Lucas
Jesús ʉ̃i meađaino cocoroyʉre
(Mt 12.11)
14 Cũinájãravʉ, judíovai jabʉóvaijãravʉ sábadoi, Jesús ãcʉnʉrejameđa cũinácʉ jabocʉ, fariseovacacʉi cʉ̃rami. Ina jabova nore cʉrivʉ cocorejaimađa ʉ̃́re, ʉ̃i ãmeina tedu, boro coyʉrĩ ađarãjivʉ ʉ̃́re. 2 Aru cũinácʉ ʉ̃mʉ pare ijimʉ járorejameđa nore, ʉ̃i ãmuvea aru ʉ̃i ãrađoa máre pare cocororejavʉ̃ya ʉ̃́re. 3 Ʉ̃́re jã́ñʉ Jesús, jẽniari jã́rejameđa ina Jʉ̃menijicʉi yávaiye báquede bueipõevare aru ina fariseovare máre, noi cʉrivʉre, yópe arĩ:
—¿Meađaiye jaʉri põevare judíovai jabʉóvaijãravʉ sábadoi? arejameđa Jesús.
4 Ʉbenita bi arejaimađa na. Dinʉmʉma Jesús ñai ijimʉre jẽni meađarejameđa. Ʉ̃i meađarĩburu yóboi, nʉicõjenejameđa ʉ̃́re. 5 Aru Jesús arejameđa náre:
—¿Ácʉ mʉjacacʉ mamacʉ o ʉ̃i oteivecʉ máre tʉru cobe ʉ̃mʉjʉricobe jívʉi, cũiná ĩmeje bárica ʉ̃́re judíovai jabʉóvaijãravʉre? arejameđa Jesús.
6 Ʉbenita bi arejaimađa na.
“Cutuimara torojʉve teinoi” jã́ri dápiarĩ ne đarãjiyepe aino
7 Dinʉmʉre Jesús jã́rejameđa ina cutuimara voivʉre apevʉ pʉeno ne dobarõ mearova. Que baru coyʉrejameđa náre yo jã́ri dápiarĩ ne đarãjiyepe ainore:
8 14:8-9 —Apecʉ ʉ̃i cuturu mʉre ʉ̃i torojʉve teinoi, apevʉ pʉeno dobabejacʉ dobarõ mearoi. Que đaru, ñai torojʉve teino upacʉ cutuyʉ baru apecʉ ʉ̃mʉre, mi pʉeno ne majimʉre, acʉyʉme mʉre: “Jíjacʉ mi dobarõre ñai ʉ̃mʉre”. Que teni cʉyoje teni dobacʉnʉjebu mʉ tʉrʉvaita. 9 — 10 Ʉbenita apecʉ ʉ̃i cuturu mʉre ʉ̃i torojʉve teinoi, dobajacʉ tʉrʉvai. Que đaru, dacʉyʉme mi yebai ñai cutuyʉ bácʉ aru acʉyʉme mʉre: “Jícʉ, nʉjacʉ pʉenomaque. Vojacʉ mi dobarõ mearova”. Que teni torojʉrĩ jã́rajarama mʉre caivʉ dobarivʉ mʉ́que tʉoiva yebai. 11 Que baru ñai cʉiyʉcʉ me apevʉ pʉeno, parʉbecʉyʉme pʉeno baju. Aru ñai parʉbede đaiyʉcʉ ʉ̃i baju apevʉ cãchino, me cʉcʉyʉme pʉeno baju, Jʉ̃menijicʉi mearo đacaquiye boje ʉ̃́re, arejameđa Jesús.
