2 Timoteo
Aipe põeva ne đarãjino bʉojaquijãravʉa baquiyéde
3 Coreóvajacʉ mʉ iyede. Ãnijãravʉa bʉojaquijãravʉa baquiyéde, Cristoi copaidaquijãravʉ baquinó jipocai, põeva ãmena maiyójare đarãjarama apevʉre. 2 Yópe đarãjarama na, ina ãmena. Ne baju ʉrãjarama. Aru jecʉrãjarama tãutʉrare. Dápiarãjarama ne baju mearape apevʉ pʉeno. Arãjarama, “Mearamu ñʉja apevʉ pʉeno”. Aru ãmeina yávarãjarama. Jʉeđova jʉ abenajarama nébʉcʉvai coyʉiyede. Jíbenajarama torojʉede. Aru pueđabenajarama Jʉ̃menijicʉre máre. 3 Jecʉbenajarama névʉre. Aru cõmaje ãroje jã́menajarama apevʉre. Yávarãjarama borocʉede apevʉi borore. Oarĩ corebenajarama ne baju đaiyʉede. Jijecʉrãjarama. Aru ʉbenajarama caino mearore máre. 4 Jẽni jínajarama põevare ne mauvare. Aru đarãjarama ãrʉmevʉpe. Dápiarãjarama ne baju majidivʉpe caiyede apevʉ pʉeno. Jʉ̃menijicʉi ʉrõpe đabenajarama na. Aru cojʉbenajarama ʉ̃́re. Quénora đarãjarama cojʉrãjivʉ ne baju yópe ne baju ʉrõpe. 5 Apevʉ põeva ne jã́iyede náre đarãjarama yópe ina mearore jívʉ Jʉ̃menijicʉre đaiyepe. Ʉbenita Jʉ̃menijicʉre parʉre đaicõjemenajarama ne ũmene đarãjivʉ yópe ʉ̃i ʉrõpe.
Dupini nʉjacʉ mʉ nápe paivʉre jocarĩ. 6 Apevʉ nácavʉ dʉibajĩeneca ecoicõjene đaivʉbu náre apevʉ ne cʉ̃ramiai, jʉjovarãjivʉ nomiva ãrʉmevʉre. Ina nomiva, ne dápiaiye ãmeque đaiye boje, đaiyʉrivʉbu ãmenore ʉrarõ. 7 Cainʉmʉa jápiaivʉbu obedivʉ põeva ne bueiye mamaene. Ʉbenita ye bʉojabema coreóvaivʉ áđe yávaiyede jãvene. 8 Yópe ina yaviva bácavʉ ne ãmiá Janes aru Jambres ne maucʉvae báquepe Moisés bácʉre, nopedeca na máre, ina jʉjovaivʉ nomivare, maucʉvarivʉbu iye yávaiyede jãvene. Dápiaivʉbu ãmenore cainʉmʉa. Aru Jʉ̃menijicʉi jarʉvaimaramu na, ne jʉ abe boje iye yávaiyede jãvene. 9 Ʉbenita obedivʉ põeva coreóvarãjarama aipe ãrojarivʉre náre. Jã́rajarama náre ãrʉmevʉpe, yópe ne jã́iyepe ina pʉcarã Moisés bácʉi mauva mácavʉpe paivʉre.
Pablo ʉ̃i cõjeino yóbocarõ baju Timoteore
10 3:10-11 Ʉbenita mʉ́capũravʉ coreóvaivʉ aipe ji bueiye báquede, aru ji đaiye báquede, ji đaiyʉe báquede, ji jʉ aiye báquede Jʉ̃menijicʉre, ji napiye báquede, ji ʉe báquede põevare, aru ji ñájiye báquede máre. Mʉ coreóvaivʉ aipe ina Antioquía, Iconio, aru Listra ãmicʉriĩmaroacavʉ ne ñájine đaiye báquede yʉre. Ne ñájine đaiyedeca yʉre, cainʉmʉa napinejacacʉ yʉ. Aru maje jabocʉ Jesucristovacari meađarejame yʉre cainʉmʉa. 11 — 12 Jãve caivʉ ina meara maiyʉrivʉ Jʉ̃menijicʉi jã́inoi cʉrivʉ Jesucristoque cũinávʉpe ñájinajarama na. 13 Ʉbenita ina põeva ãmena aru ina jʉjovaivʉ máre pʉeno ãmena nʉrajarama na. Jʉjovarãjarama apevʉre. Aru náre máre jʉjovarãjarama pʉeno baju.
14 Ʉbenita mʉ́capũravʉ dajocabejacʉ mi jʉ aiyede caiye iye mi bueiye báquede. Majivʉ mʉ jãve diede. Que baru mʉ coreóvaivʉ ina mʉre bueivʉ bácavʉre iye yávaiyede jãvene. 15 Aru mʉ coreóvaivʉ jʉeđocʉ cãreja, caride máre, majicʉre iye Jʉ̃menijicʉi toivaicõjeiye báquede ʉ̃i yávaiyede, mi majiquiyepe ayʉ Jʉ̃menijicʉ meađacʉyʉre mʉre, mi jʉ aiye boje Jesucristore. 16 Caiye iye Jʉ̃menijicʉi yávaiyede ʉ̃́vacari toivare đarejaquemavʉ ina ʉ̃́re toivacaivʉ bácavʉre. Que baru ʉ̃i yávaiye bojecʉvʉ majare, maje buenajiyepe aiye iye yávaiyede jãvene, aru maje coreóvarãjiyepe aiye maje ãmeina teiyede, aru maje oatʉvarãjiyepe aiye maje đaiyede, aru maje majinajiyepe aiye aipe đaiye jaʉrõre, cʉrãjivʉ meara Jʉ̃menijicʉi jã́inore. 17 Ñai Jʉ̃menijicʉre memecayʉbe nópe đarĩ me majini, napini coreyʉ, đacʉyʉ caiye méne.