Hechos

Pablo aru Bernabé ne bueino Iconiocavʉre

14 Iconio ãmicʉriĩmaroi Pablo Bernabémaque ecorejaimađa judíovai cójijiñami, buenajivʉ nócavʉre. Aru buedejaimađa majiéque. Que baru obedivʉ põeva jʉ arejaimađa Jesúre, apevʉ judíova aru apevʉ judíova ãmevʉ máre. 2 Ʉbenita nócavʉ judíova Jesúre jʉ abevʉ maucʉvare đarejaimađa nócavʉ judíova ãmevʉre, ne ãmeina dápiarãjiyepe aivʉ Pablojãre. 3 Que baru Pablojã mautedejaimađa noi obedijãravʉa. Náre Jesús ʉ̃i cađateiye boje, jidʉbevʉva coyʉivʉ barejáimađa parʉéque. Aru Jʉ̃menijicʉ parʉre đarejaquemavʉ náre, ne đarãjiyepe ayʉ põeva ne jã́mene aru ne đarĩ majibede máre. Que baru Jʉ̃menijicʉ jã́đovarejaquemavʉ jãve ne coyʉiyede jíyede mearo bojecʉbenore Jesúre jʉ aipõevare. 4 Ʉbenita cũinátʉrʉ ne ũme dápiabedejaimađa na, diĩmarocavʉ. Apevʉ jʉ arejaimađa ina judíova ne coyʉiyede aru apevʉ jʉ arejaimađa Jesús ʉ̃i yávaiye méne beorĩ coyʉicõjeimara ne coyʉiyede. 5 Dinʉmʉre ina judíova aru apevʉ judíova ãmevʉ máre coyʉrejaimađa jabovaque, yópe arĩ: “Ñájine đarãjarevʉ Pablojãre”, arejaimađa ne bajumia. Que arĩ, cʉ̃raboaque dʉvarĩ boaiyʉrĩdurejaimađa náre. 6 Pablojã coreóvaivʉ ne maucʉvarĩ dápiaiyede náre, dupini nʉrejaimađa apejoborõi. Cʉrejaimađa Licaonia ãmicʉrijoborõcaĩmaroai, Listra aru Derbe ãmicʉriĩmaroai, aru no joabenoquei máre. 7 Coyʉivʉ barejáimađa Jesús ʉ̃i yávaiye méne nócavʉre.

Listracavʉ ne boaino Pablore cʉ̃raboaque

(Hch 4.24)

8 Listra ãmicʉriĩmaroi dobarejameđa cũinácʉ ʉ̃mʉ cuiye majibecʉ. Ʉ̃i cʉboba jiacʉbedejavʉ̃ya. Põetedejameđa ñai ʉ̃mʉ cuiye majibecʉ. Aru cainʉmʉa cubedejameđa ʉ̃. 9 Ʉ̃ jápiayʉ barejámeđa Pabloi coyʉiyede. Pablo me cocoyʉ ʉ̃́re, coreóvarejameđa ñai ʉ̃mʉ jʉ ayʉre Jesús parʉcʉre, ʉ̃́re meađacʉyʉre. 10 Que baru Pablo me jã́ñʉ ʉ̃́re, arejameđa parʉrõreca:

—Nacajajacʉ mi cʉbobaque nurié, arejameđa Pablo.

Maumejiena biarárĩ, núri, vaivárĩ bʉ́rejameđa ʉ̃, cuiye majibecʉ bácʉ. 11 Ina obedivʉ põeva jã́ivʉ Pabloi đaiye báquede, cođoboborĩ bʉ́rejaimađa ne yávaicamuaque, Licaonia ãmicʉrijoborõcavʉ ne yávaicamuaque. Yópe arĩ, cođoboboivʉ barejáimađa na:

—¡Jʉ̃menijina ʉ̃mʉvape ãrojarivʉ teni ẽmeni darĩ edađama maje yebai! arejaimađa na.

12 Que baru arejaimađa Bernabéde, “Ʉ̃́recabe ñai jʉ̃menijicʉ ʉ̃i ãmiá Zeus”. Aru arejaimađa Pablore, “Ʉ̃́recabe ñai jʉ̃menijicʉ ʉ̃i ãmiá Hermes”. Que arejaimađa na Pablo ʉ̃i yávaiye boje Bernabé pʉeno. 13 Cũináđami cʉ̃rami põeva ne torojʉede jíñami ñai Zeure cʉrejavʉ̃ya diĩmaro tʉrʉvai. Aru Zeui sacerdote davarejameđa oteivecʉvare aru cóvʉare máre diñami jedevacobe yebai. Ʉ̃ diĩmarocavʉque ina oteivecʉvare boarĩ́ juaiyʉrĩdurejaimađa na, mearore jínajivʉ Bernabéde aru Pablore máre. 14 Ʉbenita Bernabé aru Pablocapũravʉ jápiaivʉ põeva ne đaiyʉede, ne baju doicajeare tatorĩ jađevarejaimađa, põeva ne majinajiyepe aivʉ diede ʉbevʉre. Aru põeva jẽneboi cúyarĩ nʉri, cođoboborejaimađa na:

