Efesios
Espíritu Santo ʉ̃i cójijovaino caivʉ Jesúre jʉ aipõevare cũináyajubocavʉpe
4 Caiye iye ji toivaicõjeiyede apecʉre mʉjare dápiarĩ caride, parʉrõreca jẽniaivʉ yʉ, mʉje đarãjiyepe ayʉ yópe đaiye jaʉépe mʉjare. Yʉ́bu bʉoimʉ ãmeina teivʉre jẽni jacoiñami jívʉi, ji memecaiye boje Jesucristore. Ðajarã mʉja yópe Jʉ̃menijicʉ “Que đajarãri” ʉ̃i arĩ dápiaino mácarõpedeca, ʉ̃i cutuiye báquede mʉjare ʉ̃ jina marajiyépe ayʉ. 2 “¿Meara márica apevʉ pʉeno?” abejarã mʉja. Aru ména meađarĩ cađatejarã apevʉre. Napijara apevʉre. Aru jorojĩmevʉva náque jã́đovajara mʉje ʉede náre. 3 Ñai Espíritu Santo cãrijimenoque cʉre đaibi mʉjare. Cójijovaibi mʉjare cũináyajubocavʉpe cũinátʉrʉ mʉje ũmei. Que baru đajarã caiyede mʉje oainope, meađarãjivʉ iye mʉje cʉede cũinátʉrʉ mʉje ũmei.
4 Cũináyajuborabu maja Jesucristore jʉ aipõeva. Cũinácʉrabe ñai Espíritu Santo. Cũinároramu yo maje napini coreino Jʉ̃menijicʉi mearo đacaquiyede majare, ʉ̃i cutuimara mácavʉre, maje cʉvarãjiyepe ayʉ diede. 5 Cũinácʉrabe maje jabocʉ Cristo. Cũináenamu iye yávaiye me, maje jʉ aiye. Cũinácʉrabe ñai maje jã́đovaimʉ ocoque. 6 Cũinácʉrabe majepacʉ Jʉ̃menijicʉ, maje mearore jímʉ, caivʉ Jesúre jʉ aipõeva majepacʉ. Caivʉ Jesúre jʉ aipõeva maje jabocʉbe ʉ̃. Caivʉ Jesúre jʉ aipõevare memeicõjeimi ʉ̃́re maje đaiyeque majare coapa. Aru caivʉ Jesúre jʉ aipõevaque cʉbi ʉ̃.
7 Majare coapa đare đaibi Cristo ʉ̃i majide đaiye bojecʉbeda. Yópe ʉ̃i ʉrõpe mearore đare đaibi majare coapa. 8 Cristoi que đare đaiyede, yópe arĩ, Jʉ̃menijicʉ toivaicõjenejaquemavʉ javede ʉ̃i yávaiyede:
Vaidéjaquemavʉ ʉ̃i mauva mácavʉre. No yóboi, copaini mʉri nʉrejaquemavʉ ʉ̃mʉi. Que baru na obedivʉre, ʉ̃i bʉoimarare, nʉvarejaquemavʉ ʉ̃i yóboi. Que teni ẽmʉriburu yóboi, darorejaquemavʉ põevare ʉ̃i majide đaiyede náre, arĩ toivaicõjenejaquemavʉ Jʉ̃menijicʉ.
9 ¿“Copaini mʉri nʉrejaquemavʉ ʉ̃mʉi”, Jʉ̃menijicʉi yávaiyede coyʉcaipõecʉ bácʉi aino mácarõ, aipe aiyʉrõma no? Yópe aiyʉrõmu: Cristo ʉ̃i mʉri nʉquiye jipocai, javede ẽmeñʉ mácʉ ijãravʉi, corejaquemavʉ joborõ jívʉi, yaivʉ bácavʉ ne cʉrõi. 10 Aru ñai ẽmeñʉ mácʉrecabe mʉri nʉñʉ cojedeca pʉ cavarõ mearo Jʉ̃menijicʉi cʉrõita, cʉcʉ cainore caride aru cʉcʉyʉ cainore cainʉmʉa máre. 11 Ñai Cristorecabe jíyʉ ʉ̃́re jʉ aipõevare majide đaiyede, maje mearo đaivʉ bʉojarãjiyepe ayʉ yópe ʉ̃i ʉrõpe. Epeibi apevʉre ʉ̃i yávaiye méne beorĩ coyʉicõjeimara márajivʉva, aru apevʉre Jʉ̃menijicʉi yávaiyede coyʉcaipõeva márajivʉva. Epeibi apevʉre ʉ̃i yávaiye méne coyʉipõeva márajivʉva, aru apevʉre ʉ̃́re jʉ aivʉre ne coreipõeva márajivʉva, aru náre bueivʉ márajivʉva máre. 12 Que đaibi meađacʉyʉ caivʉ Jʉ̃menijicʉi põevare, maje memecaivʉ bʉojarãjiyepe ayʉ ʉ̃́re.
