Hechos

Jabova ne boarĩ́ jarʉvaino Santiagore aru ne bʉoino Pedrore

12 Dijãravʉai ñai jabocʉ Herodes ñájine đarĩ bʉ́rejameđa apevʉ Jesúre jʉ aipõevare. 2 Boarĩ́ jarʉvaicõjenejameđa Santiagore, Jũai mamicʉre, boaicaroveque. 3 Ʉ̃i boarĩ́ jarʉvaiye báque Santiago bácʉre cojʉrejavʉ̃ya ina judíovai jabovare. Que baru bʉoicõjenejameđa Pedrore. Dinʉmʉ pã́ure bʉcʉre đaiye cʉbe ãiye torojʉve teinʉmʉ marejávʉ̃ya. 4 Pedrore ne jẽniburu yóboi, nʉvarejaimađa ʉ̃́re ãmeina teivʉre jẽni jacoiñami. Noi yóvaicʉvaiyajuboa churarava jã́ri coreivʉ barejáimađa ʉ̃́re. Yóvaicʉvaivʉ churarava barejáimađa yajuboa coapa. Aru ina churarava jã́ri coredejaimađa ʉ̃́re ne yajuboa coapa. Herodes davaicõjecʉyʉ barejámeđa Pedrore põeva ne jã́inoi Pascua ãmicʉrijãravʉ yóboi, acʉyʉ ʉ̃́re “Yaicʉ́yʉmu mʉ”. 5 Que teni ina churarava me coreivʉ barejáimađa Pedrore ãmeina teivʉre jẽni jacoiñami jívʉi. Ʉbenita ina Jesúre jʉ aipõeva parʉrõreca jẽniaivʉ barejáimađa Jʉ̃menijicʉque ʉ̃́re jãravʉre aru ñamine máre.

Jʉ̃menijicʉ ʉ̃i jaetovaino Pedrore ãmeina teivʉre jẽni jacoiñamine jocarĩ

6 Cũináñami, Herodes davaicõjecʉyʉ Pedrore cõmiáijãravʉ jipocacañamine, Pedro cãñʉ marejámeđa ãmeina teivʉre jẽni jacoiñami jívʉi. Pʉcarã churarava coricai cãñʉ, pʉcamea tãumeaque bʉoimʉ mácʉ; cũinámeque bʉoimʉ mácʉ cũinácʉ churarare ʉ̃i meapũravʉi aru apemeque bʉoimʉ mácʉ apecʉ churarare ʉ̃i cãcopũravʉi. Aru apevʉ churarava máre coreivʉ barejáimađa diñami jedevacobe yebai. 7 Maumejiena ñai Jʉ̃menijicʉi daroimʉ, cũinácʉ ángele, cʉetedejameđa noi Pedro yebai. Aru miađárejavʉ̃ya diñami jívʉi. Ñai ángele jẽni jã́ñʉ marejámeđa ʉ̃́re cũinápũravʉi, ʉ̃́re coedavacʉyʉ, aru arejameđa ʉ̃́re:

—¡Maume coedajacʉ mʉ! arejameđa Pedrore.

Aru cũiná dimeá tãumea voarĩ tʉrejavʉ̃ya Pedroi ãmuveare jocarĩ. 8 Ñai ángele arejameđa ʉ̃́re:

—Bʉojacʉ mi jãrióicãvare. Dojacʉ mi cʉraidoare máre, arejameđa.

Jʉ arĩ, ʉ̃i đaicõjeiyepedeca đarejameđa Pedro. Aru ñai ángele arejameđa ʉ̃́re:

—Dojacʉ mi pʉenocacajede. Aru dajacʉ yʉ́que, arejameđa ʉ̃.

9 Pedro ʉ̃i yóboi nʉri, etarejameđa diñami jacoiñamine jocarĩ. Ʉbenita Pedrocapũravʉ coreóvabedejameđa ʉ̃i đaiye jãvene. “¿Decoboaino márica yo?” arĩ dápiarejameđa Pedro. 10 Nʉre nʉivʉ vaidéjaimađa cũináyajubo churarava coreivʉre. Aru vaidéjaimađa apeyajubore máre, churarava coreivʉre. Quénora earejaimađa na ʉracobe jedevacobe parʉricobe tãuque đaicobede, nʉino ĩmaroi. Dicobe bajumareca vorejavʉ̃ya, ne etarãjiyepe diñami jacoiñamine jocarĩ. Nʉimai cuivʉ barejáimađa na. Aru cũiná ñai ángele dajocarejameđa Pedrore cũinácʉra. 11 Dinʉmʉmia Pedro coreóvarejameđa iye ʉ̃́re vaiye jãvene. Yópe arĩ dápiarejameđa: “Caride majivʉ yʉ caiye iye jãvene. Jʉ̃menijicʉ darocʉbe ʉ̃i ángelede, ʉ̃i jaetovaquiyepe ayʉ yʉre Herodes ʉ̃i đaicõjeiyede jarʉvarĩ, ʉ̃i đabequiyepe ayʉ yʉre yópe ina judíovai jabova ne ʉrõpe”, arĩ dápiarejameđa Pedro ʉ̃i baju.

12 Ʉ̃ coreóvayʉ caiye iyede, nʉrejameđa Maríai cʉ̃rami. Ico María Jũai paco barejácođa. Aru ñai Jũavacari ãmicʉrejameđa Marcos máre. Obedivʉ põeva cójijivʉ diñami jẽniaivʉ barejáimađa Jʉ̃menijicʉque, ʉ̃i meađaquiyepe aivʉ Pedrore. 13 Ne jẽniaiyedeca, Pedro eayʉ diñami jedevacobei, órejarejameđa. Aru cũináco ne yebacaco, õi ãmiá Rode, voaconʉridurejacođa õ. 14 Ʉbenita Pedrore jápiarĩ, coreóvarĩ, pare torojʉrejacođa õ. Que baru cúyarĩ copainʉrejacođa põevai cʉritucubʉi cojedeca, jedevacobede voabecova cãreja. Ina jẽniaivʉre torojʉco arejacođa õ:

—Jedevacobei cʉbi Pedro, arejacođa õ.

