Efesios
Aipe đaiye jaʉrõ Jʉ̃menijicʉi márare
5 Majamu Jʉ̃menijicʉi mára pare ʉ̃i ʉmara. Que baru me đarĩ jã́rajarevʉ, đarãjivʉ yópe Jʉ̃menijicʉi đaiyepe. 2 Caiye maje đaiyede đarãjarevʉ maje ʉe boje Jʉ̃menijicʉre aru apevʉre máre. Cristovacari ʉcʉ majare, boarĩ́ jarʉvaicõjenejaquemavʉ ʉ̃i bajure majare boje. Ʉ̃i nópe đaiye báque cojʉrejaquemavʉ Jʉ̃menijicʉre, yópe cojʉépe ʉ̃́re põeva ne cʉvaequede jíye aru ne ãimarare boarĩ́ juarĩ jíye máre. Yópe iye jíye me corajʉvʉ ʉ̃́re mumijʉepe, nopedeca Cristoi yaiye báque majare boje me cojʉrejaquemavʉ Jʉ̃menijicʉre. Yópe Cristoi đaiye báquepe ʉrarõ baju ʉ̃i ʉe boje majare, nopedeca ʉrarõ ʉre nʉiye jaʉvʉ majare máre.
3 Majamu Jʉ̃menijicʉi põeva, ʉ̃́re memecaivʉ. Que baru ãmeina đaiye jaʉbevʉ majare. Aru ãmeina đaiyede apevʉque mʉjemarebʉcʉva ãmevʉque ye dápiabejarã mʉja. Aru mʉja ʉ̃mʉva nomivaque ãmenore đaiyʉrĩ dápiabejarã mʉja. Aru mʉja nomiva máre ʉ̃mʉvaque ãmenore đaiyʉrĩ dápiabejarã mʉja. Aru mʉje cʉvae pʉeno baju cʉvaiyʉrĩ dápiabejarã mʉja. Caiye diepe paiye mʉje dápiaru, meamenotamu. 4 Aru apejĩene máre đaiye jaʉbevʉ mʉjare. Que baru coyʉbejarã ãmene cʉyoje tede đaiyede. Aru yávabejarã ãrʉmevʉpe máre. Yʉrivʉpeda yávabejarã ãmeina baju yávaiye máre. Meamevʉ diepe paiye yávaiye. Quénora pʉeno baju torojʉede jíjarã Jʉ̃menijicʉre. 5 Me majijarã mʉja iyede jãve: Põeva đaivʉ baru ãmenore apevʉque némarebʉcʉva ãmevʉque aru põeva ãmeina đaivʉ baru ʉ̃mʉva nomivaque aru nomiva ʉ̃mʉvaque, ina põeva nópe đaivʉ cʉrãnʉmenajarama Jʉ̃menijicʉque aru Cristoque máre. Ye ne jaboteimara ãmenajarama na. Aru põeva ʉrivʉ baru pʉeno baju ne cʉvaede Jʉ̃menijicʉre jarʉvarĩ, pẽpeimarare mearore jívʉpe paivʉbu na. Que baru põeva nápe paivʉbu cʉbenajivʉ Cristoque cavarõ mearo Jʉ̃menijicʉi cʉrõi. 6 Jʉ̃menijicʉ jorojĩni jã́ri, ñájine đacʉyʉme põevare diepe paiyede đaivʉre, ʉ̃́re jʉ abevʉre, ne ãmeno đaiye boje. Que baru ñamene jʉjovaicõjemejara mʉja ʉbeni cʉeque, “Ye baju ãmevʉ ñʉje đaru ãmenore”, ne aiye. 7 Ye đabejarã nápe ina ãmenore đaivʉpe.
