Efesios
Pablo Jesús ʉ̃i bueicõjeimʉ ʉ̃i yávaiye méne judíova ãmevʉre
(1 Co 15.9; Gá 1.12; Col 1.25-27, 3.12-13)
3 Mʉja judíova ãmevʉ, mʉje Jʉ̃menijicʉi põeva teiye boje, jẽniaivʉ yʉ ʉ̃́que mʉjare boje. Yʉ, Pablo, bʉoimʉmu ãmeina teivʉre jẽni jacoiñami jívʉi, ji coyʉiye boje Jesús ʉ̃i yávaiye méne. Jesucristore memecayʉbu yʉ mʉja judíova ãmevʉre boje. 2 Jãve majidivʉbu mʉja Jʉ̃menijicʉ epeyʉ bácʉre yʉre, ji memecaquiyepe ayʉ ʉ̃́re mʉjare boje, ʉ̃i mearo đacaiye bojecʉbeda. Que teni yʉre coyʉre đaibi mʉjare iye ʉ̃i mearo đacaiye bojecʉbeda. 3 Jʉ̃menijicʉ majide đaibi yʉre ʉ̃i dápiaiye báquede javeita Cristorã, yo jã́đovameno mácarõre jipocamia ʉbenita jã́đovainore caride. Que baru obebecamuaque toivaicõjeivʉ mʉjare diena.
4 3:4-6 Yópebu ʉ̃i dápiaiye báquepe jipocamia: Mʉje jápiaiye boje Jesucristoi yávaiye méne, mʉja judíova ãmevʉ Jʉ̃menijicʉi meađaimaramu ñʉja judíovaque. Ñʉjaque jacopʉrãjaramu mʉja caiye iye Jʉ̃menijicʉi mearo đacaiyede, ʉ̃i jíquiyede ʉ̃i põevare. Ñʉjaque cũináyajubo põeyajubocavʉbu mʉja. Que baru ñʉjaque mearo đacacʉyʉme mʉjare Jʉ̃menijicʉ yópe ʉ̃i aiye báquepe. Caiye iye mʉjetamu, mʉje cʉe boje Jesucristoque cũinávʉpe. Iye ji toivaicõjeiye báquede jã́ivʉ baru coreóvarãjaramu mʉja yʉre me majicʉre Jʉ̃menijicʉi ʉrõre yo jã́đovameno mácarõre jipocamia ʉbenita jã́đovainore caride. Javede ácʉ põecʉre Jʉ̃menijicʉ jã́đovamenejaquemavʉ diede, ʉ̃i dápiarĩ jã́đovame máquede. Que baru javede, “Judíova quévʉratamu Jʉ̃menijicʉi meađarãjimara”, arĩ dápiarĩdurejaquemavʉ. Ʉbenita caride ñai Espíritu Santore majide đaibi Jʉ̃menijicʉi dápiaiyʉrõre, ñʉja Jesúre jʉ aivʉre ne daroimarare coyʉrãjivʉre Jesús ʉ̃i yávaiye méne aru Jʉ̃menijicʉi yávaiyede coyʉcaipõevare, ʉ̃́re memecaivʉre. 5 — 6 —
7 Yʉrecabu Jʉ̃menijicʉi beorĩ epeimʉ ʉ̃́re memecacʉyʉva. Ʉ̃i majide đaiye bojecʉbeda yʉre, bueyʉbu yʉ Jesús ʉ̃i yávaiye méne. Majide đaibi yʉre ji ũmei ji buequiyepe ayʉ ʉ̃i ʉrarõ majiéque. 8 Yʉrecabu caivʉ ina Jʉ̃menijicʉi põeva ne cãchinocacʉpe páyʉ baju. Ʉbenita Jʉ̃menijicʉ ʉrarõ mearo đacaibi yʉre, bueicõjeñʉ mʉja judíova ãmevʉre iye yávaiye méne, mʉje coreóvarãjiyepe ayʉ aipe baju meacʉre ñai Cristore aru aipe ʉrarõ mearo cũiménore đacayʉre ʉ̃́re jʉ aivʉre. 9 Jʉ̃menijicʉ ʉ̃i dápiainore jã́đovameno mácarõre coreóvare đaicõjeimi yʉre põevare cũinátʉrʉra beobecʉva. Ñai cʉeđayʉ bácʉ caiye ijãravʉquede yópe ʉ̃i đaiyʉepe đaibi ʉ̃ ʉ̃i cʉeđarĩburu yóbore pʉ carita. 10 Que đaibi Jʉ̃menijicʉ caivʉ cõjeivʉre aru parʉrivʉre máre, ángelevare aru abujuvare máre, ne coreóvarãjiyepe ayʉ caride ʉ̃ majicʉre caiyede aru caiye ʉ̃i dápiaiye me matʉiyede. Diede coreóvarãjarama ne jã́iyede Jʉ̃menijicʉi đaiyede ʉ̃ jinare caivʉ Jesucristore jʉ aivʉre.
