Hechos

8 Aru ñai Saulo torojʉrejameđa ne boarĩ́ jarʉvaiyede Esteban mácʉre.

Saulo ʉ̃i ñájine đaino Jesúre jʉ aipõevare

(Hch 2.2, 4-5, 26.9-11)

Dijãravʉmareca Jesúre jʉ aipõeva Jerusalén ãmicʉriĩmaroi cʉrivʉ ñájini bʉ́rejaimađa pare, náre apevʉ ne ãmeina đaiye boje. Caivʉ ina Jesúre jʉ aipõevare dupini nʉre đarejaimađa caino Judea ãmicʉrijoborõi, aru caino Samaria ãmicʉrijoborõi máre. Ʉbenita Jesús ʉ̃i yávaiye méne beorĩ coyʉicõjeimara dupini nʉmenejaimađa. 2 Apevʉ ʉ̃mʉva, Jʉ̃menijicʉre ʉrivʉ, nʉvarejaimađa Esteban mácʉi baju bácarõre, jarʉvarãjivʉ ʉ̃ mácʉre cʉ̃racobei. Ʉrarõ chĩoivʉ cođoboborĩ bʉjiéque orejaimađa ʉ̃ mácʉre. 3 Ʉbenita Saulocapũravʉ bíjaroiyʉrejameđa caivʉ Jesúre jʉ aipõevare. Que baru nʉñʉ cʉ̃ramia coapa, ina jʉ aipõevare jẽni jabʉborĩ bʉoicõjeñʉ marejámeđa ãmeina teivʉre jẽni jacoiñami jívʉi. Ʉ̃mʉvare aru nomivare máre ñájine đarejameđa ñai Saulo.

Felipe Samariai ʉ̃i coyʉino Jesús ʉ̃i yávaiye méne

4 Ina Jesúre jʉ aipõeva dupini nʉivʉ Jerusalén ãmicʉriĩmarore jocarĩ, Jesús ʉ̃i yávaiye méne coyʉrãnʉrejaimađa caino joborõi. 5 Cũinácʉ nácacʉ, Felipe ãmicʉcʉ, nʉrejameđa Samaria ãmicʉriĩmaroi. Aru coyʉyʉ barejámeđa Jesús ʉ̃i yávaiye méne nócavʉre. 6 Obedivʉ põeva ʉ̃i coyʉiyede jápiaivʉ aru ʉ̃i đaiyede põeva ne đarĩ majibede jã́ivʉ, me jápiarejaimađa ʉ̃́re. 7 Felipe etaicõjenejameđa abujuvare obedivʉ põevare jocarĩ. Cođoboborĩ etarejaimađa na. Aru meađarejameđa obedivʉ nacajaiye majibevʉre, cuiye majibevʉre máre. 8 Que baru obedivʉ Samaria ãmicʉriĩmarocavʉ pare torojʉrivʉ barejáimađa na.

9 Ʉbenita diĩmaroi cũinácʉ ʉ̃mʉ cʉrejameđa, ʉ̃i ãmiá Simón. Joe baju cʉcʉ bácʉ noi, yaviéde đayʉ barejámeđa ʉ̃. Caivʉ nócavʉ cuecumarejaimađa ʉ̃i yaviéde. “Parʉcʉbu yʉ”, arejameđa ʉ̃. 10 Que baru caivʉ diĩmarocavʉ, jabova aru apevʉ máre, me jápiarejaimađa ʉ̃i coyʉiyede. “Ñai Simón parʉcʉbe apevʉ pʉeno. Jʉ̃menijicʉi parʉéde cʉvabi ʉ̃. Ʉ̃́recabe Jʉ̃menijicʉ baju”, arejaimađa caivʉ.

11 Joe baju Simón pare cuavarejameđa ina põevare. Que baru me jápiarejaimađa caiye ʉ̃i coyʉiyede. 12 Ʉbenita ina põeva ne jʉ aiyede Felipei coyʉiyede, jápiaivʉ bácavʉ iye yávaiye méne Jʉ̃menijicʉi jaboteinore aru Jesúre, Jʉ̃menijicʉi epeimʉ mácʉre máre, jã́đovarejaimađa Jʉ̃menijicʉre ocoque, ʉ̃mʉva aru nomiva máre. 13 Simón máre jʉ arejameđa Jesúre. Aru jã́đovarejameđa Jʉ̃menijicʉre ocoque. Ʉ̃i jã́đovariburu yóboi, Simón yóvarejameđa Felipede. Ʉ̃́vacari cuecumarejameđa ʉ̃ jã́ñʉ mácʉ caiye iye Felipe ʉ̃i đaiyede põeva ne jã́mene aru ne đarĩ majibede.

