Hechos
26 Dinʉmʉ Agripa arejameđa Pablore:
—Caride coyʉjacʉ mi borore, arejameđa.
Que aiyede, Pablo jabióvarĩ ʉ̃i pʉrʉre, yávarĩ bʉ́rejameđa, coyʉcʉyʉ ʉ̃i borore:
2 —Mʉ, ñʉje jabocʉ Agripa, caride torojʉvʉ yʉ ji ũme mi jápiaquiyepe ayʉ ji coyʉiyede caiye iye ne ãmeno boro coyʉrĩ ađaiyede yʉre ina judíova. 3 Mʉ́vacari coreóvaivʉ me judíova ne đarĩ cõmajiyede aru ne bueiyede máre. Que baru jẽniaivʉ mi jápiaquiyepe ayʉ ji coyʉiyede napiyeque, arejameđa Pablo.
Pablo ʉ̃i coyʉino ʉ̃i đaiye báquede Jesús jicʉ tequiye jipocai
4 Pablo, yópe arĩ, coyʉre nʉrejameđa:
—Ina judíova coreóvađama aipe cʉcʉre yʉ ne jẽneboi jʉeđocʉ cãreja aru caride máre, mamarʉmʉre ji cʉede ji ĩmaroi aru no yóboi ji cʉede Jerusalẽ́i máre. 5 Joe baju yʉrecabu cũináyajubo fariseo ãmicʉriyajubocacʉ. Ñʉja fariseova mearore jívʉbu Jʉ̃menijicʉre yópe ʉ̃i đaicõjeiyede ʉ̃i coyʉiye báquepe Moisés bácʉre caivʉ apevʉ judíova pʉeno baju. Ina judíova ʉrivʉ baru, jʉ ajebu jãve iye ji coyʉiyede. 6 Caride núvʉ yʉ yui, ne boro coyʉrĩ ađaimʉ, ji coreiye boje Jʉ̃menijicʉi mearo đacaquiyede ñʉjare yópe ʉ̃i aiye báquepedeca ñʉjeñecuva mácavʉre. 7 Aru caivʉ ñʉje doce paiyajuboacavʉ Israecavʉ máre coređama yópe ji coreiyepe. Que baru mearore jíyama na Jʉ̃menijicʉre jãravʉre aru ñamine máre. Aru mʉ, ñʉje jabocʉ Agripa, ina judíovavacari boro coyʉrĩ ađaivʉbu yʉre, iye ji coreiye boje. 8 ¿Aipe teni “Jʉ̃menijicʉ nacovañʉ bʉojabebi yaivʉ bácavʉre yainore jarʉvarĩ”, arĩ dápiaivʉrʉ̃ mʉja? arejameđa Pablo.
Pablo ʉ̃i coyʉino ʉ̃i ñájine đaiye báquede Jesúre jʉ aipõevare
9 Yópe arĩ, coyʉre nʉrejameđa Pablo:
—Javede yʉ́vacari yópe arĩ dápiacacʉ: “Jesús Nazarecacʉre jʉ aipõevare maucʉvae jaʉvʉ yʉre”, acacʉ yʉ. 10 Yópe đacacʉ yʉ Jerusalẽ́i: Obedivʉ ina Jesúre jʉ aipõevare jẽni, bʉorĩ, jarocacʉ yʉ náre ãmeina teivʉre jẽni jacoiñamiai, yópe ina sacerdotevare jaboteipõeva ne đaicõjeiyepe. Aru ne boarĩ́ jarʉvaiyʉede náre, yʉ máre jʉ acacʉ diede. 11 Obedijãravʉa yʉ nʉcacʉ judíovai cójijiñamiai, ñájine đacʉyʉ ina Jesúre jʉ aipõevare. Jesúre jʉ abede đarĩducacʉ yʉ náre. Aru ji ʉrarõ baju jorojĩye boje náre, yʉ cujucacʉ náre apeĩmaroaita, arejameđa Pablo.
