Gálatas

4 Yópe coyʉquijivʉ mʉjare cojedeca maje cʉede Jesucristoque ʉ̃ jinava, đaicõjeimara ãmevʉ. Mamacʉ, bʉcʉrĩburu yóboi, cʉvacʉyʉme jípacʉ jiede. Ʉbenita jʉeđocʉ cãreja, jabocʉ bacʉyʉ́vacari, yebacacʉpe páyʉ apevʉi cõjeimʉme ʉ̃. 2 Jʉeđocʉ cãreja, apevʉ jã́ri coreivʉbu ʉ̃́re aru ʉ̃ jie baquiyéde máre pʉ ãnijãravʉ, jípacʉi beoijãravʉ baquinóita, ne dajocarãjiyepe aivʉ ne jã́ri coreiyede ʉ̃́re aru ʉ̃i cʉvaede máre. 3 Nopedeca vaidéjaquemavʉ majare máre maje majibede cãreja Jʉ̃menijicʉi yávaiye méne. Yópe jʉeđova ne cõjeimarape, maja máre yebacavʉ barejaquémavʉ, iye đaicõjeiyeque, majeñecuva ne đarĩ cõmajiye báqueque.

4 Ʉbenita majare nápe paivʉ bácavʉre ãnijãravʉ, Jʉ̃menijicʉi beoijãravʉ bácarõi, Jʉ̃menijicʉ darorejaquemavʉ mamacʉre ijãravʉita. Ʉ̃ máre caivʉ apevʉ põevape, cʉvarejaquemavʉ jípacore. Aru põetedejaquemavʉ judíovacacʉ. Que baru jʉ arĩ Jʉ̃menijicʉi đaicõjeiyede ʉ̃i coyʉiye báquede Moisés bácʉre cʉrejaquemavʉ ʉ̃, mamacʉ. 5 Ʉ̃i daiye boje Jʉ̃menijicʉi đaicõjeimʉpe páyʉvacari, bojeđayʉ bʉojarejaquemavʉ ina đaicõjeimara mácavʉre iye đaicõjeiyeque, ne ñájimenajiyepe ayʉ ne vainí tʉiye báque boje diede. Aru ʉ̃i nópe đaiye báque boje, bʉojaibi cʉre đayʉ majare Jʉ̃menijicʉi márape. 6 Mʉje Jʉ̃menijicʉi mára teiye boje, ʉ̃ daroibi mamacʉi Espíritu Santore, ʉ̃i cʉquiyepe ayʉ mʉje ũmei, jã́đovacʉyʉ jãve Jʉ̃menijicʉi márare mʉja. Aru ñai Espíritu Santo “mʉ, jipacʉ”, arĩ jẽniari bʉojare đaibi caivʉ majare Jʉ̃menijicʉque. 7 Jʉ̃menijicʉi nópe đaiye boje, caride yebacavʉpe, apevʉi đaicõjeimarape paivʉ ãmevʉ mʉja. Quénora Jʉ̃menijicʉi máramu mʉja, ʉ̃i jãve mearo đacaiye boje mʉjare yópe ʉ̃i aiye báquepedeca. Caiye iye ʉ̃i cʉvaede ʉ̃i jíquiyede ʉ̃i márare jícʉyʉme mʉjare.

Pablo ʉ̃i dápiaino aipe nʉquinore Galaciacavʉre

(Hch 16.6; Ro 8.29; 2 Co 3.18; Fil 3.10; Col 2.8, 20)