14 Aru Jesús ʉ̃i yávaiye méne beorĩ coyʉicõjeimara Jerusalén ãmicʉriĩmaroi cʉrivʉ, jápiarejaimađa ina Samariacavʉre ne jʉ aiyede Jʉ̃menijicʉi yávaiye méne. Que baru jarorejaimađa Pedrore aru Jũare máre Samaria ãmicʉriĩmaroi. 15 Nore Pedrojã earĩ, jẽniacarejaimađa Jʉ̃menijicʉre, ʉ̃i daroquiyepe aivʉ Espíritu Santore ina põeva mamarʉmʉ jʉ aivʉre Jesúre dijãravʉare. 16 Jave jã́đovarejaimađa Jʉ̃menijicʉre ocoque Jesúi ãmiái. Ʉbenita ñai Espíritu Santore cʉvabedejaimađa na cãreja. 17 Ne jẽniariburu yóboi, Pedro aru Juan máre tʉorejaimađa ne pʉrʉáque náre coapa ne jipobʉrã. Que teni caivʉ ina cʉvarejaimađa ñai Espíritu Santore.

18 Aru Simón jã́rejameđa Pedrojã ne tʉoiyede Jʉ̃menijicʉ daroyʉre Espíritu Santo põevare. Que baru jíyʉrejameđa tãutʉrare Pedrojãre, cʉvaiyʉcʉ Jʉ̃menijicʉi majiéde nápe.

19 —Jíjarã yʉre máre iye Jʉ̃menijicʉi majiéde. Yʉ máre jíyʉvʉ Espíritu Santore ina ji tʉoimarare ji pʉrʉáque, Simón arejameđa Pedrojãre.

20 Ʉbenita Pedrocapũravʉ jarayʉ arejameđa ʉ̃́re:

—Yʉ ʉvʉ Jʉ̃menijicʉi ñájine đaquiyepe mʉre mi tãutʉraque toabo cũiméboi, mi dápiaiye boje bojeđainore ʉ̃́re iye majiéde Espíritu Santo jíyede põevare. 21 Mʉ Jʉ̃menijicʉi jã́inore ãmecʉ bajutamu mʉ mi ũme. Que baru mʉ jãve ñʉjacacʉ ãmevʉ. Ñʉje memeinore đabevʉ mʉ. 22 Caride chĩoñʉ oatʉvajacʉ mʉ mi đaiyede. Dajocajacʉ mi ãmeina dápiainore. Aru jẽniajacʉ Jʉ̃menijicʉque, ʉ̃i ãrʉmetequiyepe mi nópe dápiainore. 23 Jã́ivʉ yʉ mʉre pare jorojĩñʉre. Aru bʉoimʉpe páyʉbu mʉ, mi ãmeina teiye boje, arejameđa Pedro ʉ̃́re.

24 Nópe ayʉre, Simón jʉ arejameđa:

—Jẽniaivʉ mʉjare. Jẽniacajarã yʉre Jʉ̃menijicʉque, vaibéquiyepe yópe mi coyʉiyepe, arĩ jẽniarejameđa Simón.

25 No yóboi Pedro aru Juan, Jesúre coreóvaivʉ, coyʉrejaimađa caivʉ ina põevare Jʉ̃menijicʉi yávaiye méne. Coyʉrĩ bʉojarĩ, etarejaimađa diĩmarore jocarĩ, copainʉrajivʉ Jerusalén ãmicʉriĩmaroi. Aru mái nʉri coyʉrejaimađa Jʉ̃menijicʉi yávaiye méne obedivʉ ĩmaroacavʉre Samaria ãmicʉrijoborõi.

Felipe ʉ̃i bueino Etiopíacacʉre

26 Dinʉmʉ Jʉ̃menijicʉi daroimʉ, cũinácʉ ángele, nʉicõjenejameđa Felipede.

—Caride aviá daino cãcopũravʉ nʉjacʉ, Jerusalén ãmicʉriĩmaro yebai nʉimai nʉjacʉ, Gaza ãmicʉriĩmaroi nʉimai, arejameđa.

Caride põeva cʉbema dimare. 27 Jʉ arĩ, Felipe nʉrejameđa. Dinʉmʉ dimai cũinácʉ ʉ̃mʉ eunuco, Etiopía ãmicʉrijoborõcacʉ, copainʉñʉ marejámeđa Jerusalén ãmicʉriĩmarore jocarĩ ʉ̃i joborõi. Ñai ʉ̃mʉ jabocʉ parʉcʉ barejámeđa. Ʉ̃i joborõ jabocoi tãutʉrare coreipõecʉ barejámeđa. Aru ico jabocore põeva arejaimađa Candace. Ñai ʉ̃mʉ copainʉñʉ marejámeđa ʉ̃, torojʉede jíyʉ bácʉ Jʉ̃menijicʉre Jerusalén ãmicʉriĩmaroi. 28 Jãturuicũi dobacʉ nʉñʉ caballovaque, aru ʉ̃i nʉiyedeca Jʉ̃menijicʉi yávaiyede jã́ri boroteyʉ barejámeđa. Ñai Jʉ̃menijicʉi yávaiyede coyʉcaipõecʉ bácʉ, ʉ̃i ãmiá Isaías, ʉ̃i toivaiye báque barejávʉ̃ya ʉ̃i jã́iye. 29 Aru Felipei jã́iyede ñai ʉ̃mʉre, Espíritu Santo arejameđa ʉ̃́re:

—Jãturuicũ yebai nʉjacʉ mʉ. Mautejacʉ mʉ ñai ʉ̃mʉque, arejameđa.

