Hechos
Saulo Jesucristore jã́ri ʉ̃i jʉ aino
9 Que teiyedeca, Saulo cainʉmʉa ñájine đayʉ barejámeđa Jesúre jʉ aipõevare, náre yópe arĩ:
—Boaquíjivʉ mʉjare mʉje Jesúre jʉ aiye boje, jarayʉ arejameđa Saulo.
2 Aru ñai sacerdotevare jaboteipõecʉre jẽniacʉnʉrejameđa paperayocare Saulo, ʉ̃i jã́đovaquiyepe ayʉ diyocare judíovai cójijiñamia coreipõevare Damasco ãmicʉriĩmaroi, ne majinajiyepe ayʉ ñamene ʉ̃ Saulo aru ye parʉéde cʉvacʉre ʉ̃, ne cõjeimʉ mácʉ. Damasco ãmicʉriĩmaroi nʉcʉyʉ barejámeđa Saulo, vocʉnʉñʉ Jesúre jʉ aipõevare. Náre eayʉ baru, bʉojebu náre, ʉ̃mʉvare aru nomivare máre, nʉvacʉyʉ náre Jerusalén ãmicʉriĩmaroi.
3 Diyocare ĩni, Saulo nʉrejameđa mái. Damasco ãmicʉriĩmaro joabenoi eaiyede, maumejiena cavarõre jocarĩ pẽorejavʉ̃ya yópe yaroinope ʉ̃i yebai, aru ʉrarõ miađárejavʉ̃ya noi. 4 Que baru cuecumañʉ, mori tʉrejameđa joborõi. Aru jápiarejameđa Jesús ʉ̃i yávainore, yópe ainore:
—Mʉ, Saulo, ¿aipe teni maucʉvacʉrʉ̃ mʉ yʉre? arejameđa.
5 Saulo jẽniari jã́rejameđa:
—Mʉ, ji jabocʉ, ¿ñamenʉ mʉ? jẽniari jã́rejameđa.
Aru Jesús arejameđa:
—Yʉrecabu Jesús, mi maucʉvamʉ mácʉ. Mi maucʉvarõ yʉre ãmeđaivʉ mʉre, arejameđa.
6 Saulo, jidʉcʉ, bidini jẽniari jã́rejameđa Jesúre:
—Mʉ, ji jabocʉ, ¿yéde ji đainore ʉcʉrʉ̃ mʉ? arejameđa Saulo.
Aru Jesús arejameđa ʉ̃́re:
—Nacajajacʉ. Ecojacʉ diĩmaroi. Noi apecʉ majicacʉyʉme mʉre aipe mi đaquinore, arejameđa Jesús ʉ̃́re.
7 Iye pẽoiyede, ina ʉ̃mʉva, nʉivʉ bácavʉ Sauloque, dajocarejaimađa. Aru bi arejaimađa na. Iye yávainore jápiarejaimađa na. Ʉbenita ñai yávayʉre ye jã́menejaimađa na. 8 Jʉ arĩ Jesús ʉ̃i cõjeiyede, Saulo nacajarejameđa. Ʉbenita ʉ̃i yacorʉa voaiyede, ye jã́menejameđa ʉ̃. Jã́ri eabecʉ barejámeđa ʉ̃, Saulo. Que baru ʉ̃́que nʉivʉ ʉ̃i pʉrʉáre jẽni, nʉvarejaimađa ʉ̃́re pʉ Damasco ãmicʉriĩmaroita. 9 Yóbecʉrijãravʉare Saulo jã́ri eabedejameđa. Ãinore ye ãmenejameđa. Aru ũcuinore máre ũcumenejameđa ʉ̃.
10 Noi, Damasco ãmicʉriĩmaroi, cʉrejameđa cũinácʉ Jesúre jʉ aipõevacacʉ, ʉ̃i ãmiá Ananías. Ʉ̃ apʉcʉ jã́rejameđa Jesúre decoboainope. Aru Jesús arejameđa ʉ̃́re:
—Mʉ, Ananías, ¿cʉcʉrʉ̃ mʉ? arejameđa.