8 Javede mʉje coreóvabede cãreja Jʉ̃menijicʉre, ijãravʉre cõjeivʉ ne yebacavʉpe paivʉ barejaquémavʉ mʉja. “Jʉ̃menijinamu na”, arĩ dápiarĩduivʉ barejaquémavʉ mʉja. Ʉbenita ye jʉ̃menijina ãmema na. Ñai Jʉ̃menijicʉ cũinácʉra, caiyede cʉeđayʉ bácʉre coreóvabeni mearore jíbedejaquemavʉ mʉja. 9 Ʉbenita caride mʉja coreóvaivʉbu Jʉ̃menijicʉre, ʉ̃i coreóvaiye báque boje mʉjare mamarʉmʉre. Que baru, ¿aipe teni dajocaiyʉrivʉrʉ̃ mʉja mʉje cʉede jocarĩ Jesucristoque cũinávʉpe, yebacavʉpe tenajivʉ bedióva cojedeca iye đaicõjeiyeque, majeñecuva mácavʉ ne đarĩ cõmajiye báqueque? Iye đaicõjeiye parʉbetamu. Que baru mʉja ye cađatebemaramu iye đaicõjeiyeque. Aru cʉre đabejarã mʉje baju yebacavʉpe cojedeca mʉje đarĩ bʉiyeque yópe judíovape. 10 Mʉja dápiarĩduivʉbu mʉje đaiyede judíovape, Jʉ̃menijicʉi mearo đacaquiyepe aivʉ mʉjare. Que baru torojʉve teivʉbu yópe judíovape apejãravʉai, apevʉ aviávai, aru apeʉjʉai máre. 11 Mʉje que đaiye boje chĩoivʉ yʉ mʉjare. Que baru, “¿Ye bojecʉbedi ji bueiye báque náre?” arĩ dápiaivʉ yʉ.

12 Mʉja, jívʉ, parʉrõreca jẽniaivʉ mʉjare, mʉje đarãjiyepe ayʉ yópe ji đaiyepe. Yʉ judíovacari, đabevʉ yópe Jʉ̃menijicʉi đaicõjeiyede Moisés bácʉi toivaiye báquepe. Que baru yʉ máre đaivʉ yópe mʉje đaiyepe. Mʉjape teyʉbu yʉ. Diede dajocarejacacʉ yʉ. Ãmeno đabeteavʉ̃ mʉja yʉre. Quénora mearo đávʉ̃ mʉja yʉre. 13 Coreóvaivʉbu mʉja yʉre ijimʉ mácʉre. Aru ji ijeteiye boje mamarʉmʉre coyʉcʉnʉcacʉ Jesús ʉ̃i yávaiye méne mʉje yebai. 14 Aru yʉre ijié báque boje, copʉ etaiyʉbejebu mʉja yʉre. Ʉbenita ãmeina jã́mevʉva jarʉvabeteavʉ̃ yʉre. Quénora me copʉ etavʉ̃ yʉre yópe mʉje copʉ etajʉroepe cũinácʉ ángele, Jʉ̃menijicʉi daroimʉre, aru yópe mʉje copʉ etajʉroepe Jesucristore máre. 15 Mamarʉmʉ ji bueiyede mʉjare Jesús ʉ̃i yávaiye méne, torojʉrivʉ bateávʉ̃ mʉja. ¿Aipe teni torojʉbevʉrʉ̃ mʉja caride? Yʉ́vacari majivʉ aipe mʉje đaiyede dinʉmʉre. Caijĩene đajebu mʉja, cađatenajivʉ yʉre, ĩ́vʉ mʉje yacorʉare, jínajivʉ yʉre. 16 Ʉbenita caride jã́ivʉbu mʉja yʉre yópe mʉje maucʉpe, ji coyʉiye boje yávaiyede jãvene mʉjare.

