1 Timoteo
Aipe đaiye jaʉrõ Jesúre jʉ aivʉre coreipõevare
3 Jãvetamu iye. Ñai põecʉ coreiyʉcʉ baru Jesúre jʉ aipõevare, ʉ̃ memecaiyʉbi me Jʉ̃menijicʉre. Que baru mearomu ʉ̃i đaiyʉrõ. 2 Ñai coreiyʉcʉ Jesúre jʉ aipõevare đaiye jaʉvʉ ʉ̃́re cainʉmʉa yópe põeva “Ãmecʉbe ñai”, ne boro coyʉrĩ ađaivʉ bʉojabenajiyepe aiye ʉ̃i borore. Aru đaiye jaʉvʉ ʉ̃́re cainʉmʉa yópe põeva ne jã́đovamenajiyepe aiye ʉ̃i ãmeina teiyede. Jaʉvʉ ʉ̃́re máre ʉ̃i cʉvaquiyepe jímarepaco cũinácora. Coreiye jaʉvʉ ʉ̃́re me ʉ̃i đaiyede. Aru đaiye jaʉvʉ ʉ̃́re majiéque. Ðaiye jaʉvʉ ʉ̃́re yópe põeva ne pueđaimʉpe. Me copʉ etarĩ jacoyʉiye jaʉvʉ ʉ̃́re ina curãdaivʉre. Aru me bueiye jaʉvʉ ʉ̃́re ʉ̃i coreimarare máre. 3 Ũcumejacʉrĩ pacotede đaiyede. Aru ãđamateiyʉbejacʉrĩ. Quénora meacʉ põecʉ bajacʉ́rĩ. Aru jarabejacʉrĩ. Tãutʉrare jecʉbeni, diede pare ʉrĩ vore nʉmejacʉrĩ. Aru ãujimejacʉrĩ apevʉ ne cʉvaede. 4 3:4-5 Ñai ʉ̃mʉ bʉojabecʉ baru jaboteyʉ ʉ̃i cʉ̃ramicavʉre, jãve bʉojabecʉbe coreyʉ Jʉ̃menijicʉi cʉ̃ramicavʉre, Jesúre jʉ aipõevare. Que baru jaʉvʉ ʉ̃́re ʉ̃i jaboteiye me ʉ̃i cʉ̃ramicavʉre, mamara ne jʉ arãjiyepe aiye ʉ̃́re aru ne pueđarãjiyepe aiye ʉ̃́re máre cainʉmʉa. 5 — 6 Cũinácʉ ʉ̃mʉ mama jʉ ayʉ Jesúre corebejacʉrĩ apevʉ Jesúre jʉ aipõevare, “¿Meacʉ bárica yʉ apevʉ pʉeno?” arĩ dápiabecʉyʉ. Ʉ̃i que aru, Jʉ̃menijicʉ “Ñájicʉyʉmu mʉ”, ajebu ʉ̃́re nópe “Ñájicʉyʉmu mʉ”, ʉ̃i aiye báquepedeca ñai abujuvai jabocʉre. 7 Aru ñai Jesúre jʉ aivʉre coreipõecʉre đaiye jaʉvʉ cainʉmʉa yópe ina Jesúre jʉ abevʉ ne me yávarãjiyepe aiye ʉ̃́ra. Ʉ̃i ména đabedu ina jʉ abevʉ ãmeina yávarãjarama ʉ̃́ra. Que teni vainí tʉcʉyʉme ʉ̃́re ñai abujuvai jabocʉ ʉ̃i jʉjovaiyeque. Ñai abujuvai jabocʉ jẽcʉyʉme ʉ̃́re nopedeca doriñʉ jẽiyepe moacʉre.
Aipe đaiye jaʉrõ Jesúre jʉ aivʉre cađateipõevare
8 Quédeca ina Jesúre jʉ aivʉre cađateipõeva máre, jaʉvʉ náre ne mearo đaiye cainʉmʉa. Jaʉvʉ náre ne đaiye yópe põeva ne pueđaimarape, aru ne yávaiye máre jãve caivʉre jʉjovabevʉva. Ʉrarõ ũcuiyede ũcumejarari na pʉ ne pacotede đaiyeta. Aru vorĩ eabejarãri na tãutʉrare ãmei dápiaiyeque. 9 Jaʉvʉ náre ne jʉ aiye jãve “Boropatebevʉ yʉ”, ne arĩ dápiaiyeque iye bueiyede jãvene, Jʉ̃menijicʉi jã́đovameno mácarõre jipocamia ʉbenita jã́đovainore caride. 10 Apevʉ jã́rajarama ne cʉede. Aru náre ãmeina teiyede jã́menu, memecajarãri na Jesúre jʉ aivʉre cađateipõevape. 11 Quédeca ina nomiva Jesúre jʉ aipõevare cađateinomiva máre, jaʉvʉ náre ne mearo đaiye cainʉmʉa, yópe põeva ne pueđaimarape. Yávabejarãri borocʉede apevʉi borore. Corejarãri me ne đaiyede máre. Jaʉvʉ náre máre ne bʉojaiye me caiye ne memeiyede. 12 Jaʉvʉ ina Jesúre jʉ aivʉre cađateipõevare ne cʉvarãjiyepe némarepacova cũinácora. Aru jaʉvʉ náre ne jaboteiye me némarare aru caivʉ ne cʉ̃ramicavʉre máre. 13 Que teni ina Jesúre jʉ aivʉre cađateipõeva ne memecaru me, põeva pueđarãjarama náre. Que baru nácapũravʉ bʉojarãjarama coyʉivʉ jidʉbevʉva aipe ne jʉ aiyede maje jabocʉ Jesucristore.
Jʉ̃menijicʉ ʉ̃i jã́đovameno mácarõre jipocamia coyʉino
14 3:14-15 Jã́cʉnʉiyʉvʉ yʉ mʉre maumena. Ʉbenita caride toivaicõjeivʉ apecʉre mʉre yo paperayocare, ji járobedu mi majiquiyepe ayʉ aipe đaiye jaʉrõre ne bajumia Jʉ̃menijicʉi põevare, Jesúre jʉ aipõevare, ñai Jʉ̃menijicʉ apʉcʉ jinare. Nácapũravʉ coyʉyama Jʉ̃menijicʉi yávaiyede ʉ̃i toivaicõjeiye báquede ne bajumia. Aru bueđama apevʉre parʉrõreca diede máre. 15 — 16 Jãve pʉeno métamu iye bueiye jãve, Jʉ̃menijicʉi jã́đovameno mácarõ jipocamia ʉbenita jã́đovaino caride, maje majinajiyepe aiye aipe đarĩ cʉrãjivʉ meara Jʉ̃menijicʉi jã́inore. Yópe arĩ, coyʉivʉbu maja:
Cristo járorejaquemavʉ ijãravʉi põecʉpe. Aru ñai Espíritu Santo jã́đovarejaquemavʉ ʉ̃́re pʉeno meacʉ bajure. Ina ángeleva jã́rejaquemavʉ ʉ̃́re. Põeva coyʉrejaquemavʉ ʉ̃i borore caivʉ joborõcavʉre. Ijãravʉcavʉ jʉ arejaquemavʉ ʉ̃́re. Aru Jʉ̃menijicʉ mʉvarejaquemavʉ ʉ̃́re cavarõ mearo ʉ̃i cʉrõi, arĩ coyʉivʉbu maja.