Pablo ʉ̃i coyʉino cojedeca Jesús jicʉ teni bʉino mácarõre
12 Yópe arĩ, coyʉre nʉrejameđa Pablo:
—Cũinájãravʉ Damascoi nʉcacʉ yʉ ina sacerdotevare jaboteipõevai parʉéque, đacʉyʉ yópe ne đaicõjeiyepe. 13 Aru mʉ, ñʉje jabocʉ Agripa, ji nʉiyede mái jãravʉ corica baji jã́cacʉ cavarõre jocarĩ ʉrarõ miađárore, aviá ʉ̃i pʉeno cojinore. Pẽoávʉ ñʉje yebai, yʉre aru yʉ́que nʉivʉre máre. 14 Que baru cuecumaivʉ caivʉ mori tʉcarã joborõi. Aru jápiacacʉ apeno yávainore ñʉja judíova ñʉje yávaicamuaque, yópe ainore: “Mʉ, Saulo, ¿aipe teni maucʉvacʉrʉ̃ mʉ yʉre? Yópe đayʉ, mʉ́vacari ñájine đaivʉ mʉ mi bajuma, yópe cũinácʉ oteiãimacʉ ʉracʉ ʉ̃i ñájine đaiyepe ʉ̃i bajure tãtañʉ abođo juijóiyore”, áme yʉre. 15 “Mʉ, ji jabocʉ, ¿ñamenʉ mʉ?” acacʉ yʉ. “Yʉrecabu Jesús, ñai mi maucʉvamʉ. 16 Caride nacajari nújacʉ. Yʉ jã́đovaivʉ mʉre, ji baju mi memecaquiyepe ayʉ yʉre. Beoivʉ mʉre, mi coyʉquiyepe ayʉ apevʉre yópe mi jã́inope yʉre caride. Aru mi jã́quiyede yʉre bedióva coyʉcʉyʉmu diede máre. 17 Que baru jaroquijivʉ mʉre, mi coyʉquiyepe ayʉ ji yávaiye méne judíovare, aru judíova ãmevʉre máre. Aru yʉ jođecʉyʉmu mʉre, ne ãmeno đabenajiyepe ayʉ. 18 Mi coyʉquiyede judíova ãmevʉre, yʉ jápiarĩ eare đacʉyʉmu náre, ne dajocarãjiyepe ayʉ ne ãmeina teiyede yópe ñeminoi cuiyepe, aru ne jʉ arãjiyepe ayʉ yʉre yópe miađároi cuiyepe. Yʉ jaetovacʉyʉmu náre ñai abujuvai jabocʉ Satanás ʉ̃i jaboteinore jocarĩ. Aru ecovacʉyʉmu náre Jʉ̃menijicʉi jaboteinoi. Que teni yʉ ãrʉmetecʉyʉmu ne ãmeina teiyede, ne yʉre jʉ aiye boje. Aru Jʉ̃menijicʉi põevaque cʉrãjarama na”, áme Jesús yʉre, arejameđa Pablo.
Pablo ʉ̃i coyʉino ʉ̃i đaiyede Jesúi đaicõjeinore ʉ̃́re decoboainoque
19 Yópe arĩ, coyʉre nʉrejameđa Pablo:
—Mʉ, ñʉje jabocʉ Agripa, ñai cavarõ mearo Jʉ̃menijicʉi cʉrõcacʉ ji jã́imʉ mácʉre jãve jʉ acacʉ yʉ. 20 Que baru coyʉcacʉ mamarʉmʉre Damascocavʉre, aru no yóboi Jerusalẽ́cavʉre, no yóboi caino Judeacavʉre, aru no yóboi judíova ãmevʉre máre. Coyʉcacʉ náre: “Chĩojara mʉja mʉje ãmeina teiyede. Aru jarʉvajarã diede. Oatʉvajarã mʉje đaiyede. Aru đajarã yópe Jʉ̃menijicʉi ʉrõpe, apevʉ põeva ne majinajiyepe ayʉ jãve mʉja jʉ aivʉre Jʉ̃menijicʉre”, arĩ coyʉcacʉ náre. 21 Ji nópe bueiye boje, ina judíova yʉre jẽni boarĩ́ jarʉvarĩduima Jʉ̃menijicʉi cʉ̃rami jívʉi. 22 Ʉbenita javede aru caride máre Jʉ̃menijicʉ cađateibi yʉre. Que baru yʉ yui núcʉ, coyʉivʉ yávaiyede jãvene caivʉre, parʉrivʉre aru parʉbevʉre máre. Quénora coyʉivʉ yʉ yópe Jʉ̃menijicʉi đaicõjeiyede ʉ̃i coyʉiye báquepe Moisés bácʉre aru ina Jʉ̃menijicʉi yávaiyede coyʉcaipõeva mácavʉ ne toivaiye báquepe ne coyʉcaiyede, “Yópe vaiquíyebu. Que ayʉbe Jʉ̃menijicʉ”, ne aiye báquepedeca. 23 Yópe arĩ, toivarejaquemavʉ na: “Cristore, Jʉ̃menijicʉi daroquimʉre, jaʉvʉ ʉ̃i ñájiquiye, aru ʉ̃i yaiquíye, aru ʉ̃i nacajaquiye yainore jarʉvarĩ caivʉ apevʉ jipocai. Que đarĩ yópe pẽoino jã́re đaiyepe põevare, nopedeca Cristo jã́đovacʉyʉme judíovare aru judíova ãmevʉre máre Jʉ̃menijicʉi meađaquiyede náre”, arejaquemavʉ na, arejameđa Pablo.
