Hechos

Siete paivʉ cađateipõevare ne beoino

6 No yóboi, apevʉ obedivʉ Jesúre jʉ aipõeva jararĩ jũjuvaivʉ barejáimađa ne bajumia. Nácavʉ griego ãmicʉricamuare yávaivʉ aru apevʉ nácavʉ hebreo ãmicʉricamuare yávaivʉ jaraivʉ barejáimađa ne baju. Ina judíova griegore yávaivʉ arejaimađa:

—Ñʉjacavʉ nomiópeva jacopʉbema mʉje coavaiyede jãravʉa coapa. Que baru, “Mʉja coapavabevʉ”, chĩoivʉ arejaimađa.

2 Que baru ina doce paivʉ Jesús ʉ̃i yávaiye méne beorĩ coyʉicõjeimara órejarĩ caivʉ ina Jesúre jʉ aipõevare ne yebai arejaimađa:

—Ñʉje dajocaru Jʉ̃menijicʉi yávaiye méne coyʉiyede, jínajivʉ nomiópevare aru apevʉ cõmaje ãrojarivʉre máre náre jaʉéde, meamejebu no. 3 Que baru mʉja, ñʉjevʉ, beojarã siete paivʉ mʉjacavʉre. Yópe bajarã́ri na: Põeva ne pueđaimara, Espíritu Santo ʉ̃i đaicõjeimara, aru majiéde cʉvarivʉ bajarã́ri. Ñʉja náre coapavaicõjenajivʉbu cõmaje ãrojarivʉre. 4 Que teni ñʉjacapũravʉ cũinátʉrʉ ñʉje ũme jẽniarajivʉbu Jʉ̃menijicʉque aru coyʉrãjivʉbu ʉ̃i yávaiye méne, arejaimađa na, Pedrojã.

5 Ne coyʉiye cojʉrejavʉ̃ya caivʉ ina Jesúre jʉ aipõevare. Que baru beorejaimađa Estebãre. Ʉ̃ parʉrõreca jʉ ayʉ barejámeđa Jesúre. Aru ñai Espíritu Santo đaicõjenejameđa ʉ̃́re. Beorejaimađa apevʉre máre: Felipede, Prócorore, Nicanore, Timóre, Parmenare, aru Nicoláre máre. Ñai Nicolás Antioquía ãmicʉriĩmarocacʉ barejámeđa. Ʉ̃ judío ãmenejameđa. Ʉbenita jipocamia jʉ arejameđa ina judíova ne bueiyede. 6 Náre beorĩ bʉojarĩ, nʉvarejaimađa náre Jesús ʉ̃i yávaiye méne coyʉicõjeimara yebai, ne jẽniacarãjiyepe aivʉ náre Jʉ̃menijicʉque, tʉorĩ pʉrʉáque ne jipobʉrã náre coapa yópe judíova ne đarĩ cõmajiyepe, jã́đovarajivʉ ne memeino bʉiyede.

7 Aru apevʉ põeva obedivʉ Jʉ̃menijicʉi yávaiye méne coyʉiyede jápiarĩ, jʉ arejaimađa diede. Caijãravʉa apevʉ ne jʉ aiyede pʉeno baju obedivʉ jʉ aivʉ nʉrejaimađa Jerusalén ãmicʉriĩmaroi. Aru apevʉ ina sacerdoteva máre jʉ arejaimađa Jesús ʉ̃i yávaiye méne.

Estebãre apevʉ ne jẽino

8 Esteban Jʉ̃menijicʉi mearo đacaimʉ marejámeđa. Jʉ̃menijicʉ me jã́rejaquemavʉ ʉ̃́re. Que baru parʉre đarejaquemavʉ ʉ̃́re. Aru majide đarejaquemavʉ ʉ̃́re máre. Esteban đare cuyʉ barejámeđa ʉrarõ põeva ne jã́mene, ne đarĩ majibede máre, põeva jẽneboi. 9 Ʉbenita apevʉ ʉ̃mʉva maucʉvarejaimađa ʉ̃́re. Ina cũináđami judíovai cójijiñamicavʉ barejáimađa na. Ina Estebãi mauva marejáimađa Cirene aru Alejandría ãmicʉriĩmaroacavʉ, aru apevʉ Cilicia aru Asia ãmicʉrijoborõacavʉ máre. Caivʉ ina judíova barejáimađa na. Esteban yebai nʉri, jaraivʉ yávarĩ bʉ́rejaimađa na ʉ̃́que. 10 Ʉbenita Esteban yávarejameđa ʉrarõ majiéque, ñai Espíritu Santoi parʉéde ʉ̃i cʉvae boje. Que baru ina ʉ̃i mauva jʉ arĩ majibedejaimađa na ʉ̃́re. 11 Que baru Estebãi mauva bojeđarejaimađa apevʉ borocʉrivʉre. Aru ina borocʉrivʉ arejaimađa yópe:

—Esteban ãmeina yávabi Moisés bácʉre aru Jʉ̃menijicʉre máre. Jápiaivʉbu ñʉja, ʉbenina arejaimađa.

12 Yópe đarĩ jorovarejaimađa obedivʉ põevare, judíova bʉcʉvare aru Jʉ̃menijicʉi yávaiyede coyʉipõevare máre. Ina Esteban yebai nʉri, ʉ̃́re jẽni, japʉporejaimađa judíovai cójijiñami. 13 Dinʉmʉ davarejaimađa apevʉ borocʉrivʉre. Aru borocʉrĩ arejaimađa na:

—Ñai ʉ̃mʉ cainʉmʉa ãmeina ávaibi Jʉ̃menijicʉi cʉ̃ramine aru Jʉ̃menijicʉi đaicõjeiyede ʉ̃i coyʉiye báquede Moisés bácʉre máre. 14 Ñʉjavacari jápiaivʉbu ʉ̃ ayʉre yópe ãñʉ Jesús Nazarecacʉi borore: “Jesús jarʉvacʉyʉme diñami Jʉ̃menijicʉi cʉ̃ramine aru oatʉvacʉyʉme caiye maje đarĩ cõmajiyede yópe Jʉ̃menijicʉi đaicõjeiyede ʉ̃i coyʉiye báquepe Moisés bácʉre”. Que abi ñai Esteban, ina borocʉrivʉ arejaimađa cójijinocavʉre.

15 Aru caivʉ nore cʉrivʉ me cocorĩ Estebãre jã́rejaimađa ʉ̃i jivare yópe ángelei jivape ãrojarore.