Romanos
3 3:1-2 Aru apecʉ ʉ̃i aru yʉre: “Caivʉ majidivʉbu ina judíovare Jʉ̃menijicʉi beoimara mácavʉre. ¿Mi dápiaru, ina judíova meari apevʉ pʉeno aru ne cajede buraicõjeiye cađatebedi náre?” yópe arĩ, coyʉjebu yʉ: “Jʉ̃́jʉ. Yópe ayʉbuicʉ yʉ. Põecʉ judíovacacʉ baru, pare meavʉ ʉ̃́re. Aru cajede buraicõjeiye pare cađateivʉ judíovare, ne nópe jã́đovaiye boje Jʉ̃menijicʉ jinare. Mamarʉmʉre Jʉ̃menijicʉ jídejaquemavʉ judíovare ʉ̃i yávaiyede, maje jʉ arĩ, aru bueni apevʉre, meađarĩ corenajiyepe ayʉ diede”. Que ajebu yʉ. 2 — 3 3:3-4 Ʉbenita apecʉ ʉ̃i aru yʉre: “Apevʉ judíova jʉ abema Jʉ̃menijicʉi yávaiyede. ¿Ne jʉ abe boje, đabecʉyʉba Jʉ̃menijicʉ nópe ʉ̃i aiye báquepedeca?” yópe arĩ, coyʉjebu yʉ: “¡Bi, ye que ãmevʉ! ¡Aipinʉmʉ vaibéjarõri nópe! Jʉ̃menijicʉ jãve đacʉyʉme yópe ʉ̃i aiye báquepedeca. Caivʉ põeva ne borocʉru, Jʉ̃menijicʉcapũravʉ cainʉmʉa borocʉbecʉbe ʉ̃”. Javede yópe arĩ, toivaicõjenejaquemavʉ Jʉ̃menijicʉ ʉ̃i yávaiyede:
Mi ñájine đaiyede yʉre ji jʉ abe boje mʉre, apevʉ jã́ivʉ aipe đarĩ ñájine đayʉre yʉre, pueđarĩ mʉre arãjarama na mi borore: “Ðaibi yópe ʉ̃i aiye báquepedeca majare. Borocʉcʉ ãmemi ʉ̃”, arĩ toivaicõjenejaquemavʉ. 4 —
5 ¿Aru apecʉ ʉ̃i aru yʉre: “Maja judíova maje đabede yópe Jʉ̃menijicʉi đaicõjeiye báquepe majare, jã́đovaivʉbu Jʉ̃menijicʉcapũravʉre pʉeno meacʉ bajure ʉ̃i jãve đaiyede yópe ʉ̃i aiye báquepedeca cainʉmʉa, mearo đayʉre põeva ne mearo đabede”, aipe aji yʉ? ¿Aji yópe apevʉ põeva ne aiyepe, “Jʉ̃menijicʉcapũravʉ jorojĩni jã́ri, ñájine đayʉ baru majare, judíovare, ʉ̃i ñájiovaquijãravʉ baquinói põevare, ne ãmeina teiye boje, ãmenore đayʉ bájebu ʉ̃”? 6 ¡Bi, ye que ãmevʉ! ¡Aipinʉmʉ vaibéjarõri nópe! Jãve maru no, Jʉ̃menijicʉ ye ñájine đarĩ bʉojabejebu ijãravʉcacʉre cũinácʉra yópe ʉ̃i ãmeina teiyepedeca. 7 Cũinácʉ põecʉ ʉ̃i jínoque mearore pẽpeimarare ʉ̃i coreóvare đaru põevare ʉrarõ baju Jʉ̃menijicʉ meacʉre caivʉ pʉeno, jãve Jʉ̃menijicʉ ñájine đacʉyʉme ʉ̃́re, ʉ̃i que đaiye boje. 8 Que baru maje ãmeina đaiyede maje coreóvare đaru Jʉ̃menijicʉre pʉeno meacʉ bajure, apevʉ põeva yópe ađama: “Ãmeina đarãjarevʉ, Jʉ̃menijicʉ ʉ̃i jã́đovaquiyepe aivʉ majare meacʉ bajure caivʉ pʉeno”, ađama na. Apevʉ põeva boro coyʉrĩ ađarĩduyama yʉre, ji nópe aiye boje. Que aivʉ, borocʉma yʉre. Jʉ̃menijicʉ ñájine đacʉyʉme ina borocʉrivʉre yópe náre ñájine đaiye jaʉépe, ne que aiye báque boje.