Pablo “Jʉ ajacʉ Jesúre” ʉ̃i arĩduino jabocʉ Agripare
24 Pablo ʉ̃i coyʉiyede, Festo cođoboborejameđa ʉ̃́re:
—Mʉ, Pablo, ãrʉmevʉ mʉ. Mi pare bueiye boje, ãrʉmevʉ mʉ, arejameđa ʉ̃́re.
25 Ʉbenita Pablo arejameđa ʉ̃́re:
—Mʉ, ñʉje jabocʉ Festo, ãrʉmecʉ ãmevʉ yʉ. Quénora coyʉivʉ yávaiyede jãvene ji ũmei. Ʉbenina ayʉ ãmevʉ yʉ. 26 Ñai jabocʉ Agripa majibi caiye iye ji coyʉiyede. Que baru yʉ jidʉbecʉva coyʉivʉ ʉ̃́re. Yavenina ãmeno đaiye ãmevʉ iye. Que baru javede jápiaquemavʉ diede ñai jabocʉ Agripa, arejameđa Pablo.
27 Que ayʉ, Pablo arejameđa Agripare:
—Mʉ, ñʉje jabocʉ Agripa, ina Jʉ̃menijicʉi yávaiyede coyʉcaipõeva mácavʉ ne toivaiye báquede jʉ aivʉ mʉ. Majivʉ yʉ mʉ jʉ ayʉre, arejameđa ʉ̃́re.
28 Agripa arejameđa Pablore:
—Mi coyʉinoque quĩ́jino baju yʉre jʉ are đarĩduivʉ mʉ Jesúre, arejameđa.
29 Aru Pablo jʉ arejameđa ʉ̃́re:
—Quĩ́jino baju meajebu. Ʉrarõ baju máre meajebu. Yʉ Jʉ̃menijicʉque jẽniacaivʉ caivʉ mʉjare, mʉje jʉ arãjiyepe ayʉ ʉ̃́re aru mʉje nʉrajiyepe ayʉ yʉ́pe paivʉ, ʉbenita bʉoimeaque cʉbevʉva, arejameđa Pablo.
30 Dinʉmʉ ñai jabocʉ Agripa, ñai jabocʉ Festo, Berenice, aru náque dobarivʉ máre nacajari etarejaimađa nore jocarĩ. 31 Ne etarĩburu yóboi, arejaimađa ne bajumia:
—Ñai ʉ̃mʉ ʉ̃i đaiye boje yaiquíno jaʉbevʉ ʉ̃́re, aru bʉoino máre. 32 Pablo ʉ̃i abedu “Jarojacʉ yʉre ñai jabocʉ ijãravʉcacʉ pʉeno baju parʉcʉ yebai, ʉ̃i jápiaquiyepe ayʉ ji borore”, maja bʉojajebu etaicõjeivʉ ʉ̃́re. Ʉbenita ʉ̃i nópe jẽniaiye boje, maja bʉojabevʉ etaicõjeivʉ ʉ̃́re, arejameđa Agripa Festore.