1 Tesalonicenses
5 Mʉja, ñʉjevʉ, põecʉ cʉbebi majicʉ aipijãravʉa jaʉrõre aru aipe vaiquíyede maje jabocʉ Jesús ʉ̃i daquiye jipocare. Que baru toivaiye jaʉbevʉ ñʉjare diede. 2 Mʉjavacari coreóvaivʉbu me maje jabocʉ Jesús copaidacʉyʉre ijãravʉi põeva ne corebede, ʉ̃i copaidaquinʉmʉre majibedeca yópe ñavaipõecʉ daiyepe ñamine põeva ne corebedeca. 3 Põeva, yópe arĩ, coyʉrĩdurãjarama ne bajumia: “Caino cãrijimene đaivʉ. Yéde jidʉbevʉ maja”, arĩdurãjarama. Aru ne nópe coyʉrĩduiyedeca, cũiná bíjarãjarama na. Ñájini bʉ́rãjarama maumejiena. Aru dupini majibenajarama na diede jocarĩ. Ñájinajarama na yópe ico jʉeđocʉvacođo maumejiena ãmei ijiéde ñájiyepe põeđare đacođo mamajicʉre.
4 Ʉbenita mʉja, ñʉjevʉ, mʉjacapũravʉ Jʉ̃menijicʉre coreóvabevʉ ãmevʉ mʉja. Aru ãmeina teivʉ ãmevʉ mʉja nápe, Jesúre jʉ abevʉ, ñeminoi cʉrivʉpe. Que baru mʉje coreóvaiye boje maje jabocʉ Jesús dacʉyʉre, ʉ̃ cuavabecʉyʉme mʉjare ʉ̃i copaidaiyede ijãravʉi, yópe ñavaipõecʉ ʉ̃i cuavaiyepe cʉ̃ramicavʉre. 5 Caivʉ mʉja Jesúre jʉ aivʉ majidivʉpe đaivʉbu cainʉmʉa põeva ne jã́inoi mʉje đaiyede, mʉje coreóvaiye boje Jʉ̃menijicʉre. Que baru caivʉ mʉja miađároi cʉrivʉ jãravʉcavʉpebu. Maja Jesúre jʉ aivʉ đabevʉ cainʉmʉa majibevʉpe, ne coreóvabe boje Jʉ̃menijicʉre põeva ne jã́iyede maje đaiyede. Que baru ñamicavʉ aru ñeminocavʉ máre ãmevʉ maja. 6 Que baru dápiabenajarevʉ maja nápe, Jesúre jʉ abevʉpe. Cãivʉpebu na. Quénora dápiarãjarevʉ maja me apʉrivʉpe, me oaburĩ coreivʉ maje bajure. 7 Ñaminecabu ina cãivʉ ne cãiyede. Aru ñaminecabu ina pacoteivʉ ne pacoteiyede. 8 Ʉbenita majacapũravʉ coateivʉbu ina ñamicavʉre jarʉvarĩ. Aru ñeminoi cubevʉ maja. Quénora jãravʉcavʉtamu maja. Aru miađároi cuivʉbu maja.
Que baru me đaicõjeiye jaʉvʉ maje bajure. Maje jʉ aiye Jʉ̃menijicʉre jaʉvʉ majare aru maje ʉe apevʉre máre. Yópe đarĩ taoivʉbu maja nópe churarava ne taoiyepe ne bajure jãjaricaje doicajeque. Aru jaʉvʉ majare maje napini coreiye Jʉ̃menijicʉi meađaquiyede. Nópe đarĩ taoivʉbu maja yópe churarava ne taoiyepe ne jipobʉre jãjaribo moiboque. 9 Que baru Jʉ̃menijicʉ epebebi majare ñájine đacʉyʉ. Quénora epeibi majare maje jabocʉ Jesucristoi meađaquiyepe ayʉ, ñájimemuri ãmenaque. 10 Jesús yaidéjameđa majare boje, maje cʉrãjiyepe ayʉ ʉ̃́que cainʉmʉa. Ina apʉrivʉ cãreja aru ina yaivʉ bácavʉ máre ʉ̃i copaidaquiyede caivʉ maja cũinátʉrʉ cʉrãjaramu ʉ̃́que cainʉmʉa. 11 Que baru parʉre đajarã mʉja pʉeno baju cainʉmʉa, mʉje baju jʉ aiyede Jesúre parʉrõ nʉre đaquiyepe aivʉ. Aru cađatejarã cainʉmʉa mʉje bajumia, nopedeca mʉje đare nʉiyepe caride.
