Onoded

WE GARDA sunmagnai ebbenne ibmar nabbira gusmaladgi. Sulegarnanaed garda, bamaladba bur biriginedgi, Bibliagi. Weg ibmar soglenanaidi beg ebbenne ibmar Nabbaneggi gusmaladgi sunmagnaid, gebe Babdummad ibmar obinyialid aggale geb anmar ibase. Ar anba beg sogbaloed ibu Babdummad yoogidse imaggedgi binsae.

We garda wis bibbi beg sunmagnai Bibliag ibmar soglenaidgi. Beg sunmagbali Bibliag dulemar obarilenanaidgi geb e ibmar imasmaladgi. Anba be odurdagbali, Babdummad sogsadgi dulemar sadegua Nabbaneg yeerdaglegedgi gudigumaloye.

We garda Bibliag sunmagnai. Degiidi, 116 mergunai. Sogbaabag mergu buraggwa buraggwa narmaggarnai. Buraggwanaid gebe onoded irbali wis bibbisaar beg sognai, ibug weg sunmaglegoe. Sunmaglenanaidi ibmar gusadbali ilemaggarnanai. We, be bendaggoe daggega, ibu inso gusa, geb sorba ibu ibmar gusbali.

Sunmaglenanaidi ibigwensur magiddollege narmaglegaled. Burwigan walagwena nabir absomaloed. Babgan dagdamaloe, burwigangala balibali absomalale, wemar yeeriddodae. We gardag narmaggarnai, nusganamar geb sergan ibmar wisgubidamaladi.

Sunmagnaid bergumaidba urbananaid biagi Bibliag sulegale. Nuedile be Bibliag absogedi we ibmar soglenaidi. Be sunmagnaid soggwen bela absosale, ibmar egislenanaid, aa gadi be dagbalo, ebinsaedse sao, ibu be durdasa. Sunmagnaid 116 sorbali, bergwable ibmar durdaggega egislenanaid narmaggarnaid.