Caivʉ põeva maje boropateino maje ãmeina teiye boje
(Gá 2.16)
9 ¿Mearama maja judíova apevʉ pʉeno Jʉ̃menijicʉi jã́inore? ¡Que ãmevʉ! Jave jã́ri coreóvaivʉbu judíovare aru judíova ãmevʉre máre, caivʉ cũinátʉrʉ ãmeina teivʉre. Caivʉ ijãravʉcavʉ maje ãmeina đaiyʉe boje cõjeimarape cʉrivʉbu. 10 Yópe arĩ javede Jʉ̃menijicʉ toivaicõjenejaquemavʉ ʉ̃i yávaiyede:
Põecʉ cʉbebi meacʉ Jʉ̃menijicʉi jã́inore. Ye cũinácʉ páyʉ cʉbebi. 11 Caivʉ põeva coreóvabenama mearore. Aru caivʉ põeva Jʉ̃menijicʉ jina máre teiyʉbenama. 12 Caivʉ põeva dajocađama Jʉ̃menijicʉre, ãrʉmeteđama ʉ̃́re. Mamateđama caivʉ cũinátʉrʉ. Ye cõmaje ãroje jã́meni apevʉre cađatebenama náre. Ñame đabenama mearore. Ye cũinácʉ páyʉ cʉbebi. 13 Ne jijecamu yópe põetõcu voitõcupebu. Que baru ne yávaiyeque jorojĩne đađama Jʉ̃menijicʉre. Borocʉrivʉ yávađama apevʉre, jʉjovarãjivʉ. Ne yávaiye yópe ãđai jĩmape paiyebu. Que baru ne yávaiyeque ãmetede đađama apevʉre. 14 Ãmeina đarĩ yávađama apevʉre, ijivʉ ne yávaiye. 15 Que baru cãrijiñama boarĩ́ jarʉvaiyʉrivʉ põevare. 16 Ã́ri ne nʉinoi ñájine đađama põevare, aru mamatede đađama, aru chĩore đađama náre. 17 Torojʉre đabeni aru cãrijine đađama põevare. 18 Ye cũinájino quĩ́jinoreca pueđabenama Jʉ̃menijicʉre máre, arĩ toivaicõjenejaquemavʉ.
19 Majidivʉbu maja caiye iye Jʉ̃menijicʉi đaicõjeiyede ʉ̃i coyʉiye báquede Moisés bácʉre toivacaino mácarõre caivʉ maja judíovare, maje majinajiyepe ayʉ majare máre ãmeina teivʉre. Caivʉ bi arãjarama Jʉ̃menijicʉi jã́inoi ʉ̃i ñájiovaquijãravʉ baquinói põevare, ne majié boje ñájiye jaʉrõre náre, ne đabe báque boje yópe Jʉ̃menijicʉi đaicõjeiye báquepe. 20 Iye đaicõjeiyeque ñame boropatebema Jʉ̃menijicʉi jã́inore. Quénora iye đaicõjeiyeque põeva coreóvaivʉbu caivʉre ãmena matʉiyede.
Jʉ̃menijicʉ ʉ̃i jã́ino põevare boropatebevʉpe ne jʉ aiyede Jesucristore
21 Ʉbenita caride Jʉ̃menijicʉ coreóvare đaibi majare aipe đarĩ coyʉrĩ bʉojayʉre põevare “Boropatebevʉ mʉja ji jã́inore”, Jesucristoi đaiye báque boje. Aru yópe đacaibi majare ʉ̃i đaicõjeiye báquede đabecʉva. Ʉbenita Jʉ̃menijicʉi đaicõjeiyede ʉ̃i coyʉiye báquede Moisés bácʉre aru ina Jʉ̃menijicʉi yávaiyede coyʉcaipõeva mácavʉ ne toivaiye báquede máre javede coyʉrejaquemavʉ aipe đacʉyʉre Jʉ̃menijicʉ diede. 22 Jʉ̃menijicʉ coyʉibi põevare “Boropatebevʉ mʉja ji jã́inore”, ne jʉ aiyede Jesucristore. Caivʉ põeva cũinátʉrʉtamu. Que baru Jʉ̃menijicʉ nópe coyʉibi caivʉre Jesucristore jʉ aivʉre.
23 Maja caivʉ põeva ãmene đaivʉbu maja. Que baru nópe đaivʉre Jʉ̃menijicʉ “Boropatebevʉ mʉja”, abecʉbe majare, maje đabe boje yópe ʉ̃i ʉrõpe. 24 Ʉbenita Jʉ̃menijicʉrecabe pʉeno meacʉ baju. Que baru jíyʉbe mearore bojecʉbeda. Que teni coyʉibi “Boropatebevʉ mʉja ji jã́inore” caivʉ majare, maje Jesucristore jʉ aiyede. Nópe bojecʉbeno đarĩ, Jesús ñájine đabede đaibi majare, maje ãmeina teiye boje yópe põecʉ ʉ̃i yebacacʉre bojeđarĩ ĩ́yepe, ʉ̃i dajocaquiyepe ayʉ ʉ̃i memeino ãmeno baju bácarõre.