Aru Ananías arejameđa:
—Mʉ, ji jabocʉ, cʉvʉ yʉ, arejameđa.
11 Jesús arejameđa ʉ̃́re:
—Nʉjacʉ Nurinima ãmicʉrimai. Noi, Judai cʉ̃rami nʉri, vojacʉ cũinácʉ ʉ̃mʉre, Tarso ãmicʉriĩmarocacʉre, ʉ̃i ãmiá Saulo. Jipacʉ Jʉ̃menijicʉre jẽniaimi ʉ̃. 12 Jã́ri eabebi ʉ̃ caride. Apʉcʉ ʉ̃ decoboainope jã́imi mʉre tʉoyʉre mi pʉrʉáque, jã́re đacʉyʉre ʉ̃́re cojedeca, arejameđa Jesús Ananíare.
13 Nópe ayʉre jápiarĩ, Ananías arejameđa:
—Mʉ, ji jabocʉ, ʉ̃ mínare mearare Jerusalẽ́cavʉre ãmeno đabiya ʉ̃. Obedivʉ põeva yávađama yʉre. 14 Que baru yo Damascore caivʉ ina mʉre jʉ aivʉre bʉocʉdayʉtame ʉ̃, sacerdotevai jabova ne cõjeimʉ mácʉ, arejameđa Ananías Jesúre.
15 Ʉbenita Jesús arejameđa ʉ̃́re:
—Nʉjacʉ. Beoivʉ yʉ ñai ʉ̃mʉre, ʉ̃i coyʉquiyepe ayʉ ji yávaiye méne apejoborõacavʉre, nócavʉ ne jabovare máre, aru Israecavʉre máre. 16 Yʉ jã́đovaquijivʉ ʉ̃́re ñájiyede yʉre boje, arejameđa Jesús.
17 Dinʉmʉ Ananías nʉrejameđa cʉ̃rami, Sauloi cʉriñami. Ecoyʉ bácʉ, tʉorĩ ʉ̃i pʉrʉáre Saulorã, arejameđa:
—Mʉ, jícʉ, Saulo, Jesúvacari ñai mi jã́imʉ mácʉ mái dayʉ, daroibi yʉre, mi jã́quiyepe ayʉ cojedeca aru Espíritu Santo ʉ̃i đaicõjequiyepe ayʉ mʉre, arejameđa Ananías Saulore.
18 Nópe ʉ̃i aiyeda, tʉrejavʉ̃ya ʉ̃i yacorʉare jocarĩ moatʉ̃chiape paiyede, aru me jã́rejameđa cojedeca. Dinʉmʉre nacajañʉre jã́đovarejameđa Jʉ̃menijicʉre ocoque. 19 No yóboi ãri, parʉcʉ nʉrejameđa cojedeca. Aru mautedejameđa obebejãravʉa Jesúre jʉ aipõevaque, Damasco ãmicʉriĩmaroi cʉrivʉque.
Saulo Damascoi ʉ̃i coyʉino Jesús ʉ̃i yávaiye méne
20 Maumejiena Saulo coyʉrĩ bʉ́rejameđa judíovai cójijiñamiai, “Jesúre jãveneca Jʉ̃menijicʉi mácʉbe” ayʉ. 21 Caivʉ ʉ̃́re jápiaivʉ bácavʉ cuecumaivʉ arejaimađa ne baju:
—Ñai Jesúre jʉ aivʉre ãmeno đayʉbe ʉ̃. Que baru náre jẽni jícʉyʉ dacʉbe yui, ina sacerdotevai jabova ne bʉorãjiyepe ayʉ náre, arejaimađa na.
22 Ʉbenita Saulocapũravʉ coyʉrejameđa Jesús ʉ̃i yávaiye méne, parʉéque jã́đovañʉ jãveneca Jʉ̃menijicʉi mácʉre. Ʉbenita jápiarĩ coreóvare đabedejameđa ina judíova cʉrivʉre Damasco ãmicʉriĩmaroi.
