2 Tesalonicenses
Pablo ʉ̃i aino “Jẽniajara ñʉjare Jʉ̃menijicʉque”
3 Mʉja, ñʉjevʉ, jẽniajara ñʉjare Jʉ̃menijicʉque, apevʉ obedivʉ põeva ne jápiarãjiyepe aivʉ maje jabocʉ Jesucristoi yávaiye méne maumena, ne jʉ arãjiyepe aivʉ diede, aru ne jínajiyepe aivʉ mearore Jʉ̃menijicʉre, nópe vaiye báquepedeca mʉjaque. 2 Aru jẽniajara ñʉjare Jʉ̃menijicʉque, ʉ̃i meađaquiyepe aivʉ ñʉjare ina põeva ãmena, ne ãmeno đabenajiyepe aivʉ ñʉjare. Põeva obebevʉ jʉ aivʉbu Jʉ̃menijicʉi yávaiye méne. Que baru ina ãmeina đaivʉ aru apevʉre máre ãmeno đare đaivʉ ãmeno đaiyʉrivʉbu ñʉjare.
3 Ʉbenita maje jabocʉ Jesucristo cainʉmʉa đayʉbe yópe ʉ̃i aiye báquepedeca. Que baru jãve parʉre đacʉyʉme mʉjare mʉje ũmene. Aru jã́ri corecʉyʉme mʉjare ñai abujuvai jabocʉ, ʉ̃i ãmeno đabequiyepe ayʉ. 4 Ñʉja coreóvaivʉbu maje jabocʉ Jesucristo cađateyʉre mʉjare, mʉje jʉ aiye boje ʉ̃́re. Que baru coreóvaivʉbu mʉja đaivʉre yópe ñʉje bueiye báquepe mʉjare, aru đarãjivʉre máre yópe ñʉje bueiyepe iyocaque caride. 5 Ñʉja jẽniaivʉbu maje jabocʉ Jesucristoque, ʉ̃i napine đaquiyepe aivʉ mʉjare parʉrõreca yópe ʉ̃i baju napino mácarõpe, aru mʉje ʉrãjiyepe aivʉ põevare yópe majepacʉ Jʉ̃menijicʉ ʉ̃i ʉepe majare.
Memeiye jaʉrõ
6 Mʉja, ñʉjevʉ, yóvaicõjemevʉ ñʉja mʉjare, maje jabocʉ Jesucristoi parʉéque, ina mʉjacavʉ jũracʉrivʉre aru đabevʉre máre yópe ñʉje bueiye báquepe. 7 Mʉjavacari coreóvaivʉbu aipe đaiye jaʉrõre mʉjare, đarãjivʉ nópe ñʉje đarĩ cõmajiye báquepe mʉje jẽneboi cʉrivʉ cãreja. Memeiyʉbevʉ ãmetecarã ñʉja. Quénora jũracʉbevʉva ʉrarõ memecarã. 8 Jacopʉbetecarã ñʉje ãiyede mʉjaque bojecʉbeda. Quénora cainʉmʉa bojeđacarã mʉjare mʉje jíye báquede ñʉjare. Ʉrarõ memeivʉ batecárã jãravʉre aru ñamine máre, mʉje ñájimenajiyepe aivʉ ñʉjare jaʉé boje. 9 Ñʉja jẽniari bʉojajebu ñʉjare jaʉéde, ñʉje bueiye boje Jesús ʉ̃i yávaiye méne. Ʉbenita quéda jẽniametecarã mʉjare. Jã́đovacarã mʉjare ñʉje đaiyeque aipe đaiye jaʉrõre mʉjare. Que baru đajarã mʉja yópe ñʉje jã́đovaiye báquepe. 10 Javede ñʉje cʉ́vaquede mʉje jẽneboi, yópe arĩ, “Ñai memeiyʉbecʉre jíbejarã ãiyede”, đaicõjeivʉ batecárã mʉjare. 11 Nópe arĩ, coyʉivʉbu ñʉja mʉjare, ñʉje jápiaiye boje ne borore, apevʉ mʉjacavʉ jũracʉrivʉre. Nácapũravʉ mememema, bojeđarãjivʉ náre jaʉéde. Quédata cãrijovađama náre ina memeivʉre ména.
12 Que baru, ina mʉjevʉ memeiyʉbevʉre coyʉivʉbu ñʉja caride. Maje jabocʉ Jesucristo ʉ̃i parʉéque memeicõjeivʉbu náre. Aru parʉrõreca jẽniaivʉbu náre, ne memenajiyepe aivʉ cãrijovamevʉva apevʉre, ne cʉvarãjiyepe aivʉ ne ãiyeva.
13 Ʉbenita mʉja, ñʉjevʉ, ʉetʉbejarã mearo đaivʉ.
14 Apecʉ mʉjacacʉ ʉ̃i jʉ abedu ñʉje coyʉiyede yo paperayocaque, ʉ̃́re coreóvarĩ caivʉ mʉja yóvabejarã ʉ̃́re, ʉ̃i cʉyoje tequiyepe aivʉ. 15 Ʉbenita jã́mejara ʉ̃́re yópe mʉje jã́iyepe mʉje maucʉre. Quénora coyʉjarã aipe đaiye jaʉrõre ʉ̃́re yópe mʉje majicaiyepe mʉjeyocʉre.
Pablo ʉ̃i meaicõjeino Tesalónicacavʉre
16 Maje jabocʉ Jesucristovacari cãrijimenoque cʉre đayʉ põevare, cʉre đajacʉrĩ mʉjare cãrijimevʉva cainʉmʉa. Maje jabocʉ Jesucristo cʉjacʉrĩ caivʉ mʉjaque. 17 Yʉ́vacari, Pablo, toivaivʉ ji pʉrʉque caride. Meaicõjeivʉ caivʉ mʉjare. Caiyoca ji paperayocare toivaivʉ yʉ yópe, jã́đovacʉyʉ mʉjare jãve ji toivaicõjeiye báquede. Que toivaivʉ yʉ. 18 Ʉrarõ mearo đacajacʉrĩ mʉjare maje jabocʉ Jesucristo bojecʉbeda ʉ̃i me boje. Quénoramu.