Colosenses

2 Coreóvare đaiyʉvʉ mʉjare pʉeno baju ji memeiyede pʉ ʉetʉyʉvacari, cađatecʉyʉ mʉjare aru ina Jesúre jʉ aivʉ Laodicea ãmicʉriĩmarocavʉre, aru apevʉ Jesúre jʉ aivʉre máre, yʉre jã́mevʉ bácavʉre. 2 Yópe memeivʉ, parʉre đacʉyʉ caivʉ mʉjare mʉje ũmei, mʉje cʉe boje cũinávʉpe mʉje ʉede mʉje bajumia. Aru yópe memeivʉ, mʉje jápiarĩ coreóvarãjiyepe ayʉ jãve caiye iye Jʉ̃menijicʉi majiéde ʉ̃i meađaiyede mʉjare. Que teni jãve coreóvarãjaramu mʉja Cristoi borore. Ʉ̃́recabe Jʉ̃menijicʉi jã́đovamemʉ mácʉ cãreja javede. 3 Cristo cũinácʉrabe majicʉ pʉeno baju caiye iye põeva ne majibede aru ne coreóvabede máre. Majibi caiyede. Aru ʉ̃i majiébu pʉeno baju me, yópe põecʉi bojecʉede yaveiyepe paiye. 4 Caiye diede toivaicõjeivʉ apecʉre mʉjare, apevʉ ne jʉjovabenajiyepe ayʉ mʉjare borocʉeque. 5 Ji cʉedeca joai mʉjare jocarĩ ãrʉvʉ yʉ mʉjare cainʉmʉa. Coreóvaivʉ yʉ mʉjare cʉrivʉre Jesucristoque cũinávʉpe aru jʉ aivʉre ʉ̃́re parʉrõreca. Que baru torojʉvʉ yʉ ji ũmei.

Apʉé mamae jaʉrõ majare, Jesúre jʉ aipõevare

(Ro 6.4; Gá 4.3, 9; Ef 2.1-5, 15)

6 Mʉje jʉ aiye báque boje iye maje jabocʉ Jesucristoi yávaiyede, đajarã mʉja cainʉmʉa yópe ne đaiye jaʉrõpe ina cʉrivʉ Jesucristoque cũinávʉpe. 7 Que teni jʉ are nʉjara Jesucristore, aru đare nʉjara yópe ñʉje bueiyepe mʉjare ʉ̃i yávaiye méne mamarʉmʉre. Caijãravʉa pʉeno baju đare nʉjara yópe ʉ̃i ʉrõpe. Aru, “Jesucristoi yávaiye me jãvetamu”, are nʉjara. Nopedeca buedejaquemavʉ mʉjare mamarʉmʉre. Aru pare torojʉede jíde nʉjara majepacʉ Jʉ̃menijicʉre cainʉmʉa.

8 Me jã́jara mʉja. Mʉje bajumia apevʉre jʉjovaicõjemejara ne bueiye bojecʉbeque aru borocʉeque máre, ne đabenajiyepe aivʉ mʉjare ne bueimarare. Iye ne bueiye põeva néñecuva mácavʉ ne đarĩ cõmajiyebu. Iye ne bueiye põeva ne majiébu. Aru iye ne bueiyedecabu Cristoi yávaiyede, “Jãve ãmevʉ” aiye. Que baru jãve ãmevʉ aru bojecʉbevʉ iye ne bueiye.

