Romanos
Põeva ne cʉe Cristoque cũinávʉpe
6 ¿Maje jʉ aiye boje diede, aipe đarãjidi maja caride? ¿Pʉeno ãmenore đare nʉiye jaʉri, Jʉ̃menijicʉi jã́đovaquiyepe aivʉ ʉ̃i pʉeno ʉrarõ mearore? 2 ¡Bi, ye que ãmevʉ! ¡Aipinʉmʉ vaibéjarõri nópe! Majarecabu boarĩ́ jarʉvaimara mácavʉpe paivʉ. Aru ãmeno majare boarĩ́ jarʉvayʉ bácʉpe painotamu. Que baru ãmeina teiye jaʉbevʉ majare. Aru “Ðare nʉivʉ baru ãmenore me cʉrãjaramu maja Jʉ̃menijicʉque”, arĩ bʉojabevʉ maja. 3 Jãve majidivʉbu mʉja aipe teni jã́đovaimara mácavʉ Jʉ̃menijicʉre ocoque. Maje jã́đovaiye báque Jʉ̃menijicʉre ocoque apevʉre coreóvare đarejaquemavʉ maja cʉrivʉre Jesucristoque cũinávʉpe. Iye maje ñájijʉroede maje ãmeina teiye boje, Jʉ̃menijicʉ ñájine đarejaquemavʉ ʉ̃́re majare boje. Ʉ̃́re yaidé đayʉ, Jʉ̃menijicʉ dajocarejaquemavʉ ʉ̃́re cũinácʉva. 4 Maje jã́đovaiyede Jʉ̃menijicʉre ocoque, yaivʉ bácavʉpe barejaquémavʉ maja, yópe jarʉvaimara mácavʉpe Jesucristoque põe jarʉvainoi, mamabaju cʉvarãjivʉ ʉ̃́que. Yópe vaidéjaquemavʉ Jesucristore. Majepacʉ Jʉ̃menijicʉ ʉ̃i parʉé pʉeno mearoque nacovarejaquemavʉ ʉ̃ mácʉre yainore jarʉvarĩ, apʉcʉyʉre cojedeca, maje ména cʉrãjiyepe ayʉ caride Jesucristoque cũinávʉpe.
5 Que baru maje yaivʉ bácavʉpe paiye boje ʉ̃́que cũinávʉpe ʉ̃i yaiyede, jãve nacovaimaramu maja yainore jarʉvarĩ ʉ̃́que cũinávʉpe ʉ̃i apʉé mamaene. 6 Aru majidivʉbu maja maje cʉe báquede javede, Jesúre jʉ arãjiye jipocare. Cristo ʉ̃i yaiyede jocʉcʉjaravena bíjarorejaquemavʉ maje ãmeina đaiyʉe parʉé báquede. Jʉ̃menijicʉ nópe đacarejaquemavʉ majare, maje đabenajiyepe ayʉ maje ãmeina đaiyʉede yópe yebacavʉ ne jabocʉi cõjeiyede đaiyepe. 7 Ʉbenita jabocʉ cʉbebi cõjeñʉ yaiyʉ́ bácʉre. Nopedeca maje yaiye báque boje Cristoque, coatede đarejaquemavʉ majare, maje ãmeina đaiyʉede jarʉvarĩ. 8 Maje majié boje maja yaivʉ bácavʉpe Cristoque ʉ̃i yaiyede, coavaimara márajivʉbu maje ãmeina đaiyʉede jarʉvarĩ. Nopedeca majidivʉbu maja cʉrãjivʉre me Jesucristoque, maje jʉ aiye boje Jʉ̃menijicʉre caride aru cainʉmʉa. 9 Maja majidivʉbu Cristo nacajañʉ mácʉre yainore jarʉvarĩ. Yaibécʉbe ʉ̃ cojedeca. Caride yaino bʉojabevʉ ʉ̃́re yaiváino.
10 Que baru Cristo yaidéjaquemavʉ cũinára, yaibécʉyʉ cainʉmʉa, parʉbede đacʉyʉ maje ãmeina đaiyʉede. Aru Jʉ̃menijicʉi parʉéque cʉbi, đaiyʉcʉ yópe Jʉ̃menijicʉi ʉrõpe. 11 Quédeca dápiajarã mʉja mʉje baju yópe: “Ãmeina teiye parʉbebu, Jesucristoi đaiye báque boje. Que baru đaicõjemevʉ yʉre caride. Yʉ yaiyʉ́ bácʉpe páyʉbu ãmeina teiyeque. Ʉbenita yʉ apʉcʉbu Jʉ̃menijicʉque, ʉ̃i parʉé boje. Yʉ cʉvʉ đayʉ yópe Jʉ̃menijicʉi ʉrõpe, cʉcʉ cũinávʉpe Jesucristoque”, arĩ dápiajarã mʉja.
