Colosenses

3 Mʉjarecabu yópe Jʉ̃menijicʉi nacovaimara mácavʉpe Cristoque yainore jarʉvarĩ. Que baru Cristo jinatamu mʉja. Que baru mʉje ãmeina teiyede mʉje javeque đaiyede dajocarĩ, oatʉvađavʉ̃ mʉja, mearo đarãjivʉ. Oatʉvaimara mácavʉ mʉja, cainʉmʉa ʉre nʉjara yo cavarõ mearo Jʉ̃menijicʉi cʉrõcarõre. No cavarõ mearotamu Cristo ʉ̃i cʉrõ, dobacʉ ʉ̃i dobarõ mearo Jʉ̃menijicʉi meapũravʉ yebai, ʉ̃i parʉé cʉvae boje.

2 3:2-3 Caride mʉja đabevʉ yópe mʉje đaiye báquepe, mʉje yaivʉ bácavʉpe paiye boje Cristoque. Que baru coatede đaimaratamu mʉja mʉje cʉe báquede jarʉvarĩ. Quénora cʉrivʉbu mʉja mʉje ũmei Cristoque cũinávʉpe Jʉ̃menijicʉi jã́inore. Ʉbenita apevʉ põeva jã́mema cãreja iye mʉje jãve cʉede Cristoque. Quénora Jʉ̃menijicʉi yaveimarapebu mʉja caride. Que baru cainʉmʉa dápiare nʉjara yo cavarõ mearo Jʉ̃menijicʉi cʉrõcarõre. Dápiabejarã iye ãmene ijãravʉquede ijãravʉcavʉ ne đaiyede. 3 — 4 Cristorecabe jãve cʉre đayʉ mʉjare mʉje ũmei. Ʉ̃i copaidaquiyede ijãravʉi cojedeca caivʉ ne jã́iyede, mʉja máre cʉrãjaramu ʉ̃́que. Dinʉmʉ maquinóre meara marajáramu mʉja ye jaʉbeda yópe Jʉ̃menijicʉi ʉrõpe.

Aipe đaiye jaʉrõ Jesúre jʉ aipõevare

(Ef 2.3, 10, 4.2, 22, 24, 32, 5.19-20)

5 Coatejarã mʉje baju mʉje ãmeina đaiyʉede jarʉvarĩ. Ãmeina đabejarã apevʉque mʉjemarebʉcʉva ãmevʉque, aru ãmeina đabejarã ʉ̃mʉva nomivaque aru nomiva ʉ̃mʉvaque máre. Caiye iye ãmene đaiyʉbejarã mʉja. Mʉje baju ãmeina daiyʉepe đabejarã mʉja. Ʉbejarã pʉeno baju mʉje cʉvaede. Que đaivʉ baru, đajebu mʉje cʉvaede yópe jʉ̃menijinape. 6 Aru Jʉ̃menijicʉ jorojĩni jã́ri ina ʉ̃́re jápiabevʉre, ñájine đacʉyʉme náre, ãmene ne đaiye boje. 7 Mʉja máre javede ãmenore đarejaquemavʉ napedeca mʉje jápiabede cãreja Jʉ̃menijicʉre. 8 Ʉbenita caride mʉjacapũravʉ dajocajarã caiye ãmene. Que baru jarabejarã apevʉre. Aru jorojĩmejara náre máre. Ãmeina dápiabejarã apevʉre. Aru coyʉbejarã ãmenore caivʉ ne jápiaiyede apevʉi borore. Ãmeina yávabejarã apevʉre ne jápiaiyede máre. 9 Que baru borođabejarã mʉje bajumia. Mʉja aipe ãrojarivʉ bácavʉre mʉje ãmeina đaiyʉeque aru mʉje đare nʉiye báquede ãmenore dajocađavʉ̃ mʉja.

10 Caride mearape ãrojarivʉbu mʉja. Aru caijãravʉa Jʉ̃menijicʉ pʉeno baju meara nʉre đaibi mʉjare, mʉje ãrojarajiyepe ayʉ ʉ̃́pe, ñai mʉjare cʉeđayʉ bácʉpe mamaũmeque, mʉje coreóvarãjiyepe ayʉ ʉ̃́re jãve. 11 Que baru caride ye baju ãmevʉ põecʉ judío o judío ãmecʉ, aru buraicõjeñʉ ʉ̃i cajede o buraicõjemecʉ diede, aru yávayʉ griego ãmicʉricamua yávaicamuare o yávabecʉ diede, aru ĩmarocacʉ o ʉbeni cʉrijĩcʉ, aru apecʉi yebacacʉ o apecʉi yebacacʉ ãmecʉ máre. Quénora Cristorecabe cũinácʉra parʉcʉ caivʉ apevʉ pʉeno cainʉmʉa. Aru caivʉ ʉ̃ jinaque cʉbi ʉ̃.