25 Jʉ̃menijicʉ jorojĩni jã́imi maje ãmeina teiyede. Que baru dajocacʉyʉ ʉ̃i jorojĩyede, darorejaquemavʉ Jesucristore, ʉ̃i ñájiquiyepe ayʉ põeva ne ãmeina teiye boje. Que baru Jesucristo yaidéjaquemavʉ maje yaijʉroede. Que teni ʉ̃i jiveque bojeđarejaquemavʉ põevare ne ãmeina teiyede. Jesús ʉ̃i yaiye báque boje, Jʉ̃menijicʉcapũravʉ ãrʉmeteibi maje ãmeina teiyede caivʉ maja Jesucristore jʉ aivʉre. Jʉ̃menijicʉ yópe vaidé đarejaquemavʉ, jã́đovacʉyʉ aipe đarĩ coyʉrĩ bʉojayʉ põevare “Boropatebevʉ mʉja ji jã́inore”.
Jipocamia Jʉ̃menijicʉ majidejaquemavʉ darocʉyʉ Jesucristore, ʉ̃i bojeđaquiyepe ayʉ põeva ne ãmeina teiyede. Que baru Jʉ̃menijicʉ napinejaquemavʉ põeva ne ãmeina đaiyede. Yópe ñájine đabecʉyʉpe vaidéjaquemavʉ ne ãmeina teiyede. 26 Ʉbenita caride Jʉ̃menijicʉ quéda vaibébi põeva ne ãmeina teiyede. Quénora ãmeina teiyede bojeđaibi ʉ̃, jã́đovacʉyʉ põevare boropatebevʉre ʉ̃i jã́inoi. Que teni Jʉ̃menijicʉ coreóvare đaibi ʉ̃i đaino pʉeno mearo bajure, “Boropatebevʉ” ayʉ caivʉ Jesucristore jʉ aivʉre.
27 ¿Caride “Boropatebevʉ maja”, arĩ majidi maja, mʉje dápiaru? Nópe arĩ majibevʉ maja. ¿Aipe teni diede nópe arĩ majibedi maja? ¿Jʉ̃menijicʉi đaicõjeiyepe đarĩ cõmajidu, “Boropatebevʉ” abecʉyʉba Jʉ̃menijicʉ majare? ¡Que ãmevʉ! Maja đarĩ bʉojabevʉ yópe caiye Jʉ̃menijicʉi đaicõjeiyepe cainʉmʉa. Ʉbenita põecʉ ʉ̃i jʉ aru Jesucristore, Jʉ̃menijicʉvacari boropatebede đacʉyʉme ʉ̃́re ʉ̃i jã́inoi. 28 Põecʉ cʉbebi Jʉ̃menijicʉ “Boropatebecʉbu mʉ” ʉ̃i aimʉ, Jʉ̃menijicʉi đaicõjeiyede đaiye boje. Quénora caivʉ põeva jʉ aivʉre Jesucristore, “Boropatebevʉ mʉja ji jã́inore” aibi Jʉ̃menijicʉ. Que baru ácʉ põecʉ cʉbebi “Meacʉtamu yʉ” ayʉ.
29 ¿Dápiaivʉrʉ̃ mʉja Jʉ̃menijicʉ ʉcʉre judíova quévʉra ʉ̃ jinava? Jãve ãmevʉ no. Jʉ̃menijicʉ ʉbi judíovare aru judíova ãmevʉre máre ʉ̃ jinava. 30 Cũinácʉrabe Jʉ̃menijicʉ. Que baru Jʉ̃menijicʉ coyʉibi judíovare “Boropatebevʉ mʉja ji jã́inore”, maje jʉ aiyede Jesucristore. Aru quédeca coyʉibi judíova ãmevʉre máre “Boropatebevʉ mʉja ji jã́inore”, ne jʉ aiyede Jesucristore. Que teni Jʉ̃menijicʉrecabe coyʉyʉ caivʉ majare “Boropatebevʉ mʉja”, maje jʉ aiyede ʉ̃́re. 31 Dinʉmʉ, ¿coyʉivʉba maja põevare ne dajocarãjiyepe aivʉ Jʉ̃menijicʉi đaicõjeiyede ʉ̃i coyʉiye báquede Moisés bácʉre, Jʉ̃menijicʉi coyʉiye boje maja boropatebevʉre maje jʉ aiyede Jesucristore? ¡Bi, ye que ãmevʉ! ¡Aipinʉmʉ vaibéjarõri nópe! Quénora caride maje jʉ aiye boje Jesucristore pʉeno baju đaiyʉrivʉbu maja yópe Jʉ̃menijicʉi đaicõjeiye báquepe.