15 —¡Yópe đabejarã mʉja! ¡Jʉ̃menijina ãmevʉ ñʉja! Ñʉja máre mʉjape paivʉ põevatamu. Coyʉrãdaivʉbu Jʉ̃menijicʉi yávaiye méne mʉjare, mʉje dajocarãjiyepe aivʉ mʉje mearore jíyede jʉ̃menijina ãmevʉre aru mʉje majinajiyepe aivʉ ñai Jʉ̃menijicʉ apʉcʉ cũinácʉva. Ñai Jʉ̃menijicʉ cʉeđarejaquemavʉ cavarõre, joborõre, jia ʉrađare máre, aru caivʉ nócavʉre, noi cʉede máre. 16 Jipocai judíova ãmevʉ đaivʉ bácavʉreca ne baju ʉrõ coapa, Jʉ̃menijicʉ đaicõjeñʉ ãmenejaquemavʉ náre. 17 Ʉbenita cainʉmʉa Jʉ̃menijicʉ jã́đovaimi mʉjare aipe ãrojacʉ ʉ̃i baju ʉ̃i đacaiyede mearore mʉjare. Que teni Jʉ̃menijicʉ ocare đacaibi cavarõre jocarĩ mʉjare. Aru bʉcʉre đacaibi mʉje oteiyede, mʉje cʉvarãjiyepe ayʉ ãiyede. Yapide đacaibi mʉjare ãiyeque. Aru torojʉre đacaibi mʉje ũmene, Pablo Bernabémaque arejaimađa.

18 Yópe arejaimađa, náre ne torojʉede oteivecʉvare juarĩ jíyʉe boje. Ʉbenita maiyójarejavʉ̃ya náre ne dajocaiyede.

19 Dinʉmʉre apevʉ judíova, Pisidia ãmicʉrijoborõcaĩmaroa Antioquía aru Iconio ãmicʉriĩmaroacavʉ earejaimađa diĩmaroi. Obedivʉ diĩmarocavʉre maucʉvare đarejaimađa na Pablojãre. Que teni Pablore ĩni, cʉ̃raboaque dʉvarĩ ʉ̃́re, “¿Yaiyʉ́ bárica?” arĩ jabʉborĩ jarʉvarejaimađa ʉ̃i baju bácarõre diĩmarore jocarĩ. 20 Ʉbenita no yóboi Jesúre jʉ aipõeva cójijini nʉivʉ ʉ̃i yebai, Pablo nacajari, copainʉrejameđa diĩmaroi. Cõmiáijãravʉre Bernabémaque nʉrejaimađa Derbe ãmicʉriĩmaroi.

21 Pablojã coyʉrejaimađa Jesús ʉ̃i yávaiye méne diĩmaroi. Aru obedivʉ põeva jʉ arejaimađa diede. No yóboi, copainʉrejaimađa Listra, Iconio, aru Antioquía ãmicʉriĩmaroai, Pisidia ãmicʉrijoborõcarõai. 22 Diĩmaroa coapa cađatedejaimađa Jesúre jʉ aipõevare, ne jʉ arãjiyepe aivʉ pʉeno baju parʉrõ aru ne dajocabenajiyepe aivʉ ne Jesúre jʉ aiyede máre. Arejaimađa diĩmaroacavʉre:

—Caivʉ maja jʉ aivʉ Jesúre ñájinajivʉbu pare ijãravʉi, maje ecorãjiye jipocai Jʉ̃menijicʉi jaboteinore, arĩ buedejaimađa na.

23 Diĩmaroa coapa apevʉ ʉ̃mʉva Jesúre jʉ aivʉcavʉre beorejaimađa Pablo aru Bernabé máre, ne corenajiyepe aivʉ apevʉ Jesúre jʉ aipõevare, náque cójijivaivʉre. Que teni jẽniarejaimađa Jʉ̃menijicʉre ãmevʉva ãiyede, ʉ̃i corequiyepe aivʉ ina ʉ̃́re jʉ aipõevare, aru ʉ̃i cađatequiyepe aivʉ náre. Que đarejaimađa Pablojã diĩmaroa coapa.

Pablo aru Bernabé ne copaino Antioquía Siriacarõi

24 Dinʉmʉ Pisidia ãmicʉrijoborõre vainí, earejaimađa Pablojã Panfilia ãmicʉrijoborõi. 25 Noi Perge ãmicʉriĩmaroi coyʉrejaimađa Jesús ʉ̃i yávaiye méne. Coyʉrĩ bʉojarĩ, ẽmenejaimađa Atalia ãmicʉriĩmaroi. 26 Noi jiađocũ ʉracũi jaturĩ, earãnʉrejaimađa Antioquía ãmicʉriĩmaroi cojedeca, mamarʉmʉ ne etaino mácarõi. Ne etarãjijãravʉ jipocamia, Jesúre jʉ aipõeva diĩmarocavʉ jẽniarejaimađa Jʉ̃menijicʉre, ʉ̃i corequiyepe aivʉ ina ʉ̃́re memecaivʉre aru ʉ̃i cađatequiyepe aivʉ náre.

Que arejaimađa, jẽniaivʉ Jʉ̃menijicʉre ʉ̃i đacaquiyepe aivʉ mearore Pablojãre. Aru ne copaiyede noi cojedeca jave bʉojarejaimađa ne memeinore, Jʉ̃menijicʉi coreni cađateiye báque boje náre. 27 Que baru Pablojã eaivʉ Antioquía ãmicʉriĩmaroi, cójijide đarejaimađa caivʉ Jesúre jʉ aipõevare, coyʉrãjivʉ náre caiye iye Jʉ̃menijicʉi cađateiye báquede náre aru ʉ̃i meađaicõjeiye báquede ina judíova ãmevʉre, jʉ arãjivʉre Jesúre. 28 Aru Pablojã mautedejaimađa Jesúre jʉ aipõevaque noi obedijãravʉa.