1 Timoteo

Aipe đaiye jaʉrõ Jesúre jʉ aipõevaque

(Mt 10.10, 18.16; Lc 10.7; 1 Co 9.9)

5 Jarabejacʉ mʉ ina ʉ̃mʉva bʉcʉvare. Quénora coyʉjacʉ me aipe đaiye jaʉrõre náre, nopedeca mipacʉre mi coyʉiyepe. Ina ʉ̃mʉva bojʉvʉre máre, coyʉjacʉ nopedeca míyovare mi coyʉiyepe. 2 Ina nomiva bʉcʉrõmivare máre, coyʉjacʉ nopedeca mipacore mi coyʉiyepe. Ina nomiva bojʉrõmivare máre, coyʉjacʉ nopedeca míyorõmivare mi coyʉiyepe. Aru cainʉmʉa ãmeno đabejacʉ náque.

3 Pueđajacʉ ina nomiópeva cũinácova cʉrivʉre némara aru népãramena máre cʉbevʉre. Jãve cõmaje ãrojarivʉbu na. Que baru cađatejacʉ náre jaʉéde.

4 Ʉbenita ico nomiópecoi mamara cʉrivʉ baru o jípãramena máre cʉrivʉ baru, jaʉvʉ náre ne cađateiye ṍre. Que baru napini corebejarãri ina Jesúre jʉ aipõevare ne cađatenajiyepe aivʉ népacore o néñecore máre. Quénora jíjarãri na ṍre jaʉéde. Õi me jã́ri coreiye boje náre jʉeđovare cãreja, õ bʉcʉco caride, ṍre jã́ri coreiye jaʉvʉ náre. Que teni Jʉ̃menijicʉ me jã́ñʉme ina põeva jã́ri coreivʉre me nébʉcʉvare. 5 Ʉbenita ico nomiópeco cũinájico cʉco, ṍre jã́ri coreipõecʉ cʉvabeco, napini coreibico õ Jʉ̃menijicʉ cađatecʉyʉre ṍre. Que baru jẽniađome ʉ̃́re cainʉmʉa, ʉ̃i cađatequiyepe ađo ṍre jãravʉre aru ñamine máre. 6 Ʉbenita ico nomiópeco torojʉve teiyede vođore, cađatebejacʉ ṍre. Que teni õ apʉbico õi baju. Ʉbenita yaiyó bácope páđobe õi ũmene Jʉ̃menijicʉi jã́inore. 7 Ðaicõjejacʉ mʉ ina Jesúre jʉ aipõevare yópe ji coyʉiyepe. Que teni apevʉ bʉojabenama ãmeina yávaivʉ ne borore. 8 Ina jʉ abevʉvacari jíma ne bʉcʉvare jaʉéde. Que baru cũinácʉ Jesúre jʉ aipõecʉ jíbecʉ baru ʉ̃ jivʉre aru ʉ̃i cʉ̃ramicavʉre máre náre jaʉéde, ʉ̃́capũravʉ ãmecʉ bajube jʉ abevʉ pʉeno.

9 Mi toivarĩ cʉvarõre ne ãmiáre ina nomiópevare, toivajacʉ ico nomiópeco sesenta paiʉjʉa pʉeno cʉvacore jã́ri baju, aru cũinácʉra ʉ̃mʉcʉco bácore dajocabecova ʉ̃́re, Jesúre jʉ aipõeva ne cađatenajiyepe ayʉ. 10 Põeva ne pueđaimo majacórĩ õ. Coyʉjarãri na õi borore, “Ico nomiópeco mearo đaibico õ”. Jaʉvʉ ṍre õi bʉcʉóvaiye báque me mamarare, aru õi copʉ etaiye báque curãdaivʉre, õi joaiye báque Jʉ̃menijicʉi põevai cʉbobare, aru õi cađateiye báque cõmaje ãrojarivʉre máre. Que teni jaʉvʉ ṍre õi mearo đacaiye apevʉre cainʉmʉa.

11 Ʉbenita toivabejacʉ ne ãmiáre, Jesúre jʉ aipõeva ne cađatebenajiyepe ayʉ ina nomiópeva bojʉrõmivare. Ina pʉrʉbʉoiyʉrivʉ baru apecʉque, dajocarãjarama ne memecaiyede Jesucristore. 12 Que teni đabenajarama yópe “Yʉ bácojivʉ memecađo”, ne aiye báquepe Jesucristore. 13 Aru ina nomiópeva bojʉrõmiva jũracʉrivʉ, cʉre cuyama cʉ̃ramia coapa. Borore coyʉrĩ jiođama na. Cãrijovađama põevare. Aru boroteđama boroteiye jaʉbede máre. 14 Que baru yʉ ʉvʉ ina nomiópeva bojʉrõmivare ne pʉrʉbʉorĩ jʉeđocʉvarãjiyepe ayʉ jã́ri coreivʉva ne cʉ̃ramiare. Que teiyede maje maucʉ bʉojabecʉbe ãmeina yávayʉ Jesúre jʉ aipõeva ne borore. 15 Javede apevʉ nomiópeva dajocaquemavʉ ne jʉ aiye báquede Jesúre. Que teni memecađama ñai abujuvai jabocʉ Satanáre. Que baru que aivʉ yʉ mʉre.