11 Que baru Jʉ̃menijicʉ đarejaquemavʉ yópe ʉ̃i dápiarĩ đaiyʉrõpe, “Que đacʉyʉmu” ʉ̃i aino mácarõpedeca, ijãravʉre ʉ̃i cʉeđaquiye jipocamia. Maje jabocʉ Jesucristoi đaiye báque boje, Jʉ̃menijicʉ đarejaquemavʉ caiyede ʉ̃i ʉrõpe. 12 Maje cʉe boje Jesucristoque cũinávʉpe aru maje jʉ aiye boje ʉ̃́re jidʉbevʉva jẽniaivʉbu Jʉ̃menijicʉque. Majidivʉbu jidʉé jaʉbede majare ʉ̃i jã́inore. 13 Que baru parʉrõreca jẽniaivʉ mʉjare. Ʉetʉbevʉva chĩomejara mʉja ji ñájiyede ji bueiye báque boje mʉjare. Ji ñájiyede mʉjare boje, mʉjarecabu Cristoi meađaimara. Jãve ʉrarõ mearo cađateino cʉvarivʉbu mʉja caride.
Pablo ʉ̃i jẽniaino Éfesocavʉre Jʉ̃menijicʉque
14 Mʉja, judíova ãmevʉ, mʉje Jʉ̃menijicʉi põeva teiye boje, majepacʉ Jʉ̃menijicʉre ñʉatutarĩ torojʉede jívʉ yʉ ʉ̃i jã́inore. 15 Majepacʉ Jʉ̃menijicʉrecabe cʉeđayʉ bácʉ caivʉ cavarõ mearocavʉre aru caivʉ ijãravʉcavʉre máre. Caivʉ náre ne yajuboa coapa epedejaquemavʉ ʉ̃. Que teni népacʉpe páyʉ cʉrĩ, coreóvare đaibi náre coapa aipe meacʉ ãrojajʉrocʉre põecʉi pacʉre. Que baru jẽniaivʉ Jʉ̃menijicʉque mʉjare boje. 16 Ʉrarõ mearo bajutamu Jʉ̃menijicʉi parʉé. Que baru jẽniaivʉ yʉ ʉ̃́que, ʉ̃i pʉeno jʉ are nʉre đaquiyepe ayʉ mʉjare ʉ̃i majiéque yópe ʉ̃i parʉé cũimépe. Ñai Espíritu Santorecabe pʉeno jʉ are nʉre đayʉ mʉjare ʉ̃i majiéque. 17 Jẽniaivʉ yʉ Cristo cʉcʉyʉre mʉjaque mʉje ũmei. Que đacʉyʉme ʉ̃, mʉje jʉ aiye boje ʉ̃́re. Jẽniaivʉ yʉ ʉeque dápiarãjivʉre mʉja aru đarãjivʉre caiye mʉje đarãjiyede, mʉje ʉe boje apevʉ Jesúre jʉ aipõeva.
18 Que baru mʉja caivʉ, apevʉ Jʉ̃menijicʉi põevaque, coreóvaivʉ bʉojarãjaramu aipe Jʉ̃menijicʉ ʉrarõ meacʉre. Yópe mearo đacaiyʉbi ʉ̃ jabovare aru jabova ãmevʉre máre. Cainoa joborõacavʉre mearo đacaiyʉbi cainʉmʉa, Cristoi ʉe boje põevare. 19 Iye Cristoi ʉede põevare ye jápiarĩ eaivʉ bʉojabenamu maja. Ʉbenita maja coreóvarĩ bʉojabevʉreca caiye ʉ̃i ʉede, jẽniaivʉ yʉ mʉje ʉrarõ coreóvare nʉrajiyepe ayʉ. Ʉ̃i ʉede coreóvarĩ tenanʉrajaramu mʉja yópe Jʉ̃menijicʉ bajupe.
20 Mearore jíjarãri caivʉ majepacʉ Jʉ̃menijicʉre. Ʉ̃i majié parʉéque ʉrarõ mearo đare đacaibi majare, maje ʉ̃́re jẽniajʉroe pʉeno aru maje dápiajʉroe pʉeno máre. 21 Caivʉ põeyajuboacavʉ Jesúre jʉ aivʉ ne cʉe boje aru Jesucristoi cʉe boje máre, mearore jíjarãri caivʉ majepacʉ Jʉ̃menijicʉre dajocabevʉva cainʉmʉa, jã́đovarajivʉ ʉ̃́re meacʉ bajure. Quédecabu.