8 Mʉjarecabu ñeminoi cuivʉ bácavʉpe javede, mʉje ãmenore đare nʉiye báque boje. Ʉbenita caride, mʉje jʉ aiye boje maje jabocʉ Jesucristore, miađároi cuivʉpebu mʉja caride. Que baru mʉjare đaiye jaʉvʉ yópe ina miađárijãravʉi cuivʉ ne đaiyepe. 9 Que teni meara marajáramu mʉja Jʉ̃menijicʉi jã́inore. Caino mearore đarãjaramu mʉja apevʉ põeva ne jã́iyede. Aru yávaiyede jãvene coyʉrãjaramu mʉja máre. 10 Me đarĩ jã́rajarevʉ, đarãjivʉ mearore yópe Jʉ̃menijicʉi ʉrõpe. 11 Mʉjacapũravʉ đabejarã yópe ina põeva ñeminoi cuivʉpe. Ina ãmenore đaivʉbu ñeminocavʉ. Iye ne đaiye bojecʉbetamu. Que baru iye ne ãmeina đaiyede coreóvare đajarã náre. 12 Iye ãmene ne đaiye põeva ne jã́mene ʉrarõ baju cʉyojetamu die. Que baru ye coyʉiye jaʉbevʉ põevare diena. 13 Ʉbenita ne đaiyede mʉje coreóvare đarĩburu yóboi, majinajarama Jʉ̃menijicʉ ãmeina jã́ñʉre ne que đaiyede. 14 Mʉje coreóvare đaiyede náre diena yópe ñeminore pẽoiyepebu. Que baru põeva, yópe arĩ, yʉriaivʉbu diepe paiyede đaivʉrã:
Mʉ, Jʉ̃menijicʉre coreóvabecʉ, cãñʉpe páyʉ, coedajacʉ, coreóvacʉyʉ ʉ̃́re. Nacajajacʉ yainore jarʉvarĩ. Aru Cristo cʉre đacʉyʉme mʉre miađároi, arĩ coyʉivʉbu.
15 Que baru me matʉiyeda đajarã apejĩe mʉje đaiyede. Ðabejarã yópe ina coreóvabevʉ, Jʉ̃menijicʉre ãrʉmevʉ, ne đaiyepe. Quénora đajarã mʉja yópe ina coreóvaivʉ, Jʉ̃menijicʉre ãrʉrivʉ, ne đaiyepe. 16 Caride ijãravʉcavʉ Jʉ̃menijicʉre jʉ abevʉ ʉrarõ ãmene đaivʉbu. Que baru cainʉmʉa mʉje oainope Jʉ̃menijicʉre memecaiye jaʉvʉ mʉjare. 17 Que baru đabejarã coreóvabevʉpe. Quénora me đarĩ jã́jara, coreóvarãjivʉ maje jabocʉ Cristoi ʉrõre, mʉje đarãjiyepe ayʉ yópe ʉ̃i ʉrõpe. 18 Ũcumejara pacotebeburĩ mʉja. Pacoteivʉ baru, ãmeđarãjaramu mʉja, mʉje đaicõjeme boje mʉje bajure. Quénora mʉjacapũravʉ đaicõjejara ñai Espíritu Santore ʉ̃i majiéque. 19 Mʉja que đaivʉ baru, torojʉrãjaramu. Que baru coyʉjarã mʉjevʉre iye Salmos ãmicʉeque. Aru mearore jíjarã Jʉ̃menijicʉre yʉriainoque, aru ʉ̃i Espíritu jino yʉriainoque máre. Yʉriajarã mearore jíyede aru Salmore máre maje jabocʉ Cristore. Yópe đaivʉ mearore jíyeque yʉriaivʉbu mʉja mʉje ũmei. 20 Que baru caiye ʉ̃i vaidé đaiyede, torojʉede jíjarã majepacʉ Jʉ̃menijicʉre cainʉmʉa maje jabocʉ Jesucristoi parʉéque, mʉje cʉe boje ʉ̃́que cũinávʉpe. 21 Pueđarĩ jápiajarã mʉja mʉje bajumia, mʉje pueđaiye boje Cristore.