Ʉbenita jʉ abevʉ ṍre, arejaimađa na:

15 —Ãrʉmecobu mʉ, arejaimađa.

Ʉbenita parʉrõreca:

—Jãvetamu. Jápiajarã yʉre. Jedevacobei cʉbi Pedro, arejacođa ṍcapũravʉ.

Ina cójijivʉ arejaimađa ṍre:

—Ʉ̃́recabe Pedro bácʉi decocʉ, mi jápiaimʉ, arejaimađa na.

16 Aru ne nópe yávaiyedeca, Pedrocapũravʉ dajocabecʉva órejayʉ barejámeđa ʉ̃ cãreja. Quénora apevʉ nácavʉ jedevacobede voaivʉ, Pedrore jã́ivʉ, cuecumarejaimađa na. 17 Pedro cʉ̃rami ecorĩ, ʉ̃i pʉrʉque jã́đovari, bi aicõjeni, coyʉrejameđa náre caiye iye Jʉ̃menijicʉi đaiye báquede jaetovacʉyʉ ʉ̃́re ãmeina teivʉre jẽni jacoiñamine jocarĩ.

—Iye ji coyʉiyede Santiago, Jesúi yócʉre, máre coyʉjarã mʉja, aru caivʉ apevʉ Jesúre jʉ aipõevare máre, arejameđa náre Pedro.

Náre yávarĩ bʉojarĩ, Pedro etarejameđa diñamine jocarĩ, nʉcʉyʉ apenoita.

18 Cõmiáijãravʉ miađáe tʉiyede ina ãmeina teivʉre jẽni jacoiñami churarava pare jidʉrivʉ cãrijinejaimađa na. Jẽniari jã́ivʉ barejáimađa ne bajumia:

—¿Ã́ri cʉri Pedro? ¿Aipe tedica ʉ̃? arejaimađa.

19 Herodes churaravare voicõjenidurejameđa Pedrore. Ʉbenita eabedejaimađa ʉ̃́re. Que baru Herodes jẽniari jã́rejameđa ina churaravare ne majiéde Pedroi borore. Aru boarĩ́ jarʉvaicõjenejameđa náre, Pedro ʉ̃i dupini nʉiye boje náre jocarĩ.

No yóboi, Herodes ẽmenejameđa Judea ãmicʉrõre jocarĩ, cʉcʉyʉ Cesarea ãmicʉriĩmaroi.

Herodes ʉ̃i yaino

20 Ʉ̃i cʉede noi, pare jararejameđa ñai Herodes Tiro aru Sidón ãmicʉriĩmaroacavʉre máre. Que baru apevʉ diĩmaroacavʉ cójijidejaimađa, cãrijimene đaiyʉrãjivʉ Herodede. Diĩmaroacavʉ ĩni bojeđaivʉ barejáimađa ne ãrajiyede Herodei jaboteinoi. Que baru maucʉvaiyʉbedejaimađa ʉ̃́re. Mamarʉmʉre coyʉrãnʉrejaimađa Blastore, jẽniarajivʉ ʉ̃i cađatequinore náre. Ñai Blasto Herodei cʉ̃ramine coreipõecʉ barejámeđa. Ne coyʉiyede jápiayʉ, ne jẽniaiyede jʉ ayʉ, cađateiyʉrejameđa náre. Ʉ̃i cađateiyeque, cójijini, nʉrajivʉ barejáimađa Herodes yebai, jẽniarajivʉ ʉ̃i cãrijimene đaquiyepe aivʉ náre. 21 Que baru cũinájãravʉ, Herodes ʉ̃i beoijãravʉi, ʉ̃i meacaje jabocʉi doicajede dorĩburu yóboi, ne cójijinoi nʉri, jabocʉi dobarõra dobarĩ, yávarejameđa náre joe ñai Herodes. 22 Aru yávarĩburu yóboi, caivʉ ina cójijivʉ, yópe arĩ, cođoboboivʉ barejáimađa:

—¡Jʉ̃menijicʉi yávaiyepe yávaibi ʉ̃! Yávabebi ʉ̃mʉpe. ¡Jʉ̃menijicʉi yávaiyepe yávaibi ʉ̃! cođoboborĩ arejaimađa na.

23 Maumejiena Jʉ̃menijicʉi daroimʉ, cũinácʉ ángele, pare ijino jídejameđa Herodede, “Yʉ máre ʉ̃mʉrecabu. Jʉ̃menijicʉ ãmevʉ yʉ” ʉ̃i arĩ coyʉbe boje ina põevare. Que teni júva ne ãimʉ yaidéjameđa ʉ̃, Herodes bácʉ.

24 Ʉbenita apevʉ põeva obedivʉ Jʉ̃menijicʉi yávaiye méne coyʉiyede jápiarĩ, jʉ arejaimađa diede. Caijãravʉa apevʉ ne jʉ aiyede pʉeno baju obedivʉ jʉ aivʉ nʉrejaimađa.

25 Bernabé aru Saulo ne jíniburu yóboi iye tãutʉrare jʉ aivʉre coreipõevare, copainʉrejaimađa Jerusalén ãmicʉriĩmarore jocarĩ. Aru Juan Marcore nʉvarejaimađa náque Antioquía ãmicʉriĩmaroi.