Pablo ʉ̃i majicaino Jesúre jʉ aipõevare aipe đaiye jaʉrõre náre
12 Mʉja, ñʉjevʉ, ñʉja jẽniaivʉbu parʉrõreca mʉjare, mʉje pueđarãjiyepe aivʉ ina memecaivʉre maje jabocʉ Jesúre mʉje jẽneboi. Nárecabu maje jabocʉ Jesúi epeimara, jabotenajivʉ aru majicarãjivʉ máre. Aru buenajivʉbu mʉjare aipe đaiye jaʉrõre, mʉje đarãjiyepe aivʉ mearo maje jabocʉ Jesús ʉ̃i jã́inoi. 13 Que baru pueđajarã náre. Aru pare ʉjarã náre, ne cađateiye boje mʉjare. Cʉjarã mʉja cãrijimevʉva mʉjevʉque.
14 Mʉja, ñʉjevʉ, ñʉja jẽniaivʉbu parʉrõreca, mʉje đarãjiyepe aivʉ yópe mʉjare jaʉéde. Majicajarã ina memeiyʉbevʉre, ne memenajiyepe aivʉ. Torojʉre đajarã ina jidʉrivʉre, ne jidʉbenajiyepe aivʉ. Cađatejarã ina chĩoivʉre, ne torojʉre đarãjiyepe aivʉ ne ũmei. Aru napijara caivʉre.
15 Apecʉ ʉ̃i ãmeno đaru cũinácʉ mʉjacacʉre, đabejacʉrĩ ãmeno ʉ̃́re copʉ. Quénora cainʉmʉa napini dápiajarã mʉje đarãjiyede mearore mʉje bajumia aru caivʉ põevaque máre.
16 Torojʉjarã mʉja mʉje ũmei. 17 Aru ʉetʉbevʉva coyʉjarã Jʉ̃menijicʉque. 18 Aipe vaiye vaijárõri mʉjare. Cainʉmʉa torojʉede jíjarã Jʉ̃menijicʉre. Jʉ̃menijicʉ ʉbi maje nópe đaiyede, maje jʉ aiye boje ʉ̃́re.
19 Ñai Espíritu Santore maucʉvabejarã mʉja ʉ̃i đaiyʉrõre mʉjaque. 20 Jʉ̃menijicʉi yávaiyede coyʉcaiyedeca jápiaiyʉbevʉpe tebejarã mʉja. 21 Caiyede me jã́ri coreóvajarã mʉja. Aru coreóvarĩburu yóboi, đajarã caiye méne. 22 Ʉbenita đabejarã caiye ãmene.
23 Jʉ̃menijicʉvacari, cãrijimenoque cʉre đayʉ põevare, cʉre đajacʉrĩ mʉjare caivʉ meara baju. Aru corejacʉrĩ mʉjare coapa caivʉ, mʉje decocʉre, mʉje ũmene, aru mʉje bajure máre, mʉje boropatebenajiyepe aivʉ maje jabocʉ Jesucristoi copaidaquijãravʉ baquinói. 24 Jʉ̃menijicʉ cutuibi mʉjare ʉ̃ jina márajivʉva. Aru cainʉmʉa đayʉbe yópe ʉ̃i aiye báquepedeca. Que baru ʉ̃́vacari mearo đacacʉyʉme mʉjare.
Pablo ʉ̃i meaicõjeino Tesalónicacavʉre
25 Mʉja, ñʉjevʉ, jẽniajara Jʉ̃menijicʉque ñʉjare. 26 Meaicõjeivʉbu ñʉja caivʉ mʉja Jesúre jʉ aipõevare. Me jacoyʉjarã mʉja mʉjevʉre, mʉje jivare nuri, mʉje Jʉ̃menijicʉ jina mae boje. 27 Maje jabocʉ Jesús ʉ̃i jã́inoi yʉ jã́ri boroteicõjeivʉ mʉjare iyoca paperayocare caivʉ mʉjevʉ Jesúre jʉ aipõevare. 28 Me cʉjarã mʉja maje jabocʉ Jesucristo ʉ̃i mearo đacaiye bojecʉbeda ʉ̃i me boje. Quénoramu.