9 Jʉ̃menijicʉvacari cʉbi Cristoque. Ʉ̃i bajurecabe ã́ri Jʉ̃menijicʉ cʉcʉ jã́đovañʉ jãve aipe ãrojacʉre. Que baru maje jã́iyede Cristore, majivʉ aipe ãrojacʉ bajure Jʉ̃menijicʉre. 10 Jʉ̃menijicʉ jãve cʉre đaibi mʉjare mʉje ũmei, mʉje cʉe boje cũinávʉpe Cristoque, ñai jaboteyʉ caivʉ jabovare aru cõjeivʉre máre. Que baru ye jaʉbevʉ mʉjare mʉje ũmei. 11 Yópe ʉ̃mʉva ne buraicõjeiyepe ne cajede, ãrʉrajivʉ ne baju Jʉ̃menijicʉ jinava, nopedeca Cristo đaibi mʉjare Jʉ̃menijicʉ jinare, mʉje cʉe boje ʉ̃́que cũinávʉpe. Ʉbenita ʉ̃ burarĩ ĩni jarʉvabebi mʉje cajede. Quénora đaiyʉbede đaibi mʉjare ãmeina teiyede, mʉje ãmeina teiye đaiyʉe cõjeimara ãmenajiyepe ayʉ.

12 Mʉje jã́đovaiye báquede Jʉ̃menijicʉre ocoque yaivʉ bácavʉpe tedejaquemavʉ mʉja Cristoque, aru ne põe jarʉvainoi epeiye báquepe mʉjare ʉ̃́que, aru Jʉ̃menijicʉi nacovaiye báquepe mʉjare ʉ̃́que máre yainore jarʉvarĩ. Que đacarejaquemavʉ Jʉ̃menijicʉ mʉjare ʉ̃i majié parʉéque mʉje jʉ aiyede ʉ̃́re, “Jãve Jʉ̃menijicʉ nacovarejaquemavʉ Cristore yainore jarʉvarĩ”, mʉje aiyede. 13 Mʉja yaivʉ bácavʉpe mʉje ũme coatede đaimara marejaquémavʉ Jʉ̃menijicʉre jarʉvarĩ, mʉje vainí tʉiye boje aru mʉje đaicõjeiye boje mʉje ãmeina đaiyʉeque. Dinʉmʉre Cristo epebedejaquemavʉ mʉjare cãreja Jʉ̃menijicʉ jinava. Ʉbenita caride Jʉ̃menijicʉ apʉre đaibi mʉjare apʉé mamaeque Cristoque. Que teni ãrʉmeteibi caiye maje ãmeina teiyede. 14 Jʉ̃menijicʉi toivaicõjeiye báque boje ʉ̃i đaicõjeiyede, đaiye jaʉrejaquemavʉ majare. Ʉbenita maje đabe boje diede, bojecʉbe đaiye cʉvarejaquemavʉ Jʉ̃menijicʉque. Maja đabevʉ bácavʉreca iye đaicõjeiyede, ye boropateivʉpe jã́menejaquemavʉ majare Jʉ̃menijicʉ. Quénora Cristoi yaiye báqueque jocʉcʉjaravena jarʉvarejaquemavʉ maje bojecʉbe đaiye báquede ʉ̃́re. 15 Que đayʉ Jʉ̃menijicʉ pʉeno baju vainí tʉrejaquemavʉ caivʉ ina jabovare aru cõjeivʉre ʉ̃i cãchinoi. Náre cʉyoje tede đarĩ, jã́đovaimi parʉcʉre caivʉ apevʉ pʉeno Cristo ʉ̃i đaiyeque. Que đaibi Jʉ̃menijicʉ caivʉ põeva ne jã́iyede.

Ijãravʉque bʉobevʉ Jesúre jʉ aipõeva

(Mt 15.9, 22.44; Ro 6.4-11, 14.1-6; Gá 2.19-20; Ef 1.22, 4.15-16; Fil 1.21; Col 2.21; He 1.3)