12 Aru ñai ʉ̃́re cutuyʉ bácʉre máre arejameđa Jesús:
—Mi torojʉve teinʉmʉ, cutubejacʉ mʉ mi yóvaimarare, aru mívʉre, aru mi cađajĩecavʉ cʉve cʉvarivʉre máre. Que đaivʉ baru, nácapũravʉ ne cuturãjiyede mʉre máre ne torojʉve tenajiyede, cʉvacʉyʉmu mʉ mi bojeva. 13 Ʉbenita mi torojʉve teinʉmʉ cutujacʉ ina cõmaje ãrojarivʉre: cʉve cʉvabevʉre, ijimarare, cuiye majibevʉre, aru jã́ri eabevʉre máre. 14 Aru torojʉcʉyʉmu mʉ. Nácapũravʉ bʉojabenama bojeđaivʉ mʉre. Ʉbenita eacʉyʉmu mʉ mi bojeva ina boropatebevʉ ne nacajarajijãravʉ baquinóre yainore jarʉvarĩ, arejameđa Jesús.
“Ʉrarõ ãinore” jã́ri dápiarĩ ne đarãjiyepe aino
15 Cũinácʉ ʉ̃́que cʉrivʉcacʉ, Jesús ʉ̃i que aiyede jápiayʉ bácʉ, arejameđa Jesúre:
—¡Torojʉcʉyʉme ñai ãcʉyʉ Jʉ̃menijicʉi jaboteinore! arejameđa ʉ̃.
16 Jesús, ʉ̃́re buecʉyʉ, arejameđa:
—Apenʉmʉ cũinácʉ ʉ̃mʉ torojʉve teinore meađaquemavʉ. Aru cutuquemavʉ obedivʉ põevare. 17 Que teni ne ãiora joabejĩnoi ñai torojʉve teino upacʉ ʉ̃i yebacacʉre jaroyʉ, aicõjequemavʉ ʉ̃i cutuimarare yópe: “Jave meađacavʉ caiyede mʉjare, que baru ‘Ãradajarã’ aibi ji jabocʉ”, ajacʉ, aquemavʉ ʉ̃. 18 Ʉbenita ina ʉ̃i cutuimara coapa coyʉrĩ bʉ́quemavʉ nʉiyʉbevʉ ʉ̃i torojʉve teinore. Cũinácʉ ʉ̃i cutuimaracacʉ aquemavʉ: “Mamajiore bojeđavʉ yʉ. Que baru jã́cʉnʉiye jaʉvʉ yʉre no jiore. Que baru coyʉjacʉ mi jabocʉre, ʉ̃i corebequiyepe yʉre”, aquemavʉ ʉ̃. 19 Aru apecʉ aquemavʉ: “Caipʉcapʉrʉape paivʉ oteivecʉvare bojeđavʉ yʉ. Que baru jã́cʉnʉiye jaʉvʉ yʉre náre. Que baru coyʉjacʉ mi jabocʉre, ʉ̃i corebequiyepe yʉre”, aquemavʉ ʉ̃. 20 Aru apecʉ aquemavʉ: “Pʉrʉbʉovʉ yʉ. Que baru daiye majibevʉ yʉ mi jabocʉi torojʉve teinoi”, aquemavʉ ʉ̃. 21 Que teni ñai ʉ̃i yebacacʉ copaini coyʉquemavʉ caiye iyede ʉ̃i jabocʉre.
’Ʉ̃i coyʉiyede jápiayʉ bácʉ ñai jabocʉ, jararĩ dápiayʉ, aquemavʉ ʉ̃i yebacacʉre: “Maumejiena nʉjacʉ ĩmarocama ʉramai aru quĩ́jimai máre. Aru davajacʉ ina cõmaje ãrojarivʉre: cʉve cʉvabevʉre, ijimarare, jã́ri eabevʉre, aru cuiye majibevʉre máre”, aquemavʉ ñai jabocʉ. 22 Ñai yebacacʉ ʉ̃i copaiyede, aquemavʉ ʉ̃i jabocʉre: “Mʉ, ji jabocʉ, yópe mi cõjeiyepe đavʉ yʉ. Ʉbenita mi ãitucubʉ buibévʉ cãreja”, aquemavʉ ñai yebacacʉ. 23 Aru ñai jabocʉ aquemavʉ ʉ̃i yebacacʉre: “Ĩmarore jocarĩ nʉjacʉ mʉ. Ma nʉimai nʉjacʉ aru daicõjejacʉ põevare ji torojʉve teinoi, ji cʉ̃rami buiquíyepe. 24 Coyʉyʉbu mʉre: Caivʉ ina ji cutuimara mácavʉ ãmenajarama ji torojʉve teinoque ãiyede”, aquemavʉ ñai jabocʉ, arejameđa Jesús.
Jesúque nʉru ñájiovaino
(Mt 10.37-38; 16.24; Mr 8.34; Lc 9.23; Jn 12.24)
25 Mái nʉiyede obedivʉ põeva yóvarejaimađa Jesúre. Aru ʉ̃copedini, jã́ri, arejameđa náre:
26 —Ácʉ põecʉ ʉ̃i daru ji yebai, ji bueimaracacʉ bacʉyʉ́, yʉre jecʉé jaʉvʉ ʉ̃́re caivʉ pʉeno baju. Que baru ʉjacʉrĩ yʉre jípacʉ, jípaco, jímarepaco, mamara, jíbʉrã, ĩmara, aru ʉ̃i baju máre pʉeno baju. 27 Ácʉ põecʉ daiyʉcʉ yʉ́que, dajocajacʉrĩ põeva ne mearo jã́iyede ʉ̃́re, cʉyebejacʉrĩ yʉre yóvaiyede, aru jidʉbejacʉrĩ ʉ̃i ñájiquiyede. Nópe đabecʉ baru, ʉ̃bʉojabebi jícʉ bacʉyʉ́. 28 Ácʉ mʉjacacʉ cʉ̃rami ʉrađãmi đaiyʉcʉ baru, dápiarĩ dobajebu, corevacʉyʉ aipino bojecʉrõre diñamine aru ʉ̃i bʉojaquinore máre. 29 14:29-30 Iñamine đarĩ bʉ́rĩburu yóboi, ñai cʉ̃ramine đayʉ ʉ̃i bʉojabedu, caivʉ ina jã́ivʉ ʉ̃́re yʉrinajarama yópe aivʉ: “Ñai ʉ̃mʉ cʉ̃ramine đarĩ bʉ́cʉbe. Ʉbenita bʉojabebi caride”. 30 — 31 Aru ácʉ jabocʉ dápiarĩ dobajebu, ʉ̃ jina caipʉcapʉrʉape paimil baju churaravaque boaiyʉcʉ baru apecʉ jabocʉ veinte mil paivʉ baju churarava cʉvacʉque ãđamatecʉdayʉ ʉ̃́re. 32 Aru boarĩ́ bʉojaiyʉbecʉ baru ʉ̃i boro nʉvaipõevare coyʉrĩ jarocʉyʉme ʉ̃i maucʉ joai cʉedeca cãreja, “Boaiyʉbevʉ yʉ” arĩ jaroyʉ. 33 Que baru me dápiaiye jaʉvʉ mʉjare jipocamia, ji bueimara márajivʉ baru. Mʉja dajocabevʉ baru mʉje cʉvaede, ji bueimara teivʉ bʉojabenamu mʉja, arejameđa Jesús.
“Yuquirare” jã́ri dápiarĩ ne đarãjiyepe aino
34 Bedióva cojedeca arĩ buedejameđa Jesús náre:
—Meađaivʉ maje ãiyede yuquiraque. Nopedeca ñájiye meađaivʉ põevare. Yuquira maje ãiyede meađaivʉ. Ʉbenita yuquira vaijʉe bíjaru, ãiyede meađaiye bʉojabevʉ. 35 Joborõre aru oteiye ʉ̃rojʉrõre máre meađaiye bʉojabevʉ. Quédata põeva jarʉvađama iye yuquira meamene. Nopedeca Jʉ̃menijicʉi põeva ʉ̃i ʉrõpe đarĩ dajocaivʉ baru, meađarĩ bʉojabenama ijãravʉcavʉre. Me jápiajarã mʉja iye ji bueiyede, arejameđa Jesús.