Saulo ʉ̃i dupino judíovare jocarĩ
23 Obedijãravʉa yóboi, judíovacavʉ cójijidejaimađa, boarĩ́ jarʉvarãjivʉ Saulore. 24 Ʉbenita ʉ̃ majidejameđa. Jãravʉre aru ñamine máre coreivʉ barĩdurejaimađa ĩmaro jedevacobeai, boarĩ́ jarʉvarãjivʉ ʉ̃́re, ʉ̃i etaru nore. 25 Ʉbenita Jesúre jʉ aipõeva epedejaimađa Saulore pʉe ʉrapʉe jívʉi. Aru no biaido tarabʉ jã́icobede ẽmeóvarejaimađa ʉ̃́re ĩmaro biaido apepũravʉi pʉ joborõita ñami. Yópe đarĩ, Saulo dupini nʉrejameđa ʉ̃i mauvare jocarĩ.
Saulo Jerusalẽ́i ʉ̃i cʉrõ
26 Saulo eayʉ bácʉ Jerusalén ãmicʉriĩmaroi, cójijiyʉrĩdurejameđa Jesúre jʉ aipõevaque. Ʉbenita caivʉ jidʉrejaimađa, ne dápiaiye boje jʉ abecʉre Jesús ʉ̃i yávaiye méne. 27 Ʉbenita Bernabécapũravʉ nʉvari yóvare đarejameđa Jesús ʉ̃i yávaiye méne beorĩ coyʉicõjeimaraque. Coyʉrejameđa aipe teni Saulo ʉ̃i jã́ino mácarõre Jesúre, ʉ̃i nʉiyede Damasco ãmicʉriĩmaroi, aru aipe Jesús ʉ̃i yávaino mácarõre ʉ̃́re. Aru Bernabé coyʉrejameđa aipe Saulo ʉ̃i yávaino mácarõre máre, Damasco ãmicʉriĩmaroi, coyʉyʉ jidʉbecʉva caivʉ põevare Jesús ʉ̃i yávaiye méne.
28 Yópe arĩburu yóboi, Saulo mautedejameđa Jerusalén ãmicʉriĩmaroi, cuyʉ Jesús ʉ̃i yávaiye méne beorĩ coyʉicõjeimaraque. 29 Coyʉre cuyʉ barejámeđa jidʉbecʉva põevare Jesús ʉ̃i yávaiye méne, boroteni coyʉvarejameđa pare ina judíova griego ãmicʉricamuare yávaivʉre. Ʉbenita boarĩ́ jarʉvaiyʉre curĩduivʉ barejáimađa na. 30 Jesúre jʉ aipõevare majidivʉ boarĩ́ jarʉvaiyʉrivʉre, nʉvarejaimađa Saulore Cesarea ãmicʉriĩmaroi. Aru nore jocarĩ, jarorejaimađa ʉ̃́re Tarso ãmicʉriĩmaroita. 31 Yópe teni, Jesúre jʉ aipõeva caivʉ Judea, aru Galilea, aru Samaria ãmicʉrõacavʉ ñájimenejaimađa. Pʉeno baju majidivʉ barejáimađa na Jʉ̃menijicʉre aru ʉ̃i yávaiyede máre, ñai Espíritu Santo ʉ̃i bueiyede náre. Cʉrejaimađa pueđarĩ Jʉ̃menijicʉre Espíritu Santo ʉ̃i cađateinoque. Aru pʉeno baju obedivʉ tedejaimađa Jesús ʉ̃i yávaiye méne jʉ aipõeva.