30 Jʉ arĩ, cúyarĩ, ʉ̃i yebai earĩ, Felipe jápiarejameđa ʉ̃i jã́ri boroteiyede Isaías bácʉi toivaiye báquede. Que teni Felipe jẽniari jã́rejameđa ʉ̃́re:

—¿Dápiarĩ eayʉrʉ̃ mʉ aipe aiyʉrõre yo mi jã́ri boroteinore? arejameđa Felipe.

31 Aru ñai Etiopíacacʉ arejameđa Felipede:

—Bi, dápiarĩ eabevʉ yʉ yo ji jã́ri boroteinore. Põecʉ majicʉ jaʉbi yʉre, majicacʉyʉ aipe aiyʉrõre yo ji jã́ri boroteinore. Jatujacʉ. Dobajacʉ ji yebai. Majicajacʉ yʉre yore, arejameđa ñai ʉ̃mʉ Felipede.

32 Iye toivaiye báquede jã́ri boroteyʉ barejámeđa yópe:

Nʉvarajarama ʉ̃́re boarĩ́ jarʉvarãjivʉ, yópe ne nʉvaiyepe ovejare boarĩ́ jarʉvainoi. Aru bi acʉyʉme ʉ̃, yópe ovejajĩcʉ obepe ʉ̃i pođare buraiyedeca. Abecʉyʉme ʉ̃. 33 Cʉyoje tede đarãjarama ʉ̃́re. Aru yávarĩ cađateipõecʉ cʉbecʉyʉme. Que baru ãmeno đarãjarama ʉ̃́re. Cũiquíyebu ijãravʉre ʉ̃i cʉrõ. Que baru ʉ̃i pãramena majʉrórivʉ cʉbenajarama. Aru na majʉrórivʉre coyʉbenajarama ne borore, jã́ri borotedejameđa ñai Etiopíacacʉ.

34 Aru jẽniari jã́rejameđa Felipede:

—Coyʉjacʉ yʉre. ¿Ñamene Jʉ̃menijicʉi yávaiyede coyʉcarejaquemari iyede? ¿Coyʉrejaquemari ʉ̃i baju o apecʉre? arejameđa.

35 Jʉ arĩ ʉ̃́re, iye toivaiye báqueque bʉ́rĩ, Felipe coyʉrejameđa ʉ̃́re caiye iye Jesús ʉ̃i yávaiye méne. 36 Ne nʉiyedeca mái earejaimađa oco cʉrijitabʉre. Aru ñai jabocʉ arejameđa Felipede:

—Jã́jacʉ. Yuibu oco cʉrijitabʉ. ¿Ji jã́đovaiyʉede Jʉ̃menijicʉre ocoque, apecʉ jã́đovaicõjemecʉ bʉojaidi yʉre? arejameđa.

37 Felipe arejameđa ʉ̃́re:

—Mʉ jʉ ayʉ baru Jesúre, jã́đovari bʉojaivʉ mʉ Jʉ̃menijicʉre ocoque, arejameđa.

Ñai jabocʉ, yópe arĩ, jʉ arejameđa ʉ̃́re:

—Yʉ jʉ ayʉbu Jesúre. Majivʉ yʉ ʉ̃́re Jʉ̃menijicʉi mácʉre, Jʉ̃menijicʉi daroimʉ mácʉre, arejameđa ñai jabocʉ.

38 Que arĩ, nʉicõjemenejameđa caballovare, icũ jãturuicũ mautequiyepe ayʉ. Aru ina pʉcarã, Felipe ʉ̃́maque, etarĩ dicũre jocarĩ, ẽmeni oco cʉrijitabʉi, Felipe jã́đovarejameđa ʉ̃́re Jʉ̃menijicʉque noi. 39 Aru ne maiyede oco cʉrijitabʉre jocarĩ, cũiná Jʉ̃menijicʉi Espíritu nʉvarejameđa Felipede. Ñai jabocʉ jã́menejameđa ʉ̃́re cojedeca. Ʉbenita torojʉcʉ mái nʉrejameđa bedióva. 40 Felipecapũravʉ járorejameđa Azoto ãmicʉriĩmaroi. Etarĩ nore jocarĩ, mái nʉre nʉñʉ Cesarea ãmicʉriĩmaroi coyʉrejameđa iye Jesús ʉ̃i yávaiye méne cainoa ĩmaroai dimai pʉ eayʉta Cesarea ãmicʉriĩmaroi.