʉque yópe ʉ̃i ʉrõpe. 8 Caiye mʉjare jaʉé pʉeno, yo cũináro jaʉrõtamu: Ʉjarã apevʉre parʉrõreca. Ʉrivʉ baru apevʉre, ãrʉmeteiyʉrãjivʉbu ne ãmeina teiyede. 9 Torojʉrivʉ copʉ etajarã mʉjevʉre me. Jecʉbejarã ne ãiyede, “Ʉbevʉ yʉ náre copʉ etarĩ”, abevʉva. 10 Jʉ̃menijicʉi Espíritu Santo majide đaibi mʉjare coapa, mʉje đarãjiyepe ayʉ apeno memeinova, cađatenajivʉ apevʉ mʉjevʉre. Me đajarã iye ʉ̃i majide đaiyede yópe coreipõecʉi me đaiyepe iye ʉ̃i jabocʉi cʉvaede ʉ̃i coreicõjeiye báquede ʉ̃́re. 11 Ñai coyʉyʉ, coyʉiye jaʉvʉ ʉ̃́re Jʉ̃menijicʉi yávaiyede jãvene. Aru ñai memecayʉ, memecaiye jaʉvʉ ʉ̃́re iye parʉéque Jʉ̃menijicʉi jíyede ʉ̃́re. Que baru caiye mʉje đaiyeque Jesucristo mearore jíde đaibi Jʉ̃menijicʉre, mearore aru parʉéde máre cʉvacʉ cainʉmʉa. Quédecabu.
Jesucristore jʉ aivʉ ne ñájinajino
12 Mʉja, ji ʉmara, cuecumamejara ne ñájine đaiyede mʉjare. Mʉje ñájiyeque jã́đovarajivʉbu mʉje jʉ aiyede Jʉ̃menijicʉre jãve, yópe ne jã́đovaiyepe tãure jãve toaque. Que baru caivʉ Jesucristore jʉ aivʉ ñájinajaramu. 13 Que baru cuecumamejara. Quénora torojʉjarã mʉje ũmei mʉje ñájiyede yópe Jesucristo ʉ̃i ñájiye báquepe. Que baru pʉeno baju torojʉrãjaramu caivʉ ne jã́rajiyede Cristo meacʉ bajure. 14 Põeva ne ãmeina yávaru mʉjare, mʉje jʉ aiye boje Cristore, torojʉjarã mʉja mʉje ũmei. Caivʉ mʉja ne ãmeina yávaimara Cristore boje, mʉjarecabu cʉvarivʉ Jʉ̃menijicʉi Espíritu Santore, ñai Espíritu pʉeno baju meacʉre. Aru ʉ̃ cʉbi mʉjaque. 15 Mʉja ñájivʉ baru, ñájimejara yópe põevare boarĩ́ jarʉvaivʉpe, aru ñavaipõevape, aru apevʉ ãmeno đaipõevape máre. Aru ñájimejara yópe ina “Yópe ji coyʉiyepe đaiye jaʉvʉ mʉjare”, coyʉivʉpe apevʉre. 16 Ʉbenita mʉja ñájivʉ baru mʉje jʉ aiye boje Cristore, cʉyoje tebejarã mʉje jʉ aiyede ʉ̃́re. Quénora mearore jíjarã Jʉ̃menijicʉre mʉje Cristo jina mae boje.
17 Joabejĩnoi Jʉ̃menijicʉ bʉ́cʉyʉme ʉ̃i ñájine đaquiyede põevare, ne ãmeina teiye boje. Mamarʉmʉre Jʉ̃menijicʉ ñájine đacʉyʉme ʉ̃ jinare. Aru Jʉ̃menijicʉi ñájine đaiye boje ʉ̃ jinare, ina jʉ aivʉre ʉ̃i yávaiye méne, jãve pʉeno ʉrarõ ñájine đacʉyʉme ina jʉ abevʉre ʉ̃i yávaiye méne. 18 Yópe arĩ Jʉ̃menijicʉ toivaicõjenejaquemavʉ ʉ̃i yávaiyede: “Ina põeva meara meađarĩduimara maru, pʉeno baju meađarĩduimaramu ina põeva ãmena, ãmeina teivʉ”, arĩ toivaicõjenejaquemavʉ. 19 Iye ji coyʉiyede yópe aiyʉrõtamu: Ina põeva ñájivʉ Jʉ̃menijicʉi ʉrõpe mearore đare cuiye jaʉvʉ náre cainʉmʉa. Aru jʉ aiye jaʉvʉ náre Jʉ̃menijicʉre, náre cʉeđayʉ bácʉre aru cainʉmʉa đayʉre yópe ʉ̃i aiye báquepedeca, ʉ̃i meađaquiyepe aivʉ ne ũmene.