Pedro ʉ̃i meađaino Eneare
32 Dinʉmʉ Pedro coyʉre cuyʉ barejámeđa cainoa ĩmaroacavʉre. Que teni cũinájãravʉ jã́cʉnʉrejameđa ina põevare, Jʉ̃menijicʉre mearore jívʉre, Lida ãmicʉriĩmarocavʉre. 33 Nore cũinácʉ ʉ̃mʉ cʉrejameđa, ʉ̃i ãmiá Eneas. Nacajaiye majibecʉ barejámeđa ʉ̃. Ocho paiʉjʉa joe nacajamenejameđa ʉ̃i parainore jocarĩ. 34 Aru Pedro ʉ̃i yebai nʉri, arejameđa ʉ̃́re:
—Mʉ, Eneas, caride Jesúvacari meađaibi mʉre. Nacajajacʉ. Aru meađajacʉ mi parainore, arejameđa Pedro Eneare.
Maumejiena Eneas nacajarejameđa. 35 Que teni caivʉ ina põeva Lida ãmicʉriĩmarocavʉ aru Sarón ãmicʉridarõcavʉ máre jã́rejaimađa Eneas meateyʉre. Que baru jʉ arejaimađa Jesúre.
Pedro ʉ̃i nacovaino Dorcas yaiyó bácore Jesúi parʉéque
36 Dinʉmʉ Jope ãmicʉriĩmaroi cũináco nomió cʉrejacođa, õi ãmiá Tabita. Ico Tabita Jesúre jʉ aipõeco barejácođa õ. Õi ãmiá griego ãmicʉricamua yávaicamuaque Dorcas barejávʉ̃ya, yo aiyʉrõ ñamaco. Cainʉmʉa mearo đarĩ cõmajiyo báco apevʉre aru cađateđo báco cõmaje ãrojarivʉre máre. 37 Dijãravʉai ijeteni, yaidéjacođa õ, Tabita báco. Õi baju bácarõre joarĩburu yóboi, epedejaimađa pʉenocatucubʉi. 38 Jope ãmicʉriĩmaro aru Lida ãmicʉriĩmaro joabeno marejávʉ̃ya. Que baru ina Jesúre jʉ aipõeva Jope ãmicʉriĩmarocavʉ jápiaivʉ Pedro cʉcʉre Lida ãmicʉriĩmaroi, yo borore jarorejaimađa ʉ̃́re pʉcarã ʉ̃mʉvaque:
—Maume dajacʉ ñʉje cʉrõi, arĩ daicõjenejaimađa ʉ̃́re.
39 Jʉ arĩ, Pedro nʉrejameđa náque. Ne eaiyede, nʉvarejaimađa ʉ̃́re yaiyó bácoi cʉritucubʉ pʉenocatucubʉi. Ditucubʉi ecoyʉ, caivʉ ina nomiópeva oivʉ õ mácore chĩtoivʉ ʉ̃́re, jã́đovaivʉ barejáimađa doicajeare, Dorcas báco õi nareiye báquede apʉco cãreja. 40 Ʉbenita Pedro etaicõjenejameđa caivʉ inare ditucubʉre jocarĩ. Que teniburu yóboi, ñʉatutarĩ jẽniarejameđa Jʉ̃menijicʉque. Ʉ̃i jẽniariburu yóboi, copedini, õi baju bácarõre jã́ri, arejameđa:
—Mʉ, Tabita, nacajajaco, arejameđa.
Õi yacorʉare voarĩ, Pedrore jã́ri, nacajari dobarejacođa õ, Tabita. 41 Õi pʉrʉre jẽni, Pedro nacovarejameđa ṍre. Dinʉmʉma órejarejameđa ina Jesúre jʉ aipõevare aru ina nomiópevare máre, ne jã́rajiyepe ayʉ ṍre apʉcore cojedeca. 42 Aru õi borore jápiarejaimađa caivʉ Jope ãmicʉriĩmarocavʉ. Que baru obedivʉ põeva jʉ arejaimađa Jesúre nore. 43 No yóboi, Pedro mautedejameđa diĩmaroi obedijãravʉa. Cʉrejameđa apecʉ Simóque, ãimacajeare memeipõecʉque, ʉ̃i cʉ̃rami.