17 Apevʉ, ina bueivʉ ape yávaiyede, torojʉre đaiyʉrivʉbu mʉjare, mʉje me pueđarãjiyepe aivʉ náre. Ʉbenita ne đaiyʉrĩduiye meamejebu mʉjare. Maucʉvare đarĩduivʉbu mʉjare yʉ́que, mʉje jʉ arãjiyepe aivʉ ne bueiyede. 18 Põeva ne cađateiyʉe apevʉre mému cainʉmʉa, ne cađatedu náre ne baju dápiaino mearoque. Ʉbenita meamevʉ ne cađateiye mʉjare ji cʉede mʉjaque ʉbenita ne cađatebe mʉjare ji cʉbede mʉjaque. Que baru cađatejarãri mʉjare ne dápiaino mearoque cainʉmʉa, ji cʉede aru ji cʉbede máre. 19 Mʉja, jímajinape paivʉ, bedióva cojedeca ñájivʉ yʉ mʉjare boje yópe ico jʉeđocʉvacođo õi ñájiyepe. Ñájivʉ yʉ, jã́cʉyʉ mʉjare Cristope ãrojarivʉre. 20 Pare cãrijivʉ yʉ mʉjare boje. “¿Aipe đarĩ Galaciacavʉre cađateje bárica yʉ?” arĩ dápiavʉ yʉ. Que baru cʉiyʉrĩduivʉ yʉ mʉjaque caride, oatʉvacʉyʉ ji coyʉiyede mʉjare.

Pablo ʉ̃i jẽvari coyʉino đaicõjeiyede đarĩduivʉ ne đaiyena aru Jʉ̃menijicʉi mára ne đaiyena máre pʉcarã nomiva ne cʉe báqueque

21 ¿Caivʉ mʉja đaiyʉrĩduivʉ yópe Jʉ̃menijicʉi đaicõjeiyede Moisés bácʉi toivaiye báquepe, jápiarĩ eabenarʉ mʉja iye đaicõjeiyede? Jãve jápiarĩ eabevʉ mʉja diede. 22 Jápiajarã caride Moisés bácʉi toivaiye báquede Abraham mácʉi borore. Abraham mácʉ ina pʉcarã mamarʉmʉ põeteivʉ bácavʉre cʉvarejaquemavʉ pʉcarõmiva nomivaque. Cũinácʉ Abraham mácʉi márepacoi yebacacoi mácʉ barejaquémavʉ. Aru apecʉ Abraham mácʉi márepaco bajui mácʉ barejaquémavʉ. 23 Ñai yebacacoi mácʉre jʉeđocʉvarejaquemavʉ yópe caivʉ apevʉ põevape. Que baru jíbʉcʉ põetedejaquemavʉ yópe caivʉ apevʉ jʉeđovape. Ʉbenita ñai jímarepaco bajui mácʉre jʉeđocʉvarejaquemavʉ Jʉ̃menijicʉi coyʉiye báque boje cʉvarãjivʉre mamacʉre. Que baru ĩmacʉ põetedejaquemavʉ Jʉ̃menijicʉi põeva ne đarĩ majibede đaiyeque, jípacoi pare bʉcʉco bae boje.