16 Cũináco nomió Jesúre jʉ ađo cʉvaco baru nomiópevare õ jivʉ jẽneboi, cađateiye jaʉvʉ ṍre, ina Jesúre jʉ aipõevare cađateiye jaʉbequiyepe aiye náre. Nópe đaiyede ina Jesúre jʉ aipõeva jãve cađatenajarama ina nomiópevare, ñame ne cađatebemarare jãve cõmaje ãrojarivʉre.

17 Ina Jesúre jʉ aipõeva ʉrarõ pueđajarãri náre ina coreipõevare, ne jaboteiye boje náre. Aru ina Jesúre jʉ aivʉre coreipõeva bueivʉre aru coyʉivʉre máre Jʉ̃menijicʉi yávaiye méne pʉeno baju pueđajarãri aru bojeđajarãri náre ména. 18 Que baru yópe arĩ Jʉ̃menijicʉ toivaicõjenejaquemavʉ ʉ̃i yávaiyede: “Ñai oteiãimacʉ ʉracʉ memecayʉre mʉjare, bʉobejarã ʉ̃́re ʉ̃i jijecamure, ʉ̃i ãmequiyepe aivʉ ʉ̃́re ʉ̃i cʉ̃ocaiyedeca mʉjare mʉje oteiyabeare, ʉ̃i cʉraiyede diede”. Que baru ʉ̃i ãiye memeiye bojepebu. Aru, “Memecaipõecʉre bojeđaiye jaʉvʉ ʉ̃i memeinore”, arĩ toivaicõjenejaquemavʉ. Que baru me bojeđajarã mʉja ina mʉjare bueivʉre.

19 Cũinácʉ põecʉ ʉ̃i boro coyʉrĩ ađaru cũinácʉ Jesúre jʉ aivʉre coreipõecʉre, jápiarĩ ađabejacʉ mʉ ʉ̃i coyʉiyede. Ʉbenita pʉcarã o yóbecʉrã majidivʉ bácavʉ ʉ̃i ãmeina teiye báqueda ne boro coyʉrĩ ađaru ʉ̃́re, jápiarĩ ađajacʉ mʉ ne boro coyʉiyede. 20 Aru jarajacʉ ʉ̃́re caivʉ apevʉ Jesúre jʉ aipõeva ne jã́inoi, ne jidʉrãjiyepe ayʉ đarãjivʉ ãmeno ʉ̃́pe. 21 Iye ji toivaicõjeiyede apecʉre mʉre Jʉ̃menijicʉ, aru Jesucristo, aru ina ángeleva meara baju máre majima. Que baru ne jã́inoi jʉ aicõjeivʉ mʉre ji đaicõjeiyede. Que baru arĩ dápiabejacʉ mi baju apecʉ ãmeina đayʉre ʉ̃i coyʉquiye jipocai. Aru jã́mejacʉ ʉbenina apecʉ meacʉre apevʉ pʉeno.

22 Dápiabecʉva, mi pʉrʉáque tʉorĩ, epebejacʉ apecʉre Jesucristore memecaipõecʉpe. Mʉ que đayʉ baru, aru ʉ̃i ãmeina tedu, mʉ́vacari jʉ ajebu ʉ̃i ãmeina teiyede. Que baru apevʉre ãmeno đare đabejacʉ mʉ. Aru mʉ́vacari ãmenore đabejacʉ cainʉmʉa.

23 Apenʉmʉa mʉre yapibʉ ijié boje, ũcumejacʉ oco matʉiyeda. Quénora ũcujacʉ apecoro vino ʉ́yaicorore, jʉocʉyʉ mi bajure.

24 Apevʉ põevare, ne ñájinajiye jipocamia, caivʉ javede jã́đama ne ãmeina teiyede. Ʉbenita apevʉ põeva ãmeina teđama yavenina. Que teni pʉ ne ñájinajijãravʉ baquinó eaiyeta apevʉ jã́menama ne ãmeina teiyede. 25 Quédeca apevʉ põeva mearo đađama caivʉ ne jã́iyede. Aru caivʉ coreóvađama aipe ne mearo đaiyede. Ʉbenita apevʉ põeva mearo đađama yavenina. Ʉbenita yaveni đaivʉ bʉojabenama na cainʉmʉa. Quénora cũinájãravʉ baquinói apevʉ coreóvarãjarama aipe ne mearo đaiyede.