Mearo đaiye jaʉrõ cʉ̃ramicavʉque aru memeivʉque máre
(Mt 15.4, 19.5; 2 Co 11.2; Col 3.18-25, 4.1; 1 P 3.1, 7; Ap 21.2, 9)
22 Mʉja, ʉ̃mʉcʉrivʉ, jʉ ajarã mʉjemarepacʉre yópe mʉje jʉ aiyepe mʉje jabocʉ Cristore. 23 Nomicʉcʉ jaboteyʉbe jímarepacore yópe Cristoi jaboteiyepe caivʉ majare, ʉ̃́re jʉ aivʉre. Cristorecabe ñai meađayʉ majare, caivʉ ʉ̃́re jʉ aivʉre. Ʉ̃́vacari maje jabocʉbe, majare đaicõjeñʉ. Que baru ʉ̃́tame maje jipobʉpe páyʉ. 24 Aru majamu ʉ̃i bajupe paivʉ. Que baru yópe maje jʉ aiye jaʉépe Cristore cainʉmʉa, nopedeca ʉ̃mʉcʉcore jʉ aiye jaʉvʉ jímarepacʉre cainʉmʉa.
25 Mʉja, nomicʉrivʉ, jecʉjarã mʉjemarepacore yópe Cristoi jecʉépe caivʉ majare, ʉ̃́re jʉ aivʉre. Cristo pare ʉcʉ mʉjare, boarĩ́ jarʉvaicõjenejaquemavʉ ʉ̃i bajure. 26 Que đarejaquemavʉ maje ãmeina teiyede jarʉvarĩ, meađacʉyʉ majare aru coavacʉyʉ majare ʉ̃ jinava. Majare, ʉ̃́re jʉ aivʉre, meađarĩ joarejaquemavʉ majare maje jʉ aiye báquede aru maje jã́đovaiye báquede Jʉ̃menijicʉre ocoque.
27 Caiye iyede đaibi, cʉvacʉyʉ ʉ̃ jinava majare. Yópe põecʉi cʉvaiyʉepe jímarepaco bacođóre meaco bajure, nopedeca Cristo cʉvaiyʉbi majare. Ico pʉrʉbʉocođo bojʉyo baju, ye ãmeno cʉbecope, õpedeca barãjáramu maja, Jesucristore jʉ aivʉ máre. Pʉeno meara bajure aru ye ãmeno cʉbevʉre cʉvacʉyʉme Cristo majare, ʉ̃i baju đaiye báque boje. 28 Ina nomicʉrivʉre coreiye jaʉvʉ némarepacore, ye jaʉbequiyepe aivʉ ṍre, yópe ne coreiyepe ne bajuáre náre coapa. Ñai coreyʉ jímarepacore coreyʉbe ʉ̃i bajure. 29 5:29-30 Põecʉ cʉbebi cõenícʉ ʉ̃i bajure. Quénora javateni me cʉcʉbe. Aru cũinábajupe paivʉbu maja Cristoque. Que baru ʉ̃́recabe coreyʉ majare. 30 —
31 Jʉ̃menijicʉ toivaicõjenejaquemavʉ ʉ̃i yávaiyede, yópe arĩ: “Que baru caride ácʉ põecʉ jímarepaco bacođó cʉvacʉyʉ, ʉ̃i bʉcʉvare dajocacʉyʉme. Aru jímarepaco cʉvarĩ ṍmaque cũinávʉpetamu Jʉ̃menijicʉi jã́inore”, arĩ toivaicõjenejaquemavʉ Jʉ̃menijicʉ. 32 Iye yávaiye Jʉ̃menijicʉi toivaicõjeiye báque maiyójaevacari majare diede jápiarĩ coreóvajʉrorivʉre jãvetamu iye. Ji dápiaru, iye yávaiye coreóvare đaivʉ majare aipe ãrojaene Cristoi cʉede majaque, ʉ̃́re jʉ aivʉque. 33 Ʉbenita mʉjare máre coyʉivʉ die. Mʉja nomicʉrivʉ, mʉja coapa jecʉjarã mʉjemarepacore. Aru mʉja ʉ̃mʉcʉrivʉ, mʉja coapa pueđajarã mʉjemarepacʉre.