Que teni pʉeno baju đare đaibi caiyajuboa põeyajuboacavʉ Jesúre jʉ aipõevare Jʉ̃menijicʉi ʉrõpe yópe põecʉi baju bʉcʉiyepe. Majamu Cristoi bajupe paivʉ. 13 Jʉ̃menijicʉi ʉrõpe pʉeno đare nʉrajaramu maja, pʉ maje eaiyeta cʉrãjivʉ cũinátʉrʉ maje jʉ aiyede Jesucristore, Jʉ̃menijicʉi mácʉre, aru cũinátʉrʉ maje coreóvaiyede máre aipe ãrojacʉre ʉ̃́re. Bʉcʉvape paivʉ barãjáramu maja maje ũmei. Que baru bʉojarãjaramu cʉrivʉ Cristo bajupedeca. Aru Jʉ̃menijicʉre jʉ arĩ coreóvarãjaramu maja ye jaʉbeda. 14 Que baru jʉeđovape paivʉ maje cʉbenajiyepe ayʉ, Cristo jíbi majare ʉ̃i méne. Jʉeđova pʉcaũmea cʉrivʉbu. Napedeca ina Jesúre jʉ aipõeva pʉcaũmea cʉrivʉ baru, oatʉvaivʉbu ne dápiaiyede cainʉmʉa, ape bueiyede jápiaivʉva. Ina bueipõeva borocʉrivʉ me majidivʉbu aipe jʉ are đarãjivʉ apevʉre ne borocʉeque. Que baru bʉcʉvape paivʉ barĩjárajarevʉ maje ũmei, jʉjovaimara ãmenajivʉ yópe jʉeđovape. 15 Ʉbenita coyʉrãjarevʉ Jesús ʉ̃i yávaiyede jãvene. Maje yópe coyʉiyede jã́đovarajarevʉ maje ʉede maje bajumia, aru náre maje coyʉimarare máre.
Que đaivʉ baru, Jʉ̃menijicʉi ʉrõpe đare nʉrajaramu maja, maje cʉe boje Cristoque cũinávʉpe. Maja ʉ̃́re jʉ aivʉ caiyajuboa põeyajuboacavʉ ʉ̃i bajupe paivʉbu. Aru ʉ̃́vacari maje jabocʉbe, majare đaicõjeñʉ. 16 Ʉ̃i đaicõjeiye boje, maja caivʉ đarĩ majidivʉbu yópe majare jaʉépe ʉ̃i ʉrõre. Cristoi bajucarõpebu maja coapa. Põecʉ cʉvacʉ baru caiye ʉ̃i bajuquede ã́ri die cʉe jaʉrõi, đaquiyepe ayʉ yópe đaiye jaʉépe, me cʉbi ñai põecʉ. Quédecabu maje cʉede Cristoque. Cristoi bajure bʉcʉóvaiyepebu, maje đaiyede đare nʉmuri yópe ʉ̃i majide đaiyepe, aru maje cađateiyede apevʉre, náre ʉrĩ.