12 Mʉja Jʉ̃menijicʉ ʉ̃i beoimaramu, ʉ̃ jinatamu, aru ʉ̃i ʉmaramu máre. Que baru yópe paivʉ bájarã mʉja. Cõmaje ãroje jã́jara mʉjevʉre. Aru cađatejarã náre. Dápiabejarã mʉje baju mearape apevʉ pʉeno. Pueđajarã mʉjevʉre meara põevape. Aru napijara náre. 13 Jarabejarã mʉje bajumia. Aru apecʉ mʉjecʉ ʉ̃i ãmeina yávaru o ãmeina đaru mʉjare, ãrʉmetejarã ʉ̃i ãmeina đaiyede. Yópe maje jabocʉ Jesucristo ʉ̃i ãrʉmeteiye báquepe mʉje ãmeina teiyede, mʉja máre ãrʉmetejarã mʉjevʉ ne ãmeina teiyede. 14 Aru parʉébu caiye die pʉeno mʉje ʉe mʉje baju. Mʉje ʉede apevʉre, cʉrãjaramu cũinávʉpe yópe Jʉ̃menijicʉi ʉrõpe. Que baru ʉjarã apevʉre.

15 Cristo cãrijimene đaibi mʉjare. Aru Jʉ̃menijicʉ cuturĩ epeibi mʉjare, mʉje cʉrãjiyepe ayʉ cũinávʉpe cãrijimevʉva. Que baru cãrijimena cʉre nʉjara mʉja. Aru cainʉmʉa torojʉede jíde nʉjara Jʉ̃menijicʉre. 16 Coreóvare nʉjara caiye iye yávaiye méne Cristoi borore. Yópe đajarã mʉje bueiyede aru mʉje coyʉiyede parʉrõreca mʉjevʉre máre ʉre majiéque. Majicajarã aru coyʉjarã parʉrõreca Salmos ãmicʉeque, aru mearore jíjarã Jʉ̃menijicʉre yʉriainoque, aru ʉ̃i Espíritu jino yʉriainoque máre. Que teni yʉriajarã Jʉ̃menijicʉre, torojʉede jínajivʉ ʉ̃́re mʉje ũmeque.

17 Que baru caiye mʉje coyʉiyede aru caiye mʉje đaiyede máre, đajarã yópe ina Jesucristore jʉ aivʉre jaʉépe, ina jẽniaivʉ ʉ̃i parʉéque. Aru cainʉmʉa Cristoi cađateiyeque torojʉede jíjarã majepacʉ Jʉ̃menijicʉre.

Mearo đaiye jaʉrõ cʉ̃ramicavʉque aru memeivʉque máre

(Ef 5.16, 22, 25, 6.1, 4-9, 18-20; Fil 4.6; 1 P 3.1, 7)

18 Mʉja, ʉ̃mʉcʉrivʉ, jʉ ajarã mʉjemarepacʉre ʉ̃i coyʉiyede mʉjare. Jʉ aiye jaʉvʉ mʉjare ʉ̃́re, mʉje cʉe boje maje jabocʉ Cristoque cũinávʉpe. 19 Mʉja, nomicʉrivʉ, jecʉjarã mʉjemarepacore. Jarabejarã ṍre.

20 Mʉja, jʉeđova, cainʉmʉa jʉ ajarã me mʉjebʉcʉvare ne coyʉiyede mʉjare. Jʉ̃menijicʉ torojʉrĩ jã́imi mʉje jʉ aiyede náre. 21 Mʉja, nébʉcʉva, jorojĩne đabejarã mʉjemarare, ne chĩomenajiyepe aivʉ.

22 Mʉja, memecaivʉ, cainʉmʉa jʉ ajarã me mʉje jabova ijãravʉcavʉre ne coyʉiyede mʉjare. Cainʉmʉa jʉ ajarã náre me mʉje ũmeque. Jʉ aivʉ ãmejara náre quénora ne jã́iyede mʉjare, “Mearo đaivʉbu” ne arãjiyepe aivʉ mʉjare. Jʉ ajarã náre, mʉje pueđaiye boje maje jabocʉ Cristore. 23 Torojʉrivʉ memecajarã mʉja. Yópe mʉje põevare memecajʉroepe ãmevʉ. Quénora yópe maje jabocʉ Cristore mʉje memecajʉroepe đajarã mʉja. 24 Cristorecabe mʉje jabocʉ jãve. Ʉ̃́recabe mʉje memecaimʉ jãve. Que baru coreóvaivʉbu mʉja maje jabocʉvacari Cristo bojeđacʉyʉre mʉjare yópe Jʉ̃menijicʉi aiye báquepedeca, ʉ̃i mearo đacaquiyede mʉjare. 25 Ʉbenita ácʉ mʉjacacʉ ʉ̃i ãmeina đare nʉru, Jʉ̃menijicʉ, jã́ñʉ caivʉ põevare cũinátʉrʉra, ñájine đacʉyʉme ʉ̃́re ʉ̃i ãmeina đaiye báquepedeca. Que teni Jʉ̃menijicʉrecabe bojeđayʉ caivʉ põevare yópe ne đaiye báquepedeca.