Tito

Pablo ʉ̃i coyʉino Titore bueiye méne

(Mt 20.28; Mr 10.45; Gá 1.4; 1 Ti 2.6; 1 P 2.9; 2 P 1.1)

2 Ʉbenita mʉ́capũravʉ coyʉjacʉ põevare iye bueiyede jãvene. 2 Ina ʉ̃mʉva bʉcʉva corejarãri me ne đaiyede. Aru đajarãri yópe põeva ne pueđaimarape. Ðajarãri majiéque. Jʉ ajarãri parʉrõreca iye bueiyede jãvene. Jʉ̃menijicʉre ʉjarãri aru põevare máre. Aru napijarari ne ñájiyede máre. 3 Quédeca ina nomiva bʉcʉrõmiva đajarãri yópe nomiva Jʉ̃menijicʉre jʉ aivʉpe. Yávabejarãri borocʉede apevʉi borore. Aru ũcumejarari na pʉ ne pacotede đaiyeta. Quénora jã́đovajarari apevʉre mearo đaiyede ne baju đaiyeque. 4 Que teni majide đajarãri ina nomiva bojʉrõmivare aipe đaiye jaʉrõre, ne ʉrãjiyepe aivʉ némarepacʉva aru némarare máre. 5 Majide đajarãri náre aipe đaiye jaʉrõre, ne đarãjiyepe aivʉ majiéque, aru ne đabenajiyepe aivʉ ãmenore, ne memenajiyepe aivʉ me ne cʉ̃ramiai, ne cađatenajiyepe aivʉ apevʉre, aru ne jʉ arãjiyepe aivʉ torojʉrivʉ némarepacʉre. Que đaiye jaʉvʉ náre põeva ne ãmeina yávabenajiyepe aivʉ Jesús ʉ̃i yávaiye méne.

6 Quédeca coyʉjacʉ parʉrõreca ina ʉ̃mʉva bojʉvʉre, ne đarãjiyepe ayʉ majiéque máre. 7 Jã́đovajacʉ náre cainʉmʉa mi baju mearo đaiyeque aipe đaiye jaʉrõre náre. Mi bueiyede náre buejacʉ caiye iye yávaiyede jãvene. Ãrʉmetebejacʉ aru oatʉvabejacʉ apejĩene. Que baru mi bueiye bajađéni nurié cainʉmʉa. Aru buejacʉ ina mʉre jápiaivʉ ne pueđarãjiyepe ayʉ mʉre aru mi bueiyede máre. 8 Coyʉjacʉ náre iye yávaiyede jãvene, põeva “Ãmecʉbe ñai”, aru “Ãmene buebi ʉ̃”, ne arĩ bʉojabenajiyepe ayʉ. Que teni apevʉ maucʉvarivʉ baru maje bueiyede, cʉyoje tenajarama, ne boro coyʉrĩ ađarĩ bʉojabe boje majare.

9 Quédeca coyʉjacʉ ina memecaipõevare, ne jʉ arãjiyepe ayʉ ne jabovare cainʉmʉa. Ðajarãri ina memecaipõeva yópe ne jabovai ʉrõpe, cojʉquiyepe náre. Aru ãmeina yávabejarãri ne jabovare. Quénora pueđajarãri náre cainʉmʉa. 10 Aru ñavamejarari ne jabovai cʉvaede. Quénora jã́đovajarari ne jabovare ne mearo đacaiyede cainʉmʉa. Que teni ina memecaipõeva me jã́re đarãjarama apevʉ põevare iye Jʉ̃menijicʉi yávaiyede, majare meađayʉ, ʉ̃i bueicõjeiyede majare.

11 Que baru Jʉ̃menijicʉ meacʉ baju jã́đovaimi ʉ̃i mearo đacaiye bojecʉbeda majare. Que teni Jʉ̃menijicʉ bʉojare đayʉbe caivʉ põevare ʉ̃i meađaiyʉrĩduimara márajivʉre. 12 Que baru majidivʉbu maja majare jaʉrõre maje dajocaiye maje ãmeina teiyede iye Jʉ̃menijicʉi ʉbede, aru maje dajocaiye maje đaiyʉede yópe Jesúre jʉ abevʉ ne đaiyepe máre. Quénora maje cʉede ijãravʉi jaʉvʉ majare maje đaiye majiéque, maje mearo đaiye Jʉ̃menijicʉi jã́inoi, aru maje memecaiye máre Jʉ̃menijicʉre ʉ̃i ʉrõpe. 13 Que đaiye jaʉvʉ majare maje napini coreiyede torojʉrivʉ iye jãve vaiquíyede: Jesucristo, majare meađayʉ, maje jʉ aimʉ pʉeno meacʉ baju, copaidacʉyʉme ijãravʉi. 14 Jesucristo boarĩ́ jarʉvaicõjenejaquemavʉ ʉ̃i bajure ʉ̃i mauvare, meađacʉyʉ majare maje ãmeina teiyede jarʉvarĩ. Que đaicõjenejaquemavʉ, meara đacʉyʉ majare, maje torojʉrĩ memecarãjiyepe ayʉ ʉ̃́re me ʉ̃ jinape.

15 Que baru buejacʉ mʉ caiye iyede. Coyʉjacʉ parʉrõreca ina Jesúre jʉ aipõevare, ne đarãjiyepe ayʉ caiye iyede. Jã́đovajacʉ ina põeva nópe đabevʉ cãreja aipe đaiye jaʉrõre náre. Aru buejacʉ náre parʉéque. Que teni ãmeina jã́icõjemejacʉ põevare mʉre.