Apʉé mamae jaʉrõ majare, Jesúre jʉ aipõevare
(Ro 1.21-25, 12.5; Col 3.9-10, 13; Stg 1.19-20)
17 Ji cʉe boje Jesucristoque cũinávʉpe, coyʉquijivʉ mʉjare paredeca. Ðabejarã mʉja yópe ina Jʉ̃menijicʉre jʉ abevʉ ne đaiyepe. Iye ne đaiyepe paiyede dajocajarã mʉja. Námu ʉbenina dápiaivʉ. 18 Que baru jápiarĩ coreóvabema na. Iye apʉé mamaene, Jʉ̃menijicʉi cʉvare đaiyede ʉ̃ jinare, cʉvabema na. Ʉ̃i yávaiyede jápiaiyʉbema. Que baru Jʉ̃menijicʉre coreóvabema. 19 Ye chĩomema ne ãmeina đaiye boje, ne dápiaino mearo cʉbe boje. Torojʉrivʉ đađama caino ãmenore. Ʉrarõ baju ãmenore đađama dajocaiyʉbevʉva. 20 Nópe ne đaiyedeca mʉjacapũravʉ buebedejaquemavʉ Jesucristore jʉ aivʉ ne đaiyepe jaʉrõre. 21 ¿Jãve jápiabedejacarãrʉ mʉja Jesús ʉ̃i yávaiye méne? ¿Buebedejacarãrʉ mʉja diede? 22 Que đaivʉ baru, dajocajarã aipe ãrojae máquede mʉje ãmeina đaiyʉeque. Ðare nʉivʉ barejaquémavʉ ãmenore mʉje ãmeina đaiyʉe boje. No boje, jʉjovaimaratamu mʉja. Que baru pʉeno ãmenore đaivʉ baru aru dajocabevʉ baru mʉje javeque đaiye báquede, bíjarãjaramu mʉja coateivʉpe Jʉ̃menijicʉre jarʉvarĩ. 23 Mʉje cʉe boje apʉé mamaeque caride, Jʉ̃menijicʉre oatʉvaicõjejara mʉja, cʉvarãjivʉ mʉje mamaũmene aru mʉje dápiaino mamarore máre. 24 Ðajarã mʉja yópe ina apʉé mamaene cʉvarivʉre đaiye jaʉépe. Jʉ̃menijicʉ ʉbi mʉjare cʉrivʉre yópe ʉ̃i cʉepedeca. Que baru cʉre đaibi mʉjare apʉé mamaeque aru mamaũmeque máre. Que baru meara májara Jʉ̃menijicʉi jã́inore aru mearo đajarã apevʉ põeva ne jã́inore máre, yópe ʉ̃i yávaiyede jãvene coyʉiyepe.
25 Que baru borocʉbejarã mʉja caride. Quénora caivʉ mʉja coapa borotejarã jãvene mʉje baju. Cũináyajubo põeyajubope paivʉbu maja. Cristoque cũinábajupe paivʉbu. Que baru jãve borotejarã mʉja. 26 Jaraivʉ baru, ãmeina đabejarã mʉja mʉje jaraiye boje. Quénora vaidé đajarã mʉje jaraiyede maumena, dijãravʉmareca. 27 Mʉje jaraiye boje, jʉjovaicõjemejara ñai abujuvai jabocʉre, ãmenore đabenajivʉ mʉje baju. 28 Cũinácʉ mʉjacacʉ ñavacʉcʉ baru, dajocajacʉrĩ ʉ̃i ñavaiyede. Quénora memeicõjejara ʉ̃́re memeino mearore, ʉ̃i bojeđaquiyepe aivʉ ʉ̃́re jaʉéde aru ʉ̃i cađatequiyepe aivʉ ina cõmaje ãrojarivʉre máre. 29 Mʉje yávaiyeque ãmeina đabejarã apevʉre. Quénora me cađatejarã náre dieque. Mʉje yávaiyeque pare jʉ are nʉre đajarã náre Jesucristore. Coyʉjarã me yópe náre jaʉépe. Que đarĩ cađatenajaramu náre, ina jápiaivʉre mʉjare. 30 Chĩore đabejarã mʉja ñai Espíritu Santore, Jʉ̃menijicʉ jicʉre. Ʉ̃́recabe jã́đovañʉ majare Jʉ̃menijicʉ jinava. Ñai Espíritu Santoi cʉe boje majaque, majidivʉbu jãve cũinájãravʉ daquijãravʉ baquinóre meara baju jaʉbeda đacʉyʉre majare yópe Jʉ̃menijicʉi ʉrõpe. 31 Ñájine đabejarã põevare mʉje yávaiyeque. Jorojĩmejara náre. Aru jarabejarã náre. Jararĩ cođobobobejarã máre. Coyʉbejarã ãmenore caivʉ ne jápiaiyede apevʉi borore. Aru ãmeina dápiabejarã apevʉre máre. 32 Quénora cõmaje ãroje jã́ri, cađatejarã mʉje bajumia. Aru ãrʉmetejarã apevʉ ne ãmeina đaiyede mʉjare yópe Jʉ̃menijicʉvacari ʉ̃i ãrʉmeteiye báquepe mʉje ãmeina teiyede, diede jarʉvarĩ, mʉje cʉe boje Cristoque cũinávʉpe.