3 Juan
Gayo mearore jímʉ
(Hch 19.29; Ro 16.23; 1 Co 1.14; 2 Jn 4)
1 Yʉ, bʉcʉcʉ, Jesucristore jʉ aivʉre coreipõecʉ, toivacaivʉ mʉre, ji yóvaimʉ, ji ʉmʉ, Gayo. Yʉ́vacari jãve ʉvʉ mʉre, maje coreóvaiye boje Jʉ̃menijicʉi yávaiyede jãvene.
2 Mʉ, ji yóvaimʉ, ji ʉmʉ, yʉ Jʉ̃menijicʉque jẽniacaivʉ mʉre, ʉ̃i cađatequiyepe ayʉ mʉre caiye mi đaiyede, aru ʉ̃i me cʉre đaquiyepe ayʉ mi bajure duica ijiéde jarʉvarĩ yópe mi ũme cʉepe me ãmeina teiyede jarʉvarĩ. 3 Pare torojʉvʉ yʉ ji ũmei apevʉ majevʉ Jesúre jʉ aipõeva ne coyʉiyede, ne jã́riburu yóboi mʉre, aipe mi cʉede Jʉ̃menijicʉi yávaiyede jãvene jʉ ayʉ. 4 Yʉ́capũravʉ pʉeno baju torojʉvʉ majicʉ mʉje borore jímajinape paivʉre, cʉrivʉre jʉ arĩ Jʉ̃menijicʉi yávaiyede jãvene, yópe ʉ̃i ʉrõpe. Ye apejĩe cʉbevʉ torojʉre đaiye yʉre die pʉeno.
5 Mʉ, ji yóvaimʉ, ji ʉmʉ, cainʉmʉa mearo đaivʉ mʉ yópe đaiye jaʉépe mʉre mi cađatevaiyede majevʉre Jesúre jʉ aipõevare mi majibemara mácavʉreca. 6 Ina copaivʉ bácavʉ mʉre jocarĩ coyʉyama mi borore yui Jesúre jʉ aipõeva ne jápiaiyede. Coyʉyama aipe mi cađateiyede náre mi ʉe boje. Aru ne copaiyede mi yebai, cađatejacʉ náre cojedeca náre jaʉéde. Que teni mʉ me bʉojare đaquijivʉ náre yópe Jʉ̃menijicʉi ʉrõpe, ne curãnʉiyede. 7 Na etaima coyʉrãjivʉ Jesús ʉ̃i yávaiye méne ina Jesúre jʉ abevʉre cãreja. Aru náque yéde jacopʉbeteimađa apejĩene. 8 Que baru cađateiye jaʉvʉ majare máre ina Jesúre jʉ aivʉre ina coyʉivʉre iye yávaiyede jãvene, ne memecarãjiyepe aivʉ Jʉ̃menijicʉre jãve.
Diótrefes ʉ̃i ãmeno đaino aru Demetrio ʉ̃i mearo đaino
9 Apeyoca paperayocare toivacavʉ yʉ caivʉ Jesúre jʉ aipõevare mi yebai. Ʉbenita Diótrefes, ñai caivʉre jaboteiyʉcʉ, jápiaiyʉbebiya ji coyʉiye báquede aru jʉ abebiya yʉre. 10 Que baru ji daiyede mi yebai coreóvare đaquijivʉ yʉ caivʉre aipe ʉ̃i đaiye báquede. Borocʉcʉ ãmeina yávaibiya ñʉjare. Aru pʉeno ãmeno đaibiya. Ʉ̃́vacari copʉ etabebiya majevʉre curãnʉivʉre. Pʉeno ãmeno đayʉ, náre copʉ etaicõjememiya ina curãnʉivʉre Jesúre jʉ aipõevacavʉ copʉ etaiyʉrivʉre náre. Pʉeno ãmeno đayʉ, ina curãnʉivʉre copʉ etaiyʉrivʉreca ecoicõjememiya Jesúre jʉ aipõeva ne cójijiñami jívʉi. Que đaibiya ñai Diótrefes.
11 Mʉ, ji yóvaimʉ, ji ʉmʉ, đabejacʉ mʉ nápe, ãmeina đaivʉpe. Quénora đajacʉ mʉ nápe, ména đaivʉpe. Ñai põecʉ ména đayʉ Jʉ̃menijicʉ jicʉbe ʉ̃. Ʉbenita ñai põecʉ ãmeina đayʉ coreóvabebi Jʉ̃menijicʉre. 12 Demetriocapũravʉ caivʉ ne me yávaimʉme. Ʉ̃́vacari cʉbi me ʉ̃i majié boje Jʉ̃menijicʉi yávaiyede jãvene. Ñʉja máre coyʉivʉbu ñʉje jã́iye báque boje aipe ʉ̃i mearo đaiyede. Aru majivʉ mʉ ñʉje yávaiyede jãvene.
Meaicõjeino
(2 Jn 12)
13 Apeno ʉrarõ coyʉinore coyʉiyʉvʉ mʉre. Ʉbenita yore toivaiyʉbevʉ yʉ. 14 1:14-15 Quénora napini coreivʉ yʉ jã́cʉdacʉyʉ mi yebai maumejiena, yávaburĩ maje baju ména. Cãrijimenoque cʉjacʉ mʉ. Caivʉ mi yóvaimara yócavʉ meaicõjeđama mʉre. Meajarari na, caivʉ ñʉje yóvaimara coapa nócavʉ. Quénoramu.