24 Maje coreóvaiye Agar bácoi borore aru Sara bácoi borore máre jã́đovaivʉ majare ape yávaiyede jãvene. Yópe vaiye báquepedeca ina pʉcarõmiva nomivare, vaivʉ põevare ne voiyede Jʉ̃menijicʉi me jã́quiyepe aivʉ náre. Apevʉ đaiyʉrivʉbu yópe Jʉ̃menijicʉi đaicõjeiyepe ʉ̃i coyʉiye báquede Moisés bácʉre, Jʉ̃menijicʉi me jã́quiyepe arĩduivʉ náre. Aru apevʉ jʉ aivʉbu “Yópe mearo đacacʉyʉmu mʉjare”, Jʉ̃menijicʉi aiye báquede, ʉ̃i me jã́quiyepe aivʉ náre. Ico yebacaco Agar ãmicʉrejaquemavʉ. Aru õ máco jã́đovaimico majare ne đaiyede, ina voivʉre Jʉ̃menijicʉi me jã́quiyepe arĩduivʉ ne đaiye boje. Nápe paivʉbu caivʉ đaiyʉrivʉ yópe Jʉ̃menijicʉi đaicõjeiyede Moisés bácʉi toivaiye báquepe Sinaí ãmicʉricũ cʉ̃racũi. Que baru yebacavʉpe paivʉbu na, ʉ̃́pe Agar bácoi mácʉpe. 25 Aru Agar báco jã́đovaimico majare pʉcarõa cʉrõare, Sinaí ãmicʉricũ cʉ̃racũre, Arabia ãmicʉrijoborõcacũre, aru Jerusalén ãmicʉriĩmarore ijãravʉcarõre, judíovai ĩmaro ʉrarõre. Aru ina judíova đarĩduivʉbu yópe Jʉ̃menijicʉi đaicõjeiyepe. Que baru Agar báco népacope páđobe aru õpedeca yebacavʉpe paivʉbu na. 26 Ʉbenita Sara báco jã́đovaimico majare apeno ĩmaro Jerusalén ãmicʉriĩmarore, cavarõ mearo Jʉ̃menijicʉi cʉrõre, Jʉ̃menijicʉre jʉ aivʉ ne ĩmaro mearore. Aru maja jʉ aivʉbu Jʉ̃menijicʉre. Que baru Sara báco majepacope páđobe aru õpedeca yebacavʉpe paivʉ ãmevʉtamu maja. 27 Que baru Jʉ̃menijicʉi mára, caivʉ Jesucristore jʉ aivʉ, obedivʉ barãjáramu maja. Ʉbenita ina đarĩduivʉ yópe Jʉ̃menijicʉi đaicõjeiyepe ʉ̃i coyʉiye báquede Moisés bácʉre, obebejĩna marajárama na. Nópe arĩ Jʉ̃menijicʉ toivaicõjenejaquemavʉ ʉ̃i yávaiyede:

Mʉ, jʉeđocʉvabeco, torojʉjaco mʉ mi ũmei. Mʉ, ñájimeco cãreja jʉeđocʉvaede, cođobobojaco mʉ mi torojʉe boje. Que baru ico nomió jímarepacʉi jarʉvaimo máco, ʉ̃mʉcʉcođome cojedeca. Que baru mamara cʉvacođome ico ʉ̃mʉcʉco pʉeno, arĩ toivaicõjenejaquemavʉ Jʉ̃menijicʉ.

28 Aru mʉja, jívʉ, yópe Abraham mácʉi mácʉ Isaac bácʉi põeteiye báquepe Jʉ̃menijicʉ “Yópe baquiyébu” ʉ̃i aiye báquepe, nopedeca mʉjamu Jʉ̃menijicʉi mára yópe ʉ̃i aiye báque boje. 29 Javede Abraham mácʉi mácʉ mamarʉmʉ põeteyʉ bácʉ, Agar bácoi mácʉ, ñai ne jʉeđocʉvamʉ mácʉ yópe caivʉ apevʉ põeva ne jʉeđocʉvaepe, ñájine đayʉ barejaquémavʉ ĩmacʉ bácʉre, Sara bácoi mácʉre, ñai ne jʉeđocʉvamʉ mácʉre Jʉ̃menijicʉi Espíritu Santoi parʉre đaiyeque ʉ̃i bʉcʉva bácavʉre. Aru quédecabu caride máre. Ina đare đaicõjeiyʉrĩduivʉ yópe Jʉ̃menijicʉi đaicõjeiyepe ñájine đaivʉbu majare máre. 30 Ʉbenita yópe arĩ, toivaicõjenejaquemavʉ Jʉ̃menijicʉ ʉ̃i yávaiyede: “Ico yebacacoi mácʉ cʉvabecʉyʉme jípacʉi cʉvaede. Quénora ico ʉ̃i márepaco bajui mácʉ cʉvacʉyʉme caiye jípacʉi cʉvaede. Que baru jaetovajacʉ ico mi yebacacore aru mamacʉre máre yore jocarĩ”, arĩ toivaicõjenejaquemavʉ Jʉ̃menijicʉ. 31 Mʉja, jívʉ, que baru maja yebacacoi márape paivʉ ãmevʉ maja. Quénora majamu majepacʉi márepaco bajui márape paivʉbu. Que baru mearore cʉvarãjaramu maja, majepacʉ Jʉ̃menijicʉi jíquiyede majare.