16 Que baru jápiarĩ ađabejarã mʉja ácʉ põecʉ ãmeina yávayʉre mʉjare, mʉje ãiye boje aru mʉje ũcuiye boje máre, aru mʉje torojʉve tebe boje ʉ̃́pe ʉ̃i torojʉve teijãravʉare caiʉjʉa coapa, caivʉ aviáva coapa, aru sábadore máre caisumana coapa. 17 Iye javeque đaicõjeiyeque ãiyeda coyʉiyede, aru torojʉve teiyeda coyʉiyede, aru apejĩena coyʉiyede máre Jʉ̃menijicʉ epedejaquemavʉ, buecʉyʉ ñʉjare. Iye đaicõjeiyeque Jʉ̃menijicʉ jã́đovañʉ marejaquémavʉ aipe ʉ̃i đaquiyede yóbore. Cristo cʉcʉyʉrã máre jã́đovañʉ marejaquémavʉ ʉ̃. “Yópe ʉ̃́re vaiquíyebu”, arĩ jã́đovañʉ marejaquémavʉ. Que barĩdurejaquemavʉ iye đaicõjeiye. 18 Aru jápiarĩ ađabejarã mʉja ácʉ põecʉ ãmeina yávayʉre mʉjare, mʉje mearore jíye boje Jʉ̃menijicʉre ʉ̃́pe ãmevʉ. Que teni apecʉ ʉ̃i cãchinocavʉpe tebejarã mʉja. Aru mearore jíbejarã ángelevare máre, yópe ʉ̃i đaiyepe. Ʉ̃́recabe arĩduyʉ ʉbenina “Jãvemu ji coyʉiye, ji jã́iye báque boje apʉcʉ yópe decoboainope”. Ʉbenita jã́memi iyede, ʉ̃i coyʉiye borore. Aru, “¿Meacʉ bárica apevʉ pʉeno?” ʉbenina arĩduibi. Nópe arĩduibi ʉ̃i đaicõjeiye boje ʉ̃i dápiainore ʉ̃i ãmeina đaiyʉeque. 19 Ʉ̃́recabe dajocayʉ bácʉ ʉ̃i cʉede Cristoque cũinávʉpe. Que baru majibebi iye bueiye jãvene Cristoi borore. Cristo maje jabocʉbe. Que baru đaicõjeimi caivʉ ina caiyajuboa põeyajuboacavʉ ʉ̃́re jʉ aivʉre, ne pʉeno baju đare nʉrajiyepe ayʉ yópe Jʉ̃menijicʉi ʉrõpe. Que baru caijãravʉa pʉeno baju majide nʉñama na, ʉ̃́re jʉ aivʉ caivʉ, me cʉrãjivʉ ne ũmei yópe Jʉ̃menijicʉi ʉrõpe.

20 2:20-21 Mʉje cʉe boje Cristoque cũinávʉpe, yaivʉ bácavʉpe paivʉbu ʉ̃́que. Aru jaʉbevʉ ina yaivʉ bácavʉre ne jʉ aiye đaicõjeiyede. Que baru jaʉbevʉ mʉjare mʉje jʉ aiye iye đaicõjeiyede põeva ne majiéque coyʉiyede. Que barureca apevʉre đaicõjeiye jaʉbevʉ mʉjare. Jaʉbevʉ mʉjare cãreja mʉje jʉ aiye põeva ne đaicõjeiyede, yópe ne aiyede: “Jẽmejara apejĩene. Aru ãmejara apejĩene. Aru tʉobejarã apejĩene máre”, ne aiyede. 21 — 22 Quénora iye ijãravʉque cũiquíyede coyʉyama põeva ne đaicõjeiyede coyʉiyeque. Aru diedecabu põevavacari ne đaicõjeiye aru ne bueiye máre. 23 Põeva iye đaicõjeiyede đaivʉ Jʉ̃menijicʉre pueđaivʉpe ãrojariduivʉbu. Aru jã́đovariduivʉbu ne baju apevʉ ne cãchinocavʉre. Ñájine đarĩ ne bajure, Jʉ̃menijicʉre pueđaivʉpe teniduivʉbu na. Iye ne đaiyede yópe ne đaicõjeiyepe majidivʉpe teniduivʉbu. Ʉbenita iye đaicõjeiyede đaivʉvacari, ye dajocabema ne baju ãmeina đaiyʉede. Que baru iye đaicõjeiye ne cʉvae bojecʉbevʉ náre.