Lucas
Jesús ʉ̃i bueimarare ʉrarõ moare boaré đaino
(Mt 4.18-22, 13.1-2; Mr 1.16-20, 3.9-10, 4.1; Jn 21.3, 6)
5 Põeva obedivʉ nʉivʉ Jesús yebai, ʉ̃i cʉede macajitabʉ ʉrabʉ Genesaret ãmicʉrijitabʉ ẽcarʉi, pare copiporejaimađa ʉ̃́re, jápiaiyʉrivʉ Jʉ̃menijicʉi yávaiyede. 2 Jesús jã́rejameđa pʉcacũa jiađocũare macajitabʉ ʉrabʉ ẽcarʉ yebai. Dicũái moa boaipõeva núrejaimađa dicũá yebai, joaivʉ ne pápicʉare. 3 Jesús jatuyʉ bácʉ cũinácũ jiađocũi, Simón Pedro jicũi, jaroicõjenejameđa joajĩemaque ẽcarʉre jocarĩ. Aru dobacʉ dicũi, bueni bʉ́rejameđa ina obedivʉ põevare. 4 Yávarĩ bʉojayʉ bácʉ arejameđa Simón Pedrore:
—Nʉvajacʉ mi jiađocũre macajitabʉ ʉ̃mʉjʉrõ baji. Aru noi jaboájarã mʉje pápicʉare, moa boarã́jivʉ, arejameđa Jesús.
5 Simón Pedro jʉ ayʉ, arejameđa Jesúre:
—Mʉ, bueipõecʉ, caiñami memeniduvʉ ñʉja. Ʉbenita ye boabétevʉ. Ʉbenita mi cõjeiye boje, jaboáquijivʉ ji pápicʉre, arejameđa.
6 Que teni đaivʉ bácavʉ yópe Jesúi coyʉiyepe, jẽnejaimađa obedivʉ moare. Cođedejaimađa ne pápicʉre. 7 Dinʉmʉ “Yareni dajarã”, arejaimađa ne yóvaimarare, apecũ jiađocũcavʉre, ne cađatenaearãjiyepe aivʉ. Aru earĩ, buivárejaimađa caipʉcacũa jiađocũare coicũa baju. 8 Yópe teiyede jã́ri, Simón Pedro ñʉatutarĩ Jesús yebai, arejameđa ʉ̃́re:
—Mʉ, ji jabocʉ, nʉjacʉ yʉre jocarĩ, ji ãmeina teiye boje, arejameđa Jesúre.
9 Que baru Simón Pedro aru ʉ̃́cavʉ máre cuecumarejaimađa, ʉrarõ ne moa boaiye boje. 10 Santiago aru Juan máre, Zebedeoi mára, Simón Pedroi yóvaimara marejáimađa. Cuecumarejaimađa na máre. Ʉbenita Jesús arejameđa Simón Pedrore:
—Jidʉbejacʉ. Caride epequijivʉ mʉre, mi davaquiyepe põevare ji yebai yópe mi moare davaiyepe pápicʉque, ji meađaquiyepe náre, arejameđa Jesús.
11 Que teni jiađocũa eaiyede ẽcarʉi, dajocaivʉ bácavʉ caiyede nʉrejaimađa Jesúque.
Jesús ʉ̃i meađaino pojeyʉre
12 Jesús ʉ̃i cʉede cũináro ĩmaroi, ʉ̃i yebai nʉrejameđa cũinácʉ pojeyʉ. Aru Jesúre jã́ri, ñʉatutarejameđa joborõi, pueđacʉyʉ ʉ̃́re. Aru jẽniarejameđa:
—Mʉ, ji jabocʉ, ʉcʉ baru, meađajacʉ ji pojeiyede. Bʉojaivʉ mʉ meađayʉ yʉre, arejameđa.
13 Dinʉmʉre Jesús, ʉ̃i pʉrʉque jabióvarĩ tʉoyʉ, arejameđa ʉ̃́re:
—Ʉvʉ yʉ. Caride meatejacʉ mʉ, arejameđa Jesús.
Yópe ʉ̃i aiyede vaidéjavʉ̃ya ʉ̃́re. 14 Jesús, coyʉicõjemecʉ apevʉre, arejameđa:
—Cũiná nʉri, jã́đovajacʉ sacerdotede. Aru jíjacʉ mi meateiye boje, yópe Jʉ̃menijicʉi đaicõjeiyede ʉ̃i coyʉiye báquepe Moisés bácʉre, põeva ne coreóvarãjiyepe ayʉ mi meateinore, arejameđa ʉ̃́re Jesús.
15 Ʉbenita pʉeno baju coyʉivʉ barejáimađa Jesúi borore. Obedivʉ põeva cójijidejaimađa jápiaivʉ, aru ʉ̃́re meađaicõjeiyʉrivʉ náre ijiéde. 16 Que baru ina obedivʉ cʉe boje, Jesús nʉrejameđa põecʉbenoi, jẽniacʉyʉ Jʉ̃menijicʉque.
Jesús ʉ̃i cure đaino nacajaiye majibecʉre
17 Cũinájãravʉ Jesús ʉ̃i bueiyede põevare, dobarejaimađa noi fariseovacavʉ, ina Jʉ̃menijicʉi đaicõjeiyepe đaivʉ, aru Jʉ̃menijicʉi yávaiye báquede bueipõevacavʉ máre, eaivʉ bácavʉ cainoa ĩmaroa Galilea ãmicʉrõre, Judea ãmicʉrõre, aru Jerusalén ãmicʉriĩmarore jocarĩ máre. Jʉ̃menijicʉi parʉéde cʉrejameđa Jesús, meađacʉyʉ ijimarare. 18 Dinʉmʉ apevʉ ʉ̃mʉva nʉvarejaimađa ʉ̃i yebai cũinácʉ ʉ̃mʉ, nacajaiye majibecʉre, ʉ̃i parainoque. Ecoiyʉrejaimađa cʉ̃rami jívʉi Jesús yebai. 19 Ʉbenita eabedejaimađa ne ecorãjino, obedivʉ põeva cʉe boje. Que baru mʉri nʉri cʉ̃rami pʉenora, voarĩ diede, ẽmeóvarejaimađa ijimʉre ʉ̃i parainoque põeva jẽneboi Jesús yebai. 20 Náre coreóvayʉ jʉ aivʉre, Jesús arejameđa ñai nacajaiye majibecʉre:
—Mʉ, ji ʉmʉ, mi ãmeina teiyede jarʉvarĩ, ãrʉmeteivʉ yʉ diede, arejameđa Jesús.
21 Dinʉmʉ ina Jʉ̃menijicʉi yávaiye báquede bueipõeva aru fariseova máre dápiarĩ bʉ́rejaimađa yópe: “¿Yécʉba ñai ʉ̃mʉ ãmeina yávayʉ Jʉ̃menijicʉre? Ñame bʉojabema jarʉvaivʉ ãmeina teiyede. Quénora cũinácʉrabe Jʉ̃menijicʉ bʉojarĩ jarʉvayʉ diede”, arĩ dápiarejaimađa.
22 Aru Jesús, jã́ri coreóvarĩ ne baju ne dápiaiyede, arejameđa náre:
23 —¿Aipe teni que arĩ dápiaivʉrʉ̃ mʉja? Maiyójabevʉ yópe aru apecʉre: “Mi ãmeina teiyede jarʉvarĩ, ãrʉmeteivʉ yʉ”, ji parʉéde jã́đovame boje ji que coyʉiyede. Ʉbenita maiyójarõtamu nacajari cuicõjenu nacajaiye majibecʉre. Ʉ̃́re cure đayʉ baru, jã́đovaquijivʉ ji parʉéde. “Mi ãmeina teiyede jarʉvaivʉ”, ji aiyede, coreóvabevʉ mʉja Jʉ̃menijicʉi ãrʉmeteinore diede. Ʉbenita ñai cʉvacʉ Jʉ̃menijicʉi majié parʉéde, ʉ̃́rame yópe đarĩ jã́đovaiye majicʉ. Quécʉra Jʉ̃menijicʉvacari meađarĩ majibi ijimarare. 24 Que baru mʉje majinajiyepe ayʉ Jʉ̃menijicʉi daroimʉ mácʉ ʉ̃mʉpe, yʉ, parʉéde cʉvacʉre ijãravʉre jarʉvacʉyʉ ãmeina teiyede, yópe đaquijivʉ yʉ, arejameđa Jesús.
Dinʉmʉ arejameđa nacajaiye majibecʉre:
—Yópe aivʉ yʉ mʉre: Nacajari, mi parainore ĩni, nʉjacʉ mi cʉ̃rami, arejameđa Jesús.
25 Dinʉmʉma nacajari, ʉ̃i parainore ĩni, etarejameđa obedivʉ jẽneboi. Aru mearore jídejameđa Jʉ̃menijicʉre. 26 Caivʉ ina põeva máre, pare dápiaivʉ, mearore jídejaimađa Jʉ̃menijicʉre.
Jesús ʉ̃i “Dajacʉ” aino Levíde
(Mt 9.9-13; Mr 2:13-17; Lc 15.1-2)
27 No yóboi, Jesús etarĩ nʉñʉ jã́rejameđa cũinácʉ judíovacacʉ, Roma ãmicʉrõ jaboteino jabovare tãutʉra ĩcaipõecʉ, ʉ̃i ãmiá Leví, dobacʉre ne bojeđainoi. Aru arejameđa ʉ̃́re:
—Dajacʉ yʉ́que, arejameđa Jesús.
28 Aru nacajari, dajocayʉ caiyede, nʉrejameđa Jesúque.
29 Que teniburu yóboi, Leví torojʉve tedejameđa ãino ʉrarõque ʉ̃i cʉ̃rami, pueđacʉyʉ Jesúre. Aru obedivʉ jabovare tãutʉra ĩcaipõeva aru apevʉ põeva máre dobarejaimađa Levíque aru Jesúque máre. 30 Ʉbenita Jʉ̃menijicʉi yávaiye báquede bueipõevacavʉ aru fariseovacavʉ máre ãmeina yávarĩ bʉ́rejaimađa Jesúi bueimarare. Arejaimađa:
—¿Aipe teni ãri, ũcuri teivʉrʉ̃ mʉja ina jabovare tãutʉra ĩcaipõevaque aru ãmeno đaipõevaque máre? arejaimađa náre.
31 Jesús jʉ ayʉ, arejameđa náre:
—Meara põevare jʉoipõecʉi cađateiye jaʉbevʉ. Quénora ijimarare ʉ̃i cađateiye jaʉvʉ. 32 Dabedejacacʉ yʉ ijãravʉi, cutucʉyʉ mearare ne baju dápiainore. Quénora darejacacʉ yʉ, meađacʉyʉ ãmenare, ne chĩorajiyepe ayʉ ne ãmeina teiyede, Jʉ̃menijicʉi ãrʉmetequiyepe ayʉ diede, arejameđa Jesús.
Põeva ãmevʉva ãiyede ne jẽniaino Jʉ̃menijicʉque
33 Dinʉmʉre jẽniari jã́rejaimađa Jesúre ina fariseova:
—¿Aipe teni Juan Bautistai bueimara aru ñʉje bueimara máre ãmevʉba ãiyede, ʉbenita mi bueimara ãmevʉ ãmema ãiyede? arejaimađa.
34 Jesús arejameđa náre:
—Ina pʉrʉbʉoyʉ ʉ̃i cutuimara ne torojʉve tenajiyepe ayʉ ʉ̃i pʉrʉbʉoiyede, ye ãmevʉ ãmema ãiyede ʉ̃i cʉede cãreja náque. Nopedeca ji bueimara torojʉrivʉ ji cʉede náque, ãmevʉ ãmema ãiyede. 35 Ʉbenita ji mauva ne nʉvarajiyede yʉre, ji bueimara chĩoivʉ ãmenajarama ãiyede, arejameđa Jesús.
36 Jẽvari coyʉrejameđa náre:
—Ñame bʉojabema buraivʉ cũinájeve cuitótecaje mamacajede, jẽorajivʉ cuitótecaje javecarõre. Nópe đaru, ãmeđajebu cuitótecaje mamarore. Aru mamajeve jẽmejebu cuitótecaje javecarõre. Quédeca ñame bʉojabema jʉ aivʉ ji bueiye mamaene aru javeque bueiyede máre. 37 Nopedeca bʉojabema yuaivʉ vino ʉ́yaicorore mamacorore ãimacaje curubʉ javecacurubʉque. Que đaru, cođeóvajebu dicurubʉre. Aru yurĩ bíjajebu dicoro. Bíjajebu dicurubʉ máre. 38 Ʉbenita ne yuaru vino ʉ́yaicorore mamacorore mamacurubʉque, bíjabejebu dicoro. Quédeca ñame bʉojabema đaivʉ yópe ji bueiye mamaepe, đare nʉivʉ baru yópe ne jave đaiye báquepe. 39 Aru ñai ũcuñʉ mácʉ icoro mamaboqueicorore ũcuiyʉbecʉ mamaene ajebu yópe: “Javequetamu me baju”. Nopedeca apevʉ põeva jápiaiyʉbevʉ Jʉ̃menijicʉi yávaiye mamaene, ne dápiaiye boje javeque yávaiye pʉeno me bajure, arĩ buedejameđa náre Jesús.