12 Ãmeina đaiyʉede đaicõjemejara mʉje bajure. Ðaicõjeivʉ baru mʉje ãmeina đaiyʉede mʉje bajure, coatenajaramu mʉja Jʉ̃menijicʉre jarʉvarĩ. 13 Que baru đaicõjemejara mʉje ãmeina đaiyʉede mʉje bajure aru mʉje ũmene máre. Quénora đaicõjejara Jʉ̃menijicʉre mʉje bajure aru mʉje ũmene. Nacajaivʉ bácavʉpe paivʉbu yainore jarʉvarĩ, apʉrãjivʉ cojedeca. Que baru Jʉ̃menijicʉ matʉiyeda cõjejacʉrĩ mʉje dápiaiyede aru mʉje đaiyʉede máre, mearore đare đaquiyepe aivʉ. 14 Mʉje ãmeina đaiyʉede đaicõjeiye jaʉbevʉ mʉjare. Jaʉbevʉ mʉjare máre mʉje đaiye yópe Jʉ̃menijicʉi đaicõjeiyede ʉ̃i coyʉiye báquepe Moisés bácʉre. Ʉbenita mʉja me cʉrivʉbu cari, Jʉ̃menijicʉi cʉre đaiye boje mʉjare cũinávʉpe Jesucristoque, ʉ̃i ʉrõpe đarĩ. Nópe đaibi Jʉ̃menijicʉ ʉ̃i mearo đacaiye boje bojecʉbeda.
Pablo ʉ̃i jẽvari coyʉino yebacateinora maja mearore đaicõjeimarare
15 ¿Aipe arãjidi maja? ¿Ãmenore đarãjidi, majare đaiye jaʉbe boje yópe Jʉ̃menijicʉi đaicõjeiyepe ʉ̃i coyʉiye báquede Moisés bácʉre? ¿O quéda Jʉ̃menijicʉ pʉeno meacʉ baju ãrʉmeteidi maje ãmeina teiyede? ¡Bi, ye que ãmevʉ! ¡Aipinʉmʉ vaibéjarõri nópe! 16 Jãve majidivʉbu mʉja iyede. Yebacateivʉ baru apecʉre, mʉjare jʉ aiye jaʉvʉ ʉ̃́re. Quédeca mʉja jʉ aiyʉrivʉ baru mʉje ãmeina đaiyʉede, maumena đaiye jaʉquiyebu mʉjare diede. Aru coatenajaramu mʉja Jʉ̃menijicʉre jarʉvarĩ. Ʉbenita mʉja jʉ aiyʉrivʉ baru Jʉ̃menijicʉre, pʉeno baju jʉ arãjaramu ʉ̃́re. Que teni me cʉrãjaramu mʉja, đaivʉ ʉ̃i ʉrõpe. 17 Jipocamia mʉja jʉ arejaquemavʉ mʉje ãmeina đaiyʉede yópe yebacavʉ ne jʉ aiyepe ne jabocʉre. Ʉbenita apejãravʉre mʉja jʉ arejaquemavʉ mʉje ũmei iye yávaiyede jãvene, Jʉ̃menijicʉi jápiarĩ eare đaiyede mʉjare apevʉ ne bueiyede. Que baru mearore jínajarevʉ Jʉ̃menijicʉre. 18 Ʉ̃́recabe đaicõjene đabecʉ mʉjare mʉje ãmeina đaiyʉeque. Quénora mʉjamu ʉ̃i yebacavʉpe paivʉ, đarãjivʉ mearore.
19 Yʉ coyʉyʉbu mʉjare yópe mʉje majiépe, mʉje jápiarãjiyepe ayʉ ji bueiyede. Jipocare mʉja yebacavʉpe barejaquémavʉ, đarãjivʉ ãmenore. Ãmeina đaivʉ barejaquémavʉ mʉja. Aru jʉ abeni Jʉ̃menijicʉi đaicõjeiyede, đaivʉ ãmenejaquemavʉ mʉja ʉ̃i ʉrõpe. Nopedeca caride yebacavʉpe tejarã mʉja, đarãjivʉ mearore. Mʉjare Jʉ̃menijicʉi coavaiye boje ãmeina đaiyede jarʉvarĩ, cainʉmʉa đare nʉjara pʉeno mearore.
20 Jipocamia mʉje ãmeina đaiyʉeque yebacavʉpe paivʉ barejaquémavʉ mʉja. Aru mearore đaivʉ ãmenejaquemavʉ dinʉmʉre. 21 Ye mearore eabedejaquemavʉ mʉja iye mʉje ãmeina đaiye báqueque. “Torojʉrãjivʉtamu ñʉja”, arĩ dápiarĩdurejaquemavʉ. Ʉbenita torojʉbedejaquemavʉ mʉja. Que baru caride cʉyevʉ mʉja, mʉje ãmeina đaiye báque boje, coatede đaiye põevare Jʉ̃menijicʉre jarʉvarĩ. 22 Ʉbenita Jʉ̃menijicʉ đaicõjemene đaibi mʉjare mʉje ãmeina đaiyʉeque. Quénora epeibi mʉjare yópe ʉ̃i yebacavʉpe. Que teni cainʉmʉa memecaiyʉrivʉbu mʉja Jʉ̃menijicʉre. Aru Jʉ̃menijicʉi coatede đaiye boje mʉjare mʉje ãmeina đaiyʉede jarʉvarĩ, pʉeno mearo đare nʉivʉbu mʉja, cʉvarãjivʉ jãravʉ cũiméjãravʉ baquinóre ʉ̃́que. 23 Põeva ne ãmeina đaiye bojebu ne coateino Jʉ̃menijicʉre jarʉvarĩ. Ʉbenita ina cʉrivʉ Jesucristoque cũinávʉpe, cʉvama ne bojeva, Jʉ̃menijicʉi mearo đacaiye boje bojecʉbeda, ne cʉede ʉ̃